Napatag sa Pagbuto sa Bomba ang Kingdom Hall sa Australia
“Dili gayod kini mahitabo sa usa ka nasod nga sama sa Australia!” Apan nahitabo kini. Sa alas 9:35 sa buntag, Hulyo 21, 1985, si David Winder misugod sa iyang pakigpulong sa Bibliya sa Kingdom Hall sa mga Saksi ni Jehova sa Casula, sa Sydney. Sa milabay ang bayente singko minutos, naitsa siya sa atop tungod sa pagbuto sa bomba, nalumpag ang tigomanan, nakapatayg usa ka tawo, ug nakapadala sa ospital sa 46 sa 109 nga mitambong. Dili gayod kini mahitabo sa Australia, apan nahitabo kini. Kining taho nga gikan sa sangang opisina sa Watch Tower Society sa Australia nagpadayag sa kalisang ug sa trahedya niadtong buntaga, apan gipasiugda usab niini ang makatandog nga determinasyon ug pagtuo sa mga Saksi didto sa pagpadayon sa pagkigtigom ug sa pagmantala sa maayong balita sa Gingharian ni Jehova.
USA ka gamhanong bomba, nga gibanabana sa kapolisan nga usa ka kilo (2.2 lb) sa gelignite, gitago ilalom sa entablado sa mamumulong, giorasan nga mobuto sa panahon sa pakigpulong sa Bibliya. Sa mibuto kini naitsa sa atop ang mamumulong ug mitugpa siya sa bungdo sa kagun-oban sa gawas sa tigomanan—nga nagkadugo, grabeng pagkasamad, nga may duha ka bali nga batiis.
Si Graham Wykes, nga naglingkod sa atubangan, namatay dihadiha dayon. Grabe ang pagkasamad sa iyang asawa ug duha ka anak nga babaye. Ang usa sa membro sa sanga sa Sosyedad, si Sue Schulz, nabaliag ilong ug napangag ang mga ngipon sa atubangan. Ang usa ka interesado nga mitambong gikuhaan ug tinalsik sa bomba sa iyang mga mata. Ang tulo ka bulang bata naospital tungod sa mga samad.
Sa Domingo sa gabii 14 sa 46 nga naospital wala papaulia; ang uban gitugotan sa pagpauli. Ang kadaghanan kanila nag-antos sa kakurat ug sa nangadaot nga mga kuwerdas sa dalunggan. Natingala ang mga tumatan-aw nga diyutay ray namatay, sanglit napatag ang tigomanan.
Tibuok Yutang Publisidad
Naputol ang regular nga mga programa sa radyo ug TV sa tibuok nasod sa pagsibya niini nga pag-atake, ug wala magdugay mikidlap ang dinaliang balita sa tibuok yuta. Ang mahulagwayong mga ulohan sa pamantalaan mao ang Brisbane Telegraph: “MILAGRO! 110 ang naluwas sa pagbuto sa simbahan.” Ang pamantalaan sa nasod nga The Australian miingon: “Ang pagkainosente dili panalipod batok sa terorismo.” Ang unang panid sa Daily Sun sa Brisbane mipahayag: “KALISANG SA BOMBA—nakurat ang nasod sa kasuko batok sa relihiyon.” Ang pangunang sugilanon sa The Sydney Morning Herald nag-ulohan: “Wali bahin sa pamilya, dayon usa ang nagbuy-od nga patay, 49 ang nangasamdan.” Ang artikulo mipadayon: “Ang nakurat nga kongregasyon sa katingalahan kalmado. Ang pipila nagpabilin sa sulod sa pag-atiman sa nangasamdan, ang uban hilom nga migawas sa tigomanan kutob sa ilang maarangan. Ang kapolisan, ambulansiya ug mga opisyal sa bombero miabot sa dapit sa pila lang ka minuto.”
Wala magtuo ang kapolisan nga ang internasyonal nga mga terorista ang tagbuhat sa krimen. Sumala sa gitaho, dili momenos sa 60 ka tawo ug mga organisasyon ang miangkon sa bag-o pang pagbomba sa mga terorista sa tugpahanan sa Frankfurt, sa Pederal nga Republika sa Alemanya—nga maoy naandang paagi sa terorista. Apan walay usa ang miangkon sa pag-atake sa Kingdom Hall.
