Txiwotiso txo hehuka atxi txi nga tisako wuyelo ya yinene

Mary ni John,a va hanya ka ditiko adi di nga tala ngu vawuyi vo ta ngu Filipinas, se vona va ti dhunda kutxhumayela mahungu a manene ka vathu vonevo. Ngu mbimo ya korona, Mary a khatile sigondo so tala sa Bhiblia i singa ka vathu va ditiko dile a nga txi zumba ka dona dwe, kambe ni ka vathu va matiko mamwani. A mahisile kutxani toneto?

Mary a txi wotisa tiya sigondo sakwe sa Bhiblia, “Ina wa ziva m’thu mmwani awu a lavako kugonda?” Ngaku atxi womba to ina, Ene atxi mkombela ti to e mkomba m’thu eneyo.” Kumaha txiwotiso txonetxo txo hehuka, ti tisa wuyelo ya yinene. Ngu kutxani? Nguku vathu ava va gondako Bhiblia va tilava ti to maxaka awe ni vangana vawe ve ziva a ti va ti gondako. Yi vite yihi wuyelo yo maha txiwotiso txonetxo?

Jasmin txigondo txa Mary a mkombile 4 wa vathu ava va nga txi lava kugonda Bhiblia. Mmweyo wa kona i Kristine, awu a nga txi tsakela kugonda aha ko atxi lava kugonda makhambi mambidi ngu divhiki. Mbimo yi Mary a nga wotisa Kristine ti to ina atxi ziva m’thu mmwani a nga txi tsakela kugonda Bhiblia, ene a wombile tiya “Ina, na kukomba vangana vangu.” Msana ka mavhikinyana, Kristine a kombile Mary 4 wa vathu ava va nga txi lava kugonda Bhiblia. Ngu kutsimbila ka mbimo, Kristine a tshumete e komba Mary vamwani vangana vakwe ava va nga txi lava kugonda, se vangana vonevo ni vona va mkombile vathu vamwani va nga txi lava kugonda.

Kristine a txi lava ti to mwaya wakwe awu wu nga ti Filipinas ni wona wu gonda Bhiblia. Ngu toneto, ene a womba-wombile ni mwanana wakwe Andrea. Makhatoni, Andrea atxi pimisa tiya, ‘Tifakazi ta Jehovha hi nga wukhongeli wa muwa, nem va kholwi ka Jesu ni ku va thumisa Testamentu ya Kale.’ Kambe msana ka gondo yimweyo dwe, ene a tumbute ti to a ti a nga txi ti pimisa ngu Tifakazi ta Jehovha i singa ditshuri. Yotshe mbimo yi a nga txi gonda timhaka ta tiphya amu ka Bhiblia ene a txi womba tiya, “Aku ti ngaza ti bhalwa amu ka Bhiblia, ditshuri!”

Ngu kutsimbila ka mbimo, Andrea a kombile Mary vangana vakwe vavambidi ni kolega wakwe ava ni vona va nga txi lava kugonda Bhiblia. I si ngeto dwe, Andrea a ti ni titiya wa dibhofu a dhanwako ku i Angela, awu mbimo yotshe a nga txi engisela mbimo yi Mary a nga txi tsimbitisela gondo Andrea. Ditshiku dimwani, Angela a kombete Andrea ti to e mkomba Mary ni ku a kombete kugondelwa. Angela atxi tidhunda ngutu a ti a nga txi tigonda. Mndani ka mtxima, Angela se a txi ziva tindimana ta tingi ngu msungu ni ku a kombete kugondelwa 4 wa makhambi ngu divhiki! Ngu kuvhunwa ngu Andrea, Angela a khatile kuxalela mitshangano ngu vhidhiyu konferensiya.

Mbimo yi Mary a nga ziva ti to mwamna wa Kristine a txi engisela gondo, ene a m’wotisile ti to ina a txi ti tsakela kupateka ka gondo. Ene a xamute atxi “Na engisela, kambe u nga ni mahe siwotiso, u txo ni maha siwotiso na swaya.” Ku di pindile 5 wa timeneti va txi gonda, ene a wotisile siwotiso sasingi kupinda Kristine ni ku a txi lava kusimama e gonda.

Txiwotiso txa tximwetxo txa Mary txo hehuka txi mahile ti to eva ni sigondo so tala sa Bhiblia. Ti lavile e kombela vanathu vamwani ti to ve mvhuna kutsimbitisa sigondo soneso. Mary a tsimbitisile 28 wa sigondo sa Bhiblia ka mune wa matiko o hambana.

Jasmin, awu hi nga bhula ngu ngene khe makhatoni, a bhabhatisilwe ngu Abril wa 2021. Kristine a bhabhatisilwe ngu maio wa 2022 ni ku a tshumete eya Filipinas kasiku e ya va ni mwaya wakwe. Sigondo simwani sa simbidi sa Mary asi a nga kombwa ngu Kristine ni sona si bhabhatisilwe. Angela a bhabhatisilwe msana ka mitximanyana ni ku a thuma kota nyaphandule wa mbimo yotshe. Mwamna wa Kristine, Joshua ni mwanana wawe wa dihorana, Andrea ni sigondo simwani sa Bhiblia vaya masoni va txi kula ngu didhawa da moya.

Ka timbimo ta Jesu ni Vapostoli, mahungu a manene ma hangalakile ngu txikuluveta ka timwaya to tala. (Joh 1:41, 42a; Mith 10:24, 27, 48; 16:25-33) Ngu kutxani u siwotisi sigondo sako sa Bhiblia ti to “Ina wa ziva m’thu wu a navelako kugonda Bhiblia?” Kutilava txiwotiso txonetxo txo hehuka txi nga maha ti to u va ni sigondo so tala.