Pagpaniid sa Kalibotan
Dili Subay sa Naandang Batasan
Usa ka pari sa Gregong Ortodokso gidakop sa miaging tinghunlak sa operasyon sa pederal nga kagamhanan sa U.S. maylabot sa paghatag hiphip ngadto sa mga ahente sa Internal Revenue nga mitotal ug $500,000, “baylo sa pagkuha sa $2.1 milyones nga buhis sa kinitaan, sa buhis nga kuhaon daan gikan sa mga transaksiyon, sa payroll, buhis sa kita sa korporasyon ug sa buhis sa pagkawalay-trabaho nga utang [niya] ug sa 30 pang uban,” mitaho ang Tax Analysts sa Arlington, Virginia. Bisan pag misugot sa sinugdan ang pari nga motabang sa imbestigasyon sa gobyerno, gisentensiyahan siya sa Huwes sa Distrito sa U.S. si Judge Richard Owen “dihadiha sa pagkabilanggo human nga iyang nahibaloan . . . nga milapas ang pari sa iyang kasabotan sa gobyerno tungod sa paglimod sa tanang kuwarta nga iyang nakita,” nagkanayon ang Tax Analysts. Sumala sa taho, gihiphipan sa pari ang usa ka sekreta “diha sa sangtuwaryo sa St. Gerasimos Greek Orthodox Church” sa New York nga nagsul-ob sa iyang abito.
Bag-ong Impormasyon Bahin sa AIDS
Gibanabana karong adlawa sa mga tigdukiduki nga “hapit usa sa matag 5000 ka tawong nakaagig dako nga operasyon sa U.S. matakdan sa virus sa AIDS gikan sa hugawng dugo nga dili makita diha sa pagtuki,” mitaho ang New York Post. Ang kapeligrohan, hinunoa, modako diha sa mga dapit sama sa New York nga diin komun kaayo ang AIDS. Diha sa maong mga kaso, “usa gikan sa 500 ka tawo nga nagkinahanglag daghang hinatag nga dugo,” matud pa sa Post, may kapeligrohang matakdan sa virus sa AIDS. Ang rason, sumala sa tigdukiduki si Dr. Allan Salzberg, mao ang pagkawalay katakos sa bag-ong mga pag-usisa sa pagkakita sa tanang nahugawang dugo sa panahon sa pagtuki. Ang mga antibody sa virus dili makita diha sa dugo sulod sa daghang mga semana human nga matakdan ang tawo, ug ang natakdang mga tawo tingalig mohatag dugo sa maong panahon.
”Walay-aso” nga mga Paanunsiyo sa Tabako
Sulod sa daghan nang katuigan karon, ang kadaghanang mga anunsiyo sa magasin ug mantalaan nga nagadasig sa pagtabako nagpakita nga walay makitang aso gikan nagsigang tabako. Sumala sa mantalaang The Sydney Morning Herald sa Australia, nakita kini sa batok sa panabako nga mga grupo ingong tinuyong kaso sa malalangong paanunsiyo sanglit ang pagkakita ug makitang aso karon dunay negatibong epekto. Bisan tuod gisalikway ingong “batok sa panabako nga propaganda” sa mga hawas sa kompaniya sa tabako, ang pinatik nga mga paanunsiyo sa dayag nagpakita nga nagapalabi sa “mahimsog” walay-asong larawan sa usa ka sigarilyo nga nagbitay gikan sa mga ngabil sa maskuladong magkakabayo o giipit sa mga tudlo sa matahom nga batan-ong mga magtiayong nag-usa alang sa pamahaw sa Dominggo.
Mga Ministrong Homoseksuwal
Sa miaging Agosto, human sa mga bulan sa debate, ang mga lider sa United Church of Canada mibotar ug 205 ngadto sa 160 nga pabor sa pag-ordinar sa mga homoseksuwal alang sa ministeryo. Sumala sa Daily News sa New York, “ikaupat ka bahin lamang sa 4,000 ka ministro sa iglesya ug 30,000 sa 860,000 ka membro ang mipirma sa usa ka deklarasyon nga nagabatok sa pag-ordinar sa mga homoseksuwal.” Ang Church of Canada ginaingon nga mao ang “labing dakong Protestanteng denominasyon sa Canada.”
Mga Aborsiyon sa mga Dula
Tungod sa ilang tinguha alang sa mas maayong pisikal nga kahimoan sa panahon sa bangga, ang mga babayeng magdudula sa pila ka nasod tuyong nagpamabdos ug unya magpaaborsiyon, mitaho ang Sunday Mirror, usa ka mantalaan sa Britanya. Sumala sa mantalaan, ang maong mga aksiyon gibase diha sa diskoberiya nga sa panahon sa unang mga bulan sa pagsabak, mas mokusgan ang maskulo sa babaye. Ang taho nag-ingon nga ang mga babayeng magdudula ginadasig gani sa ubang mga opisyal sa dula nga magpamabdos pinaagi sa artipisyal nga inseminasyon. Si Dr. Risto Erkola, usa ka eksperto sa Finland maylabot sa medisina sa mga dula, miingon nga ang “pagpamabdos nahimong piniling paagi aron makabentaha sa mga kaparang,” mitaho ang Mirror.
