GONDO 23
NDANDO 2 Ditina dako u Jehovha
Ina ditina da Jehovha nda lisima kwako?
“‘Anu mi tifakazi tangu,’ kuwomba MKOMA.”—ISAYA 43:10.
TXIKONGOMELO TXA GONDO
Ngu wona ti hi nga ti mahako kasi kubasisa ni kusawulekisa ditina da Jehovha.
1-2. Hi ti zivisa kutxani to ditina da Jehovha nda lisima ka Jesu?
KHA txi ngaho txi i ku txa lisima ngutu ka Jesu kupinda ditina da Jehovha, ni ku kha ngaho wu a emelako ditina da Jehovha kupala Jesu. Ngaha hi nga tiwona ngu kona ka gondo yi yi nga pinda, Jesu a ti tiemisete kufa kasi kukombisa to Jehovha a sawulekile ni ti to totshe ti a ti mahako ti hetisekile. (Marku 14:36; Vaheb. 10:7-9) Msana ka Mfumo wakwe wa 1000 wa Malembe, Jesu a na tshumetela Mfumo ka Jehovha nguko a lava ti to Tate wakwe e amukela wotshe wudhumo. (1 Vak. 15:26-28) Nzila yi Jesu a ningako lisima ngu yona ditina da Jehovha yi kombisa lirando li a ku nalo ngu Tate wakwe.
2 Jesu a tile hamafuni kasi ku ta gela vathu totshe ti Jehovha a lavako ve tiziva ngu ngene. (Joh. 5:43; 12:13) Ene a zivisile ditina da Jehovha ka valondeteli vakwe. (Joh. 17:6, 26) A tshumete e maha sidiwukiso ni kugondisa vathu ngu ditina da Jehovha. (Joh. 10:25) A txi womba-womba ngu vagondiswa vakwe, Jesu a kombete Jehovha atxi: “Tate wo Sawuleka va wonelele ngu mhaka ya ditina [dako].” (Joh. 17:11) Ti ha kubasani ti to ka Jesu, ditina da Jehovha nda lisima ngutu kupinda sotshe. Se hi nga pimisa ngu tiya, ti nga kotekisa kutxani ku m’thu e va Mkristu na a si di zivi ditina da Jehovha hambi ku di thumisa?
3. Hi na bhula ngu txani ka gondo yiya?
3 Aku hi ku Makristu a ditshuri, hi etetela Jesu ngu kukombisa lirando ni txixonipho ngu ditina da Jehovha. (1 Pedro 2:21) Ka gondo yiya, hi na wona ti to ngu kutxani vathu va va txhumayelako “mahungu a manene a Mfumo” va txi dhanwa ngu ditina da Jehovha. (Mat. 24:14) Hi na tshumela hi wona to hi nga ti kombisisa kutxani to ditina da Jehovha nda lisima ngutu kwathu.
“VATHU VA VA NO DHANWA NGU DITINA DA TXONA”
4. a) Ngu tihi ti Jesu a nga gela vagondiswa vakwe asi se tshumela e ya nzumani? b) Ngu txihi txiwotiso txi hi no bhula ngu txona konku?
4 Asi se tsula nzumani, Jesu a gete tiya vagondiswa vakwe: “Kambe mbimo yi mi no amukela moya wo sawuleka mi na va ni mtamo, ni ku mi na va tifakazi tangu Jerusalema, kotshe Judheya, ni Samariya kala magemeta-mitshi ka ditiko.” (Mith. 1:8) Eto ti womba ti to mahungu a manene ma ndi na txhumayelwa ka makhalo otshe, i singa Israyeli dwe. Ngu kutsimbila ka mbimo, vathu va matiko otshe va ndi na va ni mkhanjo wo va vagondiswa va Jesu. (Matt. 28:19, 20) Ina u ti pfisisile mbimo yi Jesu a nga khene: “Mi na va tifakazi tangu.” Ina vagondiswa vava vaphya ti ndi na lava ve ziva ditina da Jehovha mwendo va ndi no va tifakazi ta Jesu basi? Xamulo ya txiwotiso txiya hi na yi mana ka dibhuku da Mithumo kapitulo 15.
