Mareferensiya a txibhukwana txa mitshangano ya Mahanyelo a Wukristu
7-13 KA OUTUBRO
TITHOMBA TA MU KA DIPSWI DA TXIZIMU | JAKOBE 3-5
“Kombisa wuzivi wu wu tako ngu txitimwi”
cl 221-222 ¶9-10
I na wa wu “kombisa wuzivi wu wu tako ngu txitimwi” ka wutomi wako?
“Kukhata wu basile.” Kubasa ti womba kwa mbi na nzambwa ni kuzumba u di xayisekile, i singa ngu hahanzi kambe ni ngu mndani. Bhiblia yi txhamusela ti to wuzivi wu tsimbitisana ni mbilu, kambe kha wu nge beli ka mbilu yi yi nga tala ngu mialakanyo, minavelo ni mi susumetelo yo biha. (Mavingu 2:10; Matewu 15:19, 20) Ngu toneto, ngako hi di basile nga ha tikotekako ngu kona kwathu vathu vo mbi hetiseka, hi na ‘thava wubihi, hi maha ati i ku ta tinene.’ (Masalmo 37:27; Mavingu 3:7) Ta fanela ku kubasa yi va fanelo yo khata ka wuzivi wa txitimwi. Nguko, kasi ku hi kombisa tifanelo timwani, tilava hi va hi di basile ngu didhawa da moya ni da mahanyelo.
“Wu ni lidikho.” Wuzivi wa txitimwi wu hi kuzeta kumaha kudikha, i ku fanelo ya moya. (Vagalatiya 5:22) Hi maha totshe ti hi nga tikotako ti to hi vayilela kuwila “dikha.” (Vaefesu 4:3) Hi maha totshe ti hi nga tikotako ti to hi tshumela hi maha kudikha ngako ku si ngaho. Ngu kutxani i di ta lisima? Bhiblia yi womba tiya: “Khutalani ngu kumaha wunene, tsanisanani mi txi va ni kualakanya kumweko, mi txi hanya ngu kudikha. Txizimu txa lirando ni txa kudikha txi na va ni nanu.” (2 Vakorinto 13:11) Mbimo yi hi simamako hi maha kudikha hi kombisa wunene, Txizimu txa kudikha txi na va ni nathu. Nzila yi hi ñolako vanathu ngu yona, ya gwesa wuxaka wathu ni Jehovha. Hi nga kombisisa kutxani to ha maha kudikha? Wona txikombiso txiya.
cl 223-224 ¶12
I na wa wu “kombisa wuzivi wu wu tako ngu txitimwi” ka wutomi wako?
“Wu ni wunene.” Ti womba txani kuva ni wunene? Ngu kuya ngu vagondi vamwani, dipswi da Txigriki adi di nga hunduluxelwa diva “wunene,” da karata ngutu ku di hunduluxela. Vahunduluxeli vo tala va di txitxile ngu di di ku: “kudivalela” ni “kupfisisa.” Ngu nzila yo kongoma, dipswi da Txigriki di womba “kutiemisela kutxitxa.” Hi nga kombisisa kutxani ka wutomi wathu ti to ha kombisa txienge txiya txa wuzivi wa txitimwi?
cl 224-225 ¶14-15
I na wa wu “kombisa wuzivi wu wu tako ngu txitimwi” ka wutomi wako?
“Kuengisa.” Dipswi da Txigriki adi di nga hunduluxelwa di va “kuengisa” kha di maneki wukhalo wumwani ka Mibhalo ya Txigriki. Vathu vamwani va womba ti to dipswi diya di yelana ni “kuengisa ka masotxhwa.” Eto ti kombisa to ti tsimbilelana ni ku “kuluveta kuengisa” ni “kutiveka hahatshi.” Awu a ku ni wuzivi wa txitimwi wa tiveka hahatshi ka ti Bhiblia yi ti wombako. Kha fani ni m’thu wu mbimo yi a mahako txisungo txo kari, a lambako kutxitxa hambi ku di ni sivangelo asi si kombisako ti to a phazamile. Kambe m’thu wu a engisako mbimo yotshe a ti emisete kutxitxa simaho sakwe ngako Mibhalo yi txi kombisa to kha mahi ta tinene. Ina awe u ziwa ngu kuva m’thu wu a engisako?
