Mi txi ziva timhaka tiya, mi na tsaka ngako mi txi ti maha

1. Ku nga maheka txani ngu ku tiveka hahatshi kwathu ngako hi txo tumela kukuzetelwa ngu mawonelo o biha a ditiko?

NGU kutxani ti txi karata kumaha ati hi ti gondako ka Dipswi da Txizimu? Txivangelo ngu ti to, kasiku hi maha ta tinene, ti lava hi tiveka hahatshi. Ka “masiku awa o gwita” ta karata kutiveka hahatshi nguko vathu vo tala va hi hanyako navo “vo ti randa vapune, vanyatimbiti, va ku ti mahisa, va kutikulisa” ni “vo mbi ti ñola.” (2 Timoti 3:1-3) Kota malanda a Txizimu ha ti ziva ti to mahanyelo onewo ma bihile, kambe ti nga woneka nga avale va hanyisako toneto va humelela ni ku vo ti busa ngu wutomi. (Masalmo 37:1; 73:3) Hi nga thuka hi ti wotisa tiya: ‘Ina ngu ditshuri ti ni lisima kuthangetisa silaveko sa vamwani? Ngako ni txi tiveka hahatshi, ina vathu va na ni xonipha?’ (Luka 9:48) Ngako hi txo tumelela kukuzetelwa ngu mawonelo o biha a ditiko, hi nga dayisa wuxaka wathu ni vanathu. Ti na tshumela ti karata ka vamwani kuziva ti to hi Makristu mwendo ahim-him. Kambe, hi nga wuyelwa ngako hi txo gonda ngu sikombiso sa malanda a Txizimu o tiveka hahatshi hi tshumela hi ma tekelela.

2. Hi nga gonda txani ka malanda a kale o thembeka a Txizimu?

² Nji txani txi nga vhuna malanda o thembeka a Txizimu ti to me va vangana va txona? Va txi tsakisisile kutxani? Va wu mani hani mtamo wo maha ta tinene? Hi txi gonda ni kualakanyisisa ngu matimu awe amu ka Bhiblia, likholo lathu li na tsana.

ATXI TXI MAHAKO HI VA NI LIKHOLO LO TSANA

3, 4. a) Jehovha a hi gondisa ngu kuthumisa txani? b) Ti lava hi maha txani ti to hi tsanisa likholo lathu?

³ Jehovha a hi ninga sotshe ti to hi tsanisa likholo lathu. Wa hi ninga silayo sa sinene ni ku hi gondisa ngu kuthumisa Bhiblia, mabhuku a Wukristu, site yathu, JW Broadcasting, mitshangano ya dibanza ni mitshangano ya hombe. Kambe Jesu a ti khene ku ni timwani ti lavekako kupinda kuziva to kari. A wombile tiya: “Sakudya sangu ngu kumaha kuranda ka wule a nga ni ruma ni kuhetisa m’thumo wakwe.”​—Johani 4:34.

⁴ Ka Jesu, kumaha kudhunda ka Txizimu ku ti fana ni sakudya. Kotaku sakudya sa sinene si hi mahako hi tipfa kwati ni kutsanisa mmidi wathu. Ngu ha kufanako, kumaha kudhunda ka Txizimu ta hi tsakisa ni kutsanisa likholo lathu. Ngu txikombiso, ina u khala kuya ka mtshangano wa mthumo wa thembwe u di karate, kambe u txi wuya mtini u ti pfa u di tsakile ni kuva ni mtamo?

5. Wutxhari wu hi vhunisa kutxani?

⁵ Ngako hi txi maha ati Jehovha a ti lavako, hi txharihile. (Masalmo 107:43) Ni ku, ava va ku ni wutxhari va humelela. “Sotshe si u nga sikotako ku si navela, kha si na kudinganiswa ni wutxhari. . . . Wutxhari mndonga wa wutomi ka vale va wu ñolisisako, kambe va katekile votshe vale va wu veketako.” (Mavingu 3:13-18) Jesu a ti khene: “Ngako mi txi ti ziva tiya ni ku ti thuma, mi katekile.” (Johani 13:17) Vagondiswa va Jesu va ndina simama ve va ni litsako ngako va txi simama ve maha ati ene a nga va gela. Mahanyelo awe i ti a kulondisela tigondo ni txikombiso txa Jesu.

