Ina to sunga ku Mkristu e bhabhatiswa?

1, 2. a) Ngu tihi ati vaveleki va ti wotisako ngako mwanana wawe a txi khene a lava kubhabhatiswa? b) Awu a vekaku m’wombawombo wa va va yako kubhabhatiswani ngu kutxani a txi va wotisa ti to se va tiningetete ka Jehovha kani? (Wona mfota wu wu ku makhatoni.)

MARIA a emile e fola ni va va yako kubhabhatiswani, vaveleki vakwe va mu wonetela. Se m’wombawombi a va wotisile siwotiso simbidi. Maria a xamute ngu dipswi do pfala kwati. Msana keto a yite kubhabhatiswani.

² Vaveleki va Maria va tsakile ngutu aku mwanana wawe a nga ningetela wutomi wakwe ka Jehovha ni kutshumela e bhabhatiswa. Kambe na Maria a si se bhabhatiswa, mame wakwe a ti alakanyisisa. A ti wotisile: ‘Ina Maria se mbwa hombe ha ko za a nga bhabhatiswa? Ina ngu ditshuri wa ti pfisisa ti to kuningetela wutomi ka Jehovha hi nga msakano? Ina kha fanela kuemanyana?’ Vaveleki vo tala va va randako vanana vawe va tiwotisa siwotiso soneso ngako mwanana wawe a txi va gela ti to a lava kubhabhatiswa. (Ekleziyaste 5:5) Phela, kuningetela wutomi ka Jehovha ni kubhabhatiswa, njisungo txa lisima ngutu atxi hotshethu hi nga txi mahako.​—Wona dibhokiso di di ku “Ina se u tiningetete ka Jehovha?”

3, 4. a) Mpostoli Pedro a ti kombisisile kutxani ti to kubhabhatiswa nga lisima ngutu? b) Kubhabhatiswa kufana ni kuakwa ka ngalava ngu nzila yihi?

³ Mpostoli Pedro a fananisile bhabhatiso ni kuakwa ka ngalava. A ti khene: “Bhabhatiso, ayi yi dinganako toneto, konkuwa ya mi ponisa.”a (Wona txhamuselo ya hahatshi.) (Lera 1 Pedro 3:20, 21, NM.) Ngu kuaka ngalava, vamwani va ti woni ti to Nowa a ti lava kumaha kudhunda ka Txizimu ngu mbilu yotshe. Ngu kuthembeka Nowa a mahile mthumo wu Jehovha a nga m’ninga. Se ngu mhaka ya likholo lakwe, Jehovha a ponisile Nowa ni mwaya wakwe ka Ndambi. Se, mapswi a Pedro ma hi gondisa txani?

⁴ Mbimo yi vathu va nga ti wona ngalava, va tizivile ti to Nowa a ti ni likholo ka Txizimu. Ngu toneto, ngako vathu va txi wona mmwani a txi bhabhatiswa, va tiziva ti to a ningetete wutomi wakwe ka Jehovha nguko a ku ni likholo ka Jesu. Kufana ni Nowa, ava va bhabhatiswako, va engisa Txizimu ni kumaha mthumo wu txi nga va ninga. Se, ngako Jehovha a nga ponisa Nowa, a na tshumela e ponisa malanda akwe o thembeka aya ma nga bhabhatiswa mbimo yi a lovisako mafu awa o biha. (Marku 13:10; Mtuletelo 7:9, 10) Wa ti wona ti to ti ni lisima kuningetela wutomi ka Jehovha ni kubhabhatiswa? Ti ha kubasani, ngako m’thu a txi swela kubhabhatiswa, a nga thuka e luza ni wutomi wo mbi guma.

5. Ngu sihi siwotiso asi hi no bhula ngu sona?

⁵ Konkuwa se ha tiziva ti to ngu lihi lisima lo bhabhatiswa, kambe se hi lava kuziva tixamulo ta siwotiso siya: Bhiblia yi womba txani ngu bhabhatiso? M’thu a fanete e maha txani na a si se bhabhatiswa? Ngu kutxani hi di fanete kukhumbula lisima la bhabhatiso mbimo yi hi gondisako vanana vathu mwendo sigondo sathu sa Bhiblia?

BHIBLIA YI GONDISA TXANI NGU BHABHATISO

6, 7. a) Bhabhatiso ya Johani yi ti womba txani? b) Ngu yihi bhabhatiso yi yi nga ti hambana ni timwani? Ngu kutxani?

