U nga txi ningelisa kutxani txialakanyiso txa txinene?

1. I mani awu a fanelako kuningela txialakanyiso, ni ku ngu kutxani?

INA wa ti dhunda kuningela txialakanyiso? Vamwani ta va hehukela kumaha toneto kambe vamwani ta va karatela. Ti singa ni mhaka ni ti u tipfisako tona, mbimo yimwani ti na lava u ningela txialakanyiso. Ngu kutxani? Nguku Jesu a wombile ti to vagondiswa vakwe va ndi na ziwa ngu kukombisa lirando ka vamwani. (Joh. 13:35) Nzila yimwani yo kombisa lirando lonelo ngu ningela txialakanyiso ka vanathu ngaku ti txi laveka. Dipswi da Txizimu di womba ti to “wungana wa wunene,” wu nga ta ngu ka “txialakanyiso txa txinene.”—Mav. 27:9, NM.

2. Ngu tihi ati madhota ma fanelako kuziva ku ti maha? (Wona ni dikwadru adi di ku “Sialakanyiso asi si ningelwako ka mitshangano ya hagari ka divhiki.”)

² Madhota ngu ona ngutu-ngutu ma fanelako kuziva kuningela sialakanyiso sa sinene. Jehovha ni Jesu va avete vavamna vava kasiku ve khatalela dibanza. (1 Pedro 5:2, 3) Madhota ma maha toneto ngu kuveka madhixkursu aya ma patako sialakanyiso sa mu ka Bhiblia. Vona va tshumela ve ningela txialakanyiso ka mmweyo ni mmweyo wathu ngaku ti txi laveka, kupata ni vale va nga hola ngu didhawa da moya ti to ve tshumela ka Jehovha. Hotshethu kupata ni madhota, hi nga maha txani kasiku hi ningela txialakanyiso txa txinene?

3. a) Hi nga maha txani kasiku hi sikota kuningela txialakanyiso txa txinene? (Isaya 9:6; wona ni dikwadru adi di ku “Etetela Jesu mbimo yi u ningelako txialakanyiso.”) b) Hi na bhula ngu txani ka gondo yiya?

³ Hi nga gonda kuningela txialakanyiso txa txinene ngu kuwona sikombiso sa mu ka Bhiblia, ngutu-ngutu txikombiso txa Jesu. Txithopo tximwani atxi Jesu a nga ningwa i “Mwalakanyisi Wamnene.” (Lera Isaya 9:6, NM.) Ka gondo yiya, hi na wona ati hi fanelako ku ti maha ngaku ti txi lava hi ningela txialakanyiso atxi hi nga mbi kombelwa ni ti hi nga ti mahako ngaku hi txi ningela txialakanyiso atxi hi nga kombelwa. Hi na tshumela hi wona lisima lo ningela txialakanyiso ngu mbimo ni ngu nzila ya yinene.

NGAKO U TXI NINGELA TXAIALAKANYISO ATXI U NGA KOMBELWA

4-5. Ngu tihi ati hi fanelako ku ti wotisa ngaku m’thu a txi hi kombela txialakanyiso? Ningela txikombiso.

⁴ U nga maha txani ngaku va txi kukombela txialakanyiso? Ti nga maha u tsaka ngu kuziva ti to m’thu eneyo wa kuthemba ni ku u nga lava ku mninga txialakanyiso ngu txikuluveta. Kambe txo khata, u fanete ku ti wotisa tiya: ‘Ina ni ni txiperiyensiya ka mhaka yiya kasiku ni ningela txialakanyiso?’ Ti nga maha nzila ya yinene yo vhuna m’thu eneyo i di ku mkongomisa ka m’thu wu aku ni txiperiyensiya.

⁵ Ngu txikombiso, pimisa ngaku u di ni mngana awu a nga tumbula ti to a ni malwati o kari. Ene a kugela to se a xoletete tinzila to thuma malwati oneyo, se a kukombela ti to u mvhuna kusawula nzila ya yinene yo thuma malwati akwe. Phela ti nga maha u di tsakete nzila yo kari yo thuma malwati aya a ku nawo, kambe awe khu nga dhokodhela. I di toneto, txa txinene txi u nga txi mahako ngu gela mngana wako to eya lavetela dhokodhela kasiku e mninga txivhuno a txi atxi lavako.

6. Ngu kutxani hi sa fanela kuva ni magwava mbimo yi hi kombelwako txialakanyiso?

⁶ Mbimo yimwani hi nga tipfa hi txi faneleka kuningela txialakanyiso, kambe ndatinene kwa mbi va ni magwava. Ngu kutxani? Nguku dibhuku da Mavingu 15:28 di womba tiya: “Mbilu ya m’thu wo lulama ya pimisa ti a no xamula.” U nga maha txani ngaku u txi pimisa to wa yi ziva xamulo? Ndatinene kutiha mbimo yo maha wuxolisisi, u maha mkombelo ni ku alakanyisisa. U txi maha toneto, u na tsaniseka ti to xamulo ayi u no ningela ya yelana ni mapimiselo a Jehovha ka mhaka yoneyo. He woneni txikombiso txa mprofeti Natani.

