Ina mwanana wako a na gwitisa kubhabhatiswa?

1. Ngu tihi ati vaveleki va va nga txhariha va lavako kutsaniseka ka tona na mwanana wawe a si se bhabhatiswa?

“SE KU ti ni mitxima yo tala ni txi zumbela kugela tate ni mami ti to ni ti la kubhabhatiswa. Se vona va ti zumbela kubhula ni nani ngu toneto. Va ti la kutsaniseka ti to ani na liziva lisima lo bhabhatiswa kani. Hambiketo, ngu 31 ka Dezembro wa 1934 kuve ditshiku da lisima ka wutomi wangu, nguko ni bhabhatisilwe.” Atiya ti humelete Blossom Brandt mbimo yi a nga lava kubhabhatiswa. Ni nyamsi, vaveleki va lava kuvhuna vanana vawe ve maha sisungo sa wutxhari. Ngako mwanana wawe a txi leka kubhabhatiswa na ku singa ni txivangelo txo pfala, ti nga dayisa wuxaka wa mwanana ni Jehovha. (Jakobe 4:17) Vaveleki va va nga txhariha va lava kutsaniseka ti to mwanana wawe ngu ditshuri se a tiemisete kuva m’gondiswa wa Jesu na a si se bhabhatiswa.

2. a) Ngu tihi ati ti nga wonwa ngu vawoneleli vamwani va sigava? b) Hi na bhula ngu txani ka msungo wuwa?

² Vawoneleli vamwani va sigava va woni ti to vaphya vamwani i ku vanana va Tifakazi, va hoka konamu ka 20 wa malembe na va si se bhabhatiswa. Ati ti nga toloveleka ngu ti to vaphya vonevo, va ya mitshanganoni ni thembweni, futhi va tigela ku ndifakazi ta Jehovha. Hambiketo, vona kha va se tiningetela ka Jehovha ni kubhabhatiswa. Mbimo yimwani ti vangwa nguko vaveleki vawe va pimisako ti to va nge bhabhatiswi nguko i ngadi vanana. Ngu toneto, ka msungo wuwa hi na bhula ngu sivangelo sa muni asi si mahako ti to vaveleki va si vhuni vanana vawe ti to ve bhabhatiswa.

INA MWANANA WANGU A KA TANGA YO BHABHATISWA?

3. Vaveleki va Blossom va ti alakanyisisa ngu txani?

³ Vaveleki va Blossom ava va nga wombwa ka ndimana yo khata, va ti alakanyisisa ngu ti to ina mwanana wawe wa tipfisisa ati kubhabhatiswa ti wombako tona, mwendo i ngadi mwanana. Vaveleki va nga tizivisa kutxani ti to mwanana wawe se a tiemisete kutiningetela ka Jehovha?

4. Txirumo txa Jesu ka Matewu 28:19, 20 txi nga va vhunisa kutxani vaveleki nyamsi wa ditshiku?

⁴ Lera Matewu 28:19, 20. Bhiblia kha yi wombi ti to m’thu a fanete e bhabhatiswa adi ni malembe mangahi. Kambe vaveleki va fanete ve alakanyisisa kwati ngu ti kumaha vagondiswa tiwombako tona. Ngu Txigriki, dipswi di di ku “maha vagondiswa” adi di nga thumiswa ka Matewu 28:19 di womba kugondisa mmwani ngu txikongomelo txo m’vhuna ti to e va txigondo mwendo m’gondiswa. M’gondiswa i m’thu wu a gondako e pfisisa ati Jesu a nga ti gondisa ni kulava ku mu engisa. Se, kukhukhela mbimo yi va ku ngadi va txi mama, vaveleki va fanete kugondisa vanana vawe ngu txikongomelo txa ti to ve tiningetela ka Jehovha ni kumaha vagondiswa va Kristu. Kambe, vanana vo mama va nge bhabhatiswi. Hambiketo, Bhiblia yi kombisa ti to vanana va vadotho va nga pfisisa ni kudhunda ditshuri da Bhiblia.

5, 6. a) Ati Bhiblia yi ti wombako ngu Timoti ti hi gondisa txani ngu bhabhatiso? b) Ti to vaveleki ve kota kuvhuna vanana vawe, va nga tiwotisa txani?

