Bhibhiliyoteka ya Site ya Watchtower
Bhibhiliyoteka ya
Site ya Watchtower
Txitxopi
ñ
  • ñ
  • BHIBLIA
  • MABHUKU
  • MITSHANGANO
  • mwbr25 Março pp. 1-12
  • Mareferensiya a txibhukwana txa mitshangano ya Mahanyelo a Wukristu

Ka txiyenge txiya, kha ku nga ni vhidhiyo

Hi divalele, vhidhiyo yi nge txhayi, ku ni ti nga maheka.

  • Mareferensiya a txibhukwana txa mitshangano ya Mahanyelo a Wukristu
  • Mareferensiya a txibhukwana txa mitshangano ya Mahanyelo a Wukristu—2025
  • Si sungwana sa timhaka
  • 3-9 KA MARÇO
  • 10-16 KA MARÇO
  • 17-23 KA MARÇO
  • 24-30 KA MARÇO
  • 31 KA MARÇO–6 KA ABRIL
  • 7-13 KA ABRIL
  • 14-20 KA ABRIL
  • 21-27 KA ABRIL
  • 28 KA ABRIL KALA 4 KA MAIO
Mareferensiya a txibhukwana txa mitshangano ya Mahanyelo a Wukristu—2025
mwbr25 Março pp. 1-12

Mareferensiya a txibhukwana txa mitshangano ya Mahanyelo a Wukristu

© 2024 Watch Tower Bible and Tract Society of Pennsylvania

3-9 KA MARÇO

TITHOMBA TA MU KA DIPSWI DA TXIZIMU MAVINGU 3

Themba Jehovha

ijwbv gondo 14 ¶4-5

Mavingu 3:5, 6—“U nga thembe mapimo ako upune”

“Themba Jehovha ngu yotshe mbilu yako.” Hi kombisa ti to ha themba Jehovha ngako hi txi maha timhaka ngu nzila yi ene a ti lavisako tona. Ti lava hi themba Txizimu ngu mbilu yathu yotshe. Ka Bhiblia dipswi di di ku mbilu, di txhamusela a ti hi ku ngu tona ngu mndani, ti patako matipfelo, mapimiselo ni simaho sathu. Ngu toneto, kuthemba Txizimu ngu mbilu yathu yotshe ti pata to tala kupinda matipfelo athu. Hi to sawula ku mthumela nguko ha tsaniseka ti to Mvangi wathu wa tiziva a ti i ku ta tinene ngutu kwathu.—Varoma 12:1.

“U nga thembe mapimo ako upune.” Ti lava hi themba Txizimu nguko mapimo athu kha ma hetiseka. Se ngako hi txo themba mapimo mwendo matipfelo athu, hi nga thuka hi maha sisungo a si makhatoni si nga wonekako nga nza sinene, kambe ngu magwito si nga hi beta txibeheni. (Mavingu 14:12; Jeremiya 17:9) Wutxhari wa Txizimu wu gulekile ngutu kupinda wathu. (Isaya 55:8, 9) Ngako hi txo tumela ku kongomiswa ngu mapimiselo a Txizimu, mbimo yotshe hi na maha sisungo sa sinene.—Masalmo 1:1-3; Mavingu 2:6-9; 16:20.

ijwbv article 14 ¶6-7

Mavingu 3:5, 6—“U nga thembe mapimo ako”

“Alakanya ene ka totshe tinzila tako.” Ka totshe ti hi ti mahako ka wutomi wathu hi lava kupimisa ngu mawonelo a Jehovha. Hi maha toneto ngu kumaha mkombelo, hi kombela mkongomiso wa Jehovha ni kulondisa a ti ti nga bhalwa mu ka Bhiblia.—Masalmo 25:4; 2 Timoti 3:16, 17.

“Ene a na lulamisa tinzila tako.” Jehovha wa lulamisa tinzila tathu ngu ku hi vhuna ti to hi hanya ngu kutumelelana ni milayo yakwe yo lulama. (Mavingu 11:5) Hi txi maha toneto, hi na vayilela ku ti beta ka sikarato ni ku hi nava ni wutomi wo tsakisa ngutu.—Masalmo 19:7, 8; Isaya 48:17, 18.

be 76 ¶4

Simama u kula ngu didhawa da moya

Msana kova m’thu a di pindile ngu ka siemo so hambana-hambana sa wutomi, mbimo yimwani a nga thuka e tigela tiya: ‘Ni khala kuwonisana ni mhaka yo nga tiya kale. Na tiziva ti to ni no maha.’ Ina wutxhari kupimisa ngu nzila yiya? Dibhuku da Mavingu 3:7 da hi bhasopisa di txi: “U nga ti wone u di txharihile upune.” Txiperiyensia txathu txi fanete ku hi vhuna kuwona timwani ati ti patekako ka mhaka yoneyo ngako hi txi wonisana ni siemo so kari. Mbimo yi hi yako hi kula ngu didhawa da moya, txiperiyensia txathu ni txona txi na hi vhuna kupfisisa ti to hi ngo humelela ka wutomi wathu ngu kuvhunwa ngu Jehovha dwe. Ngu toneto, kukula kwathu ngu didhawa da moya kha ku woneki ngu txiperiyensia txi hi ku natxo, kambe ngu kutiemisela kulava mkongomiso wa Jehovha. Hi kombisa kukula kwathu ngu didhawa da moya ngu kuthemba ti to txi walo txi txi nga hi humelelako txi sa tumelelwa ngu Jehovha. Hi tshumela hi kombisa ku kula koneko ngu kuva ni wuxaka wo tsana ni Tate wathu wa nzumani.

Tithomba ta moya

w06 15/9 17 ¶7

Timhaka ta hombe ta dibhuku da Mavingu

3:3. Hi fanete kuninga lisima wuxinji ni ditshuri di hi ngadi mana nga likordhawu lo tshura ngutu. Ti lava hi tshumela hi bhala tifanelo toneto timbiluni kwathu, ti va txienge txa wutomi wathu.

10-16 KA MARÇO

TITHOMBA TA MU KA DIPSWI DA TXIZIMU MAVINGU 4

“Xayisa mbilu yako”

w19.01 15 ¶4

U nga leke mbilu yako yi jokotelwa ngu Sathani!