7. Hi gonda txani ka txikombiso txa mprofeti Natani?

⁷ Ditshiku dimwani, Dhavhidha a gete mprofeti Natani ti to atxi lava kuakela Jehovha dithempele. Ngu txikuluveta, Natani a gete Dhavhidha to etxo txisungo txa txinene. Kambe Natani a ti fanete kutiha mbimo kasi kuya wotisa mawonelo a Jehovha ngu mhaka yiya. Ngu kutxani? Nguku Jehovha asi ti lavi to Dhavhidha e aka dithempele. (1 Mak. 17:1-4) Txikombiso txiya txi hi gondisa ti to ngaku mwanathu a txi hi kombela txialakanyiso wutxhari ‘kuswela kuwombawomba.’—Jak. 1:19.

8. Ngu txihi txivangelo tximwani atxi txi hi mahako hi pimisa kwati hi si se ningela txialakanyiso?

⁸ Ku ni txivangelo tximwani atxi txi hi mahako hi lava kupimisa kwati hi si si kuningela txialakanyiso ka m’thu. Pimisa ngu m’thu awu u nga mninga txialakanyiso, se ngu msana e maha txisungo atxi txi no m’tisela wuyelo yo biha. Phela, nawe u nga va ni mnandu ngu mhaka ya wuyelo yo biha ya txisungo txonetxo. Ngu ditshuri, ndinene kupimisa kwati hi si se ningela txialakanyiso.

NGAKU U TXI NINGELA TXIALAKANYISO ATXI U NGA MBI KOMBELWA

9. Ngu tihi ati madhota ma fanelako kutsaniseka ka tona ma si se ningela txialakanyiso? (Vagalatiya 6:1, NM)

⁹ Mbimo yimwani, madhota ti lava me ningela txialakanyiso ka mwanathu awu “a nga huma nzilani” hambi i di ti to mwanathu eneyo kha se kombela txivhuno. (Lera Vagalatiya 6:1, NM.) Kuhuma nzilani ti womba ku m’thu e maha txisungo txo i singa txa wutxhari, atxi txi no mmaha e gwitisa kumaha txionho txa hombe. Se, txikongomelo txa madhota ngu vhuna mwanathu eneyo ti to e simama e tsimbila ka nzila ayi yi yisako ka wutomi wo mbi guma. (Jak. 5:19, 20) Kambe, kasiku txialakanyiso txi va txa txinene, madhota ma fanete ku me tsaniseka ti to mwanathu eneyo a humile nzilani ngu ditshuri. Ona ma fanete kuziva ti to kuva m’thu a di mahile txisungo txo hambana ni txa vamwani kha ti lava kuwomba ti to txisungo txa m’thu eneyo kha txi tsakisi Jehovha. (Var. 14:1-4) Se, madhota ma nga txi ningelisa kutxani txialakanyiso ngaku ma txi tsaniseka ti to mwanthu a humile nzilani ngu ditshuri?

10-12. Ngu tihi ati madhota ma fenelako ku ti maha ngaku ma txi ya ningela txialakanyiso atxi ma nga mbi kombelwa? Ningela txikombiso. (Wona ni mifota.)

¹⁰ Phela ti nga ma karatela madhota kuningela txialakanyiso atxi ma nga mbi kombelwa. Ngu kutxani? Mpostoli Paulo a wombile ti to ti nga maha m’thu a si ti pfisisi ti to wa txi lava txialakanyiso. Se txo khata atxi madhota ma nga txi mahako, ngu lulamisela m’thu eneyo kasiku e amukela txialakanyiso.

¹¹ Kuningela txialakanyiso atxi u nga mbi kombelwa ti nga fana ni kuphaya mndonga ka wukhalo wa txihala. M’dimi a fanete kululamisela wukhalo wonewo a si si kuphaya mndonga. Se adi gwitile kuphaya a na wu regara kasiku wu kula. Nguha kufanako, didhota di fanete kululamisela mbilu ya wu di lavako ku mninga txialakanyiso. Ngu txikombiso, dona da lavetela mbimo ya yinene yo bhula ni mwanathu eneyo ni ku m’gela ti to da khatala ngu ngene, di tshumela di m’gela ti to di tsakela kubhula nayo ngu mhaka yo kari. Ngaku didhota donedo di ningelako txialakanyiso di txi ziwa kota m’thu wu a ku ni lirando ni wunene, ti na va hehukela vanathu kuamukela txialakanyiso txa dona.

¹² Mbimo yi didhota di bhulako ni mwanathu awu di lavako ku mninga txialakanyiso, dona da simama di lulamisela mbilu yakwe ngu ku m’gela ti to hotshethu ha onha ni ku ha si lava sialakanyiso. (Var. 3:23) Ngu mawombawombelo a manene ni a txixonipho, didhota da thumisa Bhiblia kasi kukomba mwanathu ati a nga ti maha ti kombisako ti to a humile nzilani. Msana kova mwanathu eneyo adi pfisisile ti to a humile nzilani, didhota da mtxhamusela ngu nzila yo hehuka ati a fanelako ku ti maha kasiku e tshumela e wuya nzilani. Ngu magwito, didhota nda ndunduzela mwanathu eneyo ngu timhaka tatinene ati a kotako ku ti maha ni ku wa maha nayo mkombelo.—Jak. 5:15.

