Ngu kutxani ditina da Jehovha i di da lisima ka Jesu?

1-2. a) Nji txani a txi Jesu a nga txi maha ka minova ya 14 ka Nisani? b) Ngu txihi txiwotiso atxi txi no xamulwa ka gondo yiya?

NI MINOVA ya Wazina 14 ka Nisani ngu dilembe da 33 E.C., Jesu a mahile Txilalelo txa Mkoma ni vapostoli vakwe vo thembeka, ni ku ngu wusiku wonewo a ndi na xaniswa ni kudawa ngu valala vakwe. Msana ka Txilalelo, Jesu a tsanisile vagondiswa vakwe, ni ku a mahile navo mkombelo wo huma mbiluni. Mkombelo wonewo wu bhatwe ngu mpostoli Johani, ni ku hi nga wu mana ka dibhuku da Johani kapitulu 17.

² Ka gondo yiya hi na wona timhaka ta lisima ti hi nga tigondako ka mkombelo wa Jesu. Ngu tihi ati ti nga ti m’karata ngutu a di hafuhi ni kufa? A hi woneni xamulo ya txiwotiso txonetxo.

“ANI NI ZIVISILE DITINA DAKO KWAWE”

3. Ngu tihi ti Jesu a nga ti womba mayelano ni ditina da Jehovha, ni ku a tilava kuwomba txani ngu toneto? (Johani 17:6, 26)

³ Ka mkombelo wakwe, Jesu a wombile tiya: “Ani ni zivisile ditina dako kwawe.” Phela mhaka yiya i ti ya lisima ngutu ka Jesu, ngu toneto a yi wombile makhambi mambidi. (Lera Johani 17:6, 26.) Jesu a ti lava kuwomba txani ngu mapswi oneyo? Ina Jesu a gondisile vagondiswa vakwe ti to ditina da Txizimu i Jehovha? Phela vagondiswa va Jesu i ti Vajudha, ngu toneto se va ti di ziva ditina da Jehovha ni ku ditina donedo da humelela konamu ka 7.000 wa makhambi ka Mibhalo ya Txihebheru. Se a ti Jesu a nga ti maha, hi nga ku va gela ti to ditina da Txizimu i Jehovha. Ngu ditshuri, ene a va gondisile a ti ditina donedo di txhamuselako tona. Jesu a vhuni vagondiswa vakwe ku ve m’ziva kwati Jehovha, ti patako txikongomelo txakwe ngu mafu ni vathu, a ti a nga ti ti mahile, a ti a ndi no ti maha, ni tifanelo takwe. Ova Jesu dwe a ndi no va gondisa kwati mhaka yiya nguku ene wa m’ziva kwati Jehovha kupinda vathu votshe.

4-5. a) Ningela txikombiso txa nzila yi ditina da m’thu di nga vako da lisima ngu yona kwathu. b) I ngu nzila muni vagondiswa va Jesu va nga ya ve di ziva kwati ditina da Jehovha?

⁴ Hi nga pimisa ngu didhota do kari dibanzani kwako di dhanwako ku Dhavhidha dona i dhokodhela, ni ku kale u txi di ziva. Se ditshiku dimwani u lwala ta konaha ni konaha, ve ku teka u ya sibhejela atxi a thumako ka txona, se ene e kuthuma u hanya. Kukhukhela ka koneho awe u ya u m’dhunda ngutu mwanathu eneyo, se va txi womba-womba ngu ngene wa so khumbu a ti a nga kumahela. Phela didhota diya i ngadi dona dile u di zivaku ngu kale, kambe konku di tshumela di va dhokodhela awu a nga kuhanyisa!

⁵ Nguha kufanako, vagondiswa va Jesu se va ti di ziva ditina da Jehovha. Kambe ngu mhaka ya mthumo wo txhumayela wa Jesu, ditina donedo di vite ni txhamuselo ya lisima ka vagondiswa va Jesu. Ngu kutxani? Nguku Jesu a ti etetela ngu kuhetiseka tifanelo ta Tate wakwe ka totshe ti a nga ti ti maha ni ku ti womba. Se mbimo yi vagondiswa vakwe va nga ti engisela nzila yi Jesu a nga ti gondisa ngu yona ni ku wona nzila yi a nga ti ñola ngu yona vathu, va ti ya ve m’ziva kwati Jehovha.—Joh. 14:9; 17:3.