Tingali ang editoryal sa Hulyo 22 nga gula sa The Australian nagpabanaag sa konklusyon nga naabot sa daghang may hunahunang tawo sa mipahayag kini, sa lakbit: “Kinsa man kadtong mibutag mga bomba ug bisan unsa pa ka daotan sa iya o ilang mga motibo, ang mga Australiano napahinumdoman nga nahimong gamay na kaayo ang atong kalibotan. Kita maapektohan gayod sa mga kalisang nga nahimong bahin sa atong mga kinabuhi sa pomuluyo sa nagatubong bahin sa atong planeta.”
Tinuod, walay bahin karon sa kalibotan nga dili maapektohan niining mga kahimtanga ug walay tawo usab nga dili maapektohan. Matin-awng gipasidaan ni apostol Pablo kining kahimtanga diha sa 2 Timoteo 3:1-4: “Hinumdomi nga malisod ang panahon sa kataposang mga adlaw. Ang mga tawo unya . . . dili mapuanguron, tigbutangbutang, mabangis ug mapintas; ilang dumtan ang maayo; sila mabudhion, mapinasagdanon, ug mapahitas-on.” (Today’s English Version) Ug dili ba si Jesus nagpasidaan nga niining panahona ‘tungod sa pagsanay sa kadaotan mobugnaw ang gugma sa kadaghanan’?—Mateo 24:12.
Sa mikaylap ang balita, ang sangang opisina sa Watch Tower Society sa Sydney nakadawat ug daghang tawag sa telepono nga nagpahayag sa kakurat ug simpatiya. Mibaha ang tawag sa telepono nga gikan sa lokal ug sa gawas sa nasod.
Daghang telegrama ug mga sulat sa simpatiya ang nadawat sa tibuok kalibotan—ang uban gikan sa mga politiko, sa relihiyosong mga lider, ug sa ubang dagkog mga katungdanan. Giapresyar ug dako mao ang sulat nga gikan sa Halandong Gn. Hukom Watson sa Commonwealth Family Court. Si Hukom Watson nahimong biktima sa pagbuto sa bomba sa iyang balay. Sa iyang sulat siya miingon, sa lakbit: “Niining mangiob ug makapabalakang mga adlaw daghan sa inyong katawhan, ilabina sa pamilya ni Wykes, makabati sa kalig-on sa pamilya, mga higala ug kongregasyon. Hinaot nga niini ilang mapalgan dili lamang ang kalig-on kondili kanang kalinaw nga dili arang maabot sa tawhanong pagsabot.”
Ang drayber sa taksi sa Sydney mipahayag sa mga pagbati sa kadaghanan diha sa makatandog nga sulat ngadto sa editor sa The Sydney Morning Herald. Siya misulat: “Ang usa sa akong trabaho kagahapon (Hulyo 21) mao ang pagkuha sa mga trabahante sa pelikula sa ABC gikan sa Hoxton Park ug ihatod sila, sa labing madali, ngadto sa Liverpool Hospital. Ang among nakita didto makalilisang. Gihangyo ako sa paghulat, ug gihimo ko kana. Sulod niadtong 20 minutos ang tinuod nga mga kalisang sa kinabuhi misugod sa pagtungha. Bahin na ang kasakit ug kaguol sa kinabuhi, apan ang akong nakita dili normal. . . . Sa sulod nimo dili malikayang makapangutana ka ug ‘ngano, ngano, ngano.’ Naapektohan bisan ang timawang drayber sa taksi—nga gumikan niini nakasuka ako. . . . Hinaot nga kita, nga nagadumot sa kabangisan, kasakit ug sa bomba, dili magpalangkit niining walay hinungdang mga tingusbawan ug magkinabuhing malinawon ning mubong kinabuhi. . . . Palihog, husto na.”
