Mga Saksi ni Jehova ba Lamang?

Si Umberto Eco, iladong manalaysay sa kalibotan, pilosopo, ug eksperto sa mga pinulongan, mitaho diha sa tudling sa usa ka mantalaan dili pa dugay nga gitul-id siya sa duha ka koresponsal. Ngano? Siya miingon nga ila “akong gitambagan nga dili ako angay moingong ‘Geova’ [Italyano alang sa “Jehova”] sa pagpaila sa Diyos sa Daang Tugon, apan ang ‘Iahveh’ o ‘Yahveh,’ tungod kay ang ‘Geova’ ginasulti lamang sa mga Saksi ni Jehova.” Ang iyang tubag? “Kini dili tinuod tungod kay ang mga diksiyonaryo nagapakita nga ang ‘Geova’ mao ang bag-ong pulong sa Italya alang sa Iahveh.”

Siyempre, husto si Propesor Eco. Makaikag, sa usa ka higayon ang ngalang Jehova hayan kaylap nga nahibaloan sa Italya, sanglit gigamit kini diha sa dekorasyon sa daghang mga simbahan didto. Ang usa ka pananglitan niana makita diha sa nagaubang hulagway. Maayong mahibaloan nga sa unang mga panahon ang ngalan sa Diyos gititik nga ‘Jeova’ inay ‘Geova’ sa mga simbahan sa Italya. Apan, karon, sumala sa mga komento sa mga koresponsal ni Propesor Eco, kon ang ordinaryong Italyano nahibalo sa ngalan Geova, tingali nadunggan niya kini gikan sa usa sa mga Saksi ni Jehova.