Gikan sa Among mga Magbabasa—Balos Bahin sa Seksuwal nga Pag-abuso sa Bata
ANG Hunyo 22, 1985, nga gula sa Pagmata! adunay tulo ka bahing serye nga nag-ulohang “Seksuwal nga Pag-abuso sa Bata—Makahimo Ka sa Pagpanalipod sa Imong Bata.” Diha sa kalibotan karon, kining makasubong ulohan maoy usa nga bantayan sa mga ginikanan, ug daghan sa among mga magbabasa misulat sa pagpasalamat sa impormasyong gipresentar. Buot lang namong ipakig-ambit ang ilang mga ekspresyon.
“Dakog Natabang ang Inyong mga Sugyot”
Aniay bahin sa sulat gikan sa Tinipong Bansa: “Salamat kaayo kaninyo sa impormasyon bahin sa seksuwal nga pag-abuso sa bata. Sa bata pa, ang akong igsoong babaye ug ako giabusohan sa usa ka ig-agaw. Karon kaming duha may pamilya na ug nanlimbasog sa paghimo sa among maarangan sa pagpanalipod sa among mga anak. Among ipadapat gayod ang makataronganong tambag nga makita niining artikuloha.”
Gikan sa Tinipong Bansa: “Giapresyar gayod nako ang inyong artikulong ‘Seksuwal nga Pag-abuso sa Bata—Makahimo Ka sa Pagpanalipod sa Imong Bata.’ Mapuslanon ug simple ang inyong mga sugyot. May ikasugyot usab ako nga buot nakong ipaambit kaninyo: Peligroso alang sa mga bata nga adunay ngalan sa ilang mga kamesita. Hayan mouban dayon sila sa mga estranghero nga nakaila sa ilang ngalan. Lain pa, kon magpabadlong ang bata, sagad hulgaon sila sa ilang mga ginikanan, sa pag-ingon: ‘Dakpon ka sa polis!’ Makahatag kinig kalisang sa bata ug tingali dili moduol sa polis kon magkinahanglag tabang.”
Gikan sa Tinipong Bansa: “Tapos nakabasa sa makadaghan sa Hunyo 22 nga gula sa Pagmata! bahin sa seksuwal nga pag-abuso sa bata, buot kong masayod kamo nga usa kini sa labing maayo nga akong nabasa. Nagmahay lang ako nga wala makabaton niining impormasyona sa mga katuigang milabay, sa wala pa sa makalilisang ug sa walay kaluoy abusohi ang akong duha ka matahom nga mga apong babaye. Apan kon makasanta kini sa ubang mga bata sa pag-antos sama sa ilang naagian, malipay na ako.”
“Usa Ako ka Biktima”
Napamatud-an sa daghang sulat ang makalilisang nga kadaot nga nahimo sa seksuwal nga pag-abuso sa bata. Pananglitan, aniay sulat gikan sa Inglaterra: “Salamat kaninyo sa bag-ong mga artikulo bahin sa ulohan sa seksuwal nga pag-abuso sa bata. Biktima ako sa seksuwal nga pag-abuso sa bata ug nakaagi sa mga pagbati sama niadtong gitaho sa inyong artikulo. Hangtod karon, tapos sa daghang katuigan, pugngan ko lang ang akong kaugalingon tungod kay madala ako sa emosyon kon makabasa o makadungog niining mga butanga nga nagakahitabo sa kabataan.”
Laing sulat sa Inglaterra nag-ingon: “Biktima ako sa relasyon sa sekso sa suod nga kabanay sa daghang katuigan sugod sa singko anyos pa ako. Ang tagsala mao ang akong amaama. Ang akong naagian sa iyang mga kamot makalilisang kaayo alang sa akong linghod nga hunahuna nga ang kadaghanan niana nalundag sa akong tunga-sa-buot nga hunahuna ug nanumbalik kini sa pipila lamang ka bulan. Ang mga panumdoman, kon mapukaw, motungha sama usa ka matang sa mangil-ad nga damgo.
“Tingali lantawon sa ubang mga tawo ang inyong artikulo ingong sobra rang reaksiyon ug hayan bation ug maulaw sa pagsugilon sa ilang mga anak kon unsay buhaton kon adunay usa—bisag suod nga paryente—mohikap sa parte sa ilang pribadong lawas o sa pagsugo kanila sa paghikap sa ilaha. May mensahe ako alang niadtong mga tawhana: ‘Ang tambag sa artikulo ekselente.’”
“Kinsa bay Motuo Kanimo?”
Ang ubang mga sulat nagpadayag sa mga taktika sa mga tig-abuso. Usa ka magbabasa sa Inglaterra misulat: “Sa bata pa, giabusohan ako sa usa ka tigulang nga dako ang akong pagtahod. Sumala sa gipahayag sa inyong artikulo, ang malaw-ayng paghapohap sa parte sa lawas (nga dili angay hikapon) gihimong daw pagpakigdula ug paggitikgitik. Mihatag kini kanakog dakong pagbating sad-an ug kaulaw.”
