Pagpaniid sa Kalibotan
AIDS ug ang Gatas sa Suso
Giila nga ang virus sa AIDS ikapasa ngadto sa usa ka masuso pinaagi sa gatas sa suso sa iyang inahan. Ang pagkahibalo niini nagapatunghag pila ka kabalaka sa usa ka grupo sa mga inahan nga walay AIDS. Ngano? Tungod kay daghang ospital may mga bangko sa gatas nga nagadawat ug mga donasyon sa gatas sa suso. Unya kining gatasa isuplay ngadto sa mga inahan nga kulag suplay sa ilang kaugalingong gatas o sa ubang hinungdan dili makapasuso sa ilang bata mismo. Dugang pa, ang maong gihatag nga gatas kadaghanan gamiton sa mga ospital sa pagpakaon sa ahat nga mga masuso. Ugaling, sanglit mopatim-awng walay ginabuhat nga pagsusi sa pagtino kon ang gihatag nga gatas sa suso basin may virus sa AIDS, ang mga inahan sa wala tuyoa makaladlad sa ilang masuso ngadto sa virus sa AIDS kong ang gatas nga nabatonan naggikan sa nagdonar nga natakdan niana.
Madunot nga Plastik Pilm
Ang mga plastik nagahugaw sa atong kadagatan, kalasangan, ug kasiyudaran. Bisan pa niana, ang mga kemikong si Felix H. Otey ug Richard F. Westhoff karong bag-o milampos sa paggamag plastik pilm nga madunot. Nga nagtrabaho sa laboratoryo sa Departamento sa Agrikultura sa U.S. sa Peoria, Illinois, kining mga siyentipikoha nagkombinar sa cornstarch nga mga molekula uban sa plastik nga mga molekula para sa kalig-on sa paggamag lig-ong plastik pilm. Sila nag-angkong ang pagladlad sa kabasaon ug kainit sa yuta makadunot sa starch diha sa pilm, ug ingong resulta, ang gagmayng mga tipik sa plastik nga mabilin sa kadugayan mahilis sa bakterya diha sa yuta.
Tunil sa Baki
Ang pag-abli sa kinabag-ohang tunil sa Britanya gitiman-an sa mga kasadyaan. Samtang ang mga letratista ug ang prensa nagkobre sa okasyon, ang pila ka pulong sa Ingles nga awtor si Kipling gibasa, ug ang usa ka laso nga gibabag sa ganghaan giputol ingong seremonyas ni Lord Skelmersdale, ang Ubos nga Sekretaryo sa Silinganan sa Gobyerno. Kinahanglang moluhod siya sa pagbuhat niana, sanglit ang baba sa tunil mao lamay kinse sentimetros sa gilapdon. Kadto gitukod aron ang mga baki makatabok sa ilalom sa dalang Henley. Kada tuig, panahon sa tingsanay, mga 18 metrikong tonelada kanila ang mapatay sa Britanikong mga drayber samtang ang mga baki motabok sa mga karsada aron makaabot sa ilang mga lanawng sanayanan sa tingpamulak. Malamposon kaayo ang tunil nga ang uban nagtinguhag impormasyon alang sa ilang linaing mga suliran sa pagtabok sa karsada sa kahayopan.
Mopatay nga Robot
Ang usa ka robot kalit nagpaandar sa usa ka turnohan ug nagpatay sa usa ka trabahante sa pabrika sa Hapon. Ang hinungdan? Usa ka elektromagnetikong balod nga naggikan sa kidlap sa koryente gikan sa usa ka kreyn. Kining 1982 nga hitabo gibutyag sa usa ka bag-ong pagtuon sa konseho sa Hapones nga Ministeryo sa Koreyo ug Telekomunikasyon bahin sa “elektronikong anuos.” Ang mga tinubdan sa “elektronikong anuos,” o wala kinahanglanang elektromagnetikong mga balod, nahadiindiin: personal nga mga kompiyutir, mga makinang dulaan sa TV, ug mga booster sa mga antenna sa TV, sa pagngalan ug pipila. Bisan pa niana, ang maong wala kinahanglanang elektromagnetikong mga balod giingong magpahinabog pagkaaberiya pinaagi sa pagbalda sa integrated circuits sa abanteg-teknolohiyang mga sistema sa kontrol. Ang mga robot sa Hapon nakapatay ug napulo ka tawo sa miaging walo ka tuig. Gikatahapang sa unom sa maong mga kaso nalangkit ang elektromagnetikong mga balod.
Tinapay, Bino, o . . .
Niining tuiga, ang pila ka taga-Sidlakang Alemanya nga nagatambong sa Eukarista (Komunyon) panahon sa Easter natingala. Tapad sa naandang tinapay ug bino nga itagana sa maong okasyon, ang pila sa Lutheran ug United Churches karon nagadulot usab sa kapuling ilimnon: ang duga sa ubas. Nganong duga man? “Aron makaapil ang mga alkoholiko ug ubang dili buot moinom ug alkohol,” mikomento ang nagsukad-sa-Geneva Ecumenical Press Service.
Usa ka Siyentipiko Mipahayag
“Maangkon ko ang katagbawan sa kaisipan sa pagdawat nga adunay Diyos inay sa yanong pagdawat nga kini (kita) mitunghang sulagma,” matud si Dr. Louw Alberts, sumala sa Cape Times, usa ka mantalaan sa South Africa. Si Alberts, usa ka pisiko nga nakadiskobre sa higanteng magnetostriction (kausaban sa mga sukod tungod sa magnetismo) sa talagsaong mga metal sa yuta, nagpahayag usab sa maong hunahuna bahin sa Bibliya. “Ang Bibliya mao ang sinulat nga pulong sa Diyos, ang siyensiya mao ang pagbasa sa gilalang nga buhat. Ang duha samag awtor—ang Diyos.”