5. Ngu tihi ti vapostoli ni madhota khe Jerusalema va nga ti maha kasi kukombisa ti to votshe vathu va fanete kuziva ditina da Jehovha? (Wona ni mfota.)
5 Ngu 49 E.C., vapostoli ni madhota va tshanganile Jerusalema kasi kubhula ngu ti ava i nga singa Vajudha va ngadi fanete ku ti maha kasiku ve va Makristu. Magwito ka mtshangano wonewo, Jakobe mnanda wa Jesu a wombile tiya: “[Pedro] a wombawombile ngu nzila yi Txizimu txi nga khumbula ngu yona vamatiko ni ku va sawula kasiku ve dhanwa ngu ditina da Txona.” Se Jakobe a txi womba-womba ngu ditina da mani? Atxi womba-womba ngu mapswi a mprofeti Amosi, a ti khene: “Kasiku vathu ava va nga sala ve lava Jehovha ngu mbilu yotshe kumweko ni vathu va otshe matiko ava va dhanwako ngu ditina dangu, kuwomba Jehovha.” (Mith. 15:14-18) Vagondiswa vonevo va vaphya, va ndi na gonda ngu Jehovha ni kutshumela ‘ve dhanwa ngu ditina dakwe.’ Eto ti womba ti to va ndi na zivisa vamwani ditina da Jehovha ni kudhanwa ngu ditina donedo.
Ka timbimo ta vapostoli mmidi wu wu fumako wu ti pfisisile to Makristu ma di fanete kuziwa ngu ditina da Jehovha (Wona paragrafu 5)
6-7. a) Ngu kutxani Jesu a di tile hamafuni? b) Ngu tihi timwani ta lisima ati ti nga maha Jesu e ta hamafuni?
6 Ditina da Jesu di womba ti to “Jehovha m’hulukisi.” Eto ta pfala nguko Jehovha a thumisile Jesu kasi kuhulukisa votshe va va kombisako likholo. Jesu a tile hamafuni kasi kuta ningela wutomi wakwe ngu mhaka ya vathu. (Mat. 20:28) Aku Jesu a nga ningela digandelo di va mterulo, a mahile ti koteka ti to votshe vathu ve va ni mkhanjo wo hulukiswa ni ku ve ta mana wutomi wo mbi guma.—Joh. 3:16.
7 Kambe ngu kutxani vathu va nga txi lava kuhulukiswa? Ngu mhaka ya ti ti nga humelela jaradhi ka Edheni. Nga ha hi nga tiwona ngu kona ka gondo yi yi nga pinda, Adhamu ni Evha va tshuralete Jehovha, se va luzile mkhanjo wo hanya ngu ha ku si gumiko. (Gen. 3:6, 24) Kambe Jesu a tile hamafuni kasi ku ta maha timhaka ta lisima ngutu kupinda kuhulukisa vathu. Sathani a ti lumbetile Jehovha timhaka to thisa ngutu. (Gen. 3:4, 5) Ngu toneto, kuhulukiswa ka vathu ku ti pata mhaka ya lisima ngutu i ku kusawulekiswa ka ditina da Jehovha. Jesu i ti muemeli wa Jehovha ni ku a mahile kudhunda ka Jehovha ngu nzila yo hetiseka. Ngu toneto, ene i ti m’thu wu a nga ti faneleka ngutu kupinda votshe kasiku e basisa ditina da Jehovha.
Se hi nga pimisa ngu tiya, ti nga kotekisa kutxani ku m’thu eva Mkristu na a si di zivi ditina da Jehovha hambi ku di thumisa?
