“Walay Tawo nga Adunay Gugma nga Labaw pa Niini”

SI FRANÇOIS, usa sa mga Saksi ni Jehova nga nagpuyo sa Paris, Pransiya, sinati sa mga pulong ni Jesu-Kristo: “Kini mao ang akong sugo, nga kamo maghigugmaay sa usag usa sama sa akong paghigugma kaninyo. Walay tawo nga adunay gugma nga labaw pa niini, nga ihalad sa usa ka tawo ang iyang kinabuhi alang sa iyang mga higala.” (Juan 15:​12, 13 Revised Standard Version) Wala lamang mahibalo si François nga inigmata niya sa sa pagkabuntag sa miaging Septiyembre 22 mohatag ug bag-ong kahulogan kadtong mga pulonga ni Jesus alang kaniya sa dili pa matapos ang adlaw.

Nianang gabhiona, sumala sa iyang naandan, miadto siya sa tigom sa Paris Center Congregation sa mga Saksi ni Jehova, nga gieskedyol sa alas 5:​30 s.h. Sulod na sa 25 ka tuig nga nagtigom ang kongregasyon sa inabangang tigomanan nga nahimutang sa ikaupat nga andana sa daang opisinang edipisyo. Ang edipisyo nahimutang sa usa ka matahom nga plasa sa tumoy sa iladong Avenue de l’Opera, duol sa Louvre Museum.

Nag-alagad ingong attendant, nagbarog si François duol sa pultahan nga andam sa pag-abiabi sa ulahing mangabot. Nagkatunga-tunga na ang mamumulong sa iyang diskurso sa Bibliya, nga sa kalit lamang nakapanemaho si François ug usa ka butang nga nasunog. Dayon nakakita siyag aso diha sa ubos sa pultahan. Gibuksan ni François ang pultahan ug nakakita siya ug berdeng maleta sa gawas​— nga milusot ang aso gikan niini.

Gikawhat ang maleta, gidalidali sa pagkanaog ni François ang tulo ka hut-ong sa mga hagdanan apan napandol sa miabot siya sa tiilan sa hagdanan. Nahulog ang maleta, naabri, ug ang kolor-kahil nga sudlanang plastik nga nahulog. Dalidali niyang gisirhan ang nag-asong maleta ug, gialsa kini ug midagan paggawas sa edipisyo ug mitabok sa dalan, hapit siya mabanggai sa milabay nga sakyanan. Iyang gilabog ang maleta sa pundohanan sa tubig sa fountain diha sa plasa. Dayon mibalik siya nga nagdagan sa pagkuha sa lata sa petrolyo, mibatig kahadlok nga basig bomba usab kini, ug mibalik didto sa fountain ug gilabog kini ngadto sa tubig.

Niining higayona duha ka ansiano sa kongregasyon, kinsa mibiya sa tigom sa pagtan-aw kon unsay nahitabo, miuban kaniya sa fountain. Sanglit nag-aso pa man gihapon ang maleta nga nalubog ug diyutay sa tubig, ang usa sa mga ansiano miingon nga kinahanglang ilang teleponohan dayon ang kapolisan. Sa milakaw sila ug pipila ka lakang gikan sa fountain mibuto ang bomba. Ang mga bentana nga nag-atubang sa plasa nangabuak, ug daghang mga tawo nasamdan tungod sa nangahulog nga bildo. Si François ug ang ubang mga ansiano kuyog niya napisikan sa lapok ug tubig gikan sa fountain apan wala masamdi. Ang ali sa fountain maoy nakasalipod kanila gikan sa pagbuto.

Sa itaas sa Kingdom Hall atbang sa dalan nangabuak ang mga bentana, ug ang uban sa mga mitambong nalamba sa salog tungod sa pagbuto. Apan walay tumatambong ang nasamdan. Ang kadaghanan sa nangalupad nga bildo nasangga sa mabagang kurtina.

Giawhag sa mamumulong nianang gabhiona ang mitambong sa pagpabiling kalma human sa paghatag ug kinasingkasing nga pag-ampo sa pagpasalamat kang Jehova sa iyang panalipod, gipadayon ang tigom. Dayon miabot ang kapolisan ug ang mga bombero. Apan, naghulat sila hangtod nga nahuman ang tigom ug nakahinlo sa nangabuak nga mga bildo sa misugod sila sa pag-usisa.

Gipahalipayan sa mga opisyales ang mga Saksi ni Jehova sa ilang pagkamakalmahon, ug ilabina kang François tungod sa iyang maisog nga buhat. Nagkausa silang tanan sa pag-ingon nga nakautang ang tanang mitambong sa ilang kinabuhi sa iyang kaabtik sa hunahuna ug sa iyang paglihok dayon. Kon mibuto pa unta ang bomba diha sa kahoy nga hagdanan gawas sa pultahan ug kon nasunog pa unta ang dapit tungod sa lata sa gasolina, malaang silang tanan sa kalayo.

Ang pag-atake sa bomba kaylap nga gitaho sa palumagian sa balita sa Pransiya. Bisan ang pamantalaang Swiso mitaho bahin niini, ubos sa ulohang “Tagsaong Pagkakalma.” Ug bahin kang François, nangayo siya ug gihatagan sa panalipod sa kapolisan batok sa mga reporter sa TV ug sa prensa kinsa gustong mopailaila kaniya sa katilingban. Sa gipangutana, mapainubsanong miingon siya: “Akong naamgohan nga nameligro ang among mga kinabuhi. Busa sa akong hunahuna nga mas maayo pang ako ra ang mamatay kay sa mamatay kaming tanan.”

Gisultihan siya sa usa ka polis: “Milagro nga buhi ka gihapon. Tingalig gipanalipdan ka sa imong Diyos. Tinuod ka gayod nga Saksi ni Jehova.”

Sa panahon sa pagsulat niini, giusisa gihapon sa kapolisan kon kinsa ang responsabli sa bomba.