⁶ Bhiblia yi kombisa ti to m’thu wo khata kubhabhatisa vamwani i Johani M’bhabhatisi. (Matewu 3:1-6) Ngu kutxani vathu va nga txi ya ka Johani ti to ve ya bhabhatiswa? Va ti kombisa ti to va hundukile ka sionho sawe, i ku ti to, vona va ti tumela ti to va ndakile Mlayo wa Mosi ni ku va ti tisola ngutu. Kambe ku ni wu Johani a nga m’bhabhatisa ngu txivangelo txo hambana ngutu ni txonetxo. Johani a ve ni lungelo yo bhabhatisa Jesu, Mwanana wo hetiseka wa Txizimu. (Matewu 3:13-17) Phela Jesu a si khali kuonha. Ngu toneto, nem ti si lavi e tisola ka txilo. (1 Pedro 2:22) Se a ti bhabhatiselwa txani? Ti to e kombisa to a ti tiemisete kuthumisa wutomi wakwe ti to e maha kudhunda ka Txizimu.​—Vahebheru 10:7.

⁷ Msana ko Jesu e khata kutxhumayela, vagondiswa vakwe va khatile kubhabhatisa vamwani. (Johani 3:22; 4:1, 2) Vathu vonevo ni vona va ti bhabhatiswa nguko se va nga ti tisote ka sionho sawe ngu kuya ngu Mlayo wa Mosi. Kambe msana ka kuva Jesu a di fite e tshumela e wuka, ava va nga ti lava kuva vagondiswa vakwe se va ti bhabhatiswa ngu txivangelo tximwani.

8. a) Mbimo yi Jesu a nga wuka ka vakufa, ngu txihi txirumo atxi a nga ninga vangondiswa vakwe? b) Ti to Mkristu e bhabhatiswa a fanete e tumela txani?

⁸ Ngu dilembe da 33, neti Jesu a nga wuswa a ti ya womba-womba ni vathu vo pinda 500, vavamna ni vavasikati, ti nga maha ku ti ni vanana. Ti nga maha i di mbimo yi a nga khene: “Ngu toneto tsulani mi txi ya phindula vamatiko votshe ve maha vagondiswa vangu, mi va bhabhatisa ngu ditina da Tate ni da Mwanana ni da Moya wo Sawuleka, mi txi va gondisa kuvekisa totshe tiya ni nga mi leleta tona.” (Matewu 28:19, 20; 1 Vakorinto 15:6) Jesu a rumile valondeteli vakwe ti to ve maha vathu ve va vagondiswa. Wuhi ni wuhi awu a lavako kuva m’gondiswa wakwe, mwendo kuteka “mpakato” wakwe a ti fanete e bhabhatiswa. (Matewu 11:29, 30) Ti to m’thu e thumela Txizimu ngu nzila yi Txi yi tsakelako, a fanete e tumela ti to Txizimu txi thumisa Jesu ti to txi hetisisa sikongomelo sa txona. Eho ngu kona m’thu a nga si kotako kubhabhatiswa a txi amukeleka ka Txizimu. Bhiblia yi ti kombisa kwati ti to vagondiswa va kale va Jesu va ti li ziva lisima lo bhabhatiswa. Vona kha va pimisa kuemanyana, ve ta bhabhatiswa mbimo yi yi tako.​—Mithumo 2:41; 8:12; 16:14, 15, 32, 33.

U NGA THINDEKISELI KUBHABHATISWA

9, 10. Hi gonda txani ka bhabhatiso ya Muetiyopiya ni ya Sawule?

⁹ Lera Mithumo 8:35, 36. Bhiblia yi womba ti to ku ti ni dijaha dimwani da Muetiyopiya adi di nga ti amukete tigondo ta Txijudha. Se ditshiku dimwani di txi wuya ngu dithepeleni, ngelozi ya Jehovha yi rumile Filipi ti to e ya di gondisa “Evhangeli ya Jesu.” Muetiyopiya a ti khene txani? A ti woni ti to nda lisima kukholwa ka Mkoma Jesu, se a lavile kumaha ati Jehovha a ti lavako ka Makristu. Kha veketela, a bhabhatisilwe.

