Pagtrabaho sa Balay—Alang ba Kanimo?

DAGHANG mga babaye nga nagkinahanglag dugang kita, apan dili gustong mobiya sa ilang katungdanan ingong mga ginang sa panimalay, nakasulay ug makaikag nga kapilian: ang pagtrabaho sa balay. Sa Japan adunay trabahong sama niini ang kapin sa usa ka milyong tawo. Ang mga babaye naghimog mga kimono o ubang mga besti, manahig mga panyo o mamorda. Ang uban mag-asembol pa ug elektrikal nga mga piyesa alang sa kasangkapan o sa mga sakyanan. Ug kon naghunahuna ka nga nalatid na namo ang mga posibilidad, aniay lain pa: Pagpangandam ug mga pagkaon alang sa mga restawran; pag-ayo sa mga payong; pagmakenilya; paghimog artispisyal nga mga bulak; paggamag bulsetang mga papel, mga etiketa, o mga bag ug mga kahon sa prutas.

Apan, sa dili pa pahimudsan ang higayon sa pagsugod niini nga trabaho, tagda ang pipila ka butang nga kinahanglang bantayan: Likayi ang bisan unsang mga anunsiyo nga magsaad ug dihadiha nga kuwarta. Pagmatngon, usab, kon dakong puhonan sa makinerya o kasangkapan ang gikinahanglan. Ang sama niini nga kompaniya ‘masubo sa pagpahibalo kanimo nga dili sila makahatag kanimo sa trabaho sa presente nga panahon’​—human nga nagasto na nimo ang kuwarta. O kaha dili ka nila bayran sa ilang gisaad kanimo nga suweldo tungod nianang gitawag nga barot nga pagkatrabaho.

Pagbantay, usab, nga kon magtrabaho ka wala ka masakop sa seguro kon may aksidenteng mahitabo. Ug anaa kanang Kristohanong obligasyon sa pagbayad sa mga buhis, busa kon magtrabaho ka sa imong kaugalingon, paghupot ug maayong rekord alang sa balayranan sa buhis. (Mateo 22:​21) Lain pa, ang tawo nga magkinaugalingon sa pagtrabaho sa balay kinahanglang mosusi sa mga ordinansa sa sona, sa mga reglamento sa negosyo, edukasyon o kinahanglanong mga lisensiya, o ubang legal nga mga kinahanglanon.

Sa kataposan, sayri nga ang pagtrabaho sa balay nagkinahanglan sa pagdisiplina sa kaugalingon. Ang ingon niini nga trabaho makahago ug makakapoy. Ug anaa pa ang tentasyon sa pagpabaya sa mga buluhaton sa balay aron makapadayon sa pagtrabaho. Apan kon maayo nga pagkakontrolar, ang pagtrabaho sa balay maoy usa ka praktikal nga paagi sa pagtimbang sa mga obligasyon sa panalapi ug sa panimalay.