Gikan sa Kaadunahan Ngadto sa Kakabus—Ug sa Kalipay
Salapi. Droga. Sekso. Nadani niining mga butanga ang daghang batan-on sa pagsagdi akong magkinabuhi sa karon nga paagi sa kinabuhi. Apan kini bang maong mga pangagpas makahatag tinuod nga kalipay? Basaha ang tinuod nga kinabuhing asoy sa usa ka babaye nga nakakat-on sa malisod nga paagi—gikan sa kaugalingong eksperyensiya. Gipakita niini kon sa unsang paagi ang biblikanhong mga prinsipyo mahimong gamhanong puwersa sa pagbag-o sa kinaiya alang sa maayo.
SA 1948, sa tulo pa lamang ako ka adlaw, gisagop ako sa labaw-sa-kasarangang pamilya. Pamilya kami sa lima—ang akong ginikanan nga nagsagop kanako, ang ila mismong duha ka anak nga babaye, ug ako. Didto gitagamtam ko ang matagbawon, may kasegurohang kinabuhi. Sumala sa sukdanan sa kalibotan nabatonan namo kining tanan. Ang kasagaran sa akong pagtungha gigugol sa publikong sistema sa tunghaan, apan duha ka tuig akong nakaeskuyla sa Katolikong eskuylahan sa mga interna.
Gitagan-an kami sa among mga ginikanan ug tanang butang nga among gikinahanglan—mga leksiyon sa ballet, tennis, pagsakay sa kabayo. Kami adunay kaugalingong swimming pool, ug nakaapil ako sa bangga sa paglangoy ug sa ballet sa tubig. Wala gayod ako masayod nga ang mga kinabuhi sa uban lahi kaayo gikan sa amoa hangtod nga miabot ako sa akong katuigan sa pagkatin-edyer ug sa hapit na akong migraduwar sa hayskol. Niadtong panahona ang mga martsa sa sibil nga mga katungod sa katuigang 1960 nakapaamgo kanako sa pagpinig ug sa kamatuoran nga dili tanan kabus tungod sa pagkatapolan.
Misugod ako sa pagkuwestiyon sa mga butang nga gitudlo kanako sa eskuylahang Katoliko. Debotado kaayo ako sa akong pagsimba. Sa pagkamatuod, sa daghang katuigan gusto akong mahimong madre. Apan ang akong mga pangutana wala matubag. Misugod ako sa pagduhaduha sa akong pagtuo.
Akong nakita nga diyutay lamang sa katawhan ang makahimo sa pagkinabuhi sama sa akoa, ug nagtuo ako nga dili kini makataronganon. Wala kaayoy simpatiya ang akong mga ginikanan sa kabus nga mga tawo. Ilang gibati, nga ‘Kon ang kabus nga mga tawo mokugi lamang sa pagtrabaho ug maningkamot, mabatonan unta nila ang atong nabatonan.’ Mibati ako nga daw wala ako mahasakop; nagmamingawon kaayo ako.
Uban niini nga mga hunahuna nga nagalibot kanako, mibali ako sa ubang mga butang—ilabina sa pag-inom ug sa mga lalaki. Gihanduraw ko ang akong kaugalingon nga naminyo sa mag-aawit sa rock, ug busa nakig-uban lamang ako sa mga lalaki sa mga grupo sa mag-aawit sa rock. Wala ako makig-uban sa mga kalihokan sa pamilya ug nahimong problemang bata. Sa miabot akog 16-anyos, gahi kaayo akog ulo ug dili makontrolar, nga nakahatag daghang kagul-anan sa panimalay. Magabii, mogawas ako sa pag-inom-inom ug modulog sa mga lalaki ug dili maayo ang akong dungog sa eskuylahan. Napuno na ang akong mga ginikanan, ug tapos makagraduwar sa Hunyo sa 1966, miabang silag lawak alang kanako sa San Francisco ug gipalayas ako sa balay.
Nahibalag nako si Patrick. Nahigugma ako kaniya ug medisider kami sa pag-adto sa New York, sanglit taga didto siya. Miipon ako kaniya ug sa iyang pamilya sa daghang bulan. Gilaayan siya nako sa ulahi ug gipailaila ako kang Parrish, usa ka babaye nga iyang nahibalag sa Greenwich Village. Mibalhin ako ipon kaniya.
Diyutay ra siyag kuwarta sa nahibalag ko siya, apan nahurot kana, ug naglibodlibod na lang kami sa kadalanan. Karon among nakat-onan ang mga paagi sa dalan. Kon dili kami makakitag tawo nga among ikauban sa gabii, mogamit kamig mga droga ug magpagabii, mangayog kuwarta sa mga eskina sa kadalanan o sa mga estasyonan sa sabwey. Usahay makatrabaho ako sa bar nga magtanyag sa mga lalaki ug ilimnon aron modaghan ang halin, sinuweldohan sa bar sa pagbuhat niini. Nakatrabaho usab ako ingong modelo sa pornograpiya ug pampam. Usahay mangitag kamig pagkaon sa mga basurahan gawas sa mga restawran. O mosulod sa mga restawran ug kan-on ang mga salin sa plato sa uban. Dayon among kawaton ang tip aron makapalit kamig kape.
