Gikan sa Among mga Magbabasa

Mga Pit Bull

Nakita nako ang inyong mga magasin nga maayong pagkadukiduki, busa natingala ako sa pagkaalinggat ug mga sayop diha sa “Kon Nganong ang Pipila Maisog ug ang Uban Buotan” (Marso 22, 1988). Ang irong gitawag Pete diha sa Our Gang dili usa ka pit bull kondili usa ka American bulldog. Walay mga pit bull nga puti nga may “itom ug mga mata”; ang iro nga gilarawan diha sa panid 26 dili usa ka Akita; walay agresibong mga iro, agresibong mga tag-iya lamang. Kon “mabuang” ang iro, ang tag-iya ang sad-an.

D. H., Federal Republic of Germany

Ang tuboran (“Sports Illustrated”) miingon nga ang itom nga sirkulo sa pit bull nga Pete “maoy trabaho sa usa ka tig-mek-ap.” Kami magpabilin sa among identