May Pakigdait Ka ba sa Imong Silingan?

HIGUGMAA ang imong silingan. Mao kanay gisulti kanato. Dili kini masayon. Malisod na ganing makigdait. Mauyog ang imong bungbong sa musikang rock sa imong silingan sa apartment. Ang ilang mga anak nagkaguliyang sa pasilyo. Sa dalan, mabukbokan ka. Sa haywey, mokalit lag butho ang mga drayber sa imong atubangan—sige busina di ba hingposilan ka! Paghingapin? Sa ubang dapit, dili sa dagkong mga siyudad. Ang mga lugar gawas sa siyudad ug sa kalungsoran may ilang kaugalingong mga problema nga maoy nakapalisod sa pagpakitag gugma sa silingan.

Ang hinungdan sa kadaghanang kalisod mao ang moderno mauswagong teknolohiya niini nga sistema sa mga butang. Libolibo ang magdasok ngadto sa mga siyudad samag tanga sa botelya. Ang tigngadto-nganhing mga tawo mangasuko tungod sa hinayng paglihok sa mga sakyanan sa panahon sa mabagang trapik. Ang mga namuyo sa baryo managsinggit nga mag-abog sa mga manok sa silingan nga nangaykay sa ilang tanaman. Maalakansi ang mga mag-uuma tungod kay ginadaot sa mga insekto nga dili madutlan sa pamatay sa dangan ang ilang mga tanom. Ug sa tanang dapit ang mga pabrika nagpabuga sa ilang mga hugaw. Nahimong hugaw ang hangin, mahulog ang asidong ulan, ug ang mga isda sa linaw mangamatay, bisan ang tubig nga ilimnon nahugawan na sa makahilong kemikal nga mga basura. Nagakadaot ang panglawas, nangapagan ang mga kinabuhi.

Kini ug uban pa, nakapasamot sa kalisod sa mga kinabuhi sa milyonmilyon samtang mapainit ang pagbati, nga kabuthon na, ug sagad mobuto kini. Daghan mangitag kaikyasan pinaagi sa pagpalumos sa ilang kaugalingon sa unodnong mga pangagpas. Ang hakog nga materyalismo, sosyal nga pagkabutang, pagkahubog sa droga, balikong mga estilo sa kinabuhi—tanang butang aron mobalik sa sekta sa ako-una. Nangibabaw ang paghigugma sa kaugalingon kay sa paghigugma sa silingan samtang gipabuhong ang unod ug gipagutman ang espiritu.

Ug sa dili kaayo adunahang mga nasod, ang unod ug espiritu gipanggutom. Ginadaot sa mga rebolusyon ang mga lungsoranon, nakapagan ug mga kinabuhi ang kamatay, ang kagutmanan anam-anam nga mikaylap sa yuta, sa mawad-ag paglaom, mohari ang kasub-anan.

Dili, niining modernong sistema sa mga butang dili gayod sayon ang paghigugma sa imong silingan. Bisan pa may naglungtad gihapong gugma sa silingan, ug ginatagamtam sa daghan ang pakigdait uban sa ilang silingan.