Vana m’thu wo eneliseka

1. Ti womba txani kuva m’thu wo eneliseka?

INA awe wa eneliseka ngu si u kunaso? M’thu wu a zivako kueneliseka wa mana litsako ni kurula nguku a veka mapimo kasi a ku naso konku. Ene kha karateki ngu si a singa kunaso. Hambiketo, kuva vathu vo eneliseka kha ti lavi kuwomba ti to kha hi na mbi khatala ngu nzila yi hi hanyako ngu yona. Ngu txikombiso, Mkristu a nga lavetela mikhanju yo engetela mthumo wakwe ka Jehovha. (Var. 12:1; 1 Tim. 3:1) Kambe m’thu wu a zivako kueneliseka kha na mbi gumelwa ngu litsako ngaku a txi swela kumana malungelo aya a nga ti ma emete.

2. Ngu kutxani ti di bihile kwambi eneliseka?

² Ngaku hi si eneliseki ngu si hi kunaso, hi nga khata kumaha sisungo sa walo. Ngu txikombiso, m’thu wo kha eneliseki a nga thuma yi si txhayi kasi kumana male yo xava silo so nem hi nga txilaveko. Txo mbi tsakisa ngu ti to Makristu mamwani ma hokela ha kopa male mwendo silo simwani asi va si lavako. Vona va nga ti gela tiya: ‘Sa ni fanela siya,’ ‘i kale ni txi silava siya’ mwendo ku ‘ni na tshumeta male yiya.’ Kambe kupa ti bihile ngutu masoni ka Jehovha. (Mav. 30:9) Vamwani va godhola ngu kwambi amukela malungelo aya va nga txi ma lava aha koza ve leka kuthumela Jehovha. (Vag. 6:9) Phela eto ti nga humelela ngaku Mkristu a txi leka kusakulela kuva m’thu wo eneliseka.

3. Ngu yihi gondo ya lisima ayi hi yi gondako ka Vafilipiya 4:11, 12?

³ Hotsethu hi fanete kusakulela kuva vathu vo ziva kueneliseka. Mpostoli Paulo a bhate ti to ene ati ‘gondile kutsaka ngu tihi ni tihi ati a manekako adi ka tona.’ (Lera Vafilipiya 4:11, 12.) Paulo a bhate mapswi yawa mbimo yi a nga ti jele, kambe ene kha luza litsako nguku a ti “gondile” kuva m’thu wo eneliseka. Txiperiyensiya ni mapswi ya Paulo sa hi tsanisekisa ti to nathu hi nga sikota kusakulela kuva vathu vo eneliseka. Kambe khaha velekwa hi di vathu vo ziva kueneliseka. Ngu toneto, hi fanete ku kusakulela. Hi nga ti mahisa kutxani toneto? Hi na wona tifanelo ati ti no hi vhuna kusakulela kuva vathu vo eneliseka.

SAKULELA KUVA M’THU WO ZIVA KUBONGA

4. Kuva vathu vo ziva kubonga, ti nga hi vhunisa kutxani ku hi va vo eneliseka? (1 Vatesalonika 5:18)

⁴ Kuva vathu vo ziva kubonga ti na hi vhuna ku hi va vo eneliseka. (Lera 1 Vatesalonika 5:18.) Ngu txikombiso, ngaku hi txi bonga asi hi kunaso, hi na mbi karateka ngu silo si hi si lavako kambe hi tandekako ku si mana. I singa eto dwe, ngaku hi txi bonga malungelo ya hi kunawo ka sengeletano, hi na maha totshe ti hi nga ti kotako kasiku hi txhukwatisa ka txiavelo txi hi kunatxo hahanze ko lavetela malungelo mamwani. Ta pfala aku Bhiblia yi hi kuzetako ti to hi bonga Jehovha ka mikombelo yathu! Kuva vathu vo ziva kubonga ti na hi vhuna kupfa “kuthutha ka Txizimu, kupindako wotshe wuzivi.”—Vaf. 4:6, 7.