Usa ka magbabasa gikan sa Tinipong Bansa nagpahinumdom kanato nga dili lamang ang mga edad-edaran ang tig-abuso sa bata. Siya misulat: “Akong gipasidan-an ang akong mga anak bahin sa mga edad-edaran, nga wala magpalangdong nga ugay-ugayon sa nuybe-ug-tunga ka tuig nga batang babaye ang akong kuwatro-anyos nga batang babaye.”
Laing magbabasa sa Inglaterra nagsugilon kanamo: “Usa ka huwes ang akong amaama; busa, sa misugod siya sa pag-abuso kanako, wala ako magtuo nga daotan kadto. Sa nag-12 anyos ako, nasayod ako nga daotan kadto apan wala makatug-an niini, kay balikbalikan niya ako sa pagsulti: ‘Kinsay motuo kanimo? Ug wala kay utang kabubut-on. Tan-awa ang tanang butang nga imong naangkon.’ Sa akong sayong katuigan sa pagkatin-edyer giabusohan ako sa akong mga igsoong lalaki ug uyoan. Busa sa panuigong 14, migamit akog mga droga, nga naghunahuna nga mao lamang kini ang paagi sa pagbaton ug kalipay. Midako ako nga haluag ug batasan, nga mao lamay paagi nga makapalit akog mga droga. Buot kong magpasalamat kaninyo pag-usab sa artikulo. Makasalig na ako nga ang akong anak nga lalaki dili makaagi sa kasakit sama sa akong naagian.”
Usa ka magbabasa sa Tinipong Bansa misulat: “Bag-o ko lang natapos pagbasa ang artikulong ‘Seksuwal nga Pag-abuso sa Bata’ sa Hunyo 22, 1985, nga isyu sa Pagmata! Wala ako makapugong sa mga luha nga mitulo sa akong mga mata tungod kay ako, usab, giabusohan. Nahitabo kini sa singko anyos pa ako. Ang tig-abuso mao ang tawong tigdeyt sa akong inahan. Samtang wala ang akong inahan ug magdula ang akong igsoong lalaki sa gawas, pasipad-an ako niining tawhana. Naningkamot ako sa paghikalimot, naningkamot sa pagpala niini sa akong kaisipan, naningkamot sa paghunahuna nga usa lamang kadto ka mangil-ad nga damgo, apan dili kadto damgo. Tinuod gayod kadto nga hitabo, ug sa mga katuigang nanglabay (27 anyos na ako karon) wala akoy gitug-anan. Salamat kaninyo sa artikulo bahin sa seksuwal nga pag-abuso sa bata. Nakahatag kini kanakog kaisog sa pagsulat niini.”
Kini maoy pipila lamang sa daghang sulat nga nadawat sa pagpakita sa makalilisang nga sukod sa problema. (2 Timoteo 3:1, 3) Adunay mga kaso nga nalangkit ang Kristohanong mga pamilya, nga kinahanglang atimanon sa Kristohanong mga ansiano! Ayaw gayod kalimti nga bisag ang seksuwal nga pag-abuso sa bata sa kasagaran maoy usa ka sala nga ginahimo sa mga tawong edad-edaran, ang mga bata maoy magapas-an sa kabug-at. Makalilisang gayod nga daghan kaayong kabataan ang gisakmitan sa ilang katuigan sa pagkabata sa mga tawong edad-edarang walay pagpugong sa kaugalingon. Ang emosyonal nga samad nga mahatag ngadto niining mga bataa magpabilin sa tibuok nga kinabuhi!
[Kahon sa panid 27]
Alistong Paggamit sa Pagmata! sa Oregon
Sa miabot ang Hunyo 22, 1985 nga gula sa Pagmata! sa Oregon, U.S.A., si Joy, nga usa ka ministro sa mga Saksi ni Jehova, miadto uban sa usa ka higala sa pagpakita sa mga artikulo bahin sa seksuwal nga pag-abuso sa mga bata ngadto sa lokal nga sarhento sa kapolisan nga maoy tagbantay sa pagsanta sa krimen. Miingon ang sarhento nga paingon siya sa usa ka lokal nga kolehiyo sa komunidad aron sa pagtukod ug seminar bahin sa seksuwal nga pag-abuso sa bata, busa nagdala siyag usa ka kopya sa magasin. Nianang panahona, iyang gikontak si Joy ug miingon nga gusto niyang gamiton ang magasin sa seminar. Alistong gisultihan siya ni Joy bahin sa Oktubre 22, 1984 nga isyu sa Pagmata!, nga naghisgot ug mga serye sa mga artikulo bahin sa nangawalang mga bata. Mipidido ang sarhento ug 200 ka kopya sa matag magasin aron iyang ipanghatag kini sa matag usa sa tumatambong sa seminar.
Sa ulahi, miorder ug dugang ang sarhento ug 250 ka kopya sa matag isyu aron may magamit dayon ang lokal nga kapolisan sa mga programa sa Helpline Support. Iyang gisugyot usab kang Joy sa pagkontak sa lokal nga Departamento sa Pang-alagad sa Kabataan. Gisunod ni Joy ang iyang sugyot ug nakahatag ug presentasyon atubangan sa 20 ka magtatambag diha sa seminar. Mikuha ang grupo sa nabilin pa niyang mga kopya sa duha ka isyu sa magasin.