Ina wa khumbula?

Ina u gondile khakwati marevhista a Muwoneleli a dilembe diya? Wona to mwendo u nga sikota kuxamula siwotiso asi si londiselako:

Hi na wuyeliswa kutxani ngako hi txi ti ha mbimo yo bhula ni Jehovha, ya ku mu engisa ni kualakanyisisa ngu ngene?

Hi na maha sisungo sa sinene, hi nava vagondisi va vanene, hi va ni likholo lo tsana ni kuengetela lirando lathu ngu Jehovha.—w22.01, paj. 30-31.

Hi na wuyeliswa kutxani ngako hi txi gonda kuthemba Jehovha ni vavamna ava a nga va sawula kasi ku ve thangela vathu vakwe?

Konku i mbimo yo hi gonda kuthemba nzila ayi Jehovha a mahako ngu yona to maha ngu kuengisa mkongomiso ni sisungo sa madhota. Se mkama wu yi no khata xanisa ya hombe ti na ta hi hehukela kuengisa mkongomiso hambi wu txi woneka nga wa karata.—w22.02, paj. 4-6.

Yi txi lava kuwomba txani ngelozi mbimo yi yi nga womba-womba ngu “ngoti ya lipimo manzani ka [Mkoma] Zorobhabheli”? (Zak. 4:8-10)

Muwoniso wuwa wu tsanisekisile vathu va Txizimu ti to dithepele dile da didotho di nga txi akwa di ndina hetiswa ni ku di ndi na tsakelwa ngu Jehovha.—w22.03, paj. 16-17.

Hi nga va “txikombiso . . . ka kuwomba-womba” ngu nzila muni? (1 Tim. 4:12, NM)

Ngu kuwomba-womba ngu wunene ni txixonipho ni vathu ka mthumo wo txhumayela, kuningela tixamulo mitshanganoni ni kuembelela ti txi huma mbiluni. Ni ku mbimo yotshe hi womba-womba ditshuri, hi aka vanathu ni ku vayilela kuruka.—w22.04, paj. 6-9.

Ngu kutxani mazumbelo a txikalani atxi txi nga wombwa ka Dhaniyeli ndima 7 ma txi fana ni a txikalani atxi txi txhamuselwako ka Mtuletelo 13:1, 2?

Txikalani atxi txi nga wombwa ka Mtuletelo 13 kha txi emeli mfumo wumwewo basi. Txona txi emela yotshe mifumo ya tipolitika yi fumako kala nyamsi.—w22.05, p. 9.

Hi nga kombisa ngu nzila muni to ha themba wululami wa Txizimu?

Ngako vamwani va txi hi henyisa mwendo ku hi onhela kha ha fanela kuhenya mwendo kuveka txiviti , hi na ti lekela Jehovha. Ene a na ta gumisa sotshe sikarato asi si vangwako ngu txionho.—w22.06, paj. 10-11.

Ngu tihi ati mwanathu awu a mahako mkombelo mitshanganoni a fanelako ku ti veka ka mapimo?

Mkombelo kha wa fanela kuthumiswa kasi kuningela txialakanyiso ka dibanza mwendo kumaha txiziviso. Kha ti laveki “kuwomba-womba ngutu.” (Mat. 6:7)—w22.07, paj. 24-25.

I ngu nzila muni “ava va nga maha to biha” va no wuselwa “kuya kusungwani”, mwendo kulamulwani? (Joh. 5:29)

Kha va na mbi ta lamulwa ngu nzila ya tshofu mwendo kutsayiswa ngu ti va nga maha va sise kufa. Va na ta lamulwa ngu kuya ngu ti va no ta angulisa tona ka mkongomiso awu va no ta wu mana ka mafu a maphya.—w22.09, p. 18.

Ngu yahi mapswi o tsakisa aya mwanathu J. F. Rutherford a nga ma womba ka mtshangano ngu Setembro wa 1922?

Ka mtshangano khe Cedar Point, Ohio, U.S.A, a ti khene: “Mkoma wa fuma! Anu mi vahuweleli vakwe. Ngu toneto huwelela, huwelela, huwelela Mkoma ni Mfumo wakwe.”—w22.10, paj. 3-5.

Isaya ndima 30 yi kombisa to ngu tihi tinzila tiraru ati Jehovha a ti thumisako ku hi vhuna kutsanisela?

Ndima yiya yi kombisa to 1) wa engisa ni kuxamula mikombelo yathu, 2) wa hi ni nga mkongomiso ni 3) wa hi katekisa konku ni ku a na simama ka mbimo yi yi tako.—w22.11, p. 9.

Ngu kutxani hi nga wombako to mapswi ya ma ku ka Masalmo 37:10, 11, 29 ma hetisekile kale ni ku ma na tshumela me hetiseka ka mbimo yi yi tako?

Mapswi a Dhavhidha ma kombisa kha kwati makatekwa aya Vaisrayeli va nga ti nawo mbimo yi a nga txi fuma Solyjhbmnmoni. Jesu a wombile mapswi ya ma ku ka ndimana 11 a txi kombetela Paradhise ayi yi tako. (Mat. 5:5; Luka 23:43)—w22.12, paj. 8-10,14.