5. Ngu sihi sivangelo asi Vaisrayeli va nga ti naso so ve bonga Jehovha? (Wona ni mfota.)

⁵ Wona ti ti nga mahekela Vaisrayeli. Makhambi amangi vona va txi ngungurukela ngu kulava sakudya asi va nga ti ti dya Egipta. (Mit. 11:4-6) Ditshuri ti to wutomi wu si va hehukeli khe txiwulani. Kambe nji txani atxi txi ndi no va vhuna kusakulela ku va vathu vo eneliseka? Va ti fanete kubonga Jehovha ngu totshe ti a nga ti va mahete. Mbimo yi va nga txi xaniswa kota sibotxhwa khe Egipta, Jehovha a tisile 10 wa mitungu kasi kuva khulula. Msana kova va di khulutwe, vona “va handile ka Vaegipta” prata, oru ni siambalo. (Eks. 12:35, 36) Mbimo yi Vaegipta va nga londisa Vaisrayeli kala ka Linene lo Bhilivila, Jehovha a mahile txidiwukiso txo abanisa mati ya linene. Se mbimo yi va nga ti txiwulani, ditshiku ni ditshiku Jehovha a txi va ninga manna kasiku vedya. Se i ti txihi txikarato? Vona va si bongi asi Jehovha a nga ti va ningile.

6. Nji txani txi txi no hi vhuna kuva vathu vo ziva kubonga?

⁶ U nga sakulelisa kutxani kuva m’thu wo ziva kubonga? Kukhata, tihe mbimo ditshiku ni ditshiku yo alakanyisisa ngu silo sa sinene asi si kutsakisako. Bhala silo simbidi mwendo siraru asi si kumahako u bonga. (Sid. 3:22, 23) Txa wumbidi, tsaniseka ti to wa va bonga vathu mbimo yi va kumahelako to kari, ni ku txa lisima ka sotshe bonga Jehovha ditshiku ni ditshiku. (Mas. 75:1) Txa wuraru, sawula vangana ava va zivako kubonga. Ngaku vangana vathu va txi ziva kubonga, va na hi kuzeta ku nathu hi va vathu vo ziva kubonga. (Dhewut. 1:26-28; 2 Tim. 3:1, 2, 5) Ngaku hi txi lavetela mikhanju yo kombisa kubonga, hi na mbi karateka mbimo yi hi tandekako kumana si hi si lavako.

7. Ngu tihi ti Aci a nga ti maha kasi kuva m’thu wo ziva kubonga, ni ku yi vile yihi wuyelo?

⁷ Wona ti ti nga humelela mwanathu Aci, wa Indonésia. Ene a womba tiya: “Ngu mbimo ya mtungu wa korona, ni khatile kufananisa siemo sangu ni sa vanathu vamwani. Eto ti ni tekete litsako.” (Vag. 6:4) Se nji txani txi nga mvhuna ti to e leka ku ti fananisela ni vamwani? Aci a womba tiya: “Ni khatile kukontela ma katekwa aya ni nga ti ma mana ditshiku ni ditshiku, ni kualakanyisisa ngu silo sasingi sasinene asi ni nga ti naso ngu kuthumela Jehovha. Ni tshumete ni bonga Jehova ngu silo sa sinene asi ni nga ti naso. Kota wuyelo, ni khatile kuva m’thu wo eneliseka.” Ngaku nawe u txi karateka ngu txiemo txi u ku ka txona konku, zama kumaha a ti Aci a nga ti maha kasiku u va m’thu wo ziva kubonga.

