‘Mihunong ang Akong Asawa sa Iyang Trabaho’

Pagmata!: May higayon ba nga napugos ang imong asawa sa pagtrabaho?

Cleve: Mitrabaho siya hapit usa ka tuig human nga naminyo kami. Dayon nagmabdos siya ug napugos sa paghunong.

Pagmata!: Mibalik ba siya ug trabaho human nga natawo ang bata?

Cleve: Kataw-anan kini. Human nga mihunong siya sa pagtrabaho, akong nakita nga wala ako magpangandoy sa iyang kuwarta.

Jeane: [Nagkatawa] Walay nakita si Cleve niana! Magsige akog palit ug mga sapatos, besti, bisan unsa​—wala siyay reklamo. Siempre, giseguro ko nga mabayran ang among mga balayranan. Apan kon gusto kog duha o tulo ka besti, paliton ko kana.

Pagmata!: Busa kinahanglang mag-overtime ka kanunay?

Cleve: Makahinumdom ako kas-a nga nagkinahanglan ako ug kuwarta aron ikaayo sa awto. Busa gisugdan ko ang dugang trabaho. Motrabaho ako sa tanang oras ug nakabaton ug dugang kuwarta. Apan sulod sa unom ka bulan wala akoy natigom bisan usa ka dako.

Pagmata!: Unsay nahitabo?

Jeane: Kon dako ang iyang kita daw dako usab ang among gasto.

Cleve: Mangawagtang ra dayon ang kuwarta. Gawas pa, ang tanang overtime nakabalda sa among Kristohanong mga tigom. Busa human sa unom ka bulan mihunong ako sa pag-overtime, ug sa milabay ang mga bulan nakatigom ra akog kuwarta para ipaayo sa awto.

Pagmata!: Jeane, nakabalik ka na ba sukad sa pagtrabaho?

Jeane: Oo. Sa miaging ting-init nakita nako nga nagkinahanglan ako ug dugang kuwarta, ug nakakita ug trabaho sa day-care center. Apan tulo ka bulan lamang ang akong trabaho. May namatikdan akong kausaban sa akong batang babayeng sais anyos. Magabii ang trabaho ni Cleve ug siya ang nag-atiman sa among anak sa adlaw. Ug dihay gabii nga kinahanglang motrabaho ako nga lapas sa panahon sa pagtrabaho.

Cleve: Nakatulog na ako ug sa akong pagmata wala nako siya makita. Akong gitawag siya. Apan walay tubag. Akong gisusi ang mga bentana, pultahan, sa pasilyo​—akong gipangita siya ilalom sa mga katre, natarantar ako! Ug dayon migawas siya sa aparador nga nagkatawa. Nangurog kaayo ko bisan sa nagsilot kaniya.

Jeane: Sa akong nadunggan kini ug sa paghunahuna sa paagi sa paggakos sa akong anak kanako, akong naamgohan nga siya nagpangita lamang sa akong pagtagad. Busa nakahukom ako nga dili takos niini ang pagtrabaho. Gawas pa mahurot man lang dayon ang akong kinitaan sa buhis, sa mga pangaon ug galastohan sa besti. Busa mihunong ako.

Pagmata!: Apan, dili ba usa ka pinansiyal nga pagsakripisyo ang pag-undang?

Jeane: Kanunay kaming giatiman ni Jehova nga Diyos. Ug gibati namo nga gihatagan ni Jehova ang mga ginikanan ug kaakohan sa pag-atiman sa ilang mga anak. Ug among nakita nga wala na kaayo maatiman ang among anak ug nga nagkinahanglan ako ug dugang panahon nga makauban kaniya. Kana ang hinungdanon kanamo kay sa ubang trabaho.

Cleve: Ug lain pa, kanang sobrang kuwarta sa pagkatinuod wala kaayo makatabang kanamo. Kontento na kami sa among nabatonan. Dili kami dato, apan dili usab pobre. May makita akong mga lalaki sa trabahoan nga motrabaho usahay ug pito ka adlaw sa usa ka semana. Akong gisulayan kini. Dili kini mosaler kanako.

Jeane: Nasayod ako nga malisod ang panahon, apan nagtuo gayod ako sa saad sa Bibliya sa Mateo 6:​33 nga kon imong unahon pagpangita ang Gingharian, motagana ra ang Diyos kanimo.

Pagmata!: Busa unsay imong gibuhat karon sa imong panahon?

Jeane: Sa miaging tulo ka bulan gigugol nako ang 60 ka oras sa usa ka bulan sa pagtudlo sa mga tawo bahin sa Bibliya. Tinuod gayod kini nga kalipay!

Pagmata!: Busa sa imong hunahuna ang mga inahan kinahanglang magpabilin sa balay?

Jeane: Kon mahimo. Ang apohang babaye dili gayod makapuli sa usa ka inahan.