‘ Awe u wa lisima ngutu’!

1-2. Nji txani atxi txi nga hi tsanisekisako ti to hi va lisima masoni ka Jehovha?

MALANDA a Jehovha nga lisima ngutu kwakwe. Kambe vamwani kha va kholwi ti to Jehovha ngu ditshuri wa va dhunda. Vamwani va tipfisa toneto nguku va nga ñolwa ngu nzila yo biha ngu vamwani, se ti va maha ve tipfa va si vhuni txilo. Ina nawe u ti pfa ngu nzila yoneyo? Nji txani atxi txi nga kuvhunako ti to u tsaniseka to u wa lisima ngutu masoni ka Jehovha?

² Atxi txi nga kuvhunako ngu alakanyisisa ni kugonda matimu ya mu ka Bhiblia aya ma kombisako nzila yi Jehovha a lavako ti to vathu ve ñolwa ngu yona. Jesu a txi xonipha vathu ni ku a txi va ñola ngu nzila ya yinene. Ngu kumaha toneto, ene a kombile vale va tipfako i si nga va txilo to kwakwe ni ka Tate wakwe Jehovha mba lisima ngutu. (Joh. 5:19; Vaheb. 1:3) Ka gondo yiya, hi na wona nzila yi Jesu a nga vhuna ngu yona vathu ku ve wona lisima li va ku nalo masoni ka Jehovha. Hi na tshumela hi wona ti to athu hi nga tsanisekisa kutxani to hi va lisima masoni ka Jehovha.—Hag. 2:7.

JESU A VHUNI VATHU KASIKU VE TIPFA I DI VA LISIMA

3. Jesu a ti va ñolisa kutxani vathu ava va nga txi mtshuketela a di khe Galileya?

³ Mbimo yi Jesu a nga ti txhumayela adi khe Galileya, vathu vo tala va mu tshuketete kasi ku ta pfa ati a nga ti ti gondisa ni kuhanyiswa. Jesu a pfisisile ti to vathu va ti “txheka ni kudyiswa khayi-khayi nga tinvuta to mbi na m’dyisi.” (Mat. 9:36) Vathangeli va wukhongeli va ti pimisa ti to vathu hi nga va txilo aha ko va nga va khatalela. Vona va ti tshumela ve dhana vathu kota ‘ava va nga ruketelwa.’ (Joh. 7:47-49) Kambe Jesu a ti ñola vathu ngu nzila ya yinene ni ku va xonipha. Ene a ti tiha mbimo yo va gondisa ni kuva hanyisa ka malwati awe. (Mat. 9:35) I singeto dwe, kasi kuvhuna vathu vo tala, Jesu a trenarile vapostoli vakwe ni ku va ninga mtamo ‘wo hanyisa valwati.’—Mat. 10:5-8.

4. Hi gonda txani ka nzila yi Jesu a nga ti ñola ngu yona vathu ava va nga txi tekelwa hahatshi?

⁴ Ngu kuñola vathu ngu nzila ya yinene ni ku va xonipha, Jesu a kombisile ti to kwakwe ni ka Tate wakwe, vathu a va ngu mtolovelo va tekelwako hahatshi mba lisima ngutu kwawe. I di ti to u khozela Jehovha kambe wa kana-kana ti to u wa lisima, ndatinene kualakanyisisa ngu nzila yi Jesu a nga ti ñola ngu yona vathu ava va nga ti tekelwa hahatshi ni va va nga ti lava kugondiswa ngu ngene. Kumaha eto ti na kuvhuna ku u wona lisima li u ku nalo masoni ka Jehovha.