VANA M’THU WO TIVEKA HAHATSHI

8. Nji txani txi txi nga mahekela Bharuke?

⁸ Bharuke, mabhalani wa mprofeti Jeremiya, a khatile kwambi eneliseka ngu si a nga ti naso. Bharuke a ti ni mthumo wo karata wo vhuna Jeremiya kugela Vaisrayeli ati ti ndi no va mahekela nguku va nga mbi engisa Jehovha. Kambe hahanze ko veka mapimo ka ti Jehovha a nga lava ti to e ti maha, Bharuke a khatile kupimisa ngu ti ene a nga ti lava ku ti maha. Ngu kuthumisa mprofeti Jeremiya, Jehovha a gete tiya Bharuke: “U ti lavela wuhombe kani? U nga wu lave.” (Jer. 45:3-5) Ngu mapswi mamwani, Jehovha a txo gela tiya Bharuke: “Tsaka ngu si u kunaso konku.” Bharuke a tumete kulaywa, se a simamile e tsakelwa ngu Jehovha.

9. Hi gonda txani ka 1 Vakorinto 4:6, 7? (Wona ni mifota.)

⁹ Mbimo yimwani, Mkristu a nga tipfa adi ni fanelo yo amukela malungelo o kari. Ti nga maha ene atxi tipfisa toneto nguku a ku ni wusikoti wo hambana-hambana, i di m’thu wo thuma ngutu, mwendo se adi ni malembe amangi a txi thumela Jehovha. Hambiketo, vamwani va nga amukela malungelo ona yale a nga txi ma lava. Se nji txani txi txi no mvhuna ku asi henyi? Ngu alakanyisisa ngu ti mpostoli Paulo a nga ti bhala ka dibhuku da 1 Vakorinto 4:6, 7. (Lera.) Otshe malungelo aya hi ma amukelako ni totshe tiningo ati hi kunato si ta ngu ka Jehovha. Ene kha hi ningi silo siya nguku hi ku va lisima kupinda vamwani, kambe ngu mhaka ya wuxinji wakwe wa hombe.—Var. 12:3, 6; Vaef. 2:8, 9.

10. Hi nga kusakulelisa kutxani kutiveka hahatshi?

¹⁰ Hi nga sakulela kutiveka hahatshi ngu kualakanyisisa ngu txikombiso atxi Jesu a nga hi siyela. Wona ti ti nga maheka ka wusiku wu Jesu a nga sambisa minenge ya vapostoli vakwe. Mpostoli Johane a bhate tiya: “Aku Jesu a nga txi ziva [1] ti to Tate a ti m’ningile sotshe silo manzani kwakwe ni ku [2] ene a txi ta ngu ka Txizimu ni ku, [3] a txi tshumela ka Txona, . . . a to khata kusambisa mikondo vagondiswa vakwe.” (Joh. 13:3-5) Jesu adi pimisile ti to vapostoli vakwe ngu vona va nga ti fanete ku msambisa minenge. Kambe ene kha nga pimisa ti to aku i ku mwanana wa Txizimu ati fanete kuva ni mti wawunene, male yayingi mwendo kuva ni wutomi wo thamba. (Luka 9:58) Jesu a txi tiveka hahatshi ni ku a txi eneliseka, se a hi siyete txikombiso txatxinene txo txi etetela.—Joh. 13:15.

11. Kutiveka hahatshi ku mvhunisile kutxani Dennis ku eva m’thu wo eneliseka?

¹¹ Mwanathu Dennis, wa Holanda a maha mizamo kasiku eva m’thu wo tiveka hahatshi kufana ni Jesu. Ene a womba tiya: “Mbimo yi m’thu a amukelako malungelo a ya ni nga txi ma lava, makhambi mamwani na henya ngu kupimisa ti to malungelo oneyo ma txi ni fanela. Mbimo yi eto ti mahekako, na gonda misungo mhaka ayi yi wombawombako ngu kutiveka hahatshi. Ka aplikativhu ya JW Library^® ni sawute mibhalo ayi yi wombawombako ngu kutiveka hahatshi kasiku ni yi mana ngu txikuluveta ngaku ni txi lava ku yi lera. Ni tshumete ni bhaxara ka fone yangu madhixkursu aya ma wombawombako ngu kutiveka hahatshi ni ku mbimo yotshe na ma engisela.a Ni gondile ti to wotshe mthumo awu hi wu mahako, hi wu mahela kudhumisa Jehovha i singa ku ti lavela nduma athu hipune. Jehovha wa ninga mmwani ni mmwani wathu mthumo wo wu maha, kambe ngene dwe a mahako to mthumo wonewo wu humelela.” Ngaku awe u si eneliseki ngu txiemo atxi u ku ka txona, maha mizamo kasiku u sakulela kutiveka hahatshi. Eto ti na tsanisa wuxaka wako ni Jehovha, se ene a na kuvhuna ti to u va m’thu wo eneliseka.—Jak. 4:6, 8.

