“Nagapanuko nga Bayani”

Ang sanla usa ka gikalisangang sakit nga nagaapektar tingali sa abot ug 15 milyong tawo, ilabina sa Aprika, India, Burma, Thailand, ug sa mga bahin sa Amerika del Sur. Karon ang siyam-ug-bakos nga armadillo gidayeg ingong “ang nagapanuko nga bayani” sa bugno sa tawo batok sa sakit.

Apan unsay bahin sa bugno niining gamay nga mamal o susohang hayop nga duolag duha ka tiil sa gitas-on (61 cm), nga motimbang ug abot sa 15 libras (6.8 kg) ug may kabhang nga binuhat sa gahi, daw-bukog nga mga platoplato?

Aw, nakaplagang ang mga hayop lamang nga matakdan sa sanla sa tawo mao ang ilaga ug mga armadillo. Busa ang mga siyentipiko nagagamit sa armadillo sa paghimo sa unang bakuna batok sa sanla, sanglit ang ilaga mopatunghag diyutay kaayo aron kana magamit. Ang usa ka naapektahang armadillo mohatag ug 750 ka dosis nga bakuna. Karon, ang linaing mga uma gitukod sa Tinipong Bansa ug sa Britanya sa pagbuhi sa may armadura nga susohang hayop.