Pagpaniid sa Kalibotan

Mahadlokong mga Siruhano

Nagaatubang ang mga siruhano ug makalibog nga problema bahin sa pag-opera sa pasyente nga natukian nga positibong dunay AIDS. “Ning panahona, maoy among polisa ang dili pag-opera,” miingon si Dr. W. Dudley Johnson, usa ka iladong siruhano sa kasingkasing. “Ginaatubang namo ang paagi nga nalangkit ang daghang dugo. Dunay dugo sa tanang dapit. Duna pay dakong kapeligrohan sa dagom sa pagtahi sa operasyon.” Nagkadaghang mga siruhano ang may samang kahadlok. Ug diha sa usa ka surbi, kapin sa 90 porsiento sa mga siruhano miuyon sa praktis ni Dr. Johnson sa pagbalibad sa mga pasyente. “Sa pagkatinuod,” miingon ang magasing Newsweek, “ang karaang panumpa sa mga doktor ug ang modernong lagda sa etika sa medisina wala magpugos sa mga doktor sa pagtambal sa pasyente kon dili siya gusto.” Si Dr. Johnson midawat nga sa pagkakaron wala pa siyay nahibaloang doktor nga natakdan sa AIDS gikan sa pasyente. “Buot kong magpabiling ingon niana,” siya miingon.

Gibawtismohan Pag-usab ang mga Klero

Duha ka Protestanteng mga klero, ang Luteranong Reinhart Weber ug Klaus Hoffmann sa United Church, “gibawtismohan pag-usab sa ‘biblikanhon’” nga paagi sa Lensahn, Federal Republic of Germany, mitaho ang Ecumenical Press Service. Ang pagbawtismo sa bata, miingon ang retiradong pastor nga si Weber, wala “mahiuyon sa Bibliya.” Mihangyo gani si Hoffmann sa rehiyonal nga mga lider sa Evangelical Church “sa paghunong sa pagbawtismo sa tanang mga bata,” miingon ang taho. Ang reaksiyon? Gisuspende siya gikan sa iyang mga katungdanan sa pagkapastor.

Nabuang nga mga Uso sa Polo

Ang nakulong nga mga uso sa polo ‘nangabuang,’ mitaho ang The Sunday Times sa London. Kapin sa 15 ka uso sa polo nga karon anaa sa mga zoo sa Britanya naapektohan, kini miingon. Ang paghupot ug aktibo ug mausisaong mga hayop diha sa pinugngang mga kahimtang sa zoo daw maoy mipahinabo sa kadaot sa hunahuna sa mga uso, nga makita sa ilang walay kapuslanang lihok sa pagpasopaso ug pagtuyatuya nga ubanan, sa pila ka kaso, sa pagputol sa ilang kaugalingon.

Ang Duha ka Parisan Magaantos

Ang mga lalaki nga dunay mga problema sa kaminyoon mas daling matakboyan sa sakit kay niadtong malipayong naminyo, miingon ang mga tigdukiduki si Janice Kiecolt-Glaser ug ang iyang bana, si Ronald Glaser, sa Ohio State University. Bisan pa nga gipakita sa unang mga pagtuon nga tinuod kini sa dili-malipayong mga babayeng minyo, karon na lang panahona nga nahibaloan nga ang sistema sa pagsagang sa sakit sa lalaki maluya tungod sa kapit-osan sa kaminyoon. Apan, ang mga pagtuki sa dugo diha sa mga lalaki nga may problemang kaminyoon nagpakita nga dili sila kaayo makasagang sa duha ka komung mga impeksiyon sa virus sa herpes. Dugang pa, usa ka pagtuon nga gihimo sa tigdukiduki si Christopher Coe, sa University of Wisconsin, misugyot nga ang “emosyonal nga mga impluwensiya sa pisikal nga panglawas magpabilin sa hataas nga panahon tapos masulbad ang emosyonal nga problema,” mitaho ang New York Post.

Makamatayng Tensiyon

Sa 1987 sa Japan, ang kalit nga mga kamatayon sa dagkong mga ehekutibong negosyante nga anaa sa ilang panuigong 40, 50, ug 60 milukso gikan sa tulo ka pilo sa samang yugto sa miaging tuig. Gipasangil ang hinungdan sa ilang kamatayon sa “dili-mahanduraw nga tensiyon” nga nagauban sa katungdanan sa dagkong mga ehekutibo karon, miingon ang mantalaang Mainichi Shimbun sa Tokyo. Bisan pa nga ang tanan masaligon sa ilang panglawas, ang dili maayong mga kahimtang sa negosyo nga misamot tungod sa implasyon nakadugang sa puno sa tensiyon nga kinabuhi. Aron masumpo ang maong kiling, ang Federation of Employers Association sa Japan miisyu ug walo ka lagda aron masumpo ang tensiyon. Apil sa mga lagda mao: Paglikay sa tensiyon nga mga iskedyol, pag-ehersisyo kapin sa 30 minutos sa kada adlaw, ug pagkatawa.