Sa Dihang Mahanaw ang Kanser
“Sa tuig 2100 ang mga kauswagan sa paninugdang panukiduki sa biolohiya tingali motugot sa pagsanta sa kanser sa paaging bug-os wala mahibaloi daan sa pagkakaron.”—The Causes of Cancer.
SUMALA sa tagna sa Bibliya, ang kanser mahanaw sa dili na madugay, ug tinong “sa paaging bug-os wala mahibaloi daan sa pagkakaron” sa mga magsusulat sa gikutlo-sa-ibabawng basahon. Nganong amo kanang ipatuo?
Tungod kay si Kristo Jesus, nga gipaanhi sa yuta kapin ug 1,900 ka tuig kanhi, gihatagag gahom sa pagpasig-uli sa kinabuhi ug maayong panglawas sa katawhan. Sa usa ka okasyon, nga wala gani makakita sa pasyente, iyang giayo ang sulugoong lalaki sa usa ka opisyal sa Romanhong kasundalohan nga “naghigda sa balay tungod sa paralisis, nga nagaantos sa hilabihan gayod.” (Mateo 8:5-13) Sa laing higayon, iyang giayo ang ugangang-babaye sa iyang disipulong si Pedro, kinsa gihilantan. Giunsa niya pagbuhat kadto? “Iyang gihikap ang iyang kamot, ug siya nahuwasan sa hilanat, ug siya mibangon.”—Mateo 8:14-17.
Ang pag-usisa sa ministeryo ni Jesus nagapadayag nga iyang giayo ang lainlaing sakit sa katawhan sa duruha ka sekso ug sa nagkalainlaing panuigon. Iyang gipasig-uli ang maayong lawas sa bakol, piang, buta, ug amang, sa patolon, paralitiko, sa babayeng nag-antos sa paghinugo, usa ka lalaking may nakuyos nga kamot, ug ang laing lalaki nga may panghupong. Siya nagbanhaw usab ug mga tawo gikan sa patay. Giunsa niya pagbuhat kadto? Pinaagi ba sa linaing matang sa terapiya?
Sa pagkamatuod, kadto dili hipnoterapiya, sikoterapiya, o laing matang sa medikal nga paagi. Ni kadto tungod sa personal nga kaalam, kahibalo, o gahom ni Jesus. Kadto milagrosong pagpang-ayo gikan sa labaw-kinaiyanhong Tinubdan. (Mateo 8:17; Isaias 53:4) Ang espiritu ug gahom sa iyang Amahan maoy nagpahinabo sa pagkaayo. Bisan pa niana kadto gipadapat lamang ngadto sa diyutay ra sa mga masakiton sa adlaw ni Kristo, ug kadto wala makapugong sa mga nangaayo gikan sa pagkamatay sa ulahi. Nan unsang katuyoan ang gialagaran niadto?
Ang pagpang-ayo nga gihimo ni Jesus mipunting sa adlaw dihang ang tanang masinugtanong katawhan makabatog kaayohan gikan sa pagpasig-uli sa hinatag-sa-Diyos nga mga gasa nga mao ang maayong panglawas ug kinabuhi. Busa atong nabatonan ang makapadasig nga saad sa Bibliya: “Tan-awa! Ang balongbalong sa Diyos nagauban sa katawhan, ug siya mopuyo uban kanila, ug sila mahimong iyang mga katawhan [dinhi sa yuta]. . . . Ug iyang pagapahiran ang tanang luha gikan sa ilang mga mata, ug mawala na ang kamatayon, ni may pagbalata ni paghilak ni kasakit pa. Ang unang mga butang miagi na.”—Pinadayag 21:3, 4.
Apil sa maong unang mga butang nga mahanaw mao ang kanser, uban ang mga hinungdan niini. Ilalom sa pagmando sa Ginghariang kagamhanan sa Diyos pinaagi ni Kristo, papason na ang makapatay nga mga hinungdang maylabot sa silinganan. Ang makapaluya nga kapit-osan pagahanawon, ug ang sistema sa imyunidad sa tawo moobra sumala sa katuyoan niana. Ang mahimsog nga mga lawas mokooperar sa mahimsog nga mga hunahuna, nga nasentro sa matuod espirituwal nga mga prinsipyo.—Isaias 33:24; 35:5, 6.
Kining tanan ba maayo kaayong pamation aron matuman? Apan, sumala sa ginaingon sa Bibliya, kita may pasalig sa Diyos: “Ug ang Usang naglingkod sa trono miingon: ‘Tan-awa! Akong ginabag-o ang tanang butang. . . . Isulat mo kini, tungod kay kining mga pulonga kasaligan ug matuod.’” (Pinadayag 21:5) Kini ang buhing paglaom nga nagalig-on sa mga Saksi ni Jehova nga nagaantos sa mga kadaot sa kanser, ang pipila hangtod pa sa kamatayon. Sila nasayod nga gisaad ni Jehova nga Diyos ang “bag-ong mga langit ug usa ka bag-ong yuta.”—Isaias 65:17, 18.