4 Ka Mavingu 4:23, dipswi “mbilu” di womba mialakanyo yathu, matipfelo athu, sikongomelo sathu ni minavelo yathu. (Lera Masalmo 51:6.) Di womba ti hi ku ngu tona mbiluni kwathu, i si nga ti hi wonekisako tona ngu hahanze.

w19.01 17 ¶10-11

U nga leke mbilu yako yi jokotelwa ngu Sathani!

10 Ti to hi vhikela mbilu yathu, ti lava hi sikota kuwona phango, ngu txikuleveta hi yi vayilela. Dipswi di di nga hunduluxelwa va txi “vhikela” adi di ku ka Mavingu 4:23 di hi maha hi alakanya ngu mthumo wu wu nga txi mahwa ngu muwoneleli. Ka timbimo ta Solomoni, muwoneleli a txi zumba a di ma tute ti to e woneleta maguma a didhoropa, ngako ku txi humelela to kari a ti veta mpundu. Mthumo wa muwoneleli wu hi vhuna kuwona ti hi felako ku ti maha ti to hi vayilela mapimo a Sathani.

11 Ka timbimo ta kale, muwoneleli a ti thumisana ni vawoneleli va matimba. (2 Sam. 18:24-26) Ngu wumweyo va ti vhikela didhoropa ngu kuvhala kwati matimba ngako ku txita mlala. (Neh. 7:1-3) Livhalo lathu lo gondiswa ngu Bhiblia, li nga thuma kota muwoneleli ni ku hi pekela mpundu mbimo yi Sathani a zamako kutula matimba a timbilu tathu, mwendo a txi zama kujokotela mialakanyo, matipfelo mwendo minavelo yathu. Mbimo yi livhalo lathu li pekako, hi fanete hi vhala matimba.

w19.01 18 ¶14

U nga leke mbilu yako yi jokotelwa ngu Sathani!

14 Kuxayisa mbilu yathu, kha ti wombi ku yi vhalela yi si nyetiswi dwe, kambe hi nga tshumela hi yi tula ti to hi beta timhaka ta tinene. Tshumela u alakanyisisa ngu txikombiso txa muwoneleli wa didhoropa. Muwoneleli wa matimba a ti zumba a di vhate matimba ti to mlala a si wuleli, kambe mbimo yimwani a txi ma matula ti to si bela sakudya ni simwani si si nga txi laveka. I di ku matimba ma si tulwi, vahanyi va kona va ndi na fa ngu nzala. Ngu ha kufanako, nathu ti lava hi tula timbilu tathu ti to hi beta mapimiselo a Txizimu.

w12 1/5 32 ¶2

“Xayisa mbilu yako!”

Ngu kutxani hi di fanete kuvhikela mbilu yathu yo fanekisela? Txizimu txi huhutete Mkoma Solomoni ti to e bhala tiya: “Txitimwi ka sotshe si si dinganako kuxayiswa, xayisa mbilu yako, nguko tita ngu ka yona tinzila ta wutomi.” (Mavingu 4:23) Wutomi wathu konku ni wa mbimo yi yi tako wu dhependerwa ngu ti mbilu yathu yi ku ngu tona. Ngu kutxani? Nguko Jehovha wa tiwona ati ti ku mbiluni kwathu. (1 Samuwele 16:7) Nzila yi Jehovha a hi wonako ngu yona yi tsimbitisana ni ti hi ku ngu tona ngu mndani, i ku “wuthu wo sisaleka wa mbilu.”—1 Pedro 3:4.

Tithomba ta moya

w21.08 8 ¶4

Ina u tiemisete kurinzela Jehovha?

4 Mavingu 4:18 yi hi gela tiya: “Nzila ya vo lulama yi fana ni kuwoninga ka wuronga ku woningako kambe ni kambe di za di hetiseka kutxa.” Mapswi a ma ku, “nzila ya vo lulama” ti yelana ni nzila yi Jehovha a vhunako vathu vakwe kupfisisa sikongomelo sakwe kudotho-kudotho. Ndimana yiya yi tshumela yi hi vhuna ku pfisisa nzila Mkristu a mahako ku txitxa ka wutomi wakwe kudotho-kudotho kasi ku e tipfananisa ni kudhunda ka Jehovha. Kukula ngu didhawa da moya kha ti maheki ngu mbimonyana, ti teka mkama. Ngako hi txi gonda ni kutshumela hi thumisa silayelo asi si mu ka Bhiblia ni asi hi si manako ka sengeletano ya Jehovha, hi na sikota to kudotho-kudotho hi etetela txikombiso txa Kristu. Hi na tshumela hi txi ziva kwati Txizimu. A hi woneni txikombiso txo kari txi Jesu a nga txi womba kasi ku hi pfisisa mhaka yiya.

17-23 KA MARÇO

TITHOMBA TA MU KA DIPSWI DA TXIZIMU MAVINGU 5

Vayilela kutiñola ngu nzila yo biha ngu ta mataho

w00 15/7 29 ¶1

Awe u nga zumba u di basile ka mahanyelo a nzambwa a mafu yawa

Ka dibhuku da Mavingu, m’thu wa wukanganyisi a txhamuselwa kota, “wamsikati wa dibhemba”—wa digelegele. Mapswi aya a ma thumisako kasi kubzweta dijaha, malombela kufana ni dihesa da wulombe ni ku marawula kupinda mafura. Ngu toneto ti khatisako tona kutiñola ko biha ngu ta mataho. Wona txikombiso txa Amy dihorana do tshura da 27 wa malembe. Di womba tiya: “Ku ni dijaha adi i ku kolega wangu mthumoni, dona di zumbela ku ni wonetela ni ku ni ndunduzela. Kuwomba ditshuri ta tsakisa kunõlwa ngu nzila yo sawuleka. Kambe ni pfisisile to txikongomelo txakwe i di ti to ni randana nayo. Ni nge thuki ni di tumeletete toneto.” Vathu vo nga tiya, va tolovela kuthumisa mapswi o tshamba kasi kubzweta m’thu ti to e maha nayo wugango. Se kasi kutiwonela ka mlawu wonewo, ti lava hi thumisa wusikoti wathu wo pimisa.

w00 15/7 29 ¶2

Awe u nga sikota kuvayilela kutiñola ngu nzila yo biha ngu ta mataho ka mafu yawa o biha

