U nga khatisa kutxani mabhulo ngu kuthumisa siphephana

Kukhukhela ngu Janeiro wa 2018, txifenengeto txa Txibhukwana txa mitshangano ya mahanyelo a Wukristu, txi ni sikombiso so khata mabhulo. Hi kuzetwa kubhula ni vathu, hahanze ko ningela mabhuku basi. Kasi kuvhuna vahuweleli, ku ni mavhidhiyo a sikombiso sa mabhulo aya ma kombisako nzila yo khata mabhulo ngu kuthumisa Bhiblia dwe. Ina eto ti womba ti to kha ha fanela ku thumisa mabhuku hi txi txhumayela ngu mti ni mti? Ahim-him! Ngu txikombiso hi nga khata mabhulo ngu nzila ya yinene ngu kuthumisa siphephana. Hi nga thumisa mamahelo ya ma londiselako hi txi lava kuthumisa tximwetxo txa siphephana:

1. Wotisa mawonelo akwe ngu kuthumisa txiwotiso atxi txi ku masoni ka txiphephana.

2. M’kombe xamulo ya Bhiblia ayi yi manekako ka m’bhalo awu wu ku mndani ka txiphephana didhawa da txibhabha, ngu txitimwi. Ngako mbimo yi txi kutumelela, lerani ni kubhula ngu didungula di di ku mndani ka txiphephana.

3. Ningela txiphephana ka nyamne wa mti, u tshumela u mkuzeta ku e txi lera txotshe.

4. U si se tsula, mkombe txiwotiso atxi txi ku hahatshi ka txisungwana txi txi ku: “Alakanyisisa ngu tiya,” u gwita u mthembisa kuya mkomba xamulo ya Bhiblia ka dikhambi dimwani.

U txi tshumela, xamula txiwotiso u gwita u msiyela tximwani atxi mi no ta bhula ngu txona ka dikhambi dimwani. U nga sawula txiwotiso ka site yathu mwendo ka dibhuku a di di nga kombiswa ka txiphephana. Ngako u di ni mbimo, khata dibroxura di di ku Ngu yahi mahungu a manene aya matako ngu ka Txizimu? mwendo dibhuku dimwani di manekako ka Farameti yo Gondisa.