¹⁰ Mmwani i Sawule wu i nga ti Mjudha. Kale kule Vajudha votshe va ti tiningetete ka Txizimu, kambe se txi ti va tshuralete nguko vona va ti si txiengisi. Se aku Sawule a nga ti ngadi a txi kholwa ti to Majudha ma tsakelwa ngu Txizimu, a ti xanisa Makristu. Phela Sawule a ti pimisa ku Jesu a fite, kambe ditshiku dimwani, Jesu apuni a di nzumani, a womba-wombile ni Sawule. Sawule a mahile txani? Ngu ku titsakela a tumete kuvhunwa ngu Mkristu wu a nga txi dhanwa ku i Ananiya. Bhiblia yi khene: “[A to wuka e ya bhabhatiswa, NM].” (Mithumo 9:17, 18; Vagalatiya 1:14) Msana keto a ti ziwa ti to i mpostoli Paulo. Wona taku, neti a nga tipfisisa ti to Txizimu txi thumisa Jesu ti to txi hetisisa sikongomelo sa Txona, na a si sweli a to bhabhatiswa.​—Lera Mithumo 22:12-16.

11. a) Nji txani txi mahako ti to ava vagondako Bhiblia ve bhabhatiswa? b) Hi tipfisa kutxani hi txi wona m’thu a txi bhabhatiswa?

¹¹ Ni nyamsi, kuhumelela to fana ngu vathu va vagondako Bhiblia, vahombe ni va vadotho. Aku va dhundako ni kuthemba ati Bhiblia yi ti wombako, va tiemisete kuningetela wutomi wawe ka Jehovha ni kubhabhatiswa. Ngu ditshuri, hi di ka mtshangano wa hombe, m’womba-wombo wa bhabhatiso i mbimo yo sawuleka. Tifakazi ta Jehovha ta tsaka mbimo yi ava va gondako Bhiblia va ningetelako wutomi wawe ni kubhabhatiswa. Vaveleki ni vona va tsaka va txi wona vanana vawe va txi maha toneto ni vona. Ka dilembe da mthumo da 2017, kubhabhatisilwe vathu va va pindako 284.000. (Mithumo 13:48) Ti ha kubasani ti to va tipfisisile ti to Makristu ma fanete me bhabhatiswa. Kambe, na va si se bhabhatiswa, ti lavile ve maha txani?

12. Awu a gondako Bhiblia ti lava e maha txani na a si se bhabhatiswa?

¹² Na a si se bhabhatiswa, awu a gondako Bhiblia ti lava e gonda ditshuri mayelano ni Txizimu, makungo a txona ngu vathu ni ti txi nga ti maha ti to txi ponisa vathu. (1 Timoti 2:3-6) Ti lava e kulisa likholo, ali li no m’vhuna kuengisa milayo ya Txizimu ni kuleka kumaha ati txi ti nyenyako. (Mithumo 3:19) Eto ti ni lisima nguko Jehovha a na mbi amukela kutiningetela ka m’thu wu a ku ngadi a txi maha to biha. (1 Vakorinto 6:9, 10) Kambe ku ngadi ni timwani. Ava va lavako kuningetela wutomi wawe ka Jehovha mbimo yotshe va fanete ve ya mitshanganoni ni kutxhumayela mahungu a manene. Eto ta laveka ka wuhi ni wuhi wu a lavako kulondetela Jesu. (Mithumo 1:8) M’thu wu a gondako Bhiblia a fanete kumaha totsheleleto. Se a nga ningetela wutomi wakwe ka Jehovha ngu mkombelo a di ekha, ngu magwito a nga kombisa kutiningetela kwakwe ngu kubhabhatiswa.

VHUNA TXIGONDO TXAKO TXI TSAKELA KUBHABHATISWA

13. Ngu kutxani hi di fanete kukhumbula ti to vanana ni sigondo sathu va fanete ve bhabhatiswa?

¹³ Hi fanete hi vhuna vanana vathu ni sigondo sathu ti to si maha ati ti lavekako. Kambe hi fanete hi khumbula ti to vanana ni sigondo sathu va fanete ve bhabhatiswa nguko va nge sikoti kuva valondeteli va Jesu na va sa bhabhatiswa. Se hi na mbi thava ku tana hi va gela lisima lo tiningetela ni kubhabhatiswa. Hi lava ti to vanana vathu ni sigondo sathu si kula ngu didhawa da moya ni kubhabhatiswa!