6. Ngu kutxani hi di fanete kusimama hi maha ati hi ti gondako?

⁶ Nyamsi, nathu ti lava hi simama hi maha ati hi tigondako. Alakanya ngu mlungisi wa so maha, a ku ni farameti ni wuzivi. A nava mthumi wa mnene ngako a txi thumisa farameti yakwe. Kuva mlungisi wa mnene, kha ti yi ngu malembe ya a ku nawo i di mlungisi, kambe ti lava e maha ati a nga gonda. Ngu ha kufanako, mbimo yi nathu hi nga gonda ditshuri, hi ti tsakile nguko hi mahile ati hi nga gonda mu ka Bhiblia. Kambe ti to hi simama hi tsaka, ditshiku ni ditshiku, hi fanete hi maha ati Jehovha a hi gondisako.

7. Hi fanete kumaha txani ngu ti hi ti gondako ka malanda o thembeka a kale?

⁷ Ka msungo wuwa, hi na bhula ngu siemo simwani asi ti nga karatako kusimama hi tiveka hahatshi. Hi na gonda ti to malanda o thembeka a kale ma simamisile kutxani me tiveka hahatshi ka siemo si si fanako. Kambe kha ha fanela kulera matimu awe dwe. Hi fanete hi wona ati ma nga hi vhunisako tona.

U NGA VA WONELI HAHATSHI VAMWANI

8, 9. Ka Mithumo 14:8-15 hi gonda txani ngu kutiveka hahatshi ka Paulo? (Wona mfota wu wu ku makhatoni.)

⁸ Jehovha a lava ti to vathu va tixaka totshe “ve mana kuhanyiswa ni kuziva ditshuri.” (1 Timoti 2:4) U va wonisa kutxani vathu ava va sinzi kugonda ditshuri? Mpostoli Paulo a txhumayete Vajudha ava se va nga ti ziva to kari ngu Jehovha. Kambe a tshumete e txhumayela ni va va nga ti khozela sizimu sa walo. Eto ti dukile kutiveka hahatshi ka Paulo. Ngu nzila yihi?

⁹ Ka liendo lakwe lo khata kota mrumiwa, Paulo ni Bharnabhasi va endete didhorapa da Listra. Vathu va va nga txi hanya Txilikawoniya va ti wona Paulo ni Bharnabhasi kota sizimu ve tshumela ve va ninga matina a sizimu sawe sa makuhu i ku Zewusi ni Herme. Ina va txo xoniphwa kupinda mpimo? Ina va ti woni i di mkhululeko kuhambana ni xanisa yi va nga yi mana ka madhoropa mambidi ya va nga ti ma endete? Mwendo ku pimisa ti to kutsakelwa kuwa ku ndi na vhuna vathu kuengisa mahungu a manene? Ahim-him! Va to kwangula va txi khona: “Mi mahela txani toneto kani? Anathu hi vathu vo fana ni nanu ngu mtumbuluko.”​—Mithumo 14:8-15.

10. Ngu kutxani Paulo ni Bharnabhasi va sa tiwona va txi pala vamwani?

¹⁰ Mbimo yi Paulo ni Bharnabhasi va nga womba ti to ni vona i ti vathu, va ti txhamusela ku kha va hetiseka. Va si wombi ti to va ti khozela ngu nzila yo fana ni ya va Txilikawoniya. Paulo ni Bharnabhasi i ti varumiwa va Txizimu. (Mithumo 13:2) Vona se va ti sawutwe ngu moya wo sawuleka ni ku va ti ni themba yo tsakisa. Kambe etxo i si nga txivangelo txo tipfa va txi pala vamwani. Va ti woni ti to vathu vale va nga ti va txhumayela ni vona va ndi na amukela themba yo ya nzumani ngako va txi amukela mahungu a manene.