Wuyelo yo tiñola ngu nzila yo biha ngu ta mataho ya tshavanga kufana ni longwe ya sakana ni ku ya daya kufana ni ditxhari. Eto ti tshumela ti maha e zumbela kupekwa ngu livhalo, kumana txirumbo txo mbi txi emela, ni malwati ya ma tshapelako. Se ka va i ku mpatwa, pimisa kupanda aku akupfako ngu kuva mmweyo wawe a sa kombisa kuthembeka. Tximaho tximwetxo txo mbi thembeka txi nga vanga silonda sa hombe kwanu kota mpwata wutomi wotshe. Ngu ditshuri kutinõla ko biha ngu ta mataho ta dayisa.

w00 15/7 29 ¶5

Awe u nga sikota kuvayilela kutiñola ngu nzila yo biha ngu ta mataho ka mafu yawa o biha

Hi fanete kuzumba kule ni vathu va va ku ni mahanyelo a nzambwa. Hi nga maha toneto ngu kuvayilela kuengisela wutxenje mwendo kuxalela maprograma aya ma kombisako timhaka ta nzambwa, ti patako kuxalela pornografiya (Mavingu 6:27; 1 Vakorinto 15:33; Vaefesu 5:3-5) I ngava wuphukuphuku kusakana ngu kusihana ni vathu vonevo mwendo kuambala ngu nzila ya walo!—1 Timoti 4:8; 1 Pedro 3:3, 4.

Tithomba ta moya

w00 15/7 29 ¶7

U nga zumba u di basile ka mahanyelo a nzambwa a ditiko diya

Solomoni a kombisa wuyelo ya ku ti ñola ngu nzila yo biha ngu ta mataho. M’thu wu a mahako wugango kha ti xoniphi nem kha ti ningi lisima. Ngu ditshuri, ta dhanisa ku ti ñola ngu nzila yo biha ngu ta nataho kasi kuenelisa txilaveko txathu mwendo txa mmwani. Phela kumaha timhaka ta mataho ni m’thu wu u nga mbi txhadha nayo wo ti puxisa.

24-30 KA MARÇO

TITHOMBA TA MU KA DIPSWI DA TXIZIMU MAVINGU 6

Hi nga gonda txani ka titshokoti?

it-1115 ¶1-2

Titshokoti

‘Wutxhari wo xamatisa.’ ‘Wutxhari’ wa titshokoti hi nga wuyelo ya kupimisa, kambe i wuyelo ya wutxhari awu ti nga ningwa ngu Mvangi, wo ti maha to maha ti sa nga pimisa. Bhiblia yi womba ti to titshokoti ta ‘lulamisela sakudya ngu mbimo ya kuhisa ti txi verela mbimo ya pheho.’ (Mav 6:8) Yimweyo ya tixaka ta titshokoti to toloveleka yi manekako Palestina, yi ziwako kota tshokoti yo elula (Messor semirufus), ya sengeletela sakudya so tala ngu mbimo ya kuhisa kasiku ti ta dya ngu mbimo ya pheho, i ku mbimo yi ti karatako kumana sakudya. Tshokoti yiya yi tolovela kumaneka hafuni ni mu kuhulwako timbewu. Mbimo yi mati ma wako, me hokelela timbewu ati ti nga sengeletelwa amu ka mikele, titshokoti ta humisela timbewu kasi ku ti oma ngu lisani. Mbimo yi ti wonako ti to mbewu ya kukumuka kasiku yi mila, ta thavisa mbilu ya mbewu yoneyo kasi ku yi si mili. Mtxawa wonewo wa titshokoti wu woneka ka wukhalo awu wu si nga ku ni txivhunye, mwendo amu ku ku ni makamba ya timbewu hafuhi ni mikele ya tona.

Txikombiso txa txinene. Wuxolisisi wo komanyana wu nga mahwa mayelano ni titshokoti wa seketela mapswi a ya ma ku: “Tsula u ya wonana ni titshokoti, awe mkara; wona tinzila ta tona, u na txhariha.” (Mav 6:6) Titshokoti kha ti ziwi basi ngu kululamisela sakudya para mbimo ayi yi tako, kambe ngu ku ti emisela ka tona ko txhovhela simaha so nemela ku ti pinda, ti maha totshe ati ti nga ti kotako kasi kuhetisisa mthumo wa tona, hambi ti txo wa ta wuka ti txhovha. Ta thuma kumweko, mikele ya tona yi zumba yi di basile ni ku ta khatalelana, mbimo yimwani ta vhuna titshokoti ati ti nga dawiswa mwendo ti nga karala ku ti tshumelela mikeleni.

w00 15/9 26 ¶3-4

Vhikela ditina dako

Ina kha ha fanela kuthuma ngu kuhiseka kufana ni titshokoti? Kuthuma ngu kuhiseka ni ku ti karatela kutshukwatisa mthumo wathu nda tinene kwathu, hambi hi si wonelelwi. Ti si nga ni mhaka ni ti to hi mthumoni, txikolwani, mwendo hi pateka ka timhaka ta moya, hi fanete kumaha totshe ati hi nga ti kotako. Kufana ni titshokoti ti manako wuyelo ngu konaha ka mthumo wa tona wo hiseka, Txizimu txi lava ti to nathu ‘hi tsaka ngu mthumo wathu.’ (Ekleziyaste 3:13, 22; 5:18) Livhalo lo basa ni kueneliseka i wuyelo ayi hi nga yi manako ngu kuthuma ngu kuhiseka.—Ekleziyaste 5:12.

Ngu kuthumisa siwotiso sa kwa mbi lava xamulo, Solomoni a zama kutxharihisa mikara: “Mkarawe, u na otela kala yihi mbimo kani? U na wuka ngu mbimo muni, ngu wukoheni kwako kani?” A txi etetela mawombawombelo ya mkara, a tshumela atxi: “Na nga khudhahela ka kudotho, ni otela ka kudotho, ni khutarelanyana mawoko, ni otela; ngu kumaha keto, wu nata kwako wusiwana kufana ni dikhamba, ni kuvilela kwako ku nga m’thu a nga xoma.” (Mavingu 6:9-11) Mbimo yi mkara a ku khene o humula, wusiwana wu ta nga dikhamba kupwata ku mxasela nga disotxhwa. Tithembwe ta mkara ti ta te ngu mipa ni kutshulelwa ngu mwasi. (Mavingu 24:30, 31) Mabhindu akwe ma wa ngu txikuluveta. U alakanya ti to patrawu a na zumba ni mkara eneyo kuhokela hayi? Ina aluno wu i ku mkara ko gonda ti na mtsimbilela kwati?

