Ang Pagsulti Mopataas sa Presyon sa Dugo

“ANG yanong lihok sa pagsulti—dili kinahanglan diha sa kasuko, o kahadlok, apan yanong pagsulti—daw mopaandar sa swits nga mopasaka sa presyon sa dugo,” mitaho ang magasing “Aviation Safety.” Kini naghisgot usab nga kadtong nag-antos gikan sa taas nga presyon sa dugo o nagatomar ug tambal sa pagkontrolar niini ang ilabinang maapektohan. Sa pagkatinuod, alang sa tanang mga tawo “ang pagtaas sa presyon moabot gikan sa 10 ngadto sa 50 porsiento.” Ug ang labing katingahalan mao nga “kining samang relasyon sa presyon sa dugo tinuod usab sa mga tawong bungol nga nagasulti pinaagi sa sinyas sa kamot.”

Kini nagkahulogan nga, sumala sa taho, bisan ang gamayng pagsulti samtang nagkuha ang doktor sa imong presyon sa dugo mohatag taas nga pagbasa. Tinuod, ang maong pagsulti “may katuyoan nga mahigalaon ug makarelaks,” apan kini sa ‘aktuwal nagapataas sa presyon sa dugo.’ Sa laing bahin, “ang mga pagtuon nagpakita nga ang pagpamati makatabang sa pagkunhod sa presyon sa dugo.” Sa dayag, ang tambag sa Diyos diha sa Proverbio 21:23 mohatag dili lamang napauswag nga relasyon kondili pisikal nga mga kaayohan usab.