13. Madhota ma nga ti zivisa kutxani ti to m’thu atxi pfisisile txialakanyiso?

¹³ Mbimo yimwani m’thu awu a ningwako txialakanyiso a nga txi pfisisa ngu nzila ayi i singako yona. Madhota ma nga maha txani kasiku eto ti si maheki? Ngu nzila ya wunene, madhota ma nga maha siwotiso mwanathu eneyo kasi kuwona to atxi pfisisile txialakanyiso ni ku m’gela ati a fanelako ku ti maha kasiku e txi thumisa.—Ekl. 12:11.

KUNINGELA TXIALAKANYISO NGU MBIMO YA KONA NI NGU NZILA YA YINENE

14. Ngu kutxani hi sa fanela kuningela txialakanyiso hi di henyile?

¹⁴ Hotshethu kha ha hetiseka, ngu toneto mbimo yimwani hi nga thuka hi maha mwendo kuwomba ati ti no henyisa vamwani. (Vakl. 3:13) Hambi Bhiblia ya womba ti to, mbimo yimwani hi nga henyiswa mwendo kuhenyisa vamwani. (Vaef. 4:26) Kambe hi fanete kuvayilela kuningela txialakanyiso hi di henyile. Ngu kutxani? “nguko, kuhenya ka m’thu kha kumahi kululama ka Txizimu.” (Jak. 1:20) Ngaku hi txi ninga txialakanyiso m’thu hi di henyile hi na wusa txivhunye. Eto kha ti lavi kuwomba to kha ha fanela kugela m’thu awu a nga hi henyisa ati hi ti pfisako tona. Kambe hi na sikota kuwombawomba nayo ngu nzila ya yinene ngaku ma di boxile. He woneni ati hi nga tigondako ka Elihu, awu a nga ninga Jobe txialakanyiso txa txinene.

15. Hi gonda txani ka txikombiso txa Elihu? (Wona ni mfota.)

¹⁵ Elihu a zumbile masiku amangi a txi engisela Jobe a txi ti emelela ka makuhu ya a nga txi lumbetwa ngu vangana vakwe va vararu. Elihu a txi mpfela wusiwana Jobe. Kambe, Jobe a txi ti emelela aha koza e womba-womba kubiha ngu Jehovha. Eto ti henyisile Elihu. Hambiketo, ene a emete dikhambi dakwe do womba-womba ni ku a wombawombile ngu nzila ya yinene ni ya txixonipho mbimo yi a nga txi ninga txialakanyiso Jobe. (Jobe 32:2; 33:1-7) Txikombiso txa Elihu txi hi gondisa ti to ndatinene kuningela txialakanyiso hi sa henya, ngu nzila ya lirando ni ya txixonipho.—Ekl. 3:1, 7.

SIMAMA U NINGELA NI KUAMUKELA SIALAKANYISO

16. Hi gonda txani ka Masalmo 32:8?

¹⁶ M’bhalo awu wu nga ñola msungo mhaka wa gondo yiya wu womba ti to Jehovha ‘a na hi gondisa ni ku hi komba nzila ayi hi fanelako ku yi londeta.’ (Lera Masalmo 32:8.) Eto ti kombisa ti to Jehovha mbimo yotshe wa hi vhuna. Ene wa hi ninga sialakanyiso ni ku hi vhuna ti to hi si thumisa. Etxo txikombiso txa txinene kwathu! Ngaku u di ni mkhanjo wo ninga txialakanyiso m’thu, etetela Jehovha ngu kutsanisa m’thu eneyo ni ku mvhuna ti to e maha sisungo sa wutxhari.

17. Ngu kutxani i di ta tinene kuva ni madhota aya ma hi ningako si alakanyiso so kongoma ni si si nga seketelwa amu ka Bhiblia? (Isaya 32:1, 2)

¹⁷ Ka masiku aya hi hanyako ka ona, hi na ti lava kuamukela ni kuningela sialakanyiso sa sinene. (2 Tim. 3:1) Madhota aya ma ningelako sialakanyiso so kongoma ni si si nga seketelwa amu ka Bhiblia, ma fana ni “lidhonga la mati ka makhalo a kuoma.” (Lera Isaya 32:1, 2.) Ha va bonga ngutu vangana vathu ava va si thaviko ku hi ninga sialakanyiso ngaku ti txi laveka. Mapswi awe ma “fana ni mihando ya silivhela amu ka txiya txa nzalama.” (Mav. 25:11) Se hotshethu ahi simameni hi sakulela wutxhari awu wu lavekako kasiku hi kota kuamukela ni kuningela sialakanyiso sa sinene.