14. Ngu kutxani hi sa fanela kusinzisa vamwani ti to ve bhabhatiswa?

¹⁴ Ditshuri ngu diya: Kha ngaho a ku ni fanelo yo kuzetela mwendo kusinzisa mwanana mwendo txigondo ti to txi bhabhatiswa. Jehovha kha hi sinzisi ti to hi mu thumela. (1 Johani 4:8) Mbimo yi hi gondisako vamwani, txathu ngu va vhuna ve pfisisa lisima lo va mngana wa Jehovha. Se, ngako va txi tsaka ngu ditshuri da Txizimu, na va di tiemisete kuva Mkristu wa ditshuri, vona vapuni va na lava kubhabhatiswa.​—2 Vakorinto 5:14, 15.

15, 16. a) Ngu yihi tanga ayi m’thu a bhabhatiswako a di ka yona? Txhamusela. b) Ngu kutxani m’thu wu se a nga bhabhatiswa ka titxhetxhe timwani adi fanete e tshumela e bhabhatiswa kota Fakazi ya Jehovha?

¹⁵ Yi walo tanga ayi yi nga vekwa ayi m’thu a fanelako e bhabhatiswa adi ka yona. Hotshethu hi hambanile, se ni makulelo ya sigondo ni ona ma hambani. Vamwani va bhabhatiswa i di ngadi vaphya, va tshumela ve simama ve thembeka mbimo yi va kulako. Kasi vamwani va tsakela ditshuri se i di va hombe. Phela vamwani va bhabhatisilwe va di ni 100 wa malembe mwendo kupinda!

¹⁶ Wamsikati mmwani awu a nga ti gonda Bhiblia se a ti bhabhatisilwe ka titxhetxhe timwani. Se a wotisile mwanathu wu a nga ti mu gondela ti to ina ti lava e tshumela e bhabhatiswa kambe kani. Mwanathu eneyo a mu xamute ngu kuthumisa mibhalo. Se mbimo yi a nga pfisisa ati Bhiblia yi wombako tona, a to kuluveta e bhabhatiswa hambiku se a nga ti ni konamu ka 80 wa malembe. Hi gonda txani ka txikombiso txiya? Jehovha a no amukela kubhabhatiswa kwathu ngako hi txi ziva ditshuri ngu ngene. Se hambi hi di bhabhatisilwe ka titxhetxhe timwani, ta laveka hi bhabhatiswa kota Tifakazi ta Jehovha.​—Lera Mithumo 19:3-5.

17. M’thu a fanete e alakanyisisa ngu txani ka ditshiku da kubhabhatiswa kwakwe?

¹⁷ Ditshiku di m’thu a bhabhatiswako ngu dona da tsakisa ngutu. I mbimo yo alakanyisisa ngu ti kutiningetela ni kubhabhatitiswa ti wombako tona. Kumaha ti ti lavekako ka Mkristu hi nga kudya m’baba. Vagondiswa va Jesu kha ‘va swi va txi ti hanyela vona ngu txawe, aniko va hanyela awule a nga va fela, a txi tshumela e wuka ka vakufa ngu kota yawe.’​—2 Vakorinto 5:15; Matewu 16:24.

18. Ngu sihi siwotiso asi hi no ta bhula ngu sona ka msungo wu wu tako?

¹⁸ Nga ha hi nga gonda ngu kona ka msungo wuwa, txisungo txo va Mkristu hi nga msakano. Ngu toneto ti nga maha ti to mame wa Maria e ti wotisa siwotiso si hi nga si wona makhatoni. Ngako u di m’veleki, ti nga maha u txi khala kutiwotisa tiya: ‘Ina ngu ditshuri mwanana wangu a tiemisete kubhabhatiswa? Ina se wa m’ziva kwati Jehovha ha koza a nga tiningetela kwakwe? Ina a fanete e khata ngu kuya ka sikolwa sa hombe ni kumana mthumo wa wunene i di kona a no bhabhatiswa? Se ti na txani ngako a txi bhabhatiswa e gwita e maha txionho txa hombe?’ Siwotiso soneso hi na ta bhula ngu sona ka msungo wu wu tako. Hi na ta tshumela hi wona ti to vaveleki va nga va ni mawonelo a manene ngu bhabhatiso ngu nzila yihi.