Nangawalang Kaliwatan
Ang mga Amerikano taliwala sa panuigong 18 ug 24 nangawala, sa geograpikanhong pagkasulti. Sa dihang gipangutana sa pag-ila sa sa geograpikanhong mga lokasyon diha sa bag-ong Gallup surbi nga gihimo diha sa siyam ka industriyalisadong mga nasod, sila ang nangiwit. Ang surbi, nga giisponsor sa National Geographic Society, mibutyag nga usa gikan sa lima ka Amerikano sulod sa maong pangedaron “wala makakita sa U.S. diha sa mapa sa kalibotan,” mitaho ang U.S.New & World Report. Taliwala niadtong gisurbi, usa gikan sa upat wala makakita sa Pacific Ocean, usa gikan sa lima wala makangalan bisag usa ka nasod sa Uropa, ug usa gikan sa duha wala makakita sa Estado sa New York diha sa mapa.
Papahawaa ang Pastor!
Unsay mahimo sa wala-matagbawng mga membro sa parokya sa ilang bikaryo? Usa ka protestanteng binulang basahong gikan sa West Berlin nagsugyot sa pagpapahawa gikan sa katungdanan ang klero pinaagig botasyon, mitaho ang Nassauer Tageblatt, usa ka mantalaang Aleman. “Ang parokya kinahanglan makapapahawa sa usa ka walay-katakos nga pastor kansang mga pagtulon-an bakak,” miingon ang artikulo. Kining sugyota, kon sundon, makaapekto sa duolan sa 12,600 ka klero nga nag-alagad sa 10,600 ka parokya sa Lutheran Church sa Alemanya.
Pasidaan sa Paak
Natingala ka ba nganong ang pagpigsat sa nagaatakeng lampinig mopagawas ug panon sa kaubang mga lampinig nga moduyog sa pag-atake? Sumala sa entomologong si Peter Landolt, ang pagpigsat sa lampinig makabuslot sa sudlanan sa lala niini ug mopagawas ug alarmang pheromone diha sa hangin, nga mopaalerto sa ubang mga lampinig sa pagduol aron sa pagtabang, mitaho ang Science Digest. Aron sa pagsuportar sa ilang mga nakaplagan, si Landolt ug ang kemistang si Robert Heath misulay ug sintitikong alarmang pheromone duol sa salag sa mga lampinig sa Florida. Mitaho si Landolt nga duolan sa 500 ka nagaatakeng mga insekto “migula sa salag ug misugod sa pagpamaak.” Mitambag si Landolt sa dili pagpigsat sa lampinig.
Nagapangitag Uso nga Satelayt
Sukad sa 1974 ang sistema sa satelayt nga Argos sa Pransya nakatabang, lakip sa ubang mga butang, sa pagpangita sa mga nabigador nga anaa sa katalagman ug sa pagbantay sa mga bolkano ug sa mga iceberg. Karong adlawa ang sistema nakadawat ug tagsaong buluhaton sa pagpangita sa mga uso sa U.S. “Upat ka uso sa habagatan sa [Glacier National] nga parke karon nagsul-ob ug linaing kolyar nga radyo, ang mga frequency ginabantay matag 101 ka minutos sa dihang moagi sa ibabaw ang satelayt nga Argos sa Pransiya,” mitaho ang International Herald Tribune. “Ang estasyon sa yuta diha sa Pransiya makakita sa nahimutangan sa mga uso gikan sa impormasyon sa satelayt ug ipasa kini sa Montana.” Ang satelayt makamatikod gani sa mga lihok sa ulo sa uso, nga mopaila kon natulog o patay ba ang hayop.
Nangawalang mga Bata
Ang pagpangitag nangawalang mga bata malisod tungod sa kamatuoran nga sa magkadako sila, mousab ang ilang panagway. Sa molabay ang pila ka tuig, ang daang mga letrato dili na magkaamgid sa presenteng dagway sa bata. Karong adlawa, hinunoa, ang mga siyentipiko sa University of Illinois nakahimog usa ka programa sa kompiyoter nga sulod sa napulo ka minutos makapatunghag presenteng hulagway pinasukad sa 48 ka nailhang mga porma sa nawong. Ang mga tawo matigulang sumala sa natino nang daang mga kinaiyahan sa genes. Busa, pinaagi sa pagpasulod ngadto sa kompiyoter sa sekso, edad, ug rasa sa bata, lakip sa impormasyon sa nabatonang letrato, usa ka tukmang kaamgiran ang matino, walay labot sa estilo sa buhok, mitaho ang Sunday Times sa London.
Gigamang De-Kalidad
Usa ka tiggamag trompa sa Japan nakahimog sistema alang sa pagpatokar ug musika aron sa pagdasig sa pagtubo sa mga tanom diha sa usa ka hothouse. Misaysay ang usa ka teknisyan nga ang musika makapukaw sa mga tanom sa pagbuka sa ilang stomata, usa ka gamayng mga lungag sa dahon nga makatugot sa tanom sa pagginhawa. Apan, dili kay bisan unsa lang klaseha sa musika, ang mahimo. Mikutlo sa usa ka tanom sa India nga malaya kon iladlad sa walay hunong nga mga tingog sa tambol, ang mantalaan sa Japan nga Mainichi Shimbun mitaho nga ang mga tanom gituohang maapektohan sa kusog nga kumpas sa musika, ilabina sa rock ‘n’ roll. “Ang musika kinahanglan klasikal lamang,” nagkanayon ang usa ka uma sa Osaka nga nagagamit ug musika aron sa pagpadali sa pagtubo. Labing menos ang ilang mga melon ug mga kamates de-kalidad mamili—Mozart, Bach, ug Vivaldi nga maoy ilang mga paborito.