Vanathu mi nga kumba—mi va lisima dibanzani
“Na xamala ngutu ni txi pimisa ngu totshe ati ni nga ti maha mbimo yi ni nga ti ngadi jovhem, kambe konku tanga ya ni moxa.”—Connie, wa 83 wa malembe.
Ti nga maha nawe u si nga ngadi u tikota kumaha ati u nga ti tikota kumaha u di ngadi jovhem. Hambiku u nga thumela Jehovha kudingana malembe a mangi, kutilava u nga godhola nguku u si swiko u tikota kumaha ati u nga txi tikota kumaha kale. Ngu txikombiso, u nga khata kufananisa ati u nga txi tikota kumaha kale ni ti u ti mahako konku. I di toneto, nji txani txi no kuvhuna ku u simama u di tsakile?
ATI JEHOVHA ATI EMELAKO KWAKO
Tiwotise tiya: ‘Ngu tihi ati Jehovha ati emelako kwangu?’ Mapswi ya ma ku ka Dhewuteronome 6:5 ma nga kutsanisa, ona ma womba tiya: “Randa Mkoma, Txizimu txako, ngu yotshe mbilu yako, ngu wotshe moya wako, ni wotshe mtamo wako.”
Ngu kuya ngu ndimana yiya Jehovha, a emela ti to u mthumela ngu yotshe mbilu yako, moya wako ni wotshe mtamo wako. Eto ti na kuvhuna ku u si tifananisi ni vamwani mwendo u kufananisa ati u tikotako kumaha konku ni ti u nga txi tikota kumaha kale.
Pimisa ngu tiya: Mbimo yi u nga ti ngadi jovhem u txi maha totshe ti u nga txi tikota kasi kuthumela Jehovha. Kambe aku tanga yi nga kusiya, wo kota kumaha ati ti tsimbitisanako ni txiemo txako. Ngu tihi ti u ti kotako kumaha ka mthumo wa Jehovha konku? Phela ati u ti kotako kumaha konku nda lisima kufana ni ti u nga txi tikota kumaha kale.
Mbimo yi u ti ngadi jovhem u mahile totshe ti u ga txi kota ka mthumo wa Jehovha, ni konku wa simama u maha toneto hambiku u nga kumba
VHUNA VAMWANI
Hahanze ko zumbela kupimisa dwe ngu ti u si tikotiko kumaha, zama kupimisa ngu mikhanjo ayi u ku nayo yo vhuna vamwani. Ngu ditshuri, aku u nga kumba awe u nga maha to kari ati u nga si tikoti kumaha mbimo yi u nga ti jovhem. Ngu txikombiso, awe u nga maha ati ti londiselako:
Kontarela vamwani txiperiyensiya txako. Pimisa ngu tindimana tiya ta Bhiblia:
Mkoma Dhavhidha: “Ni ti mfana, se konkuwa ni kumbile, kambe kha ni zivi kuwona m’thu wo lulama e lekwa wusiwanani, hambi vanana vakwe kha ni zivi ku va wona ve kombela sakudya.”—Mas. 37:25.
Joxuwa: “Wonani, ani ni tsimbila ngu nzila ya votshe vathu hamafuni. Anu ma tiziva ngu yotshe mbilu yanu ni wotshe moya wanu ti to, ka sithembiso sotshe sa sinene, si Mkoma, Txizimu txanu, a nga mi mahela anu, kuwalo ni txa tximwetxo txi nga mbi maheka, sotshe si mahekile kwanu, kuwalo ni dipswi dimwedo di nga wa hahatshi.”—Jox. 23:14.
Ti nga maha u di wombile mapswi o fana ni yawa mbimo yi u nga ti ngadi jovhem. Phela ati Joxuwa ni Dhavhidha va nga tiwomba nda lisima ngutu nguku ngu ti va nga ti hanya ni ti va nga tiwona ka otshe malembe ya va nga ma heta va txi thumela Jehovha ngu kuthembeka. Ngaku u di ni malembe a mangi u txi thumela Jehovha, kontarela vanathu siperiyensiya asi u nga si hanya u txi thumela Jehovha.
Ina wa khumbula dikhambi do kari adi Jehovha a nga vhuna vanathu ngu nzila yo sawuleka? I di toneto, bhulela vanathu txiperiyensiya txonetxo! Phela eto ti nga va vhuna kufana ni ti u nga vhunekisa tona mbimo yi u nga wona Jehovha atxi vhuna vanathu. Awe u nga tsanisa vanathu ngu kukontarela siperiyensiya asi u nga si hanya ka mthumo wa Jehovha.—Var. 1:11, 12.