“Kuhonisela, ni mihando ya yinene”
“Kuhonisela, ni mihando ya yinene.” Kuhonisela njienge txa lisima ka wuzivi wa txitimwi. Wona ti to “kuhonisela” kutsimbila kumweko ni “mihando ya yinene.” Eto ta pfisiseka, nguko kuhonisela ti pata kutikarata ngu mhaka vamwani, ni ku va pfela wusiwana, eto ti maha hi va ni mithumo yo tala ya wunene. Txhamuselo yimwani yi womba ti to kuhonisela “ngu karateka ka m’thu ngu kona ha ka kuwona kuxaniseka ka m’thu mmwani, se e zama ku mu vhuna.” Ngu toneto wuzivi wa txitimwi hi nga wa tshofu, wo karata, mwendo kuva wo guleka ku si na sivangelo. Hahanze keto, wona mbwo thutha, ni ku wa pfela wusiwana. Hi nga kombisisa kutxani ti to hi ni kuhonisela?
cl 226-227 ¶18-19
Ina wa wu “kombisa wuzivi wu wu tako ngu txitimwi” ka wutomi wako?
“Kha wu na txisawu-sawu.” Wuzivi wa txitimwi wu hi ninga mtamo ti to hi lwisana ni txisawu-sawu ni ku ti guleta. Hi di nawo wu na hi kongomisa ti to hi leka ku “sawula madingano ni khohe ya m’thu.” (Jakobe 2:9) Athu kha hi ñoli vathu ngu kuya ngu tigondo tawe, mali yi va ku nayo, mwendo malungelo ya va ku nawo dibanzani, nem kha hi woni vanathu i di va txiemo txa hahatshi kwathu hambi ti txi woneka nga sisiwana. Aku Jehovha a va randako, nanathu hi fanete kuva komba lirando lathu.
“Kha wu kanganyisi.” Dipswi da Txigriki di ku “mkanganyisi” di ti thuma ka vathu vale va thumako ka teatro. Ka mbimo yoneyo, Vagriki ni Varoma, va ti ambala so fenengeta khohe va di ka misakano yoneyo. Ngu toneto ngu Txigriki, dipswi “mkanganyisi” di kombisa m’thu wu a ti mahako nga mmwani, na i si nga ene. Aku wuzivi wa txitimwi i ku “wa kwa mbi kanganyisa,” wu fanete wu hi kuzetela ti to hi ñola kwati vanathu ni ku khatala ngu vona.
Lavetela tithomba ta moya
w08 15/11 20 ¶6
Timhaka ta hombe ta mapapilo a Jakobe ni Pedro
4:5—Jakobe a ti womba mapswi a m’bhalo wuhi hawa? Jakobe a si kombeteli ka m’bhalo wo kongoma. Mapswi awa a nga kongomiswa ngu Txizimu ti to e ma bhala, ti nga maha ma txi kombetela ka mhaka yi ku ka Genesisi 6:5; 8:21; Mavingu 21:10 ni Vagalatiya 5:17.
w97 15/11 20-21 ¶8
Likholo li hi maha hi laphisa mbilu ni kukhongela
Kulenga Mkristu kuloni txionho. (Jakobe 4:11, 12) Vamwani va womba-womba kubiha ngu vakwanu kutilava ngu kulava kuva txhipisa vona ve ti veka txitimwi. (Masalmo 50:20; Mavingu 3:29) Dipswi da Txigriki di di ku “kulenga,” di womba kulumbeta m’thu mmwani makuhu. Eto ti womba kulamula mwanathu. Se i ngu nzila yihi awu a “lengako mkwawe” a ‘lengako mlayo’ wa Txizimu? Vabhali ni Vafarisi va ti ‘veka ngu didhawa mlayo wa Txizimu,’ se ve lamula ngu kuya ngu mawonelo awe vapune. (Mar 7:1-13) Ngu nzila yi yi fanako, hi txi lamula mwanathu awu Jehovha a si mu woniko a di onhile, ho womba ngu kukongoma ti to milayo ya Txizimu kha ya lulama. Ni ku, ngako hi txi zumbela kukhala ngu vanathu kha hi londisi txirumu txo randa vakwanu.—Var 13:8-10.
