Ina u pimisa kufana ni Jehovha?

1, 2. Hi txi ya hi kula ngu didhawa da moya, hi gonda txani? Womba txikombiso.

ALAKANYA ngako mwanana wa m’dotho a txi ningwa txo kari. Se vaveleki vakwe ve mu gela va txi khona: “Womba to na bonga.” Se mwanana e bonga ngu ku a nga rumwa ngu vaveleki. Kambe mbimo yi a kulako, wa khata kutipfisisa to ngu kutxani vaveleki va txi wona i di tinene kubonga ngako m’thu a txi kumahela to kari ta tinene. Ngu toneto, a na bonga vamwani apune nguko a gondisilwe kubonga.

² Nathu hi humeletwe ngu to fana. Mbimo yi hi nga khata kugonda ditshuri, hi gondile ti to ti ni lisima kuengisa milayo ya Jehovha. Kambe mbimo yi hi yako hi kula ngu didhawa da moya, hi gonda to tala ngu maalakanyelo akwe, i ku, ati ene a ti dhundako, ati asi ti dhundiko, ni ti a wonisako tona timhaka to kari. Ngako hi txi kongomiswa ngu mialakanyo ya Jehovha ka ti hi tisawulako ni simaho sathu, hi pimisa kufana ni nene.

3. Ngu kutxani ti txi karata kupimisa kufana ni Jehovha?

³ Hambiko hi ti tsakelako kugonda kupimisa kufana ni Jehovha, yimwani mbimo ta karata kupimisa kufana ni nene nguko kha ha hetiseka. Ngu txikombiso, ha ti ziva ati Jehovha a ma wonisako tona mahanyelo a manene, kulava tithomba, kutxhumayela, timhaka ta mnoha, ni timwani. Kambe ti nga karata kupfisa ti to ngu kutxani ene a txi ti wona ngu nzila yoneyo. Se hi nga gonda ngu nzila yihi kuya masoni hi pimisa kufana ni Jehovha? Toneto ti na hi vhunisa kutxani kumaha ati i ku ta tinene konkuwa ni mbimo yi yi tako?

HI NGA PIMISA KUFANA NI JEHOVHA NGU NZILA YIHI?

4. Ti womba txani kuphindula mialakanyo yathu?

⁴ Lera Varoma 12:2. Ka ndimana yiya, mpostoli Paulo a txhamusete ti to hi nga maha txani kasiku hi gonda kupimisa kufana ni Jehovha. A ti khene hi nga “xengetelweni ngu sa ditiko diya.” Nga ha hi nga gonda ka msungo wu wu nga pinda, toneto tiwomba ti to hi fanete hi tshuralela mialakanyo ni mawonelo a ditiko. Kambe a ti khene hi fanete kupindula mialakanyo yathu. Eto ti womba ku ti lava hi gonda Dipswi da Txizimu, hi alakanyisisa ngu dona, ni kutikaratela kupimisa nga ti Jehovha a pimisisako tona.

5. Txhamusela kuhamabana ku kuho ka kulera ni kugonda.

⁵ Kugonda hi nga kulera to kari ngu txikuluveta mwendo kundandela tixamulo ta siwotiso. Mbimo yi hi gondako, hi fanete hi alakanya ngu ti to mhaka yi hi gondako yi hi gondisa txani ngu Jehovha, ati a ti mahako, ni nzila ayi ene a pimisako ngu yona. Hi duketa kupfisisa ti to ngu kutxani Jehovha e hi gela kumaha to kari ni kuvayilela timwani. Hi tshumela hi wona ati ti lavako hi txitxa ka wutomi wathu ni ka mapimiselo athu. Phela, kha hi na kusikota kualakanyisisa ngu totsheleleto mbimo yi hi gondako. Kambe ndinene kuheta mbimo, kutilava hafu ya mbimo yathu ya gondo hi txi alakanyisisa ngu ti hi nga lera.​—Masalmo 119:97; 1 Timoti 4:15.

6. Kumaheka txani mbimo yi hi alakanyisisako ngu Dipswi da Txizimu?

⁶ Ku ni mhaka yo xamalisa yi humelelako ngako mbimo yotshe hi txi alakanyisisa ngu Dipswi da Txizimu. Hi ‘ti kombisa hipune,’ mwendo kutikholwisa ti to mialakanyo ya Jehovha yi hetisekile. Hi khata kupfisisa mawonelo akwe ka mhaka yo kari, se hi tekela kutumela mawonelo akwe. Se, hi nga phindula mialakanyo yathu ni kukhata kupimisa ngu nzila ya yiphya. Kudotho-kudotho, hi pimisa kufana ni Jehovha.

