Bag-ong mga Pagdugang Alang sa Pagpadako sa Pagprinta

NAHIMUTANG sa tunga sa agianan sa mga taytayan sa Brooklyn ug Manhattan mao ang pangunang imprintahan sa tibuok-kalibotang organisasyon sa mga Saksi ni Jehova. Imong makita kining unom-ka-andanang mga tinukod sa mga letrato sa ibabaw ug sa tuo. Ang 49 ka metrong taytayan nagsumpay sa duha ka bag-ong mga pagdugang, nga nahimutang sa 175 Pearl Street ug sa 160 Jay Street (Numero 1), uban sa unang upat ka bloke sa siyudad nga pasilidad sa tabok sa mga karsada (Numero 2).

Kining 4.3 por 4.9 ka metrong taytayan, nga 16 ka metro ibabaw sa mga karsada, natapos sa ting-init sa 1986. Agianan kini gikan sa mga andana sa imprintahan hangtod ngadto sa ika-unom nga andana sa 175 Pearl Street.

Ang tinukod sa Pearl Street, nga gitukod sa 1917 ug gidugangan sa 1947, gipalit sa mga Saksi ni Jehova sa Enero 7, 1983. Sa pagka Hulyo 1985 ang kataposan sa nagpuyo niini niadto mibalhin. Apan bisan sa wala makabalhin silang tanan, gisugdan sa mga Saksi nga trabahante sa konstruksiyon ang pag-usab sa tinukod.

Una, gibutangan kinig bag-ong atop, ug gitaod ang 114,000 ka litrong tangke sa tubig. Aron maatiman ang kalihokan sa paghakot sa mga materyales sulod sa tinukod, usa ka bag-ong elibitor nga makakargag 5,400 kilogramos gidugang, ug gipulihan ang elibitor para sa pasahero. Ang kadaghanan sa mga andana gipatongan ug bagang epoxy. Ang daang mga bungbong sa sulod nga wala makaabot sa mga kinahanglanon sa Lagda sa Pagtukod gipulihan ug tisa nga mga bungbong nga may insulasyon. Gitaod ang mga aluminum nga balayan sa bentana ug may insulasyong thermophane nga bildo. Ug ang enterong tinukod gipintalag bag-o sa sulod ug sa gawas.

Kasamtangan, sa Disyembre 11, 1986, ang tinukod diha sa 160 Jay Street, nga tapad sa 175 Pearl Street, gipalit usab. Hapit usa sa tulo ka bahin sa tinukod, nga gitukod sa 1928, may nagpuyo gihapon. Dihang namalhin sila, gisugdan na ang paghinlo ug pag-usab sa tinukod. Dili magdugay, ang mga agianan tali sa duha ka tinukod himoon, busa, magsumpay sa 160 Jay Street uban sa lima ka mga tinukod alang sa pabrika.

Ang duha ka bag-ong pagdugang sa pabrika (Numero 1), nga halos samag gidak-on, nakahatag dugang 33,000 ka metro kuwadradong luna sa andana. Ang ubang upat ka tinukod dunay 61,500 metro kuwadradong luna. Busa ang bag-ong mga pagdugang nakadugang ug duolan sa 55 porsientong luna—mototal ug duolan sa 94,000 metro kuwadrado! Kapin kana sa 9 ka ektarya!

Apan komosta kon kulang gihapon kining mga pasilidara sa pag-atiman sa nagadugang nga mga panginahanglag mga literatura sa Bibliya? Buweno, imong makita diha sa hulagway sa panid 16 ang lugar nga may numero 3. Ang luna nga yuta nga kapin sa 5,600 metro kuwadrado gipalit sa mga Saksi ni Jehova. Kon kinahanglan, kining maong tagana magamit alang sa dugang pagpadako sa imprintahan.

Nahimutang diha sa pantalan sa New York ang mga pasilidad sa pag-imprinta nga kombinyente alang sa pagpadala sa literatura sa Bibliya sa tibuok kalibotan. Sumala sa imong makita, kombinyente usab sila kaayo sa mga opisina sa mga hedkuwarter sa mga Saksi ni Jehova, nga makita sa nagaubang hulagway. (Numero 4) Dugang pa, ang mga tinukod nga makapapuyog kapin sa 2,500 ka buluntaryong mga trabahante sa mga membro sa hedkuwarter duol ra sa opisina, pabrika, ug sa mga edipisyo alang sa shipping.—Tan-awa ang Pagmata! sa Agosto 22, 1987, alang sa mga hulagway ug kabatbatan sa mga pasilidad sa shipping.

Sa pila ka bulang milabay, ang ubang mga buluhaton sa pabrika gibalhin ngadto sa tinukod sa 175 Pearl Street. Nakahatag kinig lugar sa imprintahan aron kapundohan sa mga papel duol sa makina sa pag-imprinta, kon kinahanglan. Atong tan-awon ang pila ka kalihokan sa pabrika nga gibalhin ngadto sa 175 Pearl Street.

[Kahon/Mga letrato sa panid 18]

Mga Kalihokan sa Tinukod sa Pearl Street

Kining maong mga kard, nga hinimo sa baga nga kardbord, gigamit sa paghimog mga hapin sa libro. Putlon kini sumala sa gidak-on diha sa linain nga makina. Ang aberids nga 65 metrikong tonilada sa mga kard, nga putlon sa lima ka sukdanang mga gidak-on, ginahatod ngadto sa tahianan kada adlaw.

Ang Talyer dunay 19 ka turno, 17 ka makinang pangkorte sa asiro, 6 ka molino, ug 11 ka makinang pangbarina. Kinahanglan kining mga makinaha aron padayong makaandar ang mga makina sa imprinta ug tahianan. Gawas pa sa dakong kantidad nga madaginot kon itandi sa paghimo niining trabahoa diha sa komersiyal nga talyer, ang atong talyer nakataganag madali nga serbisyo alang sa imprintahan, sa opisina, ug sa mga pamalay.

Ang 49-metro, 159-metrikong toniladang taytayan gihimo alang sa walay baldang ngadto-nganhing trapiko paingon sa bag-o pang napalit nga mga tinukod. Ang taytayan may mga tubo sa alisngaw alang sa pagpainit sa tinukod sa 175 Pearl Street, ug mga linya usab alang sa data ug mga komunikasyon alang sa mga tinukod 175 Pearl Street ug 160 Jay Street.

Sukad nga gisugdan ang Departamento sa Paggamag-karton sa Hunyo 1982, kapin sa usa ka milyong mga karton ang nahimo sa usa ka tuig sa nagkalainlaing gidak-on. Ang paghimo sa atong kaugalingong mga karton nakapaneguro ug mas maayong kalidad nga produkto, makadaginot ug salapi, ug nakatagana sa mga panginahanglag karton sa episyenteng paagi.

Ang trabaho sa slitter/rewinder nagsugod sa 1980. Sukad niadto, tinagpulo ka libong dolyares ang nadaginot sa usa ka tuig pinaagi sa pagtabas sa atong kaugalingong materyal sa hapin sa libro alang sa mga trabaho sa pagtahi sa libro.