Kitt Peak National Observatory

Nahimutang sa tumoy sa Quinlan Mountains, 90 ka kilometros sa habagatang-kasadpan sa Tucson, Arizona, mao ang labing dagkong optikal nga mga teleskopyo sa kalibotan. Ang mga astronomo moabot gikan sa tanang bahin sa kalibotan, hapit 7,000 nga makig-indig sa pribilehiyo sa pila ka gabii sa usa ka tuig sa pagtan-aw diha sa nagkalainlaing mga teleskopyo. Ang tanan magamit sa kuwalipikadong mga siyentipiko, apan sa limitadong panahon. Ang pagpili himoon binase sa siyentipikanhong merito sa gidukiduking mga proyektong gilaraw.

Dunay 22 ka teleskopyo diha sa 2,100 ka metros nga Kitt Peak—14 maoy nasodnong obserbatoryo, 8 gigamit sa mga unibersidad o ubang mga grupo. Dunay upat ka matang sa mga teleskopyo: optikal, radyo, infrared, ug ang labing dakong solar nga teleskopyo sa kalibotan.

Ang adlaw mao ang hari sa Arizona sa daghang mga bulan nga daw walay hunong, apan sa ting-init nga hapon ug sa gabii diha sa Kitt Peak, kini sa kalit lamang mawad-an sa iyang trono. Maitom nga mga panganod motabon sa tumoy sa bukid. Nagbiyo, nagbukal, ang baga kaayong panganod mobukal paitaas nga trese ka kilometros o kapin pa. Ang kidlat mosiak sa langit, ang dalogdog mosip-ak samag higanteng latigo, mobunok ang ulan nga mopabaha ug kusog. Tinghabagat na diha sa Kitt Peak. Ang magilakong pasundayag maoy mopuli sa panganod, ug sa ulahi tabonan niini ang talan-awon gikan sa mga teleskopyo.

[Tinubdan sa Letrato sa panid 31]

G. Ladd