ATI HI TI PIMISAKO TI GWESA NI SIMAHO SATHU

7, 8. a) Jehovha a si wona ngu nzila yihi silo sa nyama? (Wona mifota yi yi ku makhatoni.) b) Ngako hi txi wona silo sa nyama kufana ni Jehovha, nji txani txi mbimo yotshe txi no va txa lisima kwathu?

⁷ Mipimiso yathu ya gwesa simaho sathu. (Marku 7:21-23; Jakobe 2:17) Ti to hi pfisisa mhaka yiya, he bhuleni ngu sikombiso so kari. Txikombiso txo khata txi ka madungula a kuvelekwa ka Jesu, txi yi veka ha kubasani nzila yi Jehovha a alakanyako ngu yona ngu silo sa nyama. Jehovha ngene apune a nga sawula Josefa ni Mariya ti to ve wunja Jesu, hambiku vona va nga ti singa ni male yo tala. (Levhi 12:8; Luka 2:24) Mbimo yi Jesu a nga velekwa, Mariya a to “mu otelisa mkawuni, nguko wu ti si nga ho wukhalo wa kudingana vona ka nyumba ya vapfhumba.” (Luka 2:7) I ti ku Jehovha a to ti lava, a di mahile ti to Jesu e velekwa ka wukhalo wo zumbiseka kwati. Kambe ene a lavile ti to Jesu e kuliselwa ka mwaya awu wu thangetisako timhaka ta wukhozeli wa Txizimu. Eto ngu ti i nga ti ta lisima ngutu ka Jehovha.

⁸ Matimu awa a kuvelekwa ka Jesu ma hi gondisa nzila yi Jehovha a si wonako ngu yona silo sa nyama. Vaveleki vamwani va lava ti to vanana vawe ve va ni silo sa sinene sa nyama, hambi toneto ti txi veka ka phango wuxaka wawe ni Jehovha. Kambe Jehovha a wona wuxaka wathu ni nene i di wona i ku wa lisima ngutu. Ina awe wa tumela mawonelo a Jehovha ka mhaka yiya? Simaho sako si kombisa txani?​—Lera Vahebheru 13:5.

9, 10. Nji txani txi no kombisa ti to hi ni mawonelo o fana ni a Jehovha ka mhaka yo khuvekisa vamwani?

⁹ Txikombiso txa wumbidi nja ti Jehovha a mu wonisako tona awu a khuvekisako vamwani, i ku kumaha ti to vamwani ve onha mwendo ve leka kuthumela Jehovha. Jesu a ti khene: “Wuhi ni wuhi a khuvekisako mmweyo wa sivananana siya si kholwako kwangu, ti nga va i di tshuko kwakwe, ngako va txi mu sunga dirigwi da txigayo mkoloni, se ngu msana va txi mu rinza digovani.” (Marku 9:42) Mapswi onewo nga hombe ngutu! Ni ku ha ti ziva ti to Jesu wa fana ni Tate wakwe. Se kha hi kanakani ti to Jehovha ta mu henyisa ngutu ngako m’thu a txi khuvekisa mmweyo wa vagondiswa va Jesu.​—Johani 14:9.

¹⁰ Ina hi ni mawonelo o fana ni a Jesu ni Jehovha ka mhaka yo khuvekisa vamwani? Simaho sathu si kombisa txani? Ngu txikombiso, ti nga maha hi txi dhunda txitayela txo kari txa maambalelo. Kambe hi na maha txani ngako ati hi ti sawulako ti txi khuvekisa vanathu dibanzani mwendo ku va maha ve va ni mialakanyo yo biha? Ina lirando li hi ku nalo ngu vanathu li na hi susumetela kuleka ati hi ti tsakelako?​—1 Timoti 2:9, 10.

11, 12. Kugonda kunyenya ati Jehovha a ti nyenyako ni kukulisa kutiñola, ti nga hi vhikela ngu nzila yihi?

¹¹ Txikombiso txa wuraru ngu txiya: Jehovha wa nyenya wubihi. (Isaya 61:8) Phela, ene wa tiziva ti to mbimo yimwani ta hi karatela kumaha ati i ku ta tinene nguko kha ha hetiseka. Kambe, ene a lava ti to hi nyenya to biha kufana ni nene. (Lera Masalmo 97:10.) Se kualakanyisisa ngu ti to ngu kutxani Jehovha a txi nyenya to biha, ti na hi vhuna kupimisa kufana ni nene ni ku ti na hi ninga mtamo wo lamba kumaha to biha.