“DITINA DAKO A DI U NGA NI NINGA”

6. Jesu a ti lava kuwomba txani mbimo yi a nga khene a ningilwe ditina da Jehovha? (Johani 17:11, 12)

⁶ Ka mkombelo wakwe, Jesu a kombelete vagondiswa vakwe tiya: “Va wonelele ngu mhaka ya ditina dako a di u nga ni ninga.” (Lera Johani 17:11, 12.) Ina eto ti lava kuwomba ti to ditina da Jesu i ndi na va Jehovha? Nadha. Mbimo yi Jesu a nga womba to “ditina dako” a ti womba-womba ngu ditina da Jehovha. Eto ti ti veka hakubasani ti to Jesu kha nga dhanwa ngu ditina da Jehovha. Se ngu kutxani Jesu a di wombile ti to a ti ningilwe ditina da Txizimu? Txo khata, Jesu i ti muemeli ni m’wombawombeli wa Txizimu. Ene a tile ngu ditina da Tate wakwe, ni ku a mahile mithumo yo xamalisa ngu ditina dakwe. (Joh. 5:43; 10:25) Hahanze keto, ditina di di ku Jesu di txhamusela ti to “Jehovha m’hulukisi.” Se txhamuselo ya ditina da Jesu yi pata ni ditina da Jehovha.

7. Ningela txikombiso atxi txi kombisako ti to Jesu a ndi na sikota kuemela ditina da Jehovha.

⁷ Kasiku hi pfisisa kwati mhaka yiya, alakanya ngu m’thu wu a rumelwako ngu mkoma wo kari ka ditiko dimwani kasi ku eya m’wombawombela. Mapswi ya a no ma womba ka ditiko di a nga rumelwa ka dona ma na va ni lisima kufana ni ku va i di mkoma a nga ma womba. Nguha kufanako, Jesu a ti m’emeli Jehovha ni ku a ti womba-womba ngu ditina dakwe.—Mat. 21:9; Luka 13:35.

8. Ngu kutxani Jesu a di dhanwi ku Dipswi hambi mbimo yi a nga si se ta hamafuni? (Eksodha 23:20, 21)

⁸ Bhiblia yi womba ti to Jesu “Dipswi,” nguku Jehovha a thumisile Jesu kasi ku ningela didungula ka tingilozi ni vathu. (Joh. 1:1-3) Ti nga maha Jesu i di ngilozi yi yi nga rumwa ngu Jehovha kasi kuya khatalela Vaisrayeli mbimo yi va nga ti txiwulani. Jehovha a gete Vaisrayeli ti to ve engisa ngilozi yile, e tshumela e va gela ni txivangelo txa kona, ene a ti khene: “Nguku yona yi na womba ngu ditina dangu.”a (Lera Eksodha 23:20, 21.) Jehovha a wombile toneto nguku Jesu muemeli wakwe, ni ku ngene a lwelako ni kubasisa ditina da Tate wakwe.

“TATA, DHUMISA DITINA DAKO”

9. Jesu a ti kombisile kutxani ti to a ti ninga lisima ditina da Jehovha?

⁹ Ngaha hi nga ti wona ngu kona, ditina da Jehovha i ti dona da lisima ngutu ka Jesu hambi a si se ta hamafuni. Totshe ti Jesu a nga ti maha hamafuni ti kombisile nzila yi ditina da Jehovha i nga ti da lisima ngu yona kwakwe! Magwito ka mthumo wakwe, Jesu a kombete Jehovha atxi: “Tata, dhumisa ditina dako.” Ngu txikuluveta, Jehovha a xamute Jesu ngu dipswi do guleka a di di nga ti fana ni txidhinda a txi khene: “Ani se ni di dhumisile, ni ku ni na tshumela ni di dhumisa kambe.”—Joh. 12:28.

10-11. a) Jesu a di sawulekisile ngu nzila muni ditina da Jehovha? (Wona ni mfota) b) Ngu kutxani ditina da Jehovha di di fanete kubasiswa ni ku sawulekiswa?

¹⁰ Jesu a tshumete a sawulekisa ditina da Tate wakwe. Ngu nzila muni? Ngu kuwombawomba ngu tifanelo ta Tate wakwe, ni timhaka to xamatisa ati a ti mahako. Kambe eto ti sa enela. Ditina da Jehovha di ti lava kutshumela di sawulekiswa ni kubasisa nduma yakwe.b Jesu a kombisile nzila yi ditina da Jehovha i nga ti da lisima ngu yona mbimo yi a nga gondisa vagondiswa vakwe kumaha mkombelo. Ene a wombile tiya: “Tata wathu u ku nzumani, ditina dako di na basiswe.”—Mat. 6:9.

