‘Kinahanglang Motrabaho ang Akong Asawa’
Pagmata!: Unsay imong trabaho, John?
John: Ako ang nagkupot sa rekord sa pabrika.
Pagmata!: Ug ikaw Carrie?
Carrie: Tig-atiman ako sa mga tigulang, nagtrabaho kanila diha sa ilang mga balay.
Pagmata!: Unsay nakatukmod kanimo sa pagtrabaho?
Carrie: Ang ekonomiya. Ang abangan ug pagkaon misugod pagsaka, ug daw kami wala nay ikasarang pa.
John: Dinhi ang magtiayon nagkinahanglan labing menos $1,200 ngadto sa $1,400 sa usa ka bulan aron mabuhi. Kapin sa $400 kada bulan ang among abangan. Ug aduna pay balayranan kami sa sakyanan, besti, ug panghinlo.
Pagmata!: Busa mitrabaho si Carrie?
John: Wala. Misulay ako sa pagtrabahog overtime. Usahay motrabaho akog 10 o 11 ka oras sa usa ka adlaw—5 o 6 ka oras sa Sabado.
Carrie: Oo, malisod kaayo kini alang kanamong duha. Wala nay panahon kaming duha. Moabot siya, manihapon ug modiretso dayon sa pagkatulog. Ug bisan pa niana naglisod gihapon kami.
John: Nasayod ako nga dili na ako makasugakod niana. Abi gud nimo, misugod ako sa pagtuon sa Bibliya uban sa mga Saksi ni Jehova. Apan sa miuswag ako, naamgohan nako nga wala na akoy panahon alang niining tanang trabaho. Hinuon, kami naghulat, hangtod nga midako-dako ang among anak nga babaye. Gusto kong magpabilin na lang si Carrie sa balay hangtod nga makatapos ang among anak sa pagtungha. Apan sa misulod siya sa hayskol, mihimo si Carrie ug part-time nga trabaho sa mga department store. Ug dayon midesider kami nga mas praktikal nga makakita siya ug bug-os panahong trabaho.
Pagmata!: Nasuko ka ba nga napugos sa pagtrabaho, Carrie?
Carrie: Wala. Akong nakita nga gilisdan si John. Busa nalipay ako nga nakatabang.
Pagmata!: Naapektohan ba ang inyong relasyon sa imong pagtrabaho?
Carrie: Buweno, karon nga dili na magsige ug overtime si John, may panahon na kami sa usag usa.
John: Niana nga paagi, ang pagtrabaho ni Carrie nakatabang ug dako, sanglit nakapaarang-arang kini sa pinansiyal nga kalisod. Apan mainampingon kami nga dili namo pasagdan ang usag usa.
Carrie: Malipay kami sa paglingkod ug sa pag-estorya sa mga butang. Magkuyog kami sa pagpamalit. Ug among ginaplano ang among mga hinapos sa semana aron magkakuyog kami sa pultahan-sa-pultahan nga buluhatong pagsangyaw—ilabinang gikalipayan namo kana.
John: Kana ang among labing maayong panahon sa pag-ubanay.
Pagmata!: Komusta ang buluhaton sa balay?
Carrie: Magtinabangay kami. Ang matag usa kanamo adunay iyang kaugalingong responsabilidad. Ako ang magluto ug makalipay kay dili kaayo kutihan si John sa pagkaon. Ug kon kapoy na ako ug atsal na lamay mapreparar, matagbaw na siya. Ang among anak nga babaye ang manghugas sa plato, ug si John ang mobuhat sa mga butang sama sa pagpasinaw ug sa paglampaso.
Pagmata!: Dili ba malisod kana human sa usa ka adlaw nga pagtrabaho?
John: Oo. Apan mahuman ra namo ang trabaho. Hinunoa, nasayod ako, nga wala na unta akoy daghang trabaho sa balay kon magpabilin si Carrie sa balay sa tibuok adlaw.
Pagmata!: Sa imong hunahuna maayo bang ideya alang sa bana ug asawa nga magtrabaho?
John: Dili kon dili kini kinahanglan. Dili maayo nga magsalig ang magtiayon sa suweldo sa asawa. Unsa kaha kon magkasakit siya ug mamabdos? Ug ang dugang kapit-osan mahimong tinuod nga problema sa batan-ong magtiayon. Busa naglaom kami nga moabot ra ang adlaw nga among mausab ang among presenteng situwasyon ug magtrabaho kaming duha nga part-time na lamang. Niining paagiha makagugol kami ug daghang oras kada adlaw sa Kristohanong ministeryo.