11. Kufana ni Paulo hi nga tivekisa kutxani hahatshi mbimo yi hi txhumayelako?

¹¹ Ku ni nzila yimwani yi hi nga kombisako ngu yona ku tiveka hahatshi kufana ni Paulo. Kha ha fanela ku tipfa hi di va lisima ngu mhaka ya ku hi nga ningwa mthumo wo txhumayela mwendo kateko ayi Jehovha a hi ningako. Hi nga tiwotisa tiya: ‘Ni va wonisa kutxani vathu va wukhalo wu ni txhumayelako ka wona? Ina ni va wonela hahatshi vathu va tixaka timwani?’ Ha mafuni kotshe, Tifakazi ta Jehovha ti maha mizamo yo mana vathu ava va no engisa mahungu a manene. Vamwani va mahile mizamo yo gonda lidimi mwendo mikhuva ya vathu va va tekelwako hahatshi. Kambe vona kha va tiwoni va txi pala ava va va txhumayelako. Hahanze keto, vona va zama kupfisisa vathu vonevo ti to ve kota ku va vhuna ve amukela madungula a Mfumo.

WOMBA MATINA A VAMWANI KA MIKOMBELO YAKO

12. Epafrasi a ti kombisisile kutxani ti to wa khatala ngu vamwani?

¹² Nzila yimwani yo kombisa ti to ha ti veka hahatshi ngu khongelela vanathu ava se “va nga amukela likholo la lisima kufana ni lathu.” (2 Pedro 1:1) Epafrasi a mahile toneto. Bhiblia yi womba-womba ngu ngene sikhati siraru basi. Mbimo yi Paulo a nga ti khotetwe Roma, a bhalete Vakolosa mayelano ni Epafrasi a txi khene: ‘A lwako yotshe mbimo ngu nganu mikombeloni kwakwe.’ (Vakolosa 4:12) Epafrasi a ti va ziva kwati vanathu, ni ku a ti va khatalela ngutu. Paulo a ti khene Epafrasi ‘njibotxhwa kulothi,’ i ku ti to a ti ni sikarato sakwe nene. (Filimoni 23) Hambi keto, ene a simamile e khatala ngu silaveko sa vamwani, e maha to kari ti to e va vhuna. Epafrasi a ti khongelela vanawe, e tshumela e womba ni matina awe, se nathu hi nga maha toneto. Mikombelo yoneyo yi ni mtamo wa hombe.​—2 Vakorinto 1:11; Jakobe 5:16.

13. Hi nga mu etetelisa kutxani Epafrasi?

¹³ Alakanya ngu wu u nga wombako ditina dakwe u txi khongela. Ti nga maha u txi ziva vamwani dibanzani mwendo timwaya ati u zivako ti to ti ni sikarato. Ti nga maha va di fanete kumaha sisungo so karata mwendo va txi lwisana ni txiduko txo kari. U nga tshumela u khongelela vanathu va matina awe ma ku ka jw.org ka msungo wu wu ku khene: “Testemunhas de Jeová presas por causa de sua fé.” (Bela ka IMPRENSA > CASOS JURÍDICOS.) U nga tshumela u khongelela ava va nga felwa ngu maxaka, va va konkuwa va nga manana ni tiphango mwendo tiyimbi, ava i ku sisiwana. Ku ni vanathu vo tala va lavako txivhuno txa mikombelo yathu! Ngako hi txi va kombelela, hi kombisa ti to kha hi khatali ngu tathu dwe kambe ni silaveko sa vamwani. (Vafilipiya 2:4) Jehovha wa engisela mikombelo yoneyo.

“KULUVETA KUENGISA”

14. Jehovha muengiseli wa hombe ngutu ngu nzila yihi?

¹⁴ Nzila yimwani yo kombisa ti to ha ti veka hahatshi, ngu engisela kha kwati. Dibhuku da Jakobe 1:19 di womba tiya: ‘kuluveta kuengisa.’ Jehovha muengiseli wa hombe ngutu. (Genesisi 18:32; Joxuwa 10:14) Ngu txikombiso, lera mabhulo aya ma ku ka Eksodha 32:11-14. (Yi lere.) Ti si sungi ku Mosi e womba mawonelo akwe, kambe Jehovha a mu tumelete ti to e womba matipfelo akwe. Nawe u nga engisela m’thu wu a nga ti tolovela ku va ni mawonelo ya i si ngako ona, se u gwita u londisela mawonelo akwe! Jehovha wa engisela vathu va va khongelako ngu likholo!

