Matinabangong Mga Tighimog-salag

Ang lugar maoy matahom kaayong kopje (bungtod) sa lugot sa South Africa. Sa kalit, upat ka langgam, nga samag dagway, mibatog sa sanga sa duol nga kahoy, mipagawas ug matahom, tagning nga mga tingog. Dunay mahapsayng salag kanang maong sanga apan salag kadto nga wala mahuman nga hinimo gikan sa mga gilisgilis sa panit sa kahoy.

Ang usa sa mga langgam milukso diha sa salag, nagpahimutang, ug, nagpagawas ug katingalahang mga tingog, gipahiluna ang pirasong materyal. Pinaagi ang lawas ug sungo, mainampingong giporma niini ang salag, gilalik ang balayan sa lawa aron lig-ong mabugkos ang salag. Ang unang langgam milukso, gipasagdan ang ikaduha, ikatulo, ug ikaupat aron sa pagsobli sa katingalahang paagi. Dihang milupad sila, ang ilang mahayag nga balhibong itom ug puti ug ang maganoyong mga tingog nakadugang sa katahom sa talan-awon.

Sa milabay ang tulo ka minutos, mibalik sila nga may dalang materyal sa paghimog salag diha sa ilang mga sungo. Handurawa lang, upat kanila nagtukod sa mao ra nga salag! Unsang matanga sila sa langgam? Taliwala sa mga 900 ka espisye sa langgam sa habagatang Aprika, ang libro sa mga langgam nagpakita nga kini sila maoy mga white helmet shrikes. Mahitungod kanila, ang usa ka ensiklopedia nagsulat: “Makipundok kaayo sila ug motabang sa pagtukod ug mga salag ug sa pagpakaon sa mga kuyabog.”