Apan, wala gayoy mitunghang isyu bahin sa pag-abunog dugo—nga niini ilado ang mga Saksi ni Jehova nga motultol tungod sa relihiyosong baroganan. (Buhat 15:20, 29) Ang Daily Sun sa Brisbane mikutlo sa tigpamaba sa ospital sa Liverpool nga walay midumili sa pag-abunog blood volume expanders. Gipatin-aw nga kini “maoy mopulig trabaho sa dugo samtang maghatag sa lawas ug higayon sa paghulip sa iyang kaugalingong abiyo. Epektibo kaayo kini, bisan alang sa mga tawo nga tagsaon ug matang sa dugo ug dili pa malangan ang mga doktor sa pagpasibo sa tagsaong matang sa dugo. Ang sintitiko o artipisyal nga dugo walay sakit nga gidala—kini sa tinuod mao ang sulbad sa mga pagtutol nga gikan sa relihiyosong mga grupo nga midawat dayon niini.”
Ang mga mensahe ug mga pahayag sa simpatiya alang sa mga biktima niining trahedya taliwala sa mga sakop sa katilingban gipabilhan ug dako. Ang mga membro sa kapolisan, sa mga trabahante sa ambulansiya, ug sa brigada sa bombero, ug sa ospital ug sa mga nars ug doktor sa ilang kinasingkasing nga paningkamot sa pagtabang. Ang usa sa mga nars sa ospital sa Liverpool natandog kaayo sa nagtambal sa unang nangasamdan nga gikan sa gibombahan. Iyang gisultihan ang usa sa mga Saksi nga mitambong: “Kon dili pa ako okupado naghilak na unta ako. Dili ko ikabatbat kanimo kon unsa ka dako sa akong gibating kasubo niining alaut nga mga biktima.” Mitelepono ang mga dili-kaila ug misulat nga nagtanyag mga hinabang sumala sa ilang maarangan.
Bililhon ug makalipay mao ang daghang telegrama duyog sa mga pulong sa kalulot ug pagdasig nga gikan sa mga Saksi ni Jehova sa tibuok kalibotan. Napahalipayan usab ang mga biktima sa mga pulong ni apostol Pedro bahin sa satanasnong pag-atake nga gihimo batok sa mga Kristohanon sa iyang panahon. Kadtong unang mga Kristohanon gitambagan nga ‘magmalig-on sa pagtuo, sa nahibaloan ninyo nga ang samang mga pag-antos nangahitabo sa tanang kaigsoonan sa kalibotan.’—1 Pedro 5:9.
Trahedya Nakapauswag sa Maayong Balita
Duna bay panalangin sa maong makalilisang nga hitabo? Mahimong malantaw kini sama sa kahayag sa pagkabilanggo ni Pablo sa Roma. Sa nagsulat ngadto sa mga Kristohanon sa Filipos, siya miingon: “Karon buot kong masayran ninyo mga igsoon, nga ang nahitabo kanako nakaalagad hinoon sa pagpauswag sa maayong balita, . . . ug ang kadaghanan sa mga igsoon sa Ginoo, nga nahimong masaligon tungod sa akong pagkabilanggo, misamot sa pagpakitag kaisog sa pagsulti sa pulong sa Diyos sa walay kahadlok.”—Filipos 1:12-14.
Ang mapintas nga pag-atake sa inosenteng mga membro sa ilang Kristohanong panag-igsoonay sa tigom sa Kongregasyon sa Lurnea nianang buntaga sa Kingdom Hall sa Casula nakapatunghag samang reaksiyon. Ang mga kongregasyon sa tibuok Sydney nakaeksperyensiya ug tagsaong gidaghanon sa tumatambong sa pagkasunod nga tigom sa mga gabii sa ilang mga Kingdom Hall. Sama sa gipamulong ni Pablo sa mga taga Filipos, sila tinuod nga “nagbarog sa usa ka espiritu, nga nagkahiusa sa usa ra ka kalag sa pagpakigbisog alang sa pagtuo sa maayong balita, ug dili magpalisang sa [ilang] mga kaaway.”—Filipos 1:27, 28.