15. Hi nga mu etetelisa kutxani Jehovha ngu kuninga vamwani lisima?

¹⁵ Ti wotise tiya: ‘Aku Jehovha a ti vekako hahatshi e za e engisela vathu ngu nzila yi a nga engisela ngu yona Abrahamu, Rakeli, Mosi, Joxuwa, Manowa, Elija, Ezekiya, ina ani ni nga mu etetela? Ina ni nga xonipha vanathu ngu ku vaengisela ni kulondetela mawonelo awe ngako ti txi koteka? Ina dibanzani mwendo mtini, ku ni wu a lavako ni muengisela kha kwati? Ni na maha txani ngu toneto?’​—Genesisi 30:6; Valamuli 13:9; 1 Vafumeli 17:22; 2 Makronika 30:20.

JEHOVHA A NA WONE KUXANISEKA KWANGU

16. Dhavhidha a mahile txani mbimo yi a nga ruketelwa ngu Simeyi?

¹⁶ Ku ti veka hahatshi kutshumela ku hi vhuna ku tiñola ngako vamwani va si hi ñoli kwati. (Vaefesu 4:2) Ka dibhuku da 2 Samuwele 16:5-13 (yi lere), hi mana txikombiso txa txinene. Simeyi, wu i nga ti dixaka da Mkoma Sawule, a ruketete ni kulwisa Dhavhidha ni malanda akwe. Dhavhidha a di sikotile kumalata Simeyi, kambe a timisete kuruketelwa ngu ngene. Dhavhidha a ti kotisile kutxani kutiñola? Xamulo hi nga yi mana ka Masalmu 3.

17. Nji txani txi nga vhuna Dhavidha ti to e tiñola? Hi nga mu etetelisa kutxani?

¹⁷ Dhavhidha a bhate ndima ya wuraru ya Masalmo mbimo yi mwanana wakwe Absalome a nga ti lava ku m’daya. I ve ngu mbimo yoneyo a nga ti xaniswa ngu Simeyi, kambe Dhavhidha a mani mtamo wo simama a di rute. Ngu nzila yihi? Ka Masalmo 3:4, ku ni mapswi awa: “Ngu dipswi do guleka na peka huwa kwakwe MKOMA, se ene wa ni angula a di mmangoni kwakwe ko sawuleka.” Ngako hi txi ñolwa ngu nzila yo biha, ti lava hi maha mkombelo kufana ni Dhavhidha. Se Jehovha a na hi ninga moya wakwe wo sawuleka ti to hi kota kutsanisela. Ina awe u nga kombisa kwati kutiñola mwendo kudivalela ngako mmwani a txi kumahela to biha? Ina wa tsaniseka ti to Jehovha wa khatala ngu kuxaniseka kwako ni ku a na kuvhuna ni ku kukatekisa?

WUTXHARI MBWA LISIMA NGUTU

18. Hi na wuyelwa ngu txani hi txi simama hi kombisa wutxhari?

¹⁸ Ngako hi txi maha ati hi ti zivako ti to ndinene, hi na va hi txi kombisa wutxhari ni ku Jehovha a na hi katekisa. Ka Mavingu 4:7 ku ni tiya: “Wutxhari ngu txona tximaha txo khata.” Hambiku wutxhari wu patako kuziva to kari, kha ti wombi kupfisisa timhaka dwe. Wutxhari wu pata ni sisungo si hi si mahako. Hambi titshokoti ta kombisa wutxhari. Kambe ngu wutxhari ta lulamisela sakudya ngu mbimo ya wuxika. (Mavingu 30:24, 25) Kristu awu a dhanwako ku i “wuzivi, [wutxhari, NM] wa Txizimu, mbimo yotshe a maha ati ti tsakisako Txizimu. (1 Vakorinto 1:24; Johani 8:29) Txizimu txi na hi hakhela ngako nathu hi txi kombisa wutxhari ngu kusawula kumaha ati hi ti zivako ti to ndinene ni kusimama hi tiveka hahatshi. (Lera Matewu 7:21-23.) Simama u zama kumaha ti to dibanzani kuva wukhalo wu votshe va nga thumelako Jehovha ngu ku tiveka hahatshi. Kumaha ati hi ti zivako ti to ndinene, ti lava mbimo ni kutimisela. Kambe kumaha toneto ti kombisa ku tiveka hahatshi, se kona ku na hi ninga litsako lo mbi guma.