5. Ngu tihi ti ti nga ti humelela wamsikati wu a nga ziwa ngu Jesu a di Galileya?

⁵ Jesu a si gondisi vathu kota mtxawa dwe, kambe a ti tshumela e vhuna mmweyo ngu mmweyo. Ngu txikombiso, ka mthumo wakwe wo txhumayela khe Galileya, ene a zivile wamsikati a wu a nga ti ni 12 wa malembe atxi xuphwa ngu malwati o humela mnoha. (Marku 5:25) Ngu kuya ngu mlayo wa Mosi, malwati oneyo ma ti mmaha eva m’thu wu a nga nyama ni ku awu a ndi no gweswa ngu ngene nene a ndi na nyama. Ngu toneto, ene a sa fanela kuzumba aha ku ku ni vathu vamwani ni ku ti nga maha a ti heta mbimo yo lapha adi ekha. I singeto dwe, ene a si na kukhozela Jehovha ni vathu vamwani a di disinagogani mwendo kuya ka mibuso. (Levhi 15:19, 25) Ngu ditshuri, wamsikati eneyo a ti xupheka ngutu.—Marku 5:26.

6. Wamsikati wule a nga ti ni malwati o humela mnoha a mahile txani kasiku e hanyiswa?

⁶ Wamsikati eneyo a nga txi karateka ngu mhaka ya malwati akwe atxi lava kuhanyiswa ngu Jesu. Kambe ene kha kombela Jesu ti to e mu hanyisa. Ngu kutxani? Ti nga maha a txi pfa tingana ngu mhaka ya malwati akwe, mwendo ti nga maha a txi thava kubhongelwa ni kuhingwa ngu Jesu ngu mhaka ya ku a nga ti nyamile ni ku a nga sa fanela kuzumba ni vathu vamwani. Ngu toneto, awule wa msikati a to ya gwesa simaha sa Jesu dwe a txi themba ti to ene a na hanya ka malwati akwe. (Marku 5:27, 28) Likholo lakwe li mmahile e hanyiswa ka malwati akwe. Msana keto, Jesu a wotisile ti to i mani a nga ti gwesile simaha sakwe, se awule wamsikati a wombile ti to ngene a nga ti si gwesile. Se Jesu a angulisile kutxani?

7. Jesu a mvhunisile kutxani wule wa msikati? (Marku 5:34)

⁷ Jesu a kombile wunene ni txixonipho wamsikati wule. Ene a woni ti to a ti ko “dhudhumela ngu kuthava.” (Marku 5:33) Aku Jesu a nga pfisisa matipfelo awule wa msikati ni ti to malwati akwe ma txi thela tingana, ene a m’kombile lirando ni ku mtsanisa aha koza e m’gela to “mwanangu.” Kuva Jesu adi wombile to “mwanangu,” ti ti kombisa ti to wa mxonipha ni ku wa m’dhunda. (Lera Marku 5:34.) Edo i vite dikhambi do khata amu ka Bhiblia Jesu a txi gela wamsikati to “mwanangu.” Ti nga maha a di wombile toneto nguku malwati awule wamsikati ma txi dhanisa ni ku a txi dhudhumela. Hi nga pimisa nzila yi wule wa msikati a nga tipfa ngu yona ni kutsaka! Ngu kuva Jesu a di kombisile wunene, a vhuni wule wamsikati ti to a si karateki nem a tipfi mnando ngu kuva adi gwesile siyambalo sakwe ni ku va hagari ka vathu ti sa fanela. Jesu a si ngo lava ku m’hanyisa dwe, kambe a txi lava kutshumela e m’vhuna ku e pfisisa ti to ene i ti mwanana wa lisima ngutu masoni ka Jehovha.

8. Ngu txihi txikarato txi mwanathu Maria a nga wonisana natxo?

⁸ Nyamsi, malanda mamwani a Jehovha ma karateka ngu mhaka ya malwati aya ma va tiselako txitrese ni ku tipfa i si nga va txilo. Wona txikombiso txa Maria,a nyaphandule wa mbimo yotshe wa khe Brasil. Ngu mhaka ya malwati, ene a velekilwe a si nga ni minenge ni diwoko da txibhabha. Ene a womba tiya: “Ani ni txi xuphwa ni ku poyilelwa ngu mhaka ya wulema wangu. Vakolega vangu va txi ni ninga matina o poyilela. Phela mbimo yimwani hambi maxaka angu ma txi ni wonela hahatshi.”