⁵ M’gondiswa Timoti a ti tiemisete kuthumela Jehovha i di ngadi m’phya. Mpostoli Paulo a wombile ti to Timoti a khatile kugonda ditshuri da Dipswi da Txizimu “kukhukhela ha wuwananani” kwakwe. Timoti a vhunwi ngu mame wakwe ni kokwani wakwe kudhunda Dipswi da Txizimu nguko tate wakwe a si thumeli Jehovha. Eto ti m’vhuni ti to e va ni likholo lo tsana. (2 Timoti 1:5; 3:14, 15) Timoti ti nga maha a ti ni konamu ka 20 wa malembe, ene a ti faneleka kuamukela siavelo so sawuleka dibanzani.​—Mithumo 16:1-3.

⁶ Vanana kha va fani. Hi nga votshe va no pfisisa va di ka tanga yo kari. Vamwani va sikota kupfisisa ditshuri, ve maha sisungo sa sinene ni kulava kubhabhatiswa i di ngadi vadotho. Vamwani va nga lava kubhabhatiswa se i di va hombiyana. Vaveleki vo txhariha kha va sinzisi vanana vawe kubhabhatiswa. Hahanze keto, va vhuna vanana vawe ti to ve kula ngu didhawa da moya vona vapuni. Vaveleki va tsaka ngako vanana vawe va txi thumisa Mavingo 27:11. (Yi lere.) Kambe va fanete ve khumbula ti to txikongomelo txawe ngu vhuna vanana ve va vagondiswa. Va txi khumbula toneto va fanete ve tiwotisa tiya: ‘Ina mwanana wangu se a nawo wuzivi wu wu lavekako ti to e tiningetela ka Txizimu ni kubhabhatiswa?’

INA MWANANA WANGU A NI WUZIVI WU WU LAVEKAKO?

7. Ina m’thu a fanete e ziva Bhiblia yotshe na asi se bhabhatiswa? Txhamusela.

⁷ Vaveleki kha va fanela kuziva ditshuri ngu titshoka, nguko va fanete ve gondisa vanana vawe. Wuzivi wuwa wu na va susumetela kutiningetela ka Txizimu. Kambe eto kha ti wombi ti to mwanana a fanete kuziva Bhiblia yotshe ngu msungo, se i di kona a bhabhatiswako. Vagondiswa votshe va Kristu va fanete ve simama ve gonda hambi se va di bhabhatisilwe. (Lera Vakolosa 1:9, 10.) Kambe, ngu tihi ati m’thu a fanelako e ti ziva na a si se bhabhatiswa?

8, 9. Kuhumelete txani ngu muwoneleti wa jele? Hi gonda txani ka mhaka yakwe?

⁸ Ati ti nga humelela mwaya wumwani ngu mbimo ya vapostoli ti nga vhuna vaveleki nyamsi wa ditshiku. (Mithumo 16:25-33) Ngu dilembe da 50, mpostoli Paulo a endete didhoropa da Filipiya ngu dikhambi da wumbidi. Mbimo yi va nga hoka, ene ni Silasi va hembetwe makuhu ve za ve ñolwa ve betwa jele. Ni wusiko ka kona, ku ve ni kuzinginikela ka hombe ka mafu ha ko za kutuleka ni matimba a jele. Aku muwoneleti wa jele a nga ti pimisa ti to sibotxhwa sotshe si humile, a ti lava ku tisunga. Kambe Paulo a mu lamulete. Se Paulo ni Silasi va gwitile ve gondisa dijaha dile ni mwaya wa dona ngu ta Jesu. Vona va khotwe ka Jesu, ve wona lisima lo mu engisa. Va bhabhatisilwe ngu mbimo yoneyo. Mhaka yiya yi hi gondisa txani?