¹² Ngako hi txi nyenya to biha, ti na hi vhuna kuwona ngako silo so kari si di bihile hambi amu ka Bhiblia ti si wombwi. Ngu txikombiso, ku ni tximaho txo kari txa ku tiñola ngu nzila yo biha atxi txi nga toloveleka makhalo o tala txi dhanwako ku i dança do colo. Vamwani va nga wona ti si fani ni kumaha timhaka ta mataho ni mmwani, vona va alakanya to kha ta biha.a (Wona txhamuselo ya hahatshi.) Kambe Jehovha nene a yi wonisa toneto mhaka yiya? U nga divali ti to Jehovha a nyenya mixaka yotshe ya wubihi. Ngu toneto, he zumbeni kule ngutu ni txihi ni txihi i ku txo biha ngu kugonda kukulisa kutiñola ni kunyenya ati Jehovha a ti nyenyako.​—Varoma 12:9.

KHATA NYAMSI U PIMISA TI U NO TA MAHA

13. Ngu kutxani hi di fanete hi alakanya ngu nzila yi Jehovha a yi wonako ngu yona mhaka yo kari ti to hi kota kumaha sisungo sa wutxhari mbimo yi yi tako?

¹³ Mbimo yi hi gondako, hi fanete hi alakanyisisa ngu nzila yi Jehovha a wonako ngu yona timhaka nguko eto ti nga hi vhuna kumaha sisungo sa sinene. Se, ngako hi di ka txiemo atxi ti lavako hi maha txisungo ngu txikuluveta, hi na mbi kanakana ti to hi na maha txani. (Mavingu 22:3) He woni sikombiso simwani sa mu ka Bhiblia.

14. Hi gonda txani ka ti Josefa a nga xamula kata Potifari?

¹⁴ Mbimo yi msikati wa Potifari a nga duketa kusiha Josefa, ngu txikuluveta a to lamba. Ti ha kubasani, Josefa a ti alakanyisile ngu nzila yi Jehovha a wu wonako ngu yona wukati. (Lera Genesisi 39:8, 9.) Josefa a gete wule wa msikati a txi khene: “Ni nga sikotisa kutxani kumaha to biha ta hombe ni to ngeto ni kuonhela Txizimu kani?” Eto ti kombisa ti to a ti ni mawonelo o fana ni a Txizimu. Athu ko? U nga maha txani ngako mthumi kuloni a txi khata kusakana ngu kukusiha? Mwendo ngako u txo rumelelwa madungula a timhaka ta mataho mwendo mfota wa nzambwa ka fone yako?b (Wona txhamuselo ya hahatshi.) Ta hehuka kuzumba hi di thembekile ka Jehovha ngako se hi di gondile ngu mhaka ya kona ni kutumela mawonelo akwe ka mhaka yo kari ni ku va se hi di mahile txisungo txa ti hi no ti maha.

15. Kufana ni Vahebheru vararu, hi nga mahisa kutxani ti to hi zumba hi di thembekile ka Jehovha?

¹⁵ Txikombiso tximwani nja Vahebheru vararu i ku Xadreke, Mixake, ni Abhedhi-Nego. Ngu txibindi, va lambile kukhozela txithombe txa nzalama txi txi nga ti emisilwe ngu Mfumeli Nebhukodhonosori. Xamulo yawe yi kombisile ti to se va ti alakanyisisile ngu ti ti nga ndi na humelela ngako va txi simama ve thembeka ka Jehovha. (Eksodha 20:4, 5; Dhaniyeli 3:4-6, 12, 16-18) Nyamsi ko? U ndi na maha txani ngako mlungu wako a txo ku kombela kuhumisa male ti to u seketela m’buso wu wu tsimbitisanako ni wukhongeli wa makuhu? Hahanze ko emela txiemo txo fana ni txiya txi humelela, ti ndina va ta tinene kukhata konkuwa u alakanyisisa ngu mawonelo a Jehovha mayelano ni mhaka yoneyo. Se ngako hi txo humelelwa ngu txiemo txo nga toneto, ti na hi hehukela kumaha mwendo kuxamula ngu nzila ya yinene kufana ni Vahebheru vale va vararu.

16. Kupfisisa mapimiselo a Jehovha ti hi vhunisa kutxani ti to hi zumba hi di emekile ti txi humelela ta txikuluveta ati ti lavako dhokodhela?