Tambal sa Fibrocystic?
Abot ug 80 porsiento sa mga babaye karon gitakboyan sa fibrocystic nga sakit sa suso, mitaho ang Dimensions, usa ka Canadianhong magasin. Ang sakit makapabaga sa mga pinakahapin sa agian sa gatas ug mapormang masakit nga mga bugon. Bisan pa niana, sukad 1971 si Dr. William Ghent sa Queens University sa Ontario, nga nakig-anib kang Dr. Bernard Eskin sa Philadelphia, Pennsylvania, nag-eksperimento sa elemental iodine sa pagtambal sa sakit, nga may dakong kalamposan. Ang ilang mga resulta nagpadayag nga sa 315 ka babayeng may fibrocystic nga gitambalan, 75 porsiento sa mga nagsakit nahibalik sa normal ug 2 porsiento lamang sa katibuk-ang gidaghanon ang wala maarang-arang. Hinuon, namatikdan ang ginagmayng mga epekto taliwala sa gamayng porsiento sa mga babayeng gitambalan. Ang maayong balita, sumala kang Dr. Ghent, mao nga daghang babaye dili na magkinahanglan niining tambala kon ilang ilakip ang daghang iodine diha sa ilang regular nga ginakaon. Nagapaluyo niini mao ang kamatuorang ang New York City nagatahog dobleng sakit sa suso nga fibrocystic taliwala sa mga babaye kay sa Tokyo, diin ang mga babaye nagakaon ug daghang pagkaong tugob sa iodine.
Ayroplano Nabangga sa Isda
Wala madugay tapos sa pagpataas gikan sa Juneau Airport sa Alaska, ang Boeing 737 nga ayroplanong jet nga may 40 ka pasaherong sakay nabangga sa usa ka salmon sa kahanginan. Sumala sa tripulante sa ayroplano, ang isda gidala sa kahanginan sa usa ka bald eagle. Sa dihang nakurat tungod sa ayroplano, nabuhian sa agila ang isda ug nahulog, nga naigo sa usa ka bentana ibabaw sa lugar sa piloto. Ang ayroplano nalangan sa usa ka oras sa sunod nga gihunongan niini aron kini masusi kon may nadaot. “Nakabangga kamig moose (sa mga dalan sa tugpahanan sa ayroplano); nakabangga kamig lagsaw, ug nakabangga kamig nagkalainlaing butang,” matud ni Jerry Kvasnikoff, manedyer sa serbisyo sa parokyano sa Alaska Airlines, “apan wala pa kami makabanggag isda sa nangagi.”
Enerhiya Gikan sa mga Balod sa Dagat
Ang mga balod sa dagat mahimo kahang hinungdanong tinubdan sa enerhiya sa umaabot? Ang Ministro sa Minerales ug Enerhiya sa Australia, si Mr. Parker, nagtuo niana ug nag-awtorisar sa Wave Power International, usa ka kompaniyang bag-ong naporma, sa pagtukod sa usa ka estasyon sa enerhiya sa Esperance sa Western Australia, aron sa pagpatunghag koryente pinaagi sa mga balod. Ang usa ka dakong generetor ipatindog nga molabaw sa tupong sa dagat sa duolag 7 metros ug ang diametro maoy mga 20 metros. Ang pagpaandar sa generetor, sumala sa gipatin-aw sa mantalaang The West Australian, nagkinahanglag maayong mga balod sa dagat sa tibuok tuig. Ang usa ka boya o balsa sulod sa usa ka kongkretong gambalay nga nagagamit sa presyon sa hangin sa pagkontrolar sa lebel sa tubig sa dagat ipataas aron mamugna ang usa ka puwersang nagabomba. Unya ang tubig makabig paingon sa ibabaw sa torre ug mopatunghag enerhiya dihang kini mahulog. Gikalkulong mga 20 porsiento sa panginahanglan sa enerhiya sa Esperance ug sa distrito sa palibot itagana niining walay-polusyong metodo sa pagpatunghag koryente.
“Papel nga Kalan-on”
“Ang among tumong mao ang paggamag masustansiya kaayo, daling bitbiton, daling kan-ong pagkaon,” mipahayag si Eiji Miyazaki, usa ka Hapones nga industriyalista, sa nagpailaila sa iyang makaon nga tarheta nga iyang gihatagag Pranses nga ngalan. Sumala sa Pranses nga mantalaang senemana nga L’Express, ang maong espesyalista sa pagkaon milampos sa pagdasok ngadto sa katorse-gramos nga barita, nga susamag gidak-on sa usa ka kredit kard, sa samang gidaghanon sa calories sama sa usa ka kompletong pagkaon. Kining diskobreha makaiikag sa mga tawo nga sama sa mga tigtungas sa bukid nga buot “magdala sa kinadaghanang calories sa labing gamayng lugar” o sa mga drayber ug trak nga buot modaginot ug panahon nga gikinahanglan sa pagkaon sa mga kan-anan sa daplin sa dalan. Ang L‘Express wala magdahom nga kini maangayan kaayo sa Pransiya. Ang rason? Bisan tuod may 14 ka kahumot, ang Pranses nga magasin nakadiskobreng kini lamian lamag diyutay sa Pranses nga ngalang gihatag sa produkto—“Papier”!