8. Ngu tihi ti votshe va va kholwako ka Jesu va fanelako ku ti ziva?
8 Votshe ava va nga ti lava kuva valondeteli va Jesu, Vajudha ni va i nga singa Vajudha, ti txi lava ve kholwa to Jehovha ngene Txisima txa kuhulukiswa kwawe. (Joh. 17:3) Kufana ni Jesu, vona va ndi na dhanwa ngu ditina da Jehovha. Ti txi lava ve tshumela ve ziva lisima la kusawulekiswa ka ditina donedo, nguko kuhulukiswa kwawe ku txi dhependerwa ngu toneto. (Mith. 2:21, 22) Se votshe valondeteli vo thembeka va Jesu ti txi lava ve gonda ngu Jehovha ni Jesu. Ta pfala kuva Jesu a di minyetile mkombelo wakwe ngu mapswi ya ma ku ka Johani kapitulo 17 aya ma ku: “Ani ni zivisile ditina dako kwawe, ni ku na simama ni di zivisa kasiku lirando li u nga ni randa ngu lona li ti komba kwawe ni ku ani ni va ni wumwewo navo.”—Joh. 17:26.
“ANU MI TIFAKAZI TANGU”
9. Hi nga ti kombisisa kutxani ti to hi teka ditina da Jehovha i di da lisima ngutu kwathu?
9 Kala hawa, hi woni ti to votshe va va lavako kuva valondeteli va Jesu va fanete kusawulekisa ditina da Jehovha. (Mat. 6:9, 10) Ditina da Jehovha di fanete ku va da lisima ngutu kwathu kupinda sotshe. Hi nga kombisa toneto ngu ti hi ti mahako ka wutomi wathu. Se hi nga maha txani kasi kusawulekisa ditina da Jehovha ni kukombisa to Sathani m’hembi?
10. Ngu wuhi wulamuli wu wu txhamuselwako ka dibhuku da Isaya kapitulo 42-44? (Isaya 43:9; 44:7-9) (Wona ni mfota.)
10 Ka Isaya 42 kala 44, hi gonda ngu ti hi nga ti mahako ka si kusawulekisa ditina da Jehovha. Ka makapitulo oneyo, Jehovha a ramba votshe vale va si mkhozeliko kasi ku ta kombisa ti to sizimu sawe nza ditshuri. Ene a tshumela e ramba tifakazi kasi ku ta kombisa wufakazi wa ti to sizimu sawe siho ngu ditshuri. Kambe votshe va feyite!—Lera Isaya 43:9; 44:7-9.
Ti fana ni ku hi di tribhunali, se hi ni mikhanjo ya yingi yo emela ditina da Jehovha (Wona paragrafu 10)
11. Ngu tihi ti Jehovha a nga gela vathu vakwe ti ku ka Isaya 43:10-12?
11 Lera Isaya 43:10-12. A txi womba-womba ni vathu vakwe, Jehovha a khene: “Anu mi tifakazi tangu, . . . Ani ni Txizimu.” Ngu msana ene a va kombela ti to ve xamula txiwotiso txiya: “Ina txiho tximwani Txizimu hahanze kwangu kani?” (Isaya 44:8) Se i lungelo ya hombe kwathu kuxamula txiwotiso txiya. Ati hi ti wombako ni ti hi ti mahako ta ningela wufakazi wa ti to Jehovha ngene dwe i ku Txizimu txa ditshuri. Ditina dakwe di gulekile kupinda matina mamwani. Nzila yi hi hanyako ngu yona ya kombisa ti to ha mdhunda Jehovha ni ku ha thembeka kwakwe ti singa ni mhaka ni mkuzetelo wa Sathani. Ngu nzila yoneyo, hi ni mkhanjo wo vhuneta ko sawulekisa ditina da Jehovha.