9. Nji txani txi nga vhuna Maria ku e wona ti to ene mbwa lisima ngutu masoni ka Jehovha?

⁹ Nji txani txi nga vhuna Maria? Mbimo yi a ngava Fakazi ya Jehovha, vanathu dibanzani va mthavelete ni ku m’vhuna to e ti wona nga ti Jehovha a m’wonisako tona. Ene a womba tiya: “Vanathu vo tala va ni vhuni ngutu aha ko ni nge sikoti kuwomba matina a votshe ava va nga ni vhuna. Ani na m’bonga ngutu Jehovha a wu a nga ni ninga mwaya wa vanathu ava va ku ni lirando.” Vanathu vonevo va vhuni Maria ku e pfisisa ti to mbwa lisima ngutu masoni ka Jehovha.

10. Ngu txihi txikarato txi Maria Magdhala a nga txi wonisana natxo, ni ku a txi tipfisa kutxani ngu mhaka ya toneto? (Wona ni mifota.)

¹⁰ Wona m’thu mwani wu a nga vhunwa ngu Jesu, i ku Maria Magdhala. Ene a ti xaniswa ngu 7 wa madhimoni! (Luka 8:2) Ti nga maha madhimoni oneyo ma txi mkuzetela kumaha timhaka ti ti nga mbi toloveleka. Ngu toneto, vathu va txi mthava ni ku zumbela kule nayo. Ka mbimo yoneyo kutilava ti nga maha ene a txi tipfa a si dhundwi ngu m’thu, a sa vhikeleka, ni ku pimisa ti to kha ngaho wu a nga si kotako ku m’vhuna. Jesu a tovete madhimoni ya ma nga ti xanisa Maria Magdhala ni ku ene a vite mlondeteli wa Jesu wo thembeka. Ngu yihi nzila yimwani a yi Jesu a nga vhuna ngu yona Maria Magdhala ku e pfisisa ti to mbwa lisima ngutu masoni ka Jehovha?

11. Jesu a mvhunisile kutxani Maria Magdhala ti to e tipfa i di wa lisima ngutu masoni ka Jehovha? (Wona ni mifota.)

¹¹ Jesu a tshumete e ramba Maria Magdhala ka maendo akwe o ya kutxhumayelani.b Ngu nzila yoneyo, Maria Magdhala a vite ni mkhanjo wo engisela Jesu mbimo yi a nga ti gondisa vamwani. Jesu a tshumete e humelela ka ditshiku di le a nga wuswa ngu dona ka Maria Magdhala ni ku ene a vite mmweyo wa va va nga wombawomba ni Jesu ditshiku di a nga wuswa ngu dona. Jesu a tshumete e kombela Maria Magdhala ti to e ya gela vapostoli to a wusilwe. Totshe ti Jesu a nga ti maha ti vhuni Maria Magdhala to e pfisisa ti to ene mbwa lisima ngutu masoni ka Jehovha.—Joh. 20:11-18.

12. Nji txani txi nga maha ti to Lídia e pimisa to hi nga wa txilo?

¹² Kufana ni Maria Magdhala, vathu vo tala nyamsi va tipfa va si dhundwi. Lídia, mwanathu wa Espanha, a womba ti to mwamwakwe a si ti lavi ti to e velekwa aha koza e lava ni kudola txirumbo. Ene a khumbula ti to hambi mbimo yi ene i nga ti nga ngadi mwanana, mame wakwe a txi m’gela mapswi o thola ni ku a si mxayisi ngu nzila ya yinene. Ene a womba tiya: “A ti ni nga txi ti lava ngu dhundwa ngu vathu vamwani. Ani ni txi thava ngutu ngu kupimisa ti to na mbi thuka ni dhundwa ngu m’thu nguku mame wangu a di ni mahile ni kholwa ti to kha ni nga wa txilo.”

