Usa ka Panan-awon Gisalikway

“ANG Liga nagalungtad, apan unsay mahitabo niana? Kini ba maoy tinuod nga butang o usa ka limbong?” Kana gisukna sa Britanikong si Lord Robert Cecil, Tsirman sa Ehekutibong Komite sa Liga sa Kanasoran nga Unyon. Oo, bisag daghang tawo ang nadani sa pagtuo nga ang Liga mogarantiya sa kalinaw, gipahayag sa uban ang seryosong mga pagduhaduha.

Ang iladong Ingles nga awtor si Jerome K. Jerome misulat: “Ang Liga sa Kanasoran natawo sa kalibotan nga daang patay. . . . Ang mga tigpasiugda niini . . . nagadapit kanato sa bunyag. . . . Sila naglaom sa usa ka bag-ong Mesiyas. Maorag ilang gidani ang ilang kaugalingon nga pinaagi sa daghang pagsinggit ug paghapa ilang mabanhaw kana gikan sa mga patay.” Ang London Standard mipahayag: “Usa ka Liga sa Kanasoran nga wala pagtuohi, apan gipasidunggan sa tanan pinaagi sa ngabil, yanong usa ka panglingla, ug labing peligrosong panglingla.”

Usa ka Tingog nga Misupak

Sa laing bahin, ato nang nakita giunsa sa klero pagdawat ang Liga. Apan taliwala sa relihiyosong suliyaw pabor niini, sa Mayo 1920 ang magasing Watch Tower mipatik sa dayag nga pagsaway sa Liga, nga miingon: “Kini gidayeg sa ubang nasod ingong dakong manluluwas sa katawhan . . . Apan kini mapakyas gayod.”

Nganong ang Liga destinado sa kapakyasan? Tungod ba lamang sa lunlon politikanhong mga hinungdan, kay ang Tinipong Bansa wala makaanib? Dili, ang bug-os nga isyu sa Liga sa Kanasoran nasabtan sa mga Saksi ni Jehova ingong sulagma lamang sa paluyo sa labi pang dakong drama—ang unibersohanong away tali sa Soberanong Ginoo, si Jehova, ug sa magtutukod sa unibersohanong pag-alsa, si Satanas. (Job, kapitulo 1 ug 2; Juan 8:44) Busa ang Liga, nga gipasiugda sa mga politiko ug gidayeg sa klero, sa pagkatinuod maoy mini nga kasulbaran ni Satanas sa pagwahing sa pagtagad gikan sa bugtong matuod nga kasulbaran sa mga sakit sa katawhan—ang Gingharian sa Diyos pinaagi ni Kristo. Gikan sa panglantaw sa Diyos ang Liga sa pagkamatuod maoy “panglingla” ug usa ka “limbong.”—Itandi ang Salmo 2.

Busa ang gikutlo sa ibabaw nga Watch Tower mipadayon: “Bisan pag gisagop sa Tinipong Bansa ang Liga sa Kanasoran, pinaagi sa pagduyog sa ubang nasod sa kalibotan, dili malampos niini ang katuyoan nga gipahayag, sa hinungdang kini ginama sa tawo, giumol sa mga tawong hakog; ug tungod sa dugang hinungdan kana maoy supak sa dalan sa Diyos.”

Ang grabe pang pagsaway gihimo panahon sa usa ka kombensiyon sa mga Saksi ni Jehova sa Cedar Point, Ohio, Septiyembre 10, 1922. Didto ilang gipahayag sa usa ka publikong resolusyon:

“Nga ang tanang internasyonal nga komperensiya ug tanang kasabotan o tratado nga mosangpot niana, apil ang kasabotan sa Liga sa Kanasoran ug ang tanang susamang kasabotan, mapakyas gayod, tungod kay gihukom sa Diyos nga maingon niana.”

Ila usab gisaway ang pagpaluyo sa klero sa Liga, nga miingong “sila [ang klero] dugang pang misalikway sa Ginoo ug sa Iyang gingharian ug mipadayag sa ilang pagkadili-maunongon pinaagi sa kinabubut-ong pakighiusa sa ilang kaugalingon sa organisasyon ni Satanas ug maisogong pagpahayag ngadto sa kalibotan nga ang Liga sa Kanasoran mao ang politikanhong kapahayagan sa gingharian sa Diyos sa yuta, nga ang maong pahayag ilang gihimo sa bug-os nga walay pagtagad sa mga pulong ni Jesus ug sa iyang mga apostol.”

Nganong ang mga Saksi mihimo nianang lig-ong pagbarog batok sa Liga sa maong sayo nga petsa? Kay ilang nahinapos gikan sa ilang pagtuon sa Bibliya “nga ang 1914 nagtimaan sa legal nga pagkatapos sa daang kalibotan ug niadto si Kristo ang may-katungod nga Hari nagdawat sa Iyang gahom ingong hari;

“Nga ang Ginoong Jesu-Kristo karon presente, nga dili makita sa tawo, ug nagapadayon sa buluhaton sa pagtukod sa Iyang gingharian, nga alang niana Iyang gitudloan ang iyang mga sumusunod sa pag-ampo.”—Mateo 6:9, 10.

Busa nasabtan sa mga Saksi nga ang Liga maoy ginama-sa-tawo nga kapuli sa Gingharian sa Diyos. Kay ingon man, kini mapakyas gayod. (Jeremias 10:23; Daniel 2:44) Sa pagkamatuod, unsay nahitabo sa Liga ni Woodrow Wilson? Alang sa tubag, atong sublion ang mga hitabo gikan sa 1920 hangtod 1946.

[Letrato sa panid 8]

Ang mga paglaom sa kalibotan nasentro sa Liga sa Kanasoran sa Geneva, Switzerland

[Mga Tinubdan]

Hiniusang Kanasoran

U.S. Nasyonal nga Dokumento