12. Wuprofeti wu wu ku ka Isaya 40:3, 5 wu hetisekile ngu nzila muni?
12 Mbimo yi hi sawulekisako ditina da Jehovha, hi etetela Jesu Kristu. Mprofeti Isaya a wombile to ku ndi na ta m’thu wu a ndi no “longisela nzila ya Mkoma.” (Isaya 40:3) Ti hetisekile ngu nzila muni toneto? Johani M’bhabhatisi a lungiselete Jesu nzila, awu a nga ta ni ku ta womba-womba ngu ditina da Jehovha. (Mat. 3:3; Marku 1:2-4; Luka 3:3-6) Isaya a tshumete e profeta tiya: “Wudhumo wa Mkoma wu na wonekiswa.” (Isaya 40:5) Ti mahisile kutxani toneto? Mbimo yi Jesu a nga ta hamafuni, a emete Jehovha ngu kuhetiseka nga o va Jehovha apune a ngadi tile hamafuni.—Joh. 12:45.
13. Hi nga m’etetelisa kutxani Jesu?
13 Kota Tifakazi, athu ha lwela ditina da Jehovha. Ha gela votshe mayelano ni timhaka to xamatisa ati Jehovha a ti mahako. Kasiku hi va Tifakazi ta tinene, hi fanete kuwombawomba ngu totshe ti Jesu a nga ti maha kasi kusawulekisa ditina da Jehovha. (Mith. 1:8) Yi walo Fakazi yimwani ayi yi nga lwela ditina da Jehovha kupala Jesu, ni ku athu hi etetela txikombiso txakwe. (Mtu. 1:5) Se ngu tihi a ti hi nga ti mahako kasi kukombisa ti to ditina da Jehovha nda lisima ngutu kwathu?
HI NGA TI KOMBISISA KUTXANI TI TO DITINA DA JEHOVHA NDA LISIMA KWATHU?
14. Hi ti pfisa kutxani ngu ditina da Jehovha? (Masalmo 105:3)
14 Athu ha tiguleta ngu ditina da Jehovha. (Lera Masalmo 105:3.) Jehovha wa tsaka ngutu mbimo yi hi kombisako to ha tiguleta ngu ditina dakwe. (Jer. 9:23, 24; 1 Vak. 1:31; 2 Vak. 10:17) I lungelo kwathu “kudhumisa ditina da Jehovha” ni kulwela nduma yakwe. Kha ha fanela ku va ni tingana to gela vakolega vathu va mthumoni, va txikolwani mwendo va vhizinyo ti to hi Tifakazi ta Jehovha. Dhawulosi kha ti lavi to hi gela vamwani ditina da Jehovha. (Jer. 11:21; Mtu. 12:17) Ngu ditshuri, Sathani ni votshe va va hangalasako makuhu akwe va lava ti to vathu ve divala ditina da Jehovha. (Jer. 23:26, 27) Kambe ngu mhaka ya lirando li hi ku nalo ngu Jehovha, athu ha simama hi m’dhumisa “otshe masiku.”—Mas. 5:11; 89:16.
15. Ti womba txani kudhana ditina da Jehovha?
15 Athu ha simama hi dhana ditina da Jehovha. (Joy. 2:32; Var. 10:13, 14) Kudhana ditina da Jehovha ti pata ta tingi kupinda ku di ziva ni ku di thumisa. Athu ha tiziva to Txizimu m’thu wo zumbisa kutxani, ha mthemba, ha lava txivhuno txakwe ni mkongomiso wakwe. (Mas. 20:7; 99:6; 116:4; 145:18) Hi tshumela hi womba-womba ngu ditina dakwe ni tifanelo takwe ka vamwani, hi vhuna vathu kasiku ve maha kutxitxa ka wutomi wawe ti to ve tsakisa Txizimu ni ku mana kuhulukiswa.—Isaya 12:4; Mith. 2:21, 38.