¹¹ Ngu kutxani ditina da Jehovha di txi lava kubasiswa ni ku sawulekiswa? Nguku Sathani a wombile makuhu ngu Jehovha Txizimu khe jaradhi ka Edheni. Ene a wombile ti to Jehovha muhembi ni ku a ti sisela Adhamu ni Evha tatinene. (Gen. 3:1-5) Sathani a tshumete a womba ti to nzila yi Jehovha a nga ti fuma ngu yona i si nga yayinene. Makuhu oneyo ma mahile ti to vathu ve pimisa kubiha ngu Jehovha. Ngu kutsimbila ka mbimo, ka masiku a Jobe Sathani a hembete malanda a Jehovha ngu kuwomba ti to ma m’thumela ngu kulava ku wuyelwa. Ene a tshumete e hembela malanda a Jehovha ngu kuwomba ti to ngaku ma txo manana ni sikarato ma nge sikoti kusimama ma di thembekile kwakwe. (Jobe 1:9-11; 2:4) Ngu kutsimbila ka mbimo, ti ndi na tikomba to i mani wu i ku tsotsi ka Jehovha ni Sathani.

“ANI NI NINGELA WUTOMI WANGU”

12. Nji txani a txi Jesu a nga ti tiemisete kumaha ngu mhaka ya lirando li a nga ti nalo ngu ditina da Jehovha?

¹² Ngu mhaka ya lirando li Jesu a ku ngu Jehovha, ene a ti lava kumaha totshe ti nga tikotaku kasi kusawulekisa ni ku basisa ditina da Jehovha. Ene a ti tiemisete kufa kasi kukombisa ti to Jehovha a sawulekile, ni ku nzila yi a mahako ngu yona to maha, ngu yona i ku ya yinene. Ngu toneto, a wombile tiya: “Ani ni ningela wutomi wangu.”c (Joh. 10:17, 18) Kuhambana ni Adhamu ni Evha va nga tshuralela Jehovha ve ema ni Sathani, Jesu a ti tiemisete ku ta hamafuni ni ku ta kombisa lirando li a nga ti nalo ngu Tate wakwe. Ene a mahile toneto ngu kuengisa Jehovha ka totshe ti a nga ti ti womba ni ku ti maha. (Vaheb. 4:15; 5:7-10) Jesu a simamile a di thembekile kala e dawa ka phande ya xanisa. (Vaheb. 12:2) Ngu nzila yoneyo, ene a kombisile lirando lakwe ngu Jehovha ni Ditina dawe.

13. Ngu kutxani Jesu i nga ti ene dwe a ndi no kombisa ngu nzila yo hetiseka ti to Sathani m’hembi? (Wona ni mfota.)

¹³ Totshe ti Jesu a nga ti maha ti ti vekile hakubasani ti to muhembi i Sathani i si nga Jehovha! (Joh. 8:44) A walo m’thu mmwani a nga ti m’ziva kwati Jehovha kupinda Jesu. Se ngaku ti Sathani a nga ti womba ngu Jehovha i ti ko va ditshuri, Jesu a di ti zivile. Kambe totshe ti Sathani a nga ti womba ngu Jehovha i ti makuhu. Ngu toneto, Jesu a simamile a di thembekile, e lwela ditina da Jehovha. Hambi mbimo yi ti nga ti tikomba nga Jehovha a ti ko m’leka, Jesu ati tiemisete kufa kupinda kutshuralela Jehovha, Tate wakwe wa lirando.—Mat. 27:46.d

“NI HETISILE MTHUMO WU U NGA NI NINGA”

14. Jehovha a m’hakelisile kutxani Jesu ngu kuva a di thembekile?

¹⁴ Ka mkombelo wu a nga wu maha ka wusiku wakwe wo gwita a si se kudawa, Jesu a wombile tiya: “Ni hetisile mthumo wu u nga ni ninga.” Jesu a ti ti ziva to ngaku a txi simama a di thembekile, Jehovha a ndi na m’hakela. (Joh. 17:4, 5) Phela a si njo ti kanganyisa ku va a di pimisile ngu nzila yoneyo nguku Jehovha a ndi na m’wusa. (Mith. 2:23, 24) Ngu toneto Jehovha a nga maha, ene a wusile Jesu ni ku m’ninga txikhalo txo guleka nzumani. (Vaf. 2:8, 9) Ngu kutsimbila ka mbimo, Jesu a vite Mkoma wa Mfumo wa Txizimu. Mfumo wonewo wu na ta hi mahela txani? Xamulo hi yi mana ka mapswi a ya Jesu a nga ma womba mbimo yi a nga ti gondisa vagondiswa vakwe kumaha mkombelo, aya ma ku: “Wu nate Mfumo wako. Ku na maheke kuranda kwako hamafuni nga nzumani.”—Mat. 6:10.