Nzila yimwani yo tsanisa vanathu ngu u tsula mitshanganoni ngaku u txi tikota. U di mitshanganoni u na tsanisa vanathu ni ku nawe u na tsaniswa. Connie, awu hi nga womba-womba ngu ngene makhatoni a womba tiya: “Kuya mitshanganoni ta ni vhuna ku ni si godholi. Phela khu nge godholi u txipfa lirando ali vanathu va kukombako u di mitshanganoni. Ni zama kubonga ngu totshe ati vamwani va ti mahako ngu ku va ninga maprezenti. Mbimo yotshe ni maha totshe ti ni nga tikotako kasi kuva tsanisa ni ku ni vona va ni tsanisa.”
JEHOVHA WA NINGA LISIMA TOTSHE ATI U MMAHELAKO
Bhiblia yi tate ngu sikombiso sa vathu ava va nga txi dhundwa ngu Jehovha hambiku va nga si tikoti kumaha totshe ati va nga ti tilava kasiku ve mthumela. Wona txikombiso txa Simiyoni, Muisrayeli awu a nga ti kumbile mbimo yi Jesu a nga velekwa. Mbimo yi Simiyoni a nga txiya dithempeleni ti nga maha ati wona majovhem aya ma nga ti maha mthumo wo sawuleka. Se ene ko? Phela aku Simiyoni a nga ti kumbile ti nga maha adi pimisile ti to Jehovha kha nga ngadi e m’thela konta. Kambe eto hi nga tona ati Jehovha a nga ti mu wonisa tona. Jehovha a woni Simiyoni kota ‘m’thu wo lulama ni wu a nga ti thava Txizimu,’ ni ku a mkatekisile ngu ku mninga lungelo yo wona Jesu. Jehovha a thumisile Simiyoni kasiku e womba wuprofeti wo kari mayelano ni Mesiya! (Luka 2:25-35) Ngu ditshuri, ti hakubasani ti to Jehovha a woni Simiyoni kota wamwamna wa likholo i si nga tanga yakwe ni ku “moya wo sawuleka wu ti ni nene.”
Jehovha a katekisile Simiyoni ngu ku mninga lungelo yo wona Jesu i di ngadi m’dotho ni kutshumela e profeta mayelano ngu ngene kota Mesiya wu a nga thembiswa
Nawe tsaniseka ti to Jehovha wa ninga lisima mthumo wako wo thembeka ti si nga ni mhaka ni ti u tandekako ku timaha nguku u nga kumba. Kwakwe, mizamo yako ‘ya amukeleka ngu kuya ngu si u ku naso i si nga ngu si u si ngako naso.’—2 Vak. 8:12.
Veka mapimo ka ti u ti kotako ku timaha. Ngu txikombiso, pimisa ngu nzila yo kari yo txhumayela ayi yi nga kuhehukelako hambi i di ti to khu na mbi heta mbimo yo lapha u txi txhumayela. Tximwani, u nga vhuna vamwani ngu kuva fonela mwendo ku va bhalela mesaji. Kumaha toneto hambi ti txi woneka nga hi nga ta boti, ti nga tsanisa vanathu ngutu-ngutu aku u ku ni malembe a mangi u txi thumela Jehovha.
Vamwani va ni sikarato sa malwati. Wona txiperiyensiya txa mwanathu wa Africa Oriental ka dikwadru adi di ku “Mwanathu wa txisikati a thumisile Bhiblia kasi kuhulukisa wutomi.”
U nga divali ti to likholo lako ni kuthembeka kwako si nga tsanisa vamwani. Awe u txikombiso txa txinene, ni ku tsaniseka ti to ‘Txizimu kha txi nga ni tshofu. Kha txi na kudivala mthumo wako, ni lirando ali u nga li kombisa ka ditina da txona aku u nga thumela vasawuleki va txona, avava ni konkuwa, mi va thumelako.’—Vaheb. 6:10.
SIMAMA U DI BHISI NGU KUVHUNA VAMWANI
Wuxolisisi wu kombisa ti to vathu ava va nga kumba va tiningetelako ko vhuna vamwani, va ni dihanyo da dinene ni ku va pimisa kwati.
Ti hakubasani ti to kumahela vamwani ta tinene kha ti gumisi sotshe sikarato asi si tiswako ngu ku kumba. I Mfumo wa Txizimu basi awu wu no ta gumisa sikarato soneso ngu kufuvisa txionho, i ku txona txi hi mahako hi kumba.—Var. 5:12.
Hambiketo, kumaha totshe ati Jehovha aku kombelako ku u maha ti patako ku vhuna vamwani, ti na tsanisa themba yako ni ku kuvhuna ti to u va ni dihanyo da dinene. Anu vanathu mi nga kumba, tsanisekani ti to Jehovha ni vanathu dibanzani va wu ninga ngutu lisima mthumo wanu ni txikombiso txano txa likholo.