Usahay tapot sa lawas lamang ang among besti. Ako sa literal nahimong gikan sa kaandunahan ngadto sa kakabus. Ang bag-ong mga senina nga maangkon usahay gikan sa mga datong tigulang, nga mopalit kanamog senina baylo sa pila ka pabor. Kas-a, dako kaayo ang akong panginahanglan ug switer nga gumikan niana misulod ako sa dakong tindahan, gisul-ob ang maanindot nga switer, ug migawas—siempre, walay gibayad!
Ang usa sa mga grupo sa mag-aawit sa Balangay nakighigala kanamo, ug pinaagi kanila nga natilawan ko ang marijuana. Kapin sa lima ka tuig, migamit akog ubang mga droga—LSD (sa literal gatosgatos ka higayon), THC, amphetamines, heriona, cocaine, ampiyon, hashish, ug uban pa. Sa ulahi nagtrabaho ako sa dakong sindikato sa droga, ngadto-nganhi sakay sa ayroplano tali sa San Francisco ug New York nga may dalang mga maleta nga puno sa marijuana.
Human sa pila sa bulan sa New York, ako ug si Parrish nakaangkas paingon sa Hollywood. Didto akong nahimamat si Carol, nga akong kauban sa tunghaan sa mga interno. Misugot siya sa pagpapuyo kanamo ni Parrish.
Niining higayona migamit kamig “reds,” kini maoy mga barbiturates (pangpakalma). Makahurot akog unom o pito ka pildoras sa usa ka adlaw. Hubog kami sa daghang gabii sa droga, dayon moadto sa Sunset Strip sa pagpamati sa musika nga nagdaguhob sa mga klab. Sa gihimo namo kini ni Carol sa usa ka gabii, may miduol kanamong duha ka lalaki ug gihatagan kamig marijuana, ug among gidawat. Gipasakay nila kami sa ilang awto, ug gibun-og ako ug gilugos.
Nakaikyas si Carol ug mitawag sa kapolisan. Miabot dayon ang mga polis ug nadakpan ang tawo nga miatake kanako. Gisusi nila ako ug nakadiskobre nga gipangita ako tungod sa wala mabayring multa sa pag-angkas, busa gidakop nila ako. Ang lalaki gibuhian. Ako napriso.
Sa milabay ang usa ka tuig, sa Mayo 1968, miadto ako sa New York ug nagkauli kami ni Patrick. Sa ulahi nagsabak ako sa anak ni Patrick. Wala na siyay tinguha sa pakig-ipon pa kanako o sa bata, busa mibalik ako sa San Francisco. Napaangkan ako ug nag-inusara, ug hapit nang mahimong inahan. Nahadlok kaayo ako nga nagplano ako sa paghikog.
Sa walo ka bulan ang akong tiyan, mitawag si Patrick ug gusto siyang mobalik. Nagkinahanglan siyag $450.000, ug akong gihatag kini kaniya. Andam ako sa pagbuhat ug bisan unsa aron lamang mobalik siya! Nagkinahanglan usab siyag mga sulat gikan kanako alang sa panawag sa pagkasundalo. Mihimo akog mga sulat, nga nag-ingon nga gisustentohan ako ni Patrick. Tingali nakatabang ang akong mga sulat, sanglit gipagawas si Patrick sa panawag sa pagkasundalo. Apan human niana wala na gayod ako makadungog pa niya pag-usab. Sa milabay ang pipila ka semana, sa Pebrero 18, 1969, nanganak akog batang babaye.
Niining puntoha akong naamgohan nga adunay labaw pa sa kinabuhi kay sa kalibotan nga akong nahibaloan. Nakatilaw ako sa duha ka kalibotan—kakabos ug kaadunahan—apan dili gihapon ako malipayon. Misugod ako sa pagpangita sa laing dapit ug mga tubag.
Nagpangita gihapon sa mga tubag, sa Disyembre 1970 miapil ako sa kapunongan ni Jesus nga gitawag Ang Dalan. May puyopuyo akong ginganlag Steve, apan walay usa sa kapunongan ang naghunahuna bahin niana. Niining panahona nakahibalag akog usa sa mga Saksi ni Jehova. Diha ako niadto sa Market Street sa San Francisco sa giduol ako sa usa ka Saksi. Nangutana siya kanako kon Kristohanon ba ako. “Oo!” mitubag ako. Nalipay kaayo ako sa pagpakigsulti bahin sa Bibliya.
