Txithembiso txa lisima

Ku di pindile mitxima yimbidi, msana ka kuva Vaisrayeli va di humile Egipta va hokile hafuhi ni Mmango wa Sinayi, se va ti ya zumba kona hale kudingana mbimonyana. Jehovha a gete Mosi ti to e kwela ka Mmango wa Sinayi, e ya m’gela tiya: ‘Ni hulukisile Vaisrayeli. Se ngaku vona va txo maha totshe ati ni no va ruma, va nava vathu vangu vo sawuleka.’ Mosi a to txhika ngu mmangoni e ta gela Vaisrayeli totshe ati Jehovha a nga ti m’gete. Wa ti ziva ati Vaisrayeli va nga womba? Vona va to kha vona: ‘Athu hi na maha totshe ati Jehovha a no hi ruma.’

Mosi a tshumete e kwela kambe Mmangoni ka Sinayi, se Jehovha a ti ya m’gela tiya: ‘Ni na womba-womba ni Vaisrayeli mndani ka masiku mararu. Va gele ti to hi nga para ve kwela Mmangoni ka Sinayi.’ Mosi a txhikile ngu mmangoni, e ta gela Vaisrayeli ti to ve ti lulamisela nguku Jehovha a txi lava ku va gela timhaka ta lisima ngutu.

Ku di pindile masiku mararu, Vaisrayeli va to wona kukelukela ni direfu do phum di txi fenengeta Mmango wa Sinayi. Vona va to tshumela ve pfa singwalangwanda ni kuvetwa ka mpundu. Se va to gwita ve wona mndilo wu txi txhika ngu txitimwi ka Mmango wa Sinayi. Mbimo yi va nga wona totshe tile, Vaisrayeli va to thava ngutu. Mmango wu to fenengetwa ngu wutshi ni ku wu txi zinginikela ngutu. Se, kuvetwa kule ka mpundu ku txoya ku pfala ngutu. Msana keto, va to pfa dipswi da Txizimu di txi pfala ngu hagari ka mndilo wule di txi kha dona: ‘Ani ngani Jehovha. Anu kha ma fanela kukhozela simwani sizimu.’

Mosi a tshumete e kwela kambe ka Mmango wa Sinayi, se Jehovha a ti ya m’gela milayo ayi Vaisrayeli va nga ti fanete ku yi engisa. Milayo yoneyo, yi txi womba ati Vaisrayeli va nga ti fanete kukhozelisa tona Txizimu. Yona yi txi tshumela yi txhamusela ati Vaisrayeli va nga ti fanete ku ti maha, ni ti va nga sa fanela kumaha. Mosi a bhaletete totshe e gwita e ta lera milayo yoneyo masoni ka Vaisrayeli. Se Vaisrayeli va thembisile tiya: ‘Jehovha, athu hi na maha totshe ati u no hi ruma.’ Kambe, ina vona va mahile ati va nga thembisa?