¹⁶ Kualakanyisisa ngu mapimiselo a Jehovha ti na hi vhuna kuzumba hi di thembekile kwakwe ngako ti txi humelela ta txikuluveta ati ti lavako dhokodhela. Phela, hi na va hi di tiemisete kwa mbi thelwa mnoha mwendo siphemu sa mune sa mnoha. (Mithumo 15:28, 29) Kambe ku ni tinzila timwani ati ti patako mnoha ati ti lavako ti to Mkristu e ti mahela txisungo txi txi nga sekeketelwa ka matshina a milayo ya Bhiblia. Ngu yihi mbimo ya yinene yo maha txisungo txonetxo? Se ngako u di sibhejela u txi pfa kupanda, ina ti na ku hehukela kumaha txisungo ngu txikuluveta? U nge sikoti. Ti he mbimo konkuwa yo maha wuxolisisi, u tatisela diphepha di di txhamuselako ati u lavako kuthumiswa tona ni kubhula ni dhokodhela wako.c (Wona txhamuselo ya hahatshi.)

17-19. Ngu kutxani i di ta lisima kugonda ngu mapimiselo a Jehovha ngu mhaka yo kari konkuwa? Womba txikombiso.

¹⁷ Alakanya ngu ti Jesu a nga xamulisa tona mbimo yi Pedro a nga mlaya a txi khene: “Txi na ku hulukise keto, Mkoma!” Jesu alakanyisisile ngu ti Txizimu txi ti nga ti ti lava kwakwe ni wuprofeti wa mayelano ni wutomi ni lifo lakwe ha mafuni. Wuzivi wonewo wu mtsanisile ti to e zumba a di thembekile ka Jehovha ni kuningela wutomi wakwe kota dingandelo dathu.​—Lera Matewu 16:21-23.

¹⁸ Nyamsi, Jehovha a lava ti to hi va vangana vakwe ni ti to hi hiseka ka mthumo wo txhumayela. (Matewu 6:33; 28:19, 20; Jakobe 4:8) Kambe ti nga maha hambi va va hi navelelako ta tinene ve hi godholisa kufana ni ti Pedro a nga maha ka Jesu. Ngu txikombiso, mlungu wako a engetela muholo kambe awe u txi tiziva ti to ti na lava u thuma mbimo yo lapha ayi u no pwata ni mbimo yo ya mitshanganoni mwendo ka mthumo wo txhumayela kumweko ni dibanza. Se, i di ti to txikolwani u ningilwe lungelo yo khukha u ya wukhalo wa kule ti to u ya engetela tigondo? Se ngako toneto ti txi humelela, ina u na maha mkombelo, wuxolisisi mwendo kubhula ni vaveleki ni madhota u si se maha txisungo? Nda lisima kugonda ngu mawonelo a Jehovha ngu mhaka yoneyo konkuwa ni ku va ni kupimisa kufana nayo. Se ngako u txo u ningwa silo soneso, ti na mbi kukaratela kulamba. Wa ti tiziva ti u no maha nguko se u ti vekisete kuthumela Jehovha.

¹⁹ Kambe ti nga maha u alakanyisisa ngu siemo simwani si si nga dukako wuthembeki wathu ka Jehovha. Phela, hi nge sikoti kutilulamisela ka totshe ti ti no hi humelela. Se ngako hi txi alakanyisisa ngu mapimiselo a Jehovha ka gondo yathu hipune, ti na hi vhuna kukhumbula ati hi nga ti gonda ni ku ti thumisa ka txiemo tximwani ni tximwani. Ngu toneto, mbimo yi gondako hi lava kuziva mawonelo a Jehovha ngu mhaka yo kari, hi pimisa kufana ni nene ni kupimisa ngu ti ti no hi vhuna kumaha sisungo sa wutxhari konkuwa ni mbimo yi yi tako.

PIMISA KUFANA NI JEHOVHA, U NA MANA WUMANGWANA WO TSAKISA

20, 21. a) Ngu wuhi mkhululeko wu hi no va nawo ka mafu a maphya? b) Hi nga li manisa kutxani litsako ka wutomi konkuwa?

²⁰ Hotshethu hi ma emete ngu do bhilivila mafu a maphya. Wungi wathu hi ni themba yo ta hanya ka Paradhise ha mafuni. Ka Mfumo wa Txizimu, hi na ta khululeka ka sotshe sikarato si hi wonisanako naso nyamsi. Hi na tshumela hi va ni mkhululeko wo maha sisungo ngu kuya ngu ti hi ti lavako ni minavelo yathu.

²¹ Hi nga ti to hi no ta hanya nga tiphongo to bhenula. Ava vo rula va na ta simama ve maha sisungo asi si nga seketelwa ka milayo ya Jehovha ni mialakanyo yakwe. Toneto ti na hi tisela litsako la hombe ni kudikha ha mafuni. (Masalmo 37:11) Kasi konkuwa, hi nga simama hi va ni litsako ka wutomi ngu kupimisa kufana ni Jehovha.