14-20 KA OUTUBRO
TITHOMBA TA MU KA DIPSWI DA TXIZIMU | 1 PEDRO 1–2
“Mahani vasawuleki”
Mterulo “i ningo yo hetiseka” yi yi tako ngu ka Tate wathu Jehovha
Hi tikombisa ngu nzila yihi ti to ha m’dhunda Jehovha? Ngu mahanyelo athu. Jehovha a lava hi va vo sawuleka. (Lera 1 Ped 1:15, 16.) Eto ti womba ti to athu hi khozela ene basi ni ku m’engisa ngu mbilu yotshe. Hi basisa ditina da Jehovha ngu kuhanya ngu milayo yakwe. (Mat. 5:14-16) Hi kombisa ti to milayo yakwe nja yinene ni ku Sathani a ni makuhu. Kambe kota ku hi nga mbi hetiseka, hi nga thuka hi phazama. Se ti txi thuka ti humelela, ha tisola ni kuleka kumaha tihi ni tihi ati ti nyamisako ditina da Jehovha.—Mas. 79:9.
lvs 77 ¶6
Hi nga sawulisa kutxani misakano yathu
Jehovha a hi gela tiya: “Mahani vasawuleki, nguko nani ni msawuleki.” (1 Pedro 1:14-16; 2 Pedro 3:11) Jehova a na amukela wukhozeli wathu ngako hi di sawulekile ni kubasa. (Dhewuteronome 15:21) Wukhozeli wathu kha wu nge basi ngako hi txi maha ati Jehovha a si ti laviko, to fana ni wugango, wugevenga mwendo kumaha to yelana ni wuñanga. (Varoma 6:12-14; 8:13) Hi txi sakana mwendo ku hungata ngu silo soneso, Jehovha kha na mbi amukela wukhozeli wathu, eto ti nga maha hi daya wuxaka wathu ni Jehovha.
Lavetela tithomba ta moya
w08 15/11 21 ¶9
Timhaka ta hombe ta mapapilo a Jakobe ni Pedro
1:10-12. Tingelozi ti txi navela ngutu kupfisisa ditshuri do tshima adi vaprofeti va Txizimu va nga ti bhala mayelana ni dibanza da Wukristu adi di nga sawulwa. Ditshuri donedo di ve hakubasani mbimu yi Jehovha a nga khata kuthumisana ni mabanza. (Vaef. 3:10) Nanathu hi nga etetela txikombiso txa tingelozi ngu kumaha wuxolisisi wa ‘timhaka to tshima ta Txizimu’.—1 Vak. 2:10.
it-3658 ¶3
Muwoneleti
Muwoneleti wa Hombe. Pedro wo khata 2:25, ti nga maha a txi womba mhaka yi yi ku ka Isaya 53:6, yi womba-wombako ngu “tinvuta ta kuhangalaka,” se Pedro a ti khene: “Aniko akuwa mi tshumete mi wuya ka Mdyisi ni Muwoneleti wa mimoya yanu.” Mhaka yiya yi kombetela ka Jehovha, nguko vathu va Pedro a nga txi vabhalela va sa hambana ni Jesu Kristu, kambe ngu mhaka yakwe va tshumete ve va ni wuxaka nayo ni Jehovha i ku Muwoneleti wa Hombe wa vathu vakwe. (Mas 23:1; 80:1; Jer 23:3; Eze 34:12) Jehovha muwoneleti awu a xolisisako timbilu. (Mas 17:3) Dipswi kuxolisisa ngu Txigriki i ku ‘e·pi·sko·pesʹ wuyelana ni wulamuli wa Jehovha awu tisako dikhombo, ngu txikombiso ka dilembe dizana do khata, Jerusalema kha sikota kuwona ti to se yi ti hokile mbimo ya kuxolisiswa i ku ‘e·pi·sko·pesʹ ngu Txigriki. (Luk 19:44) Mwendo di nga yelana kambe ni wuyelo ya yinene, kufana ni va va no dhumisa Txizimu ngu “ditshiku da kuta ka txona.”—1 Ped 2:12.