ALAKANYISISA NGU THEMBA YAKO

12. Ngu yihi themba ya wumangwana ayi yi hi vhunako ku hi va vathu vo eneliseka? (Isaya 65:21-25)

¹² Ha eneliseka ngaku hi txi alakanyisisa ngu wumangwana wo tsakisa awu Jehovha a hi thembisako. Ka dibhuku da Isaya, Jehovha wa hi gela to wa ti pfisisa ti to hi ni sikarato sasingi, kambe a tshumela a hi thembisa kugumisa sikarato soneso. (Lera Isaya 65:21-25.) Ka mbimo yi tako, hi na ta hanya ka miti ya yinene yo vhikeleka. Hi na tava ni mthumo wawunene ni ku hi na tadya sakudya so tshamba. Kha hi na mbi thuka hi thava kuhumelelwa ngu timhaka to biha. (Isaya 32:17, 18; Eze. 34:25) Hi nga tsaniseka ti to sotshe sithembiso siya so tsakisa mayelano ni wumangwana, si na hetiseka ngu ditshuri.

13. Ngu ka sihi siemo i ku ta lisima ngutu kuveka mapimo ka themba yathu?

¹³ Konku nda lisima ngutu ku hi veka mapimo ka themba yathu. Ngu kutxani? Nguku hi hanya ka “masiku a kugwitisa” ni ku hotshethu ha wonisana ni sikarato. (2 Tim. 3:1) Ditshiku ni ditshiku Jehovha wa hi vhuna ku hi tsanisela ngu ku hi seketela, ngu ku hi ninga mkongomiso ni mtamo wu hi wu lavako. (Mas. 145:14) Hahanze keto, themba yathu kota Makristu yi nga hi vhuna ka timbimo to karata. Ti nga maha awe u txi thuma ngutu kasiku u sikota kukhatalela silaveko sa nyama sa mwaya wako. Ina eto ti lava kuwomba ti to awe u na zumba u di txisiwana? Ahim-him! Jehovha a thembisa ti to ka paradhesi a na ta kuninga silo sasingi ngutu asi u si lavako. (Mas. 9:18; 72:12-14) Tinga maha u txi wonisana ni txitrese mwendo malwati o mbi na mrende. Se eto ti lava kuwomba ti to awe u na zumba u txi lwala? Nadha. Jehovha a thembisa kuta fuvisa otshe malwati kupata ni lifo ka mafu a maphya. (Mtu. 21:3, 4) Themba yoneyo ya hi vhuna ku hi si karateki ngutu ngu ti ti hi humelelako konku. Hi nga sikota kueneliseka hambi hi txi wonisana ni wubihi, malwati, mwendo sikarato simwani nguku ha ti ziva ti to ‘kuxaniseka kuwa kwathu nga mbimonyana ya yidotho.’ Ka mafu a maphya hi na mbi ta thuka hi xaniseka.—2 Vak. 4:17, 18.