‘Nganong samok kaayo ang kalibotan?’ gipangutana ko siya. Iyang gipakita kanako ang Mateo 24:3-13, ug iyang gisaysay nga ang presenteng kahimtang sa kalibotan maoy bahin sa “ilhanan” nga nagpaila nga kita nagkinabuhi na sa panahon sa kataposan. Unya mipadayon siya sa pagsaysay kanako kon unsaon sa Gingharian sa Diyos sa pagpatunghag kalinaw ug kasegurohan sa katawhan ug sa pagwala sa kamatayon, pagkatigulang, ug sakit. (Pinadayag 21:3, 4) Pagkatahom nga palaabuton nga iyang gisaysay! Nakigsabot siya kanako sa pagsugod sa pagtuon sa Bibliya nianang gabhiona sa alas siyete.
Sa miapuli ako, gisultihan dayon nako si Steve sa tanang makalilipayng mga butang nga akong nahibaloan. Apan wala siya maikag sama sa akong gibati. Hinunoa, miingon siya nga ang mga Saksi mga Anti-kristo. Gidid-an niya ako sa pagpakigsulti kanila. Misalig ako kang Steve, busa gitino ko nga wala ako inigduaw sa Saksi.
Sa milabay ang pila ka semana nagsabak ako sa anak ni Steve. Dili siya gustog bata ug milakaw. Busa ania na usab ako, napaangkan, nag-inusara, ug nagsabak. Dili ako gustong magmabdos pa sa ikaduhang higayon, busa sa upat pa ka bulan ang akong tiyan, misulod ako sa lokal nga ospital aron ipahulog ang bata. Masakit kaayo kadto sa pisikal ug sa emosyonal nga paagi. Ilang gipugos nga magbati ako, ug human nga migula ang bata, ilang gibutang kini sa garapon sa akong atubangan sa tibuok gabii. Lalaki kadto. Unsay akong nabuhat? Wala akoy katungod sa pagkuha sa katungod sa akong anak nga lalaki sa pagkinabuhi. Gitugaw ako nianang hunahunaa hangtod karong adlawa.
Sa milabay ang pila ka bulan, sa Agosto 1971, nahibalag ko ang babaye nga akong kauban sa puloy-anan sa katilingban sa San Francisco. Nahimo siyang usa sa mga Saksi. Dugay kaming nagkaestoryahay. Gipailaila niya ako sa usa ka babayeng Saksi, nga mitanyag sa pagtuon sa Bibliya kanako. Niining panahona wala ako mag-usik ug panahon sa pagtuon sa Bibliya niining minahal nga babaye, nga nahimong samag inahan para nako. Gitudloan niya ako ug sa iyang bana dili lamang sa Bibliya kondili sa personal nga kahindikan, pag-atiman sa bata, pag-areglar sa balay, pagpamalit, ug sa ubang praktikal nga mga butang. Gipalitan nila ako ug mga senina ug mga switer alang sa tingtugnaw.
Nahibalo akong maghimo akog mga kausaban. Bisan sa wala pa magsugod ang unang pagtuon, mihunong ako sa pagtabako (makahurot akog tulo ka kaha sa usa ka adlaw) ug gihunong ang tanang droga. Nakadesider usab ako sa akong kasingkasing sa pagsunod sa balaod ni Jehova bahin sa moralidad sa sekso. Miuswag ako hangtod sa punto diin, sa Hunyo 17, 1972, akong gisimbolohan ang akong dedikasyon kang Jehova nga Diyos pinaagi sa pagpabawtismo.—1 Corinto 6:9-11.
Karon, nga milabay na ang 13 ka tuig, nag-alagad gihapon akong matinumanon sa akong Maglalalang. Ang akong anak nga babaye, nga karon 16 anyos na, gibawtismohan sa Marso 12, 1983. Sa Oktobre sa 1975 naminyo ako, sa usa sa mga Saksi ni Jehova, nga usa ka buotang ulo sa pamilya, ug mahigugmaong bana ug amahan sa among tulo ka anak. Ug sukad sa Pebrero 1, 1982, nakabaton akog kalipay sa ministeryo ingong regular payoner, nga nagagugol ug 90 oras sa usa ka bulan nianang buluhatona.
Sa kataposan nakita ko ang kalipay!—Tinampo.
[Blurb sa panid 17]
Sa naghayskol ako, gahi akog ulo ug dili makontrolar, nga nakahatag dakong kasub-anan sa panimalay
[Blurb sa panid 18]
Wala akoy katungod sa pagkuha sa akong anak nga lalaki sa katungod nga mabuhi. Gitugaw ako nianang hunahunaa hangtod karong adlawa
[Blurb sa panid 19]
Sukad sa 1982 nakabaton akog kalipay sa paggugol labing menos 90 ka oras sa usa ka bulan sa pagtudlo sa Bibliya ngadto sa uban