21-27 KA OUTUBRO
TITHOMBA TA MU KA DIPSWI DA TXIZIMU | 1 PEDRO 3–5
“Magwito a sotshe simaha ma hafuhi”
w13 15/11 3 ¶1
“Zumbani mi txi ti wonela mi khongela”
Wa mwamna wo kari a thumako ni wusiku a wombile tiya: “Mbimo yo karata ngutu kuzumba u txi wona i mbimo yi di ku hafuhi ni kutxa.” Vathu ava tilavako ve zumba va txi wona wotshe wusiku va nga tumelelana ni mhaka yiya. Makristu ma manana ni txikarato txi txi fanako, ngako matsimbitiselo awa a Sathani ma fananiswako ni wusiku wo lapha, eyo i mbimo yo karata ngutu ka timbimo totshe. (Var. 13:12) I ndi nava phango ya hombe ngako hi txo tshuka hi otela ka mbimo yiya yo gwita. Ngu toneto, nda lisima kuzumba hi ‘txi wonelela hi khongela.’—1 Pedro 4:7.
w99 15/4 22 ¶3
Hi nga kutumbula ni ku kuxula ngu nzila yihi kutandeka kwathu?
Ngu magwito, khumbula txialakanyiso txa mpostoli Pedro, txi womba tiya: “Magwito a sotshe simaha ma hafuhi. Ngu toneto, zumbani mi di ni mapimo a manene, mi txi ti wonela mi khongela. Ngutu-ngutu, khatalelani kurandana nguko lirando la fenengeta mtalo wa sionho.” (1 Pedro 4:7, 8) Ti hehukile kuleka kwa mbi hetiseka kwathu mwendo ka vamwani kubela mbiluni kwathu ku hi tsulupeta. Sathani wa kuziva kutandeka kwathu. Ene a vanga mibhando ti to e xula. Ngu toneto hi fanete kukuluveta hi ‘fenengeta sionho’ soneso ngu lirando la hombe, hi si “ningi mbimo Dhiyabhulosi.”—Vaefesu 4:25-27.
Ina wa ti tsakela kuamukela vapfhumba?
Mhaka yimwani ayi Pedro a nga laya vanathu ku ve yi maha i ti ‘kuziva kuamukelana mbimo yi va endelanako.’ (1 Pedro 4:9) Ngu Txigriki, “kuziva kuamukela vapfhumba” ti womba “kutsakela, mwendo kukombisa wunene ka valuveli.” Kambe Pedro a ti gela vanathu ti to ve ‘amukelana’, hambiku va nga ti zivana ve tshumela ve thuma votshe. Kuziva kuamukelana ti ndina va vhunisa kutxani?
Ti ndina va vhuna ti to ve tolovelana. Awe ko? Ina wa khumbula litsako li u nga li mana ditshiku di mwanathu a nga khala ku kuramba mtini kwakwe? Mwendo ditshiku di awe u nga khala kuramba mwanathu mtini kwako? Mi zivanile kwati. Phela nzila ya yinene yo zivana ni vanathu ngu va ramba mtini kwathu. Makristu a mbimoni ya Pedro ti ti lava me seketelana nguko sikarato si txo ya si engeteleka. Ka “masiku a kugwitisa” aya hi ku ka ona, nathu ti lava hi maha toneto. —2 Tim. 3:1.