13. Nji txani txi nga vhuna Lídia ti to e wona to mbwa lisima ka Jehovha?

¹³ Mbimo yi Lídia a nga khata kugonda Bhiblia, timhaka ti txitxile ngutu. Kumaha mkombelo ka Jehovha, kulera Bhiblia ni mapswi o tsanisa a vanathu, ti mvhuni ku e wona ti to ene mbwa lisima ka Jehovha. Lídia a womba tiya: “Mbimo yotshe mwamna wangu wa ni gela ti to wa ni randa ni ku wa ni khumbutisa tifanelo tangu ta tinene. Vangana vangu ni vona va ni gela ti to va ni dhunda.” Kufana ni Lídia, ina waho mwanathu dibanzani kwako awu u nga mvhunako ku e pfisisa ti to Jehovha wa m’dhunda?

TI WONE NGA TI JEHOVHA A KUWONISAKO TONA

14. Dibhuku da 1 Samuwele 16:7 di hi vhunisa kutxani ku hi ti wona ngu nzila yi Jehovha a hi wonako yona? (Wona dikwadro adi di ku “Ngu kutxani vathu va Jehovha i di va lisima kwakwe?”)

¹⁴ Khumbula ti to Jehovha kha hi woni nga ti vathu va mafu yawa va hi wonisako tona. (Lera 1 Samuwele 16:7.) Vathu va mafu yawa va teka m’thu i di wa lisima ngaku a di tshurile, a di ni mali yo tala ni kuva a di gondile ngutu. Kambe Jehovha kha hi wonisi eto. (Isaya 55:8, 9) Ngu toneto, u nga ti woni nga ti vathu va mafu yawa va kuwonisako tona, awe u fanete ku tiwona ngati Jehovha a kuwonisako tona. Bhiblia yi womba-womba ngu vathu ava mbimo yimwani va nga txi tipfa i si nga va txilo, vo fana ni Elija, Nowemi ni Ana. Mbimo yi u gondako ngu matimu awe, veka mapimo ka nzila yi Jehovha a nga ti va dhunda ngu yona. U txi ti lava, u nga xava dikadherno adi u no bhaletela totshe a ti Jehovha a nga kumahela ti kombisako nzila yi a kudhundako ngu yona, ni nzila yi u ku wa lisima ngu yona masoni kwakwe. I singeto dwe, maha wuxolisisi ka mabhuku athu mayelano ni ti ti nga kuvhunako kasiku u ti wona u di wa lisima.c

15. Ngu kutxani Jehovha a di woni Dhaniyeli kota m’thu “wa lisima ngutu”? (Dhaniyeli 9:23)

¹⁵ Tsaniseka ti to kuthembeka kwako ka kumaha u va wa lisima masoni ka Jehovha. Ka dikhambi dimwani, adi ni konamu ko pinda 90 wa malembe, Dhaniyeli a ti pfite a di “karate ngutu” e tshumela e godhola. (Dhan. 9:20, 21, NM) Jehovha a mthavelete ngu nzila muni? Ene a rumete Gabriyeli ngilozi yi yi nga ta khumbutisa Dhaniyeli ti to “i ti wa lisima ngutu” ni ku Jehovha a ti engisile mikombelo yakwe. (Lera Dhaniyeli 9:23.) Nji txani txi nga maha ti to Dhaniyeli e va wa lisima ngutu masoni ka Jehovha? Ngu dhunda kwakwe ati i ku tatinene ni kuthembeka kwakwe. (Eze. 14:14) Jehovha a bhate didungula diya a mu ka Bhiblia kasiku hi thavelela. (Var. 15:4) Ene wa engisa mikombelo yako ni ku wa ku ninga lisima nguku u dhundako a ti i ku ta tinene ni ku u thembekako.—Mika 6:8; Vaheb. 6:10.

