Nawalang Yugto sa Pagkabata
“Ang yugto sa pagkabata bug-os nga nawala diha sa mga bata,” miingon ang Daily Mail sa London. “Dali nilang makat-onan ang tanang mga butang, sobrang pagkaladlad sa tanang butang, ug wala nay katilingbanong mga pagpugong nga makagiya sa ilang pamatasan.” Ang katarongan niining mga konklusyon mao ang duha ka taho: Ang usa sa AMMA (Britain’s Assistant Masters and Mistresses Association), ug ang ikaduha, ang Amerikanhong pagtuon ni Marie Winn, gipatik sa Britanya, Children Without Childhood: Growing Up Too Fast in the World of Sex and Drugs.
Ang mga batang singko anyos mas palaaway, walay pagtahod sa kabtangan sa ubang bata; kulang sa pagtahod sa mga edad-edaran, ug mahilas ug sinultihan, sumala sa daghang mga taho nga nangabot. Ang kadaghanang magtutudlo nga gisurbi sa AMMA mibati nga ginapatuyangan sa mga ginikanan ang ilang mga anak ug kini maoy hinungdan sa pagkasamot sa dili maayong batasan sa mga bata. Tali sa mga magtutudlo nga gisurbi, 86 porsiento mibasol sa “kakulang sa klarong mga sukdanan ug mga kalaoman sa balay”; 82 porsiento nagtudlo sa “kakulang sa panig-ingnan sa ginikanan” nga maoy nakaingon.
Dugang pa, ang duha ka taho mikutlo sa bungkag nga mga panimalay, dili maayong mga panig-ingnan sa mga magtutudlo, ug sobrang pagtan-awg telebisyon ingong mga katarongan sa katingalahang mga batasan sa mga bata. “Sad-an kitang tanan,” miadmiter ang Daily Mail. “Nakapatungha kitag katilingban nga bug-os dili angay sa pagmatuto ug bata. Uban sa ginadawat dayon nga disborsiyo ug pagpuyopuyong mga relasyon, atong nabungkag ang pamilya. Uban sa matugotong tinamdan sa pagdisiplina atong giwala ang mga sukdanan.”
Ang mga bata nagkinahanglan kanunay ug maluluton apan malig-ong pagbadlong ug disiplina. Sumala sa gipamulong sa maalamong Solomon: “Ang mga binuang nagbugkos diha sa kasingkasing sa usa ka bata; ang bunal sa pagbadlong magapalayo niana gikan kaniya.” Ang mga bata nagkinahanglan usab nga makakita sa ilang mga ginikanan ug mga magtutudlo sa maayong panig-ingnan sa hustong pamatasan tungod kay ang “tanang tukmang pagkadumala mahisama sa iyang magtutudlo.”—Proverbio 22:15; Lucas 6:40.