Apan laing panalangin ang gihisgotan ni Pablo sa iyang sulat: “Adunay magawali kang Kristo gumikan sa kasina ug sa pakig-indigay, apan ang uban gumikan sa maayong kabubut-on. . . . Gihimo kini sa nahauna tungod sa pagpalabaw, nga walay maayong motibo, sa pagdahom nga tungod niini molabi pa ang akong kasakit sa akong pagkabilanggo.” Si Pablo miingon nga ang iyang pagkabilanggo “nahibaloan sa katilingban” sa tanan. Ang dakong publisidad nga nahatag sa “kasakit” nga gipahamtang diha sa mga Saksi ni Jehova niining bahina mikaylap sa tibuok globo.—Filipos 1:13, 15, 17.
Gipahimuslan sa mga magsusupak kining publisidad sa pagpahungaw sa ilang kasuko batok sa mga Saksi. Daghang bakak ug malimbongong mga pahayag gihimo, “sa pagdahom nga mosamot ang kasakit” sa mga Saksi. Apan, mihatag hinuon kini ug dugang malulotong pagsanong sa katilingban nga nakabasa sa hunahuna sa bakak nga mga pahayag.
Kini bang eksperyensiyaha nakapaluya sa mga Saksi sa ilang pagsangyaw? Sa kasukwahi, nakahimo kini sumala sa gitaho ni Pablo, nga mao, “ang kadaghanan sa mga igsoon sa Ginoo, misamot sa pagpakitag kaisog sa pagsulti sa pulong sa Diyos nga walay kahadlok.” (Filipos 1:14) Makalig-on ang pagpamati sa daghang tim-os nga mga pulong sa pagbati sa isigkatawo ug sa interes sa mga tagbalay. Mas maikagon ang Saksi sa paggawas sa pag-alagad sa katilingban ug sa pakigkita kanila.
Samtang presko pa sa hunahuna ang mga hitabo sa Hulyo 21, madinawaton ang mga tawo sa solusyon ug sa mga katarongan kon nganong mahitabo kining mga butanga. Kadtong mosanong ug mosusi pa gayod sa Pulong sa Diyos makadawat ug tinuod nga panalangin. Kapin sa 21,000 ka indibiduwal o mga grupo sa pamilya sa Australia nakapahimulos sa senemanang pagtuon sa Bibliya sa balay nga gidumala sa kuwalipikadong ministro sa mga Saksi ni Jehova. Sa miaging upat ka tuig sa Australia, kapin sa 10,000 ka tawo ang misulod sa pag-alagad sa katilingban.
Daw kasulian nga ang malinawon, masinundanon sa balaod nga mga tawo gipasidan-an sa ilang Agalon nga dili nila malaoman ang malinawong pagsanong sa ilang presensiya niining masinupakong kalibotan. Siya mibatbat nga “ilang buhaton kining mga butanga batok kaninyo tungod sa akong ngalan, tungod kay sila wala makaila kaniya nga mao ang nagpadala kanako.” (Juan 15:21) Si Jesus gipadala sa iyang Amahan, si Jehova, ingong iyang hawas. Naatubang niya ang mapintas nga kamatayon sa mga kamot sa kalibotanong mga tawo nga wala makaila ni Jehova. Busa dili kita matingala sa pagkaplag kapintasan nga gamiton batok sa iyang mga sumusunod karon.—Juan 15:20.
Pagkamakalipay sa Pagkasayod nga Haduol na ang Kaluwasan!
Pagkamakalipay sa pagkasayod nga dili magpadayon kining mga butanga. Ang masilhigon ug dramatikong mga kausaban hapit nang mahitabo, kaamgid sa mga hitabo sa mga adlaw ni Noe. Kining mabangis nga kalibotan ug pagdumot hilimatyon na, ug pulihan kini sa usa ka bag-o nga yuta nga niini “magapuyo ang pagkamatarong.” (2 Pedro 3:13) Ang mga butang nga nakahatag kagul-anan sa milyonmilyon mopalipay kanato kon tukma natong “mabasa” ang ebidensiya, sama nga nagabasa sa usa ka karatula sa dalan diha sa haywey sa pagkahibalo kon asa siya nagapadulong. Si Jesus miingon: “Inigsugod nag kahitabo niining mga butanga, bumarog nga walay lihok ug ihangad ang inyong mga ulo, tungod kay ang inyong kaluwasan haduol.”—Lucas 21:28.
