Gikan sa Among mga Magbabasa

Espiritismo

Buot kong komentohan ang artikulo sa Pagmata! nga “Allan Kardec—Nanguna sa Espiritismo.” (Mayo 22, 1987) Ako nagtuo nga ang matag usa may katungod sa pagpili sa relihiyong gusto niya, basta kana magapalihok sa tawo sa pagbuhat sa maayo ug dili magdaot sa ubang tawo o mga hayop. Ako usa ka espiritista, ug sa mga klase nga akong gitambongan, kadtong presente dili mag-usik ug panahon sa pagsaway sa ubang relihiyon, labi pang dili mag-usik sa papel ug kuwarta sa pagpatik sa maong mga pagsaway. Ang mga espiritista dili mouyon sa mga Saksi ni Jehova mahitungod sa imortalidad sa kalag, pakigkomunikar sa mga patay, ug sa ubang butang. Bisan pa niana, kami dili gayod ignorante o dili mahigugmaon sa pag-ingong kamo nagapakig-ambit sa mga demonyo, sama sa inyong ginahimo kanamo. Ang espiritismo nagadasig kanato sa pagbag-o sa kaugalingon, nga nagausab sa mga bisyo ngadto sa maayong mga kagawian. Kini nagatambag kanato sa pagpakitag kaluoy ug pakighiusa sa atong kabos nga mga igsoon. Imposible nga ang mga demonyo magtambag sa mga tawo sa pagbuhat sa ingon, kay sila dili makabatog kaayohan sa pagbuhat niana. May panagsumpaki, dili ba?

C. M. G., Brazil

Kami mouyon nga ang matag usa angay malibre sa pagpili sa iyang relihiyon. Bisan pa niana, gibati namong obligado sa pag-awhag sa pagtagad sa mga pasidaan sa Bibliya sa peligrosong relihiyosong mga tulomanon. Kadtong nagtuo sa pakigkomunikar sa mga patay, ang Bibliya nagapadayag, madutlan sa malalangon, malimbongong impluwensiya sa daotang mga espiritu nga nagapakaaron-ingnong mao ang mga tawo nga nabuhi sa nangagi ug karon patay na ug busa walay gahom sa pagbuhat sa bisan unsa. (Tan-awa ang Ecclesiastes 9:5, 6, 10 ug Isaias 8:19, 20.) Tungod niini, ang Bibliya sa Levitico 19:31 ug Deuteronomio 18:10-12 nagapasidaan batok sa espiritistikanhong mga buhat sa bisan unsang matang. Bahin sa daw pagdasig sa espiritismo sa usa sa paghimo sa mga bisyo nga mga maayong kagawian, ang Bibliya sa 2 Corinto 11:14, 15 nagaingong “si Satanas nagapadayon sa paghimo sa iyang kaugalingon nga usa ka manulonda sa kahayag. Busa dili talagsaon kon ang iyang mga ministro magapadayon usab sa paghimo sa ilang kaugalingon nga mga ministro sa pagkamatarong.” Sumala sa gipahayag sa 2 Timoteo 3:16, 17, ang tawo sa Diyos angay mosalig sa Bibliya, dili sa mga espiritu, ingong ang matuod, kasaligang tinubdan sa giya mahitungod sa kabubut-on sa Diyos.—ED.

Polusyon

Akong gibasang may kaikag ang inyong mga artikulo bahin sa “Unsay Nagakahitabo sa Atong mga Lasang?” (Hunyo 22, 1987) Ako nahibulong nganong kamo wala mosugyot—sa butang nga alang kanako mao ang dayag nga solusyon ingong kapuli sa makahugaw, limitadong fossil nga mga sugnod—ang paggamit sa dili-mahurot, walay-limiteng tinubdan sa enerhiya, ang enerhiya sa adlaw o solar power. Kini hinlo ug motaganag tinubdan sa enerhiya sa walay kataposan.

R. A. M., Tinipong Bansa

Kami positibo kaayo bahin sa natagong-kagahom sa enerhiya sa adlaw o solar power ingong solusyon sa kinadak-an sa polusyon sa yuta ug sa limitadong suplay sa mga sugnod fossil. (Tan-awa ang among isyu sa Pebrero 22, 1980.) Ugaling, ang suliran labaw nga bahin sa tawhanong kahakog ug espesyal nga intereses, nga nagababag sa kaugmaran ug sa tibuok-yutang paggamit sa enerhiya sa adlaw. Tungod niining mga hinungdana, kami nagtuo nga ang Gingharian sa Diyos lamang ang malamposong makasulbad sa tanang sulirang nalangkit ug magtagana sa malungtarong solusyon.—ED.