Tithomba ta moya

w00 15/9 27 ¶3

Vhikela ditina dako

Sete wa so maha asi si nga wombwa ka Mavingu si pata yotshe mithumo yo biha. “Maso o ti guleta” ni “mbilu yo luka mipimiso ya wubihi,” sionho siya si ka kupimisa. “Lidimi la makuhu” ni “wufakazi wa walo wo womba-womba makuhu,” mapswi a txionho. “Manza o theketa mnoha wo mbi na mnandu” ni “mikondo yo tutumela to biha” simaho sa wubihi. Atxi Jehovha a txi nyenyako ngutu, vathu ava va dhundako kukuzetela mazunga ka vathu ava va ndi no va ni kurula. Kuengeteleka ka numero ya 6 kuya ka 7, kukombisa ti to kha ku laveki to lixta yi va kompleto nguko vathu mbimo yotshe va engetela mithumo yawe yo biha.

31 KA MARÇO–6 KA ABRIL

TITHOMBA TA MU KA DIPSWI DA TXIZIMU MAVINGU 7

Vayilela siemo si si nga kubetako txibeheni

w00 15/11 29 ¶5

“Xayisa sirumo sangu u na hanya”

Dijanela adi Solomoni a nga wona ngu dona hahanze, di ti ni txo vhala ngu txona—di ti ni digradhe do mahwa ngu siplangwana. Mbimo yi di nga swa ku ve ni txidema tiruwani. Ene a woni dijaha adi ti ndi no hehuka ku di zwetwa. Aku di nga si nga ni kupfisisa mwendo mapimo a manene, di txi pwatekelwa ngu wutxhari. Ti nga maha di txi ma ziva mazumbelo a wukhalo wuleya ni ti ti ndi no thuka ti maheka. Dona di tshuketile “dikhonani” ka nzila yoya mtini ka digelegele dileya. I ti mani? A ti lava txani?

w00 15/11 30 ¶4-6

“Xayisa sirumo sangu u na hanya”

Kutshambisela ka txisofu txa wule wamsikati ku ti lombela. Atxi womba-womba ngu nzila yo dhaneta ni ku a txi tsaniseka ka ti a nga txi ti womba. Totshe ati a nga txi ti womba a ti khatile ngu ku ti pimisa kasi kubzweta dijovhem dileya. Ngu kuwomba ti to a ti ningete miphaxo ya kuthutha ni kudihisa kuvilela kwakwe, ti txi ti komba i di m’thu wo lulama ni ku va ni wumoya. Miphaxo ya kuthutha ayi yi nga ti ningelwa dithempeleni khe Jerusalema yi txi pata sihari, mpupu, mafura ni vhinya. (Levhi 19:5, 6; 22:21; Mitengo 15:8-10) Aku awu a nga ti maha miningelo a nga di ni lungelo yo tekela ene ni mwaya wakwe simwani sa miphaxo ya kuthutha, ene a ti lava kuwomba ti to mtini kwakwe a ti ni sasingi so sela ni sakudya. Ati a nga txi lava ku ti womba ti di basile: Dijovhem di ndi na tidila kheya. Awule wamsikati a humile mtini kwakwe kasi kuxoletela dijovhem donedo. Ta xamatisa ku va ni m’thu wu a thembako mapswi o fana ni oneyo. Mgondi mmwani wa Bhiblia a wombile tiya: “Ti hakubasani ti to digelegele dile di ti lavetela m’thu, kambe ina di ti lavetela mfana wule ngu kukongoma? Txiphukuphuku basi, ti nga mahako i di dona dijovhem diya, txi ndi no kholwa ka mapswi a digelegele.”

Hahanze ko ndinda maso ngu siyambalo sakwe, mwendo mawombawombelo akwe ni mapswi akwe o lombela, a tshumete e thumisa wukanganyisi ngu silo sakwe so bhumula. Aha koza e womba tiya: “Se ni fenengetile m’bhedhu wangu ngu simaha so tshura, ngu so mahwa ngu masilika o hehuka a Egipta; ni tshatshete ditaho dangu ngu mira, mafura ni kinamomo.” (Mavingu 7:16, 17) A lulamisete mbedhu wakwe ngu malesole o tshura, ni ku a tshatshete mbedhu ngu mira, mafura ni kinamomo.

“Ngono hi ta ti khurisa ngu lirando kala ditxa” a simama atxi, “a hi tsakisane ngu lirando.” Txirambo txileya txi ti pata ta tingi ku mphinda ku jantara. Ti ti pata ku ya titsakisa ngu ta mataho. Phela ka dijovhem dileya txirambo txi tiwoneka i di txo tsakisa. Kasi kuya masoni atxi mu kanganyisa a tshumete e mu gela tiya: “Nguko mwamna wangu kha nga ho m’tini, a endete kuya kule. Manzani kwakwe a ni txikwamana txa male; a na wuya m’tini ngu ditshiku di a ngadi womba.” (Mavingu 7:18-20) Ene a mu tsanisekisile ti to a sa fanela kuthava txilo nguko mwamna wakwe ati endile ni ku a ndi na swela ku wuya. Phela a ti ti ziva tipulani to xenga dijovhem dileya. “A mndindile ngu kutala ka mapswi akwe, ngu kutshambisela ka txisofu txakwe a mkurumetile.” (Mavingu 7:21) Ku tilaveka wamwamna wo fana ni Josefa kasi ku lamba txirambo txileya. (Genesisi 39:9, 12) Ina dijovhem diya di ndi na sikota kulamba?

w00 15/11 31 ¶2

“Xayisa sirumo sangu u na hanya”

Phela ka dijovhem dileya ti txi woneka ti txi karata kulamba txirambo txiya. Dona di divate totshe ta tinene ati di nga ti timaha, di londisa wule wamsikati ‘nga homu ya kuya kudawani.’ Kufana ni wamwamna awu anga sungwa ngu titxhini anga si na ku sikota kuhuluka kutsayiswa, dijovhem dileya ni dona di ndindetwe txionhoni. Dona di tumbute ti to di ka phango mbimo yi di nga “fulwa txivindi ngu lingove,” tiwombako to a dawisilwe aha ko ti ndi na m’vangela lifo. Kufa ngu didhawa da nyama nguko a ndi na mana malwati aya matshapelako ngu mhaka ya ku tiñola ko biha ngu ta mataho. A ndi na tshumela e fa ngu didhawa da moya ‘wutomi wakwe wu ti haphangoni.’ A ti mahile txionho txa hombe ka Txizimu. A ndi na fa kufana ni txinyana atxi txi tutumelako mlawuni!

