Txidiwukiso ka Linene lo Bhilivila

Mbimo yi Faro a nga ziva ti to Vaisrayeli va ti humile Egipta, a to kwangula ka masotxhwa akwe a txi khene: ‘Lulamiselani sikarinyana sa yimbi. A hi va londiseni vava, hi sa fanela ku va leka ve tsula.’ Faro ni masotxhwa akwe va to londisa Vaisrayeli.

Jehovha a txi thangela Vaisrayeli ni ku va komba nzila yi va nga ti fanete kutsimbila ngu yona. Wa ti ziva ti to a txi mahisa kutxani toneto? Ni mitshikari atxi thumisa direfu, se ni wusiku a txi thumisa mndilo. A to va kongomisa kala ve hoka ka Linene lo Bhilivila, se eva gela ti to va ti fanete kuhumula kona hale.

Va di kona hale, Vaisrayeli va to wona Faro ni masotxhwa akwe va txi va londisa. Phela Vaisrayeli va si nga ni koya. Masoni kwawe ku ti ni Linene lo Bhilivila, kuveti msana kwawe ku txita Faro ni masotxhwa akwe. Vaisrayeli va thavile ngutu aha koza ve lava ni kutshumela Egipta. Kambe Mosi a txi mthemba ngutu Jehovha, se a va gete tiya: ‘Mi nga thaveni! A hi emeni hi wona ati Jehovha a no hi hulukisisa tona.’

Jehovha a gete Vaisrayeli ti to ve ti lulamisela kasiku ve simama ni liendo lawe. Se, Jehovha a mahile ti to direfu adi di nga ti masoni ka Vaisrayeli di ta maneka msana kwawe, direfu dile di ti ya maneka masoni ka Vaegipta. Se eto ti mahile ti to Vaisrayeli veva ka wukhalo wo wonekela, kambe Vaegipta ve maneka txidemani.

Jehovha a gete Mosi ti to e nawuluta diwoko dakwe txitimwi ka mati a Linene lo Bhilivila. Se, Jehovha a to gwita e maha ti to lineneni mule kupeka moya wa hombe wusiku wotshe. Ngu mhaka ya moya wule, Linene li to abaneka ngu hagari, se ku sala nzila ayi Vaisrayeli va nga tsimbila ngu yona ka mafu o oma kala veya hoka ka didhawa dimwani da Linene.

Faro ni masotxhwa akwe va to londisa Vaisrayeli ngu nzila ayi Jehovha a ngadi yi tute hagari ka Linene. Se koneho, Jehovha a to maha vhilinganya ya hombe hagari ka masotxhwa a Faro, marodha a sikarinyana sawe sa yimbi ma to gwandekela. Mbimo yi masotxhwa a Faro ma nga wona tile, ma to peka huwa ma txi kha ona: ‘A hi tshumeleni! I Jehovha a va lwelako vava.’

Jehovha a to tshumela e gela tiya Mosi: ‘Nawuluta diwoko dako txitimwi ka mati a Linene lo Bhilivila.’ Mbimo yi Mosi a nga maha toneto, mati yale ma nga di abanekile ma to tshumela me manana, me tekela kufenengeta Faro ni masotxhwa akwe. Votshe va fite, kha ngaho wu a nga huluka.

Ka didhawa dimwani da Linene adi Vaisrayeli va nga di ka dona, va ti woni ati Jehovha a nga di ti mahile. Ngu toneto, va to m’bonga. Vavasikati va to khata kusinya, se votshe va to embelela va txi: ‘Embelelelani Jehovha! Nguku nyamsi votshe va ti ziva ti to ene a ni mtamo. Ene a rinzile lineneni dikavhalu ni m’gadhi wa dona.’ Votshe va di tsakile, nguku ngu magwito va di hulukile ta ditshuri kuva sibotxhwa sa Vaegipta.