⁹ Ti nga maha muwoneleti wa jele i ti disotxhwa da Muroma adi se di nga wuya ngu wusotxhwani. A si di zivi Dipswi da Txizimu. Se, ti to e va Mkristu a ti fanete e ziva tigondo ta makhato ta ditshuri da mu ka Bhiblia. E pfisisa ati Jehovha a ti lavako ka malanda akwe ni kulava kuengisa tigondo ta Jesu. Se, ati a nga gonda ku mbimo yoneyo ya yidotho, ti m’vhuni ti to e bhabhatiswa. Phela, a ndina simama e gonda to tala se a di bhabhatisilwe. Se u nga maha txani ngako mwanana wako a txi kugela ti to a lava kubhabhatiswa nguko a randako Jehovha ni kulava ku mu engisa? U nga mu leka e ya womba-womba ni madhota ti to ve wona i di ti to wa faneleka.a (Wona txhamuselo ya hahatshi.) Kufana ni Makristu otshe aya ma nga bhabhatiswa, ene a na simama e gonda to tala ngu Jehovha ngu ha ku singako ni magwito.​—Varoma 11:33, 34.

NGU TIHI ATI TI NO VHUNA MWANANA WANGU?

10, 11. a) Ngu tihi ati vaveleki vamwani va alakanyako tona? b) Nji txani txi no vhikela mwanana?

¹⁰ Vaveleki vamwani va alakanya ti to i nga va tinene ku vanana vawe ve thanga ngu kuheta txikolwa ni kumana mthumo wa wunene i di kona va bhabhatiswako. Vaveleki vonevo, va ni minavelo ya yinene, kambe va ndina tiwotisa tiya: ‘Ina atiya ti na maha ti to mwanana wangu e humelela? Ngu tonti hi gondako ka Bhiblia? Jehovha a lava hi wu thumisisa kutxani wutomi wathu?’—Lera Ekleziyaste 12:1.

¹¹ U nga divali ti to mafu awa ni silo sa kona, si lwisana ni ti Jehovha a ti lavako ni kutipimisa. (Jakobe 4:7, 8; 1 Johani 2:15-17; 5:19) Se nji txani atxi txi nga vhikelako mwanana ka Sathani, mafu awa ni mapimiselo a ona o biha? A nga vhikelwa ngu wuxaka wo tsana ni Jehovha. Ngako vaveleki va txi thangetisa txikolwa ni mthumo ka wutomi, mwanana wawe a na kholwa ti to silo sa ditiko diya nza lisima kupinda wuxaka ni Jehovha. Yoneyo i phango ya hombe. Aku mi dhundako mwanana wanu, ina mi lava ti to mafu awa me mu gondisa ti to ma na m’ninga litsako? Nzila yimweyo dwe yo mana wutomi wo tsakisa ngu thangetisa Jehovha ka wutomi wathu.​—Lera Masalmo 1:2, 3.

SE A TXO THUKA E MAHA TXIONHO KO?

12. Ngu kutxani vaveleki vamwani va txi alakanya ku i tshuku kuleka mwanana e kula e maha wa hombe a si se bhabhatiswa?

¹² Mame mmwani a womba ti to ngu kutxani a nga ti si lavi ti to txihoranana txakwe txi bhabhatiswa. A ti khene: “Ti tshumela ti dhanisa kuwomba ti to ni ti thava ti to a nga thuka e thaviswa dibanzani.” Kufana ni mwanathu wuwa, vaveleki vo tala va khona i tshuku kuleka mwanana e kula e maha wa hombe ti to a si mahi sionho. (Genesisi 8:21; Mavingu 22:15) Vaveleki vonevo va alakanya ti to ngako mwanana wawe a sa bhabhatiswa, a nge thaviswi dibanzani. Kambe vo phazama. Ngu kutxani?—Jakobe 1:22.

13. Ngako m’thu a sa bhabhatiswa, ina a nge tixamuleli ka Jehovha? Txhamusela.

¹³ Ditshuri ti to, vaveleki va nge leki mwanana e bhabhatiswa na a si si lungekela kuningetela wutomi wakwe ka Jehovha. Kambe i phazamu kualakanya ti to ngako mwanana a sa bhabhatiswa, a nge tixamuleli ka Jehovha. Ngu kutxani? Nguko neti mwanana e ziva ati Jehovha a wombako ti to ti bihile a nga tixamulela ka Jehovha. (Lera Jakobe 4:17.) Vavekeki va va nga txhariha kha va tsiveli vanana vawe kubhabhatiswa. Hambi mwanana i ti ngadi m’dotho, vona va m’gondisa kuranda ati i ku ta tinene ka Jehovha ni kunyenya ati Ene a ku khene tibihile, nga ti vona va mahisako tona. (Luka 6:40) Se lirando ali vanana va ku nalo ngu Jehovha li na va vhikela ti to va si mahi sionho sa hombe, nguko va na lava kumaha ati Jehovha a ku khene ndinene.​—Isaya 35:8.