Tithomba ta moya

w00 15/11 29 ¶1

“Xayisa sirumo sangu u na hanya”

“Si sungelele [sirumo sangu] mu ka titiho tako,” Solomoni a simama atxi, “u si bhala ka mbila ya mbiluni kwako.” (Mavingu 7:3) Kufana ni titiho i ku ta lisima ngutu ka ti hi lavako ku timaha, wuzivi wa mu ka Bhiblia wu fanete ku hi kongomisa ka totshe a ti hi lavako ku timaha. Hi fanete ku wu bhala mu ka ti mbilu tathu, wu va txienge txa wutomi wathu.

7-13 KA ABRIL

TITHOMBA TA MU KA DIPSWI DA TXIZIMU MAVINGU 8

Engisa wutxhari wa Jesu

cf 131 ¶7

“Na m’randa Tate”

7 Ka vhersikulu  22, wutxhari wu womba tiya: “MKOMA a ni mani makhatoni ka tinzila takwe, na asi se maha mithumo yakwe ya kale ngutu.” Ahawa, ku wombawombwa ngu mhaka yimwani hahanze ka wutxhari nguko fanelo yiya kha ya ‘vangwa.’ Yona kha ya ngava ni makhato nguko Jehovha waho mbimo yotshe niku a ni wutxhari. (Masalmo 90:2) Mwanana wa Txizimu avite “Matiwula a sotshe sivangwa.” Ene a to vangwa, mbwo khata ka sotshe si Jehovha a nga si vanga. (Vakolosa 1:15) Ku si se vangwa mafu ni nzuma, Mwanana wa Txizimu ati tiho nga ha Mavingu a wombako ngu kona. Kota Dipswi mwendo Mwombawombeli wa Jehovha, ene i ti txikombiso txo hetiseka txa wutxhari wa Jehovha.—Johani 1:1.

cf 131-132 ¶8-9

“Na m’randa Tate”

8 Mwanana wa Txizimu a ti maha txani kudingana mbimo yotshe yi yo lapha a si se kuta hamafuni? Vhersikulu 30 yi womba ti to ene a ti didhawani ka Txizimu kota “m’gondiswa mwendo mthumi wamnene.” Ti lava kuwomba txani toneto? Vakolosa 1:16 yi txhamusela tiya: “Ngu kwakwe si vangilwe sotshe simaha nzumani ni hamafuni . . . sotshe simaha si vangilwe ngu ngene, kambe si vangetwe ene.” Ngu toneto, Jehovha Mvangi a mahile sotshe sivangwa simwani ngu kuthumisa Mwanana wakwe Mthumi wamnene, ku khukhela ka sivangwa sa moya nzumani kuya ka wuako wa hombe wu wu wonekako, mafu ni mixakaxaka yo xamatisa ya mindonga ni sihari ku hokela ka txivangwa txa lisima ngutu i ku m’thu. Ngu nzila yo kari, ku thumisana aku ku nga vaho ka Tate ni Mwanana hi nga ku fananisa ni ku thumisana ka enjinyeru ni meseri. Meseri ngu wu a ku ni niwusikoti wo hetisisa projetu yi yi nga mahwa ngu enjinyeru. Mbimo yi hi xamatiswako ngu txienge txo kari txa mtumbuluko hi va hi txi dhumisa Enjinyeru wa Hombe. (Masalmo 19:1) Kambe hi nga tshumela ni kona hi pimisa ngu mbimo yo lapha ayi Mvangi ni “mthumi wakwe wamnene” va nga yi heta va txi thumisana.

9 Ngako vathu vambidi vo mbi hetiseka va txi thumisana, mbimo yimwani va manana ni sikarato. Kambe eto kha ta maheka ka Jehovha ni Mwanana wakwe! Mwanana a thumile malembe o tala ni Tate wakwe aha a nga womba tiya: “Ditshiku ni ditshiku ni ti ti mtsakisa.” (Mavingu 8:30) Ngu ditshuri, ene a ti tsaka ngu kuthuma ni Tate wakwe, nene Tate a txi tsaka ngu kuthuma ni Mwanana wakwe. Ngu kutsimbila ka malembe, Mwanana atxi ya a txi fana ni Tate wakwe, ngu kugonda kuetetela tifanelo takwe. Kha ti xamalisi kuva wuxaka wu va nga ti nawo wu di yite masoni wu tsana! Ti ha kubasani ti to vona va ti ni wuxaka wo tsana ni lirando la hombe.

w09 15/4 31 ¶14

Kombisa kubonga ka Jesu—I ku Dhavhidha ni Solomoni wa Hombe

14 Ova m’thu mmweyo dwe awu a nga ti ni wuzivi wo pinda wa Solomoni. M’thu eneyo i Jesu Kristu, aha a nga ti txhamusela kota wa hombe “kupinda Solomoni.” (Mat. 12:42) Jesu a wombawombile ngu “mapswi a wutomi wo mbi guma.” (Joh. 6:68) Ngu txikombiso, ka gondo ya Mmangoni, Jesu a wombawombile ngu mavingwa mamwani a Solomoni, aya ma txhamuselako timhaka to tala a ti ti tisako litsako ka va va khozelako Jehovha. (Mav. 3:13; 8:32, 33; 14:21; 16:20) Jesu a junyatisile ti to litsako la ditshuri li tiswa ngu silo si si tsimbitisanako ni wukhozeli wa Jehovha ni ku hetisisa sithembiso sakwe. Ene a wombile tiya: “Ava va ku ni ditora do lava kuziva Txizimu va tsaka, nguko Mfumo wa nzumani mbwawe.” (Mat. 5:3) Avale va thumisako matshina ya ma manekako ka tigondo ta Jesu, va ni wuxaka wa hafuhi ni Jehovha, “i ku txisima txi txi ningako wutomi.” (Mas. 36:9; Mav. 22:11; Mat. 5:8) Jesu ngene txikombiso txa “wutxhari wa Txizimu.” (1 Vak. 1:24, 30) Kota Mkoma nzumani, ene a ni “moya wa wutxhari.”—Isa. 11:2.

Tithomba ta moya

g 5/14 16

‘Wutxhari wa dhana’—U nga wu pfisa kutxani?

