Kagamhanan sa Kalibotan—Kon Nganong Nagkinahanglan Kita Niini
ANG ideya sa usa ka kagamhanan alang sa kalibotan sagad mopukawg paglaom ug kalisang. Paglaom tungod kay ang kagamhanan sa kalibotan sa mga kamot sa tukmang mga tawo makapahiusa sa katawhan diha sa pakigdait. Kalisang tungod kay ang kagamhanan sa kalibotan diha sa sayop nga mga kamot makapaulipon sa tanang katawhan. Sanglit dako man kaayo ang kapeligrohan, ang paghunahuna ba sa kagamhanan sa kalibotan takos sa seryosong pagtagad? Oo! Nagkinahanglan kita ug kagamhanan sa kalibotan. Ang mosunod magpadayag kon ngano.
● Ang iyang mahuyang, nagtikostikos nga lawas nagsagudsod sa mangitngit nga dalan. Sa nanglabayng 70 ka tuig naanad na siya sa paglakaw nga mag-inusara sa gabii, apan karon mao ang iyang kataposang paglakaw. Usa ka tin-edyer nga giyanon sa droga, sa dakong panginahanglag kuwarta aron makapalit ug dugang inimporteng mga droga, mikuha dili lamang sa iyang diyutayng mga butang kondili sa iyang kinabuhi usab. Apan ang matarong nga matang sa kagamhanan sa kalibotan makahunong sa internasyonal nga pagpayuhot sa mga droga ug busa makasumpo sa krimen.
● Si Fritz, bisag nagtindog sa kilid sa bentana, wala makakita sa niyebeng nangahulog sa gawas. Naghinuktok siya. Kaniadto malipayong panahon kaniya ug sa iyang igsoong babaye ang Pasko. Karon dili na. Ang linampasan sa kamatayon nga 835 ka milyang gitas-on (1,344 km) nagtadlas sa utlanan sa German Democratic Republic ug sa Federal Republic of Germany. Ang si bisan kinsa nga mosulay sa pag-agi nianang linya sa laang, nga may pensa sa barb wire ug armado sa masinggan nga mga bantayanang torre, magaatubang ug seguradong kalaglagan. Apan ang tukmang matang sa kagamhanan sa kalibotan makawala sa tanang utlanan sa nasod ug makapahiusa sa tanang katawhan sa kalibotan.
● Tutokan ka sa iyang makaluluoyng mga mata gikan sa nawong nga nagniwang sa kagutom ug sa naghigos nga lawas ug nagkaluya. Sa pipila lamang ka oras sa jet, nagbungdo sa pagkaon ang kamalig. Apan ang tukmang matang sa kagamhanan makataganag mga abiyo sa pagkaon ug makawala sa kagutom.
● Gibasa sa 40-anyos nga amahan ang nag-uswag nga lumba sa nukleyar nga hinagiban, nagpalandong sa kaugmaon sa iyang pamilya ug nangurog. Gibasa sa iyang 12-anyos nga anak nga lalaki ang epekto sa nukleyar nga gubat ug nahibulong kon aduna ba unya siyay kaugmaon. Apan ang tukmang matang sa kagamhanan sa kalibotan makawala sa nag-uswag nga pundo sa mga hinagiban ug tudloan ang mga tawo sa pakigdait.
● Usa lamang siya ka batang gamay. Ang diyes sentabos (U.S.) nga bili sa medisina makatambal unta sa iyang kalibang, apan walay mabatonan niini. Nganong siya ug ang 15,000,000 pang kabataan nangamatay sa miaging tuig nga unta kini ug ang ubang mga sakit mapugngan man sa simple, baratong mga paagi? Apan ang tukmang matang sa kagamhanan sa kalibotan mopatunghag programa sa panglawas nga epektibo kaayo sa pagwala sa kamatayon gumikan sa impeksiyon, sa sakit ug sa pagkawalay hibangkaagan.
● Duol sa gidulaan sa bata, nag-agos kada adlaw ang hugaw ngadto sa sapa. Gipangnuka ang mga bata, nga napuno sa mga nana ang nuka. Sa laing bahin sa kalibotan, nagpabuga ang mga pabrika ug sulfur dioxide sa hangin ug mahulog sa porma sa asidong ulan nga makadaot sa lasang sa laing nasod. Apan ang tukmang matang sa kagamhanan sa kalibotan makatukod ug makapanaog ug mga sukdanan sa kalibotan batok sa makadaot nga polusyon.
[Kahon sa panid 4]
Mas motaas pa ang listahan sa seryosong mga problema sa matag nasod, lakip niadtong nakaapekto sa kinabuhi sa mga tawo sa laing nasod. Apan, mawala kining tanan kon magtinabangay ang katawhan sa usa ka kagamhanan. Apan unsang politikal nga sistema ang milampos sa pag-atubang ning nagsalapid nga mga suliran nga nagpangayog timbang nga solusyon?