16. Nji txani txi no kuvhuna kuwona Jehovha kota Tate wa lirando?

¹⁶ Teka Jehovha i di Tate awu a kudhundako. Ene a lava ku kuvhuna, i si nga kuwona tiphazamo tako. (Mas. 130:3; Mat. 7:11; Luka 12:6, 7) Kualakanyisisa ngu tiya ta vhuna vathu va vangi a va va ti wonako i si nga va txilo. Wona txikombiso txa mwanathu Michelle wa Espanha awu a nga txi tipfa i si nga wa txilo ngu mhaka ya ku mwamna wakwe a nga txi zumbela ku m’gela mapswi o thola ni ku mpoyilela kudingana malembe o tala. Ene a womba tiya: “Mbimo yi ni nga txi tipfa ni si nga wa txilo, ni txi zama kualakanya Jehovha a di ni gute, atxi ni bharasara, e ni komba lirando ni ku ni vhikela.” (Mas. 28:9) Lauren, mwanathu wa Joni mbimo yotshe a khumbula tiya: “Aku Jehovha a nga ni ndindela kwakwe ngu lirando, e ni maha ni va hafuhi kwakwe otshe malembe yawa ni ku ni thumisa kasiku ni gondisa vamwani, ngu ditshuri ene a ni wona ni di wa lisima ngutu.”—Hos. 11:4.

17. U nga tsanisekisa kutxani ti to Jehovha wa ku amukela? (Masalmo 5:12) (Wona ni mfota.)

¹⁷ Tsaniseka ti to Jehovha wa ku amukela. (Lera Masalmo 5:12.) Dhavhidha a fananisile ku amukelwa ngu Jehovha ni “txitxhavangu” atxi txi vhikelako valulami. Kuziva ti to wa amukeleka ka Jehovha ni ku wa kuseketela, ti nga kuvhuna ku u ti vhikela ka mialakanyo yo biha. Kambe u nga tizivisa kutxani ti to wa amukelwa ngu Jehovha? Hi tsaniseka ka toneto ngu kulera Bhiblia aha Jehovha a hi gelako ati a ti pimisako ngu ngathu. I singeto dwe, ene a thumisa madhota, vangana ni vathu vamwani kasi ku ve kukhumbutisa ti to u wa lisima ngutu masoni kwakwe. Kambe u nga maha txani ngaku m’thu a txo kugela mapswi o tsanisa?

18. Ngu kutxani u di fanete u tsaka mbimo yi vamwani va ku ndunduzelako?

¹⁸ Tsaka mbimo yi vathu vamwani ava va ku zivako kwati va txi kundunduzela. Khumbula ti to Jehovha a nga thumisa vathu vonevo kasiku ve kuvhuna u pfisisa ti to wa amukeleka masoni kwakwe. Michelle wu hi nga bhula ngu ngene a womba tiya: “ Kudotho-kudotho naya ni tsaka ti txi huma mbiluni mbimo yi vamwani va ni gelako mapswi o tsakisa. Kumaha toneto kha ti ni hehukeli, kambe na tiziva ti to Jehovha a lava ni maha toneto.” Madhota ma vhuni Michelle kasiku e pfisisa ti to wa amukeleka masoni ka Jehovha. Konku, ene a thuma kota nyaphandule ni ku a vhuneta Bhetele adi mtini.

19. Ngu kutxani hi nga tsanisekako ti to hi va lisima masoni ka Jehovha?

¹⁹ Ngu wunene, Jesu wa hi vhuna to hi pfisisa ti to hi va lisima masoni ka Tate wathu Jehovha. (Luka 12:24) Hi nga divaleni ti to Jehovha mbimo yotshe a hi wona hi di va lisima. Ni ku hi lava kumaha totshe ti hi nga ti kotako kasi kuvhuna vamwani ve wona ti to mba lisima ngutu masoni ka Txizimu!