Ina wa khumbula?

Ina u gondile kha kwati marevhista a Muwoneleli a dilembe diya? I di toneto, zama kuxamula siwotiso asi si londiselako:

Nji txani txi hi kuzetako ku hi dhumisa Jehovha?

Hi maha toneto nguku ha xonipha Jehovha ni ku ha m’randa ngutu. Hi tshumela hi m’dhumisa nguku hi lava ti to vathu vamwani ni vona ve m’ziva.—w25.01, paj. 3.

Ngako m’thu a txi hi henyisa, hi nga maha txani ti to hi kombisa ku hi m’divalete?

Kha ha fanela kusisa matipfelo athu nga kuya maheka txilo. Ngako hi si veketeli txiviti hi na vayilela wuyelo yo biha ayi yi tiswako ngu kuzumba hi di henyile.—w25.02, paj. 15-16.

Ngu kutxani m’gondiswa Marku i di txikombiso txa txinene para majovhem?

Ene a amukete txiavelo tximwani ni tximwani atxi a nga ti ningwa. Hambi mbimo yi a nga humelelwa ngu to kari ti ti nga m’henyisa, a simamile e hiseka. Ene a tshumete e sakulela wungana ni Paulo ni vamwani.—w25.04, paj. 27.

Jesu a txi lava kuwomba txani mbimo yi a nga maha mkombelo a txi: “Ni zivisile ditina dako kwawe?” (Johani 17:26)

Vagondiswa vakwe se va txi di ziva ditina da Txizimu. Kambe, ene a va gondisile ati ditina donedo di txhamuselako tona, kupata ni txikongomelo txakwe ngu mafu ni vathu, ati a nga ti ti mahile ni tifanelo takwe.—w25.05, paj. 20-21.

Ngu tihi ati hi no ti tumela ngaku hi di vathu vo dinganisela?

Hi na tumela ti to hi nga totshe hi ti zivako. Ngu txikombiso kha hi di zivi ditshiku di Jehovha a no tisa ngu dona magwito, mwendo nzila yi a no ta maha ngu yona to maha ka mbimo yoneyo. Kha hi nge sikoti kupfisisa kha kwati nzila yi Jehovha a hi zivako ngu yona, nem kuziva ati ti no ta humelela mangwana.—w25.06, paj. 15-18.

Nji txani txi nga hi vhunako ti to hi wuyelwa mbimo yi hi lerako msungo mhaka wo kari mwendo hi txi engisela dhixkursu?

Hi nga ti wotisa tiya: ‘Ngu tihi ati ti nga thumiswa kasi kukholwisa vathu ka ditshuri da mu ka Bhiblia? Ina kuthumisilwe txidinganiso txo kari atxi ni nga txi thumisako mbimo yi ni gondisako vathu ditshuri? I mani wu a nga tsakelako ditshuri donedo, ni ku ni nga m’gela ngu mbimo muni?’—w25.07, paj. 19.

Hi gonda txani ka nzila yi Jehovha a nga divalela ngu yona Dhavhidha?

Hambiku Dhavhidha a nga ti mahile sionho sa hombe, mbimo yi a nga tisola, Jehovha a m’divalete. (1 Vafu. 9:4, 5) Mbimo yi Jehovha a hi divalelako, ene kha hi puniri ngu mhaka ya txionho atxi hi nga txi maha, nem kha hi khumbutisi txionho txonetxo.—w25.08, paj. 17.

Hi nga maha txani ngaku txigondo txa Bhiblia txi si pfisisi mhaka yo kari?

Ngaku txigondo txako txa Bhiblia txi si yi pfisisi kwati mhaka yi u nga zama ku txi txhamusela, mi nga ndaka mhaka yoneyo mi ya ka yimwani, se ka dikhambi dimwani mi nga ta bhula ngu mhaka yoneyo ayi ti txi karatelako ku yi pfisisa.—w25.09, paj. 24.

Ngu kutxani Bhiblia yi txi womba ti to txionho txa “kanganyisa”? (Vaheb. 3:13)

Txionho txi nga hi kuzeta ku hi maha timhaka to biha. Txi nga tshumela txi hi maha hi kana-kana to ina Jehovha wa hi dhunda ngu ditshuri.—w25.10, paj. 16.

Ngu tihi timhaka tiraru ati hi nga ti mahako ti to hi tshukwatisa mikombelo yathu?

1) Hi nga alakanyisisa ngu tifanelo ta Jehovha. 2) Hi nga m’gela sotshe sikarato asi hi wonisanako naso. 3) Hi nga maha mikombelo yo lapha. Hi txi maha toneto, ti na hi hehukela kugela Jehovha totshe ati ti ku mbiluni kwathu.—w25.10, paj. 19-20.

Hi nga va vhunisa kutxani vanathu ava va nga kumba?

Hi nga tiha mbimo yo va ligarela ni ku va pfuxela. Hi nga va heleketa sibhejela mwendo kutxhumayela navo.—w25.11, paj. 6-7.

Ngu tihi ati hi nga ti mahako kasiku ditshiku da mtxhadho di tsakisa Jehovha?

Maha totshe ati mlayo wa mfumo wa ditiko danu wu ti lavako mayelano ni mtxhadho. Maha totshe ti u nga ti kotako kasiku fexta ya mtxhadho yi kombisa ti to u Mkristu. Vana wo dinganisela ka nzila yi u ambalako ngu yona, u vayilela sihena asi si lwisanako ni Bhiblia. Bhulisanani mbimo yi mi lungiselako mtxhadho.—w25.12, paj. 21-24.