▪ Nga ha The World Book Encyclopedia yi wombako ngu kona, “Bhiblia dibhuku adi di gondwako ngutu kupinda mabhuku mamwani.” Yona ya maneka yotshe mwendo ngu txienge ngu kona mu ka 2.600 wa tidimi, ni ku kona mu ka 90 porsentu wa vathu ha mafuni kotshe va yi lera.

▪ Wutxhari wu tshumela “wu dhana” ngu ku kongoma. Ka Matewu 24:14, hi mana tiya: “Mahungu a manene a Mfumo ma na txhumayelwa hamafuni kotshe, kasiku matiko otshe me ti ziva. Ngu kona ma no hoka magwito [a mafu yawa].”

14-20 KA ABRIL

TITHOMBA TA MU KA DIPSWI DA TXIZIMU MAVINGU 9

Vana m’thu wo txhariha, u nga vi mtseketseli

w22.02 9 ¶4

“Riya nzeve u engisa mapswi a titxhari”

4 Kambe kuwomba ditshuri ti nga karata ngutu kutumela txivhuno a txi hi nga ningwako ngu mwanathu ngu kukongoma. Hi nga henya. Hambi ku hi nga kholwako ti to kha ha hetiseka, hi nga ti wona ti txi hi karatela ngutu kuamukela txivhuno ngako mwanathu wo kari a txi womba ngu kukongoma tiphazamo tathu. (Lera Ekleziyaste 7:9.) Hi nga tshumela hi ti emelela, hi nga pimisa ti to mwanathu wule a to hi ninga txivhuno ngu ku a hi nyenyako. Se hi nga tutumela kuwona tiphazamo ka mwanathu wule a nga hi ninga txivhuno hi pimisa tiya, ene kha nga ni fanelo yo hi ninga txivhuno nguko nene wa maha tiphazamo. Ngu magwito ngako txialakanyiso txi hi no ningwa hi si txi tsakeli hi na txi lamba se hi ti wona i di tshuku kuya kombela txivhuno ka mwanathu mmwani awu hi pimisako ti to a na womba ti hi ti tsakelako.

w22.02 12 ¶12-14

“Riya nzeve u engisa mapswi a titxhari”

12 Nji txani txi nga hi vhunako ti to hi tumela txivhuno? Hi fanete kuva vo tiveka hahatshi ni kukhumbula ti to kha ha hetiseka, ni ku mbimo yimwani hi nga maha to huma hanzila. Nga ha hi nga ti wona ngu kona, Jobe a ti ni mawonelo a walo, ngu msana a ma lulamisile ni ku Jehovha a mu katekisile ngu toneto. Ngu kutxani? Nguko Jobe i ti wo ti veka hahatshi. Ene ngu kutiveka hahatshi a tumete txialakanyiso txi a nga ningwa ngu Elihu hambi ku i nga ti m’dotho kwakwe. (Jobe 32:6, 7) Ngako hi txi ti veka hahatshi ti na hi vhuna kuthumisa txivhuno hambi hi txi txi wona nga hi nga txi hi txi txi tsakela mwendo ku va hi di ningilwe ngu m’thu wu i ku wa m’dotho kwathu. Didhota dimwani da Canadá di womba tiya: “Athu kha hi si koti kuwona hipune a mu hi tandekako kona, se kha hi na ku si kota kutshukwatisa ngako hi si ningwi txivhuno.” Aku hotshethu ti lavako hi tshukwatisa ka to kari se kota Makristu hi fanete kusakulela ku va ni mihando ya moya ni kutshukwatisa wusikoti wathu ka m’thumo wo txhumayela?—Lera Masalmo 141:5.

13 Wona txivhuno i di txikombiso txa lirando la Jehovha. Jehovha a la ti i ku ta tinene kwathu. (Mav. 4:20-22) Mbimo yi a hi kawukako ngu kuthumisa Bhiblia, mabhuku athu mwendo mwanathu wu a nga vitwa i nzila yo kombisa to ene wa hi randa. Vahebheru 12:9, 10 yi womba ti to: “Txizimu txa hi laya kasiku txi txi hi vhuna.”

14 Veka mapimo ka txivhuno i si nga ka nzila yi txi nga ningelwa ngu yona. Mbimo yimwani hi nga tipfa nga nzila yi hi nga ningwa ngu yona txivhuno hi nga yona ya yinene. Ditshuri ti to a wu a ningelako txivhuno a fanete kumaha totshe ti a nga ti kotako kasi ku e txi ningela ngu nzila ya yinene. (Vag. 6:1) Kambe ngako i di athu hi ningwako txivhuno, hi fanete kuveka mapimo ka txivhuno hipune i si nga ka nzila yi txi nga ningelwa ngu yona. Se hi nga ti wotisa tiya: ‘I di to kha ni tsakeli nzila yi txivhuno txi nga ningelwa ngu yona ina ku ni ti ni nga ti thumisako ka txivhuno txonetxo? Ina ni nga leka kuveka mapimo ka tiphazamo ta mwanathu wu a nga ni ninga txivhuno se ni veka mapimo ka txivhuno?’ Hi nga ti komba hi di txharihile ngako hi txi zama kuwona tinzila to thumisa txivhuno txi hi ningwako.—Mav. 15:31.

w01 15/5 30 ¶1-2

‘Ngu kona ha ka wutxhari, masiku athu ma na engeteleka’

Nzila yi m’thu wu a ku ni wutxhari a xamulako ngu yona ngako a txi ningwa txialakanyiso ya hambana ni ya mtseketseli. Solomoni a wombile tiya: “Kawuka txhari, yi na kuranda. Ninga gondo ka txhari, kasi ku yi na txhariha ngutu.” (Mavingu 9:8b, 9a) Awu a nga txhariha wa tiziva ti to “kotshe kutsayiswa kha ku tekeli kuwoneka ti to njimaha txo tsakisa, aniko kuwonekisa ku nga ngu xaniswa. Kambe msana ka mbimo, ka vale va nga gondiswa toneto, kuninga mihando ya kudikha ni ya kululama.” (Vahebheru 12:11) Hambiku txialakanyiso txi si tshambiko mbimo yi hi ningwako, kha ha fanela ku tiemelela, nguko ngako hi txi txi amukela hi nava vo txhariha.