15. Ngu tihi timwani ti Jesu a no ti maha?

¹⁵ I singa kale, Jesu a na lwa ni valala votshe va Txizimu ka yimbi ya Armagedhoni ni ku lovisa vabihi. (Mtu. 16:14, 16; 19:11-16) Msana keto, Jesu a na vinza Sathani “diphalani ko hokoma” aha a no mbi sikota kumaha txilo, ti no fana ni kuva a di fite. (Mtu. 20:1-3) Jesu a na tisa kurula hamafuni ni kuvhuna vathu ti to ve va vo hetiseka ka Mfumo wakwe wa 1.000 wa Malembe. A na tshumela e wusa vafi ni kumaha mafu otshe me va paradhesi. Ngu magwito, txikongomelo txa Jehovha txi na hetiseka!—Mtu. 21:1-4.

16. Wu na ta va njani wutomi msana ka 1.000 wa Malembe?

¹⁶ Wu na tava njani wutomi msana ka 1.000 wa Malembe? Txionho ni kwambi hetiseka si na fuviswa. Ngu toneto, kha hi na mbiswa kambe hi onha ni ku hi na mbiswa kambe hi lava mterulo mwendo vaprista kasi ku hi va vangana va Jehovha. Ngu magwito, “mlala wo gwitisa i ku lifo a na fuviswa.” Votshe vafi va na tava va di wusilwe ni ku hotshethu hi na tava vo hetiseka.—1 Vak. 15:25, 26.

17-18. a) Ngu tihi ati ti no ta maheka magwito ka Mfumo wa 1.000 wa malembe? b) Ngu tihi ti Jesu a no ta maha magwito ka Mfumo wakwe? (1 Vakorinto 15:24, 28) (Wona ni mfota.)

¹⁷ Ngu tihi timwani to sawuleka ti ti no maheka magwito ka Mfumo wa 1.000 wa Malembe? Kha ngaho ni wamweyo a no ta kanakana to Jehovha Txizimu txo sawuleka ni txo lulama. Ngu kutxani? Ka jaradhi ya Edheni, Sathani a lumbetile Jehovha a txi hi nga Mkoma wamnene ni ku m’hembi. Kukhukhela ka mbimo yoneyo, ditina da Jehovha di sawulekisilwe makhambi o tala ngu vale va m’dhumisako ni ku m’xonipha. Kambe kugumani ka Mfumo wa 1.000 wa malembe, nduma yi na ta va yi di basisilwe. Ngu ditshuri, Jehovha wa kombisa ti to i Tate wa lirando.

¹⁸ Ngu magwito, ti na tava hakubasani ti to Sathani ngene i ku tsotsi. Ngu tihi ti Jesu a no ta maha magwito ka 1.000 wa malembe? Ina ene a na ta fana ni Sathani e tshuralela Jehovha? Nadha! (Lera 1 Vakorinto 15:24, 28.) Jesu a na tshumetela Mfumo ka Tate wakwe ni ku tiveka hahatshi ka wulawuli wakwe. Ngu ditshuri, kuhambana ni Sathani, Jesu a tiemisete kuningela sotshe ngu mhaka ya lirando li a ku nalo ngu Jehovha.

19. Ditina da Jehovha nda lisima ka Jesu ngu nzila muni?

¹⁹ Ta pfisiseka kuva Jehovha a di ningile ditina dakwe Jesu, nguku ene muemeli wo hetiseka wa Jehovha. Ngu ditshuri, ka Jesu ditina da Jehovha ngu dona da lisima ngutu kupinda sotshe, aha koza e ningela ni wutomi wakwe ngu mhaka ya dona. Ngu magwito ka Mfumo wakwe wa 1.000 wa Malembe a na ningela sotshe ka Tate wakwe. Hi nga txi etetelisa kutxani txikombiso txa Jesu? Hi na ta txhuka xamulo ya kona ka gondo ayi yi londiselako.