TXIVHUNO TXA VAMWANI

14. Madhota ma nga seketela ngu nzila yihi ati vaveleki va ti mahako?

¹⁴ Madhota ma nga seketela ati vaveleki va ti mahako ngu kuwomba-womba ngu nzila ya yinene ngu kutivekela makungo a mthumo wa Jehovha. Mwanathu mmwani a khumbute ati mwanathu Russel a nga ti womba ene a di ni 6 wa malembe. A khene: “Hi hetile 15 wa timeneti hi txi bhula ngu makungo angu a timhaka ta moya.” Kuve ni wuyelo yihi? Mwanathu wule a gwitile e va nyaphandule kupinda 70 wa malembe! Mapswi a manene ma nga gwesa m’thu wutomi wakwe wotshe. (Mavingo 25:11) Madhota ma nga tshumela me ramba vaveleki ni vanana ti to ve ta vhuneta ka mithumo yo kari Nyumbani ya Mfumo. Va nga ninga vanana mithumo ngu kuya ngu tanga ni wusikoti wawe.

15. Vamwani dibanzani va nga va vhunisa kutxani vaphya?

¹⁵ Vamwani dibanzani va nga va vhunisa kutxani vaphya? Ngu kuva komba ti to va khatala ngu vona. Ngu txikombiso, u nga zama kuwona ta tinene ati vaphya va ti mahako. Ti nga maha hi txi va wona va txi ningela tixamulo ta tinene mitshanganoni, ve va ni sienge ka mtshangano wa hagari ka divhiki, hi ziva ti to va txhumayela vagondi kulowe mwendo va lambile kumaha to biha. Ti di ngeto, hi nga va ndunduzela! Hi nga tivekela makungo o bhula ni vaphya mbimo yi hi hokako Nyumbani ya Mfumo ni loko mitshangano yi txi guma. Hi txi maha toneto, vaphya va na tipfa i di siro sa “msengeletano” ni vona.—Masalmo 35:18.

VHUNA MWANANA WAKO E BHABHATISWA

16, 17. a) Ngu lihi lisima lo mwanana e bhabhatiswa? b) Ngu lihi litsako ali vaveleki va nga li manako? (Wona mfota wu wu ku makhatoni.)

¹⁶ Vaveleki va ni lungelo ya hombe yo vhuna vanana vawe ti to ve randa Jehovha. (Masalmo 127:3; Vaefesu 6:4) Ka ditiko da kale da Israyeli, vanana va ti ningelwa ka Jehovha va di ngadi kuvelekwa. Konkuwa eto kha ti swi ti txi thuma. Kuranda Jehovha kha va mami ka tshumbu ya mame. Se, kukhukhela ka ditshiku di mwanana a velekwako ngu dona, vaveleki va fanete ve tiemisela ku m’vhuna ti to e va m’gondiswa, e tiningetela ka Txizimu ni kubhabhatiswa. Tiwalo timwani ta lisima kupala toneto! Phela ati ti no hulukisa m’thu ka xanisa ya hombe, ngu tiningetela kwakwe, kubhabhatiswa ni mthumo wakwe wo thembeka ka Jehovha.​—Matewu 24:13.

¹⁷ Mbimo yi Blossom Brandt a nga lava kubhabhatiswa, vaveleki vakwe va ti lava kutsaniseka ti to se a tiemisete kani. Mbimo yi va nga wona ti to a tiemisete, va seketete txisungo txakwe. Blossom a txhamusela ati tate wakwe a nga maha wusiku wule mangwana ka kona a nga ti na bhabhatiswa. A khene: “Tate a ti khene hotshethu he khizameni se ene e maha mkombelo. A gete Jehovha ti to wa tsaka ngu txisungo txa mwanana wawe txo ningetela wutomi Kwakwe.” Ku di pindile 60 wa malembe Blossom a khene: “Hambi ni txo kumba, kha ni na mbi divala wusiku wule!” Anu vaveleki, nanu mi nga va ni litsako mi txi wona vanana vanu ve tiningetela ni kubhabhatiswa ve va malanda a Jehovha.