Mkoma wuwa wo txhariha a simama atxi “gondisa wo lulama, se ene a na kula mu ka mapimo.” (Mavingu 9:9b) Awalo awu a zivako ngutu mwendo a nga kumba aha ko kha na ku ngadi e gonda. Hi nga wona kutsakisa ka tona, kuwona vathu va va nga kula ngu tanga va txi tumela ditshuri ni kutiningetela ka Jehovha! Nathu hi fanete kusakulela kugonda ngu Jehovha ni ku va ni mapimo a manene.

w01 15/5 30 ¶5

‘Ngu kona ha ka wutxhari, masiku athu ma na engeteleka’

Mbutixamuleli wathu kumaha a ti hi nga tikotako kasiku hi mana wutxhari. Solomoni a junyatisile mhaka yiya ngu kuwomba tiya: “Ngako u di txharihile, u na ti txharihela upune; se ngako u ti mtseketseli, ngawe wekha u no xaniseka.” (Mavingu 9:12) Wo txhariha a na wuyelwa, aniko mtseketseli a na xupheka. Hotshethu hi na funyela a si hi nga phaya. Ngu toneto ti lava hi “pfisisa wutxhari.”—Mavingu 2:2.

Tithomba ta moya

w06 15/9 17 ¶5

Timhaka ta hombe ta dibhuku da Mavingu

9:17—Nji txani “mati o piwa,” ni ku ngu kutxani ma txi “lombela”? Kota ku Bhiblia yi fananisako timhaka ta mataho ka va va nga txhadha ni kusela mati o titila a txisima, se mati o piwa ma fana ni kumaha ta mataho ni m’thu wu u nga mbi txhadha nayo txihunjani. (Mavingu 5:15-17) Mapimo oneyo a ti to na mbi tumbulwa ngu ona ma mahako nga mati oneyo mo lombela.

21-27 KA ABRIL

TITHOMBA TA MU KA DIPSWI DA TXIZIMU MAVINGU 10

Hi nga wu manisa kutxani wutomi wo tsakisa?

w01 15/7 25 ¶1-3

‘Makatekwa ma lumba ava vo lulama’

Vo lulama va katekiswa ngu nzila yimwani. “Awule a thumako ngu manza o kanganyisa wa maha txisiwana, aniko wa nonisa manza a vale va pfisisako. Awule a sengeletelako ngu mbimo yo funyela mwanana wo txhariha, aniko wule a otelako kuelulani, mwanana wo wisa tingana.”—Mavingu 10:4, 5.

Mapswi a mkoma ka vale va thumako ko elula ma ni txhamuselo ya lisima ngutu. Mbimo yo elula hi nga mbimo yo otela. I mbimo yo lapha ya mthumo wo hiseka. Ngu ditshuri i mbimo ya txikuluveta.

Hi txi pimisa ngu kuelula vathu i singa timbewu, Jesu a gete vagondiswa vakwe atxi: “Kuelula ngu ditshuri nga hombe, kambe vathumi vadotho.” Ngu toneto, kombelani Nyamne wa kuelula [Jehovha Txizimu] ti to e rumela vathumi ka mthumo Wakwe wa kuelula.” (Matewu 9:35-38) Ngu dilembe da 2000, kona mu ka 14 wa timiliyoni ta vathu va xalete Txialakanyiso txa lifo la Jesu—mtengo wa hombe wo pinda mtengo wa Tifakazi ta Jehovha. Se i mani wu a nga kanetako ti to ‘tithembwe ti do xwee ti lava kuelulwa’? (Johani 4:35) Vakhozeli va ditshuri va kombela ka Nyamne wawe kasiku e engetela vathumi mbimo yi va tiningetelako ngu kuhiseka ka mthumo wo maha vagondiswa ngu kutumelelana ni mikombelo yawe. (Matewu 28:19, 20) Ni ku Jehovha wa katekisa mizamo yawe! Ngu dilembe da mthumo da 2000, kona mu ka 280.000 va bhabhatisilwe. Ni vona va ti karatela kuva vagondisi va Dipswi da Txizimu. Hotshethu ha pfa litsako ni kueneliseka ka mbimo yiya ya kuelula ni ku ha hiseka ka mthumo wo maha vagondiswa.

w01 15/9 24 ¶3-4

Tsimbila ngu ‘nzila ya wululami’

Solomoni a junyatisile lisima la wululami. Ene a ti khene: “Thomba ya nyatithombe, ngu yona i ku didhoropa dakwe do tsana. Sisiwana si fuviswa ngu wusiwana wa sona. Mithumo ya m’thu wo lulama yi myisa kuhanyani, simaho sa muonhi si myisa kuonhani.”—Mavingu 10:15, 16.

Tithomba ti nga va txivhikelo ka timbimo to karata kufana ni didhoropa adi di ku ni mi muro di nga vhikelako ava va zumbako ka dona ngu mpimo wo kari. Ni ku wusiwana wu nga kuhoxota ngako ku txi humelela sikarato si u nga mbi si emela. (Ekleziyaste 7:12) Ngu toneto, mkoma wuwa wo txhariha atxi womba-womba ngu phango ayi yi nga welako wo ganya ni wu i ku txisiwana. Awu a nga ganya ti nga maha e wekelela ko themba ngutu tithomba takwe, a txi pimisa ti to tithomba toneto “diguma do guleka.” (Mavingu 18:11) Txisiwana txi nga pimisa to wusiwana wa txona wu maha to txi si vi ni themba ya txilo ngu wumangwana. Se ngu wumbidi wawe, va leka ku timahela ditina da dinene masoni ka Txizimu.

it-1340

Makatekwa

Jehovha wa va katekisa vathu. “Txikatekiso txa MKOMA ngu txona txi ningako thomba ka m’thu, kambe ene kha na kuengetela txilo.” (Mav 10:22) Jehovha wa katekisa avale a va amukelako ngu kuva vhikela, kuva maha ve humelela, kuva kongomisa ni kukhatalela silaveko sawe.