16. Hi nga ti kombisisa kutxani to Sathani m’hembi?
16 Athu hi tiemisete kuxaniseka ngu mhaka ya ditina da Jehovha. (Jak. 5:10, 11) Mbimo yi hi wonisanako ni sikarato kambe hi simama hi di thembekile ka Jehovha, hi kombisa ti to Sathani m’hembi. Ka timbimo ta Jobe, Sathani a wombile tiya mayelano ni vathu va va thumelako Jehovha: “Sotshe sile wamwamna a ku naso, a na diha ngu wutomi wakwe.” (Jobe 2:4) Sathani a txi lava kuwomba ti to vathu va no thumela Jehovha ngako txa wutomi txi txi va tsimbilela. Kambe ngako txi txi bhedha va na tsukula Jehovha. Jobe a kombisile to Sathani a ti ko tidyela dikanju ha mmidi. Nathu hi ni lungelo yo kombisa to ti si nga ni mhaka ni ti Sathani a hi mahelako, hi na mbi thuka hi tshuralela Jehovha. Hi nga tsaniseka ti to Jehovha a na simama e hi khatalela ni ku hi wonelela ngu mhaka ya ditina dakwe.—Joh. 17:11.
17. Ngu kuya ngu 1 Pedro 2:12, ngu tihi timwani hi nga ti mahako kasi kudhumisa ditina da Jehovha?
17 Athu ha xonipha ditina da Jehovha. (Mav. 30:9; Jer. 7:8-11) Aku hi ku va emeli va Jehovha ni kudhanwa ngu ditina dakwe, simaho sathu si nga dhumisa mwendo kunyetisa ditina da Jehovha. (Lera 1 Pedro 2:12.) Se athu hi lava kumaha totshe ti hi nga tikotako, kasiku hi dhumisa ditina da Jehovha ngu mapswi ni ngu simaho sathu. Hambiku hi nga mbi hetiseka hi nga sikota kudhumisa ditina da Jehovha.
18. Ngu yihi nzila yimwani yi hi nga kombisako ngu yona to hi teka ditina da Jehovha i di da lisima kwathu? (Tshumela u wona ni nota.)
18 Athu ha khatala ngutu ngu ditina da Jehovha kupinda ti vathu va ti wombako ngu ngathu. (Mas. 138:2) Ngu nzila muni? Vathu kha va tsaki ni ku va womba-womba kubiha ngu ngathu mbimo yi hi mahako ati ti tsakisako Jehovha.a Wona ti ti nga mahekela Jesu. Ene a ti tiemisete kudawa ngu nzila yo thisa nga o va txigevenga kasiku e dhumisa ditina da Jehovha. Jesu ‘kha khatala ngu kurukwa’ a ha ko kha karateka ngu ti vathu va ndi no ti pimisa ngu ngene. (Vaheb. 12:2-4) Txikongomelo txakwe i di kumaha kuranda ka Jehovha.—Mat. 26:39.
19. U ti pfisa kutxani ngu ditina da Jehovha, ni ku ngu kutxani?
19 Athu ha tiguleta ngu mhaka ya ditina da Jehovha ni ku i lungelo ya hombe ngutu kudhanwa kota Tifakazi takwe. Ngu toneto, hi tiemisete kuruketelwa ni kupoyilelwa ngu vathu vamwani. Kwathu, ditina da Jehovha nda lisima ngutu kupinda ti vathu va ti wombako ngu ngathu. Ngu toneto, hi tiemisete kusimama hi dhumisa Jehovha ti si nga ni mhaka ni wutsatsaratsatsara wu Sathani awu mahako kasi ku hi tsivela. Hi txi maha toneto, hi na kombisa ti to ditina da Jehovha nda lisima ngutu kwathu, ngaha Jesu a nga maha ngu kona.
NDANDO 10 Dhumisani Jehovha Txizimu txhathu!
a Makhatoni, mbimo yi Jobe wamwamna wo thembeka a nga luza vanana vakwe ni tithomba takwe, ene “kha onha, hambi kulumbeta Txizimu.” (Jobe 1:22; 2:10) Kambe mbimo yi a nga lumbetwa ngu vangana vakwe va vararu to a mahile to biha, a khatile kutiemelela ni kuwomba “mapswi o huma nzilani.” Ene a karatekile ngutu ngu ti vathu va ndi no ti womba ngu ngene kupinda kusawulekisa ditina da Jehovha.—Jobe 6:3; 13:4, 5; 32:2; 34:5.