14. Hi nga maha txani ti to hi tsanisa themba yathu?

¹⁴ Aku hi ti zivako ti to sithembiso sa wumangwana sa hi vhuna ku hi eneliseka, nji txani txi no hi vhuna ku hi tsaniseka ti to sithembiso soneso si na hetiseka ngu ditshuri? Kufana ni m’thu wu ti lavako e ambala mayokola kasiku e kota kuwona kwati so maha si si ku kule, nathu hi fanete kumaha mizamo yo tsanisa themba yathu ngu ku tialakanya hi di paradhesi. Ngu txikombiso, mbimo yi hi karatekako ngu mhaka ya wusiwana, zama ku ti wona u di ka mafu a maphya aha hi no mbi ta lava male nem hi no mbi ta va ni sikweneti. I di ti to u karatekile nguku u si amukeliko malungelo aya u nga ti ma lava ka sengeletano, tialakanye u di paradhesi a ha u no ta thumela Jehovha u di hetisekile kudingana malembe o tala. (1 Tim. 6:19) Aku hi wonisanako ni sikarato sasingi, ti nga hi karatela kualakanyisisa ngu sithembiso soneso. Kambe ngaku hi txi alakanyisisa ngu themba yo tsakisa ayi Jehovha a hi thembisako, ti na hi hehukela kuveka mapimo ka sithembiso soneso i singa ka sikarato asi hi wonisanako naso.

15. U gondile txani ka txiperiyensiya txa Christa?

¹⁵ Wona ti hi nga ti gondako ka Khrista, msikati wa Dennis, awu hi nga bhula ngu ngene makhatoni. Ene a womba tiya: “Ni ni malwati ya ma ni hetako mtamo, se kasiku ni tsimbila ti lava ni thumisa txikarinyana txa marodha ni ku ni heta mbimo yo tala ni di otete. Phela ditshiku ni ditshiku na pfa kupanda. Dhokodhela wangu a ni gete ti to kha ni na mbi tshukwala. Se ngu txi kuluveta ni pimisile tiya: ‘Ene ene kha ti zivi ti to Jehovha a na gumisa malwati i singa kale.’ Phela kuveka mapimo ka themba yangu ta ni maha nipfa kurula ka mapimo. Nyamsi na wonisana ni sikarato sasingi ka mafu yawa, kambe na ta tidila ngu wutomi wo tsakisa ka mafu a maphya!”

“KHA KUPWATEKI TXILO KA WULE A MTHAVAKO”

16. Ngu kutxani mkoma Dhavhidha a di wombile ti to awu a thavako Jehovha ‘kha pwatekelwi ngu txilo’?

¹⁶ Hambi i di ti to hi vathu vo eneliseka hi na wonisana ni sikarato. Mkoma Dhavhidha a pandisekile mbimo yi a nga felwa ngu vanana vakwe vavararu. Ene a tshumete e ñolwa ngu nzila yo biha, e wukelwa, ni ku mkoma Sawule a txi lava ku m’daya. Ngu toneto, Dhavhidha a txi zumbela kubarama. Hambiketo, mbimo yi a nga ti wonisana ni sikarato, Dhavhidha a wombile tiya ngu Jehovha: “Kha kupwateki txilo ka wule a mthavako.” (Mas. 34:9, 10) Ngu kutxani a di wombile tiya? Nguku a txi ti ziva ti to hambi ku Jehovha a nga mbi mvhikela ti to asi wonisani ni sikarato, ene a ndi na mninga sotshe si a ndi no silava kasiku e kota kutsanisela. (Mas. 145:16) Kufana ni Dhavhidha, tsaniseka ti to Jehovha a na kuvhuna to u tsanisela. Ngu toneto, ti si nga ni mhaka ni sikarato si hi wonisanako naso, hi nga sikota kuva ni kurula ni kuva vathu vo eneliseka.

17. Ngu kutxani u txi lava kuva m’thu wo eneliseka?

¹⁷ Jehovha a lava ti to u eneliseka ngu si u kunaso. (Mas. 131:1, 2) Ngu toneto, maha totshe ti u nga ti kotako kasiku u va m’thu wo eneliseka. Ngaku u txi sakulela kuva m’thu wo ziva kubonga, wo tiveka hahatshi ni kuveka mapimo ka themba yako, u na womba u di tsani u txi: ‘Ni tsakile.’—Mas. 16:5, 6.