Tithomba ta moya

w06 15/5 30 ¶18

Mana litsako ngu kutsimbila ngu wuthembeki

18 “Txikatekiso txa MKOMA”—Eto ngu ti ti mahako vathu vakwe ve humelela ngu didhawa da moya ni ku ha tsaniseka ti to “ene kha na kuengetela txilo.” (Mavingu 10:22) Se ngu kutxani vakhozeli vo tala va Jehovha va txi tshangana ni sikarato so tala ni kuxaniseka? Athu hi xaniseka ngu konaha ka sivangelo sa siraru. 1) Kwambi hetiseka kwathu. (Genesisi 6:5; 8:21; Jakobe 1:14, 15) 2) Sathani ni madhimoni akwe. (Vaefesu 6:11, 12) 3) Ditiko diya do biha. (Johani 15:19) Hambiku Jehovha a tumelelako to timhaka to biha ti hi humelela, kambe hi ngene a ti vangako. Ngu ditshuri, “sotshe sihiwa sa lisima, sotshe siningo sa kuhetiseka, si ta ngu txitimwi, si txi txhika ngu ka Tate wa liwoningo.” (Jakobe 1:17) Makatekwa a Jehovha kha ma hi vangeli kupanda.

28 KA ABRIL KALA 4 KA MAIO

TITHOMBA TA MU KA DIPSWI DA TXIZIMU MAVINGU 11

A ti u si faneliko ku ti womba!

w02 15/5 26 ¶4

Vathu vo lulama va kongomiswa ngu wuthembeki

Wuthembeki wa valulami ni wubihi wa vaonhi, toneto ta gwesa vathu vamwani. Mkoma wa Israyeli a wombile tiya “Mkanganyisi a haxula mwakelani wakwe ngu txisofu, aniko vo lulama va txhatxhiswa ngu wuzivi wawe.” (Mavingu 11:9) I mani a nga kanetako ti to kulumbeta, manzenze, tixamba sa moxa vamwani? M’thu wo lulama a sawula mapswi ngu wutxhari, a womba-womba ta tinene ni ngu nzila ya wunene. Ene wa txhatxhiswa ngu wuzivi nguko wuthembeki wakwe wa mninga mapimiselo aya ma lavekako kasi kukomba ava va mlumbetako ti to vo hemba.

w02 15/5 27 ¶2-3

Vathu vo lulama va kongomiswa ngu wuthembeki

Ngako ka didhoropa do kari ku txi hanya vathu va vanene, ti maha to didhoropa di va ni kurula, ta vhuna vathu va va hanyako ka dona ti to ve zumbiseka. Da kula ni ku da humelela. Kambe avale va lumbetako, va wombawombako kubiha ngu vamwani va maha ti to ku si vi ni litsako, kuva ni mibhando ni sikarato. Eto ti maheka ngutu-ngutu ngako vathu vonevo va di gondile ngutu, va di ganyile mwendo i di vakoma. Didhoropa di di nga tala ngu vathu vonevo di ni mazunga, wukanganyisi, mahanyelo o biha ni wusiwana.

Ditshina da mlayo adi di ku ka Mavingu 11:11 da thuma ka malanda a Jehovha mbimo yi ma patanako ngu wumwewo dibanzani kufana ni didhoropa. Dibanza di di ku ni vathu va va nga vitwa ngu didhawa da moya va kongomiswako ngu wuthembeki, va ni litsako, va hiseka, va vhunana ni ku va dhumisa Jehovha. Jehovha wa katekisa dibanza donedo ni ku da kula ngu didhawa da moya. Mbimo yimwani, ti nga maha mtxawanyana wa wudotho wa vathu wu si tsaki, wu khata kusolasola nzila yi timhaka ti mahwako ngu yona. Vona va fana ni “mkoloti wo bava” awu wu navako ngu txikuluveta wu tshapela vamwani. (Vahebheru 12:15) Vathu vonevo va lava kuthangela ni nduma. Va nga khata kungurangura, ve womba to timhaka kha ti tsimbili kwati dibanzani, va ni txisawusawu mwendo ve khata kusolasola madhota. Ati va ti wombawombako ti nga vanga mibhando dibanzani. Ngu ditshuri hi fanete kuvayilela mabhulo awe, hi fanete kusakulela kuva vathu vo vitwa ngu didhawa da moya ni ku va ni kurula ni wumwewo dibanzani.

w02 15/5 27 ¶5

Vathu vo lulama va kongomiswa ngu wuthembeki

Phela awu a si tiziviko kuveka “matomu ka txisofu” txakwe a nga tisa sikarato sa hombe ngutu! Ene a ni txisofu txo hinda aha koza e lumbeta vamwani. Se ngu txikuluveta, madhota ti lava me maha to kari kasi kufuvisa mkhuwo wonewo wo biha. Kuhambana ni wu a si “vekiko matomu,” m’thu wo pfisisa wa yi ziva mbimo ya yinene yo malala. Ene kha hangalaseli sihunja. Aku a tizivako to manzenze ma tisa sikarato wa “thembeka ngu didhawa da moya.” Wa thembeka ka vanathu ni ku kha hangalasi timhaka ta sihunja ati ti nga wusako sikarato. Hi nga kutsakisa ka tona ku va ni vanathu vo nga tiya vo thembeka dibanzani!

Tithomba ta moya

g20.1 11, dikwadro

Nzila yo wonisana ni txitrese

“DAYA TXITRESE NGU WUNENE”

“M’thu wa wunene wa mahela wunene moya wakwe apune, aniko wule i ku txigevenga wa xanisa nyama yakwe apune.”—MAVINGU 11:17.

Dibhuku di di ku khene Daya txitrese (ngu Txingiza) di ni msungo wu wu ku khene: “Daya txitrese ngu wunene.” Ngu kuya ngu m’bhali wa dona Dr. Tim Contopher, kuñola vamwani ngu nzila ya yinene ti nga tshukwatisa dihanyo dathu ni ku ti hi maha hi va ni litsako. Kasi m’thu wo karata ni wo dhunda kubhongela vamwani, kha mani litsako nguko votshe va mthava.

Hi nga tshumela hi xula txitrese ngu ku athu hipune hi tiñola ngu wunene. Ngu txikombiso, hi nga ta tinene ku tikarata ngutu mwendo ku ti wona u si vhuni txilo. Jesu a ti khene: “U na randa muakelani wako nga ti u ti randisako tona awe upune.”—Marku 12:31.

    Mabhuku ngu Txitxopi (2008-2025)
    Huma
    Bela
    • Txitxopi
    • Rumela vamwani
    • Ati u ti lavako
    • Copyright © 2025 Watch Tower Bible and Tract Society of Pennsylvania
    • Sipimelo so thumisa Web Site yiya
    • Milayo yo vhikela didungula da txihunja
    • Privacy Settings
    • JW.ORG
    • Bela
    Rumela vamwani