Lavetela tithomba ta moya
w13 15/6 23
Tixamulo ta siwotiso sa vagondi
Bhiblia yi womba ti to Jesu a Txhumayete “mimoya yile yi nga ti kusekelwani.” (1 Pedro 3:19) Ti lava kuwomba txani toneto?
▪ Mpostoli Paulo a womba to mimoya yoneyo ngu yile ya “kale ka masiku a Nowa ayi yi nga mbi lava kuengisa.” (1 Pedro 3:20) Ti ha kubasani ti to Pedro a ti womba tingelozi ati ti nga tipata ni Sathani. Judha a womba ti to “tingelozi ti ti nga mbi veketa wukoma wa tona, aniko ti nga leka wukhalo wa tona,” mbimo yi a nga womba to Txizimu txi ti “ti vekile mtemani, ti di sungilwe ngu makhodha o mbi guma, ti verela kulamulwa ka ditshiku da hombe.”—Judha 6.
I ngu nzila yihi Tingelozi ti nga mbi engisa ka masiku a Nowa? Ku si se hoka Ndambi, tingelozi toneto to biha ngutu ti ti mahile vathu, i ku ti i nga singa makungu a Jehovha ngu siwumbiwa sa moya. (Gen. 6:2, 4) Hahanze keto, tona ti mahile ta mataho ni vavasikati va ha mafuni. Txizimu kha txa maha siwumbiwa sa moya ti to si maha timhaka ta mataho. (Gen. 5:2) Txizimu txi na tigumisa tingelozi tiya to biha ngu mbimo ya kona. Kasi konku, nga ha Judha a nga womba ngu kona ti ka “txidema txa hombe,” hi nga wombako to i jele ngu didhawa da moya.
I ngu mbimo muni Jesu a nga txhumayela “mimoya yile yi nga ti kusekelwani”? Pedro a bhate ti to atiya ti mahekile mbimo yi Jesu a nga ti “hanyisilwe ngu ka moya.” (1 Pedro 3:18, 19) Wona ti to Pedro a tshumela e womba ti to Jesu a “txhumayete.” Kuva ku di thumisilwi dipswi diya, ti komba ti to mhaka yiya yi mahekile na Pedro a si se bhala dipapilo dakwe do khata. Tikombako ti to, msana ka kuva Jesu a di wusilwi, a ti ya huwelela txhatxhazelo yo biha ayi tingelozi ti ndi no yi mana. Kutxhumayela kuwa, ku si ningi tingelozi tile to biha lungelo yo tihunduluka.I ti kutxhumayela wulamuli. (Jona 1:1, 2) Msana ka kuva a di kombisile likholo ni kuthembeka kala efa, e tshumela e wuswa ka vakufa, a kombisile ti to Dhiyabhulosi kha nga ni mtamo kwakwe, ngu toneto, a ti ni txivangelo txo womba wulamuli ka tingelozi tile to biha.—Joh. 14:30; 16:8-11.
Ka mbimo yi yi tako, Jesu a na sunga Sathani kumweko ni tingelozi tiya, e ti rinza diphalani ko hokoma. (Luka 8:30, 31; Mtu. 20:1-3) Ku si se hoka mbimo eyo, tingelozi tiya to biha ti txidemani ka hombe, ni ku ngu ditshuri ti emela ku loviswa.—Mtu. 20:7-10.
w08 15/11 21 ¶7
Timhaka ta hombe ta mapapilo a Jakobe ni Pedro
4:6—Mba mani “vafi” ava ‘Evangeli yi nga txhumayelwa’ kwawe? Kuwombwa ava va nga ti ‘fite ka tiphazamo ni sionho sawe’ mwendo va nga ti ‘fite’ngu didhawa da moya, va si se txhumayelwa mahungu a manene. (Vaef. 2:1) Kukhukhela mbimo yi va nga kombisa likholo, va khatile “kuhanya” ngu didhawa da moya.
