Hi nga si thumisa ngu nzila yihi sikombiso sa mabhulo a Bhiblia

Kukhukhela ngu Janeiro wa 2018, sikombiso sa mabhulo a Bhiblia sa maneka ka kapa ya Txibhukwana txa Mitshangano ya Mahanyelo athu a Wukristu ni mthumo wo txhumayela. Hi nga si thumisa ngu nzila yihi?

U txi maha txienge u di mitshanganoni: U fanete kuthumisa txiwotiso, m’bhalo, ni kutsimbitisana ni sikombiso sa mabhulo. Kambe, eto kha ti wombi ti to u fanete kuetetela mapswi ya ma nga thumiswa ka vhidhiyo ya sikombiso sa mabhulo. Ku ti lava u nga thumisa mamahelo o hambana, txiwuletiso, mabhulo ya mapfisisekako ni timwani. U nga tshumela u ningela dibhuku di di ku ka Farameti yo Gondisa, hambi i di ti to kha ka wombwa ha ka sileletelo ka txienge txonetxo.

U di kutxhumayelani: Sikombiso sa mabhulo si mahetwe kasi ku kuvhuna. Ngako m’thu a txi kombisa kutsakela ni ku a txi lava kugonda to tala u nga simama ni dibhulo, kambe ngu kuthumisa ati ti ku ka liendo lo wuyela. U nga txitxanyana sikombiso sa mabhulo mwendo kuthumisa timwani to hambana. Ina mhaka yi mi nga bhula ngu yona ka mtxima wu wu nga pinda mwendo m’bhalo wo kari wu tolovekile ka wukhalo wanu? Ina vathu va wukhalo wanu va tsakela tximahakalo txi txi nga maheka mwendo mahungu a maphya ya ma nga humelela ka wukhalo wonewo? Ti si nga ni mhaka ni ti to hi sawula kuthumisa sikombiso sa mabhulo, txikongomelo txathu ngu ‘maha totshe ngu mhaka ya Evhangeli, kasi kugela vamwani.’—1 Vak 9:22, 23, Tradução do Novo Mundo.