Jesu e hinga ava va nga txi xavisa dithempeleni

Ku di pindile mitxima msana ka kuva Jesu a di bhabhatisilwe, ene a tsute Jerusalema. Akheya ku ti ni vathu vavangi ava va nga txi ya dya Paxkwa. Ka fexta yile vathu vavangi va txi tolovela ku tsula dithempeleni veya ningela miningelo ngu sihari. Vathu vamwani va txi teka sihari sawe ngu mitini kwawe ve tsula naso, kambe vamwani va txi ya xava sihari mbimo yi va nga txi hoka Jerusalema.

Mbimo yi Jesu a nga hoka dithempeleni, a woni vathu va txi xavisa tinvuta, tihomu ni situvani. Phela vathu vale va si ngo ya khozela Jehovha, vona va txi lava male. Wa tiziva ti Jesu a nga maha? Ene a to teka tingoti e maha txisepu se e humisela tinvuta ni tihomu dithempeleni mule. Se a to wisetela timeza ta vaxavisi vale e rinzetela timale tawe hahatshi. Jesu a to gela tiya vavamna vale va nga txi xavisa situvani: ‘Thavisani sotshe siya hawa. Mi teka mti wa Tate wa mina mi wu maha merkadhu.’

Vathu va nga di dithempeleni mule va to xamala ngu ti Jesu a nga txi timaha. Se vagondiswa va Jesu va to khumbula wuprofeti awu wu nga txi womba-womba ngu Mesiya wu txi khene: ‘Ani ni na hiseka ngu nyumba ya Jehovha.’

Ku di pindile malembe mararu, Jesu a tsute dithempeleni eya hinga kambe vathu vale va nga txi xavisa. Ene a txi lava ti to votshe vathu ve xonipha nyumba ya Tate wakwe.