[Kahon sa panid 12]
Ang mga Saksi ni Jehova adunay mahigugmaon tibuok yutang panag-igsoonay. Ingong pananglitan, sa nahibalo pinaagi sa balita sa prensa o sa TV sa pagbomba ug niadtong nangasamdan, daghang Saksi ni Jehova sa Tinipong Bansa nagpadala dayon ug kuwarta sa mga biktima sa bomba. Sa pipila lamang ka adlaw mga usa ka gatos ka sulat nga adunay sulod nga kapin sa $7,000 ang nadawat—mga gasa gikan sa 27¢ sa usa ka batang lalaki ngadto sa $1,000 sa usa ka tawo. Ang mosunod mao ang pila ka unod nga gikan sa mga sulat.
“Pobre ako nga igsoon, apan buot kong dawaton ninyo kining gamayng kontribusyong [$7] sa pagtabang.”
“Palihog ipadala kining kuwartaha sa igsoong babaye nga namatyan ug bana sa trahedya sa pagbomba.”
“Palihog gamita ang among donasyon sa pagbayad sa galastohan sa medisina sa mga igsoong lalaki ug babayeng nangasamdan. (Buhat 11:29) Nakadungog kami nga adunay usa nga namatay. Ang Juan 5:28, 29 ang madumdoman.”
“Buot kong moamot ug $50 sa pagtukod pag-usab sa tigomanan ug $50 sa balayranan sa ospital.”
“Buot motabang ang inuyonang kauban. Busa akong gipadala kaninyo ang iyang tseke nga $1,000.”
“Ang akong anak nga lalaki ug babaye buot mosulat sa pila ka batan-ong mga igsoong lalaki ug babaye niadtong kongregasyona aron sa pagdasig kanila.”
“Mahimo bang hatagan ninyo ako sa direksiyon sa puloy-anan sa pamilya sa igsoon nga namatay, kay buot kong magpadala kanilag sulat. [Gisukip ang [$50.]”
“Sa pagpakita sa among inigsoong gugma, kami [kongregasyon] nakatigom ug $161.55 aron magamit sumala sa ilang gikinahanglan.”
“Dili kaayo kini dako [$3], apan mao ra kini ang akong nabatonan, basig makatabang kinig diyutay.”
“Aron makatabang sa mga igsoong lalaki ug babaye didto, kun ihatag ba alang sa pagtabang sa nabiyudang igsoon o sa pagtukod ug bag-ong Kingdom Hall.”
“Wala akoy trabaho karon apan aniay $1. Kon makakuwarta ako, magpadala pa akog dugang.”
Dili ang kantidad nga gihatag, kondili ang pagkamainandamon ang bililhon. Si Jesus tapos nakakita sa dato nga naghulog sa ilang mga gasa sa panudlanan, “nakakita sa usa ka kabus nga babayeng balo nga naghulog ug duha ka diyut nga walay bili didto, ug siya miingon: ‘Sa pagkatinuod sultihan ko kamo, Kining babayeng balo, bisag kabus, nakahulog ug labaw pa kay sa tanan kanila.’”—Lucas 21:2, 3.
‘Gihigugma sa Diyos ang malipayong maghahatag. Kay kon anaa ang pagkamatinguhaon, kini pagakahimut-an sa pagdawat sumala sa unsay anaa sa tawo. Ang tagsatagsa nagahatag sa iyang maarangan sumala sa panalangin ni Jehova.’—2 Corinto 9:7; 8:12; Deuteronomio 16:17.
[Letrato sa panid 10]
Dagway sa kilid sa likod nga bahin sa Kingdom Hall
[Mga Letrato sa panid 11]
Ang nalungag sa bomba sa sementong salog
Butanganan sa mga libro ug magasin