28 KA OUTUBRO–3 KA NOVEMBRO
TITHOMBA TA MU KA DIPSWI DA TXIZIMU | 2 PEDRO 1-3
Simamani mi khumbula “kuhoka ka ditshiku da Txizimu”
w06 15/12 27 ¶11
Jehovha a na maha ti to kuva ni wululami
Hi fanete ku ti pfisisa ngu nzila yihi ti to Jehovha ni Jesu a na tisa wulamuli ngu txi “kuluveta”? Dipswi da Txizimu di womba ti to hambiku Jehovha a ku ni “kutimisela,” a na tisa ngu txi kuluveta wulamuli ngu mbimo ya kona. (Luka 18:7, 8; 2 Pedro 3:9, 10) Ka masiku a Nowa, Jehovha a lovisile votshe vathu vo biha ngu mbimo ya kona. Ngu mbimo ya Loti, Jehovha lovisile kambe vathu vo biha ngu kuwisa mndilo txitimwi ka didhoropa da Sodhoma ni Gomora. Jesu a ti khene: “Ti na va nga toneto, ditshiku di Mwanana wa M’thu a no humelela ngu dona.” (Luka 17:27-30) Vathu vo biha va na tshumela ve loviswa “ngu txidhukisa.” (1 Vatesalonika 5:2, 3) Ngu ditshuri, hi nga tsaniseka ti to Jehovha kha na mbi tumelela hambi ditshiku dimwedo di pinda ka mbimo yi a nga yi vekisa ti to e tisa wulamuli.
w06 15/12 19 ¶18
“Ditshiku da hombe da Jehovha di hafuhi”
Kha ti xamatise aku mpostoli Pedro a hi kuzetako kuzumba hi txi khumbula “kuhoka ka ditshiku da Txizimu.” Hi nga mahisa kutxani toneto? Ngu kuzumba hi di ni “mahanyelo o sawuleka a wukhongeli.” (2 Pedro 3:11, 12) Kuzumba hi di ñolekile ngu timhaka ta moya ti nga hi vhuna kurinzela “ditshiku da Jehovha.” Dipswi da Txigriki a di di ku ‘simama u khumbula,’ ngu kukongoma di womba “kukomisa.” Athu kha hi nge sikoti kumaha ditshiku da Jehovha di hoka ngu txikuluveta. Kambe, ngako hi txi zumba hi di ñolekile ngu timhaka ta moya, hi na wona mbimo yi txi pinda ngu txikuluveta.—1 Vakorinto 15:58.
Lavetela tithomba ta moya
w08 15/11 22 ¶2
Timhaka ta hombe ta mapapilo a Jakobe ni Pedro
1:19—I mani “nyezi”? Yi humelete mbimo muni, ni ku hi ti zivisa kutxani toneto? Nyezi i Jesu Kristu kota Mfumeli wa Mfumo wa Txizimu. (Mtu. 22:16) Ngu 1914, Jesu a humelete txitimwi ka sotshe sivangwa, kota Mfumeli wa Wumesiya a txi huwelela kutxa. Kuphinduka kwakwe ku kombisile kwati nzila yi a no dhumiswa ngu yona se i di mfumeli, etio ti kombisa ti to Dipswi da Txizimu da themebeka. Kuwona timhaka ngu nzila yi ya, ti hi vhuna kuziva ti to nyezi se yi humelete.
w08 15/11 22 ¶3
Timhaka ta hombe ta mapapilo a Jakobe ni Pedro
2:4—Nji txani Tartaru ni ku tingelozi to biha ti betilwi mbimo muni kona mule? Tartaru wukhalo awu wu ngo fananiswa ni jele, kambe kona kha ku khotelwi vathu, kambi kubetwa sivangwa sa moya. Wukhalo wa txidema txa hombe ngu didhawa da moya mayelana ni sikongomelo sa Txizimu. Ava va ku Tartaru kha va nga ni themba ya wumangwana. Txizimu txi rinzile tingelozi to biha ngu mbimo ya Nowa, tona ti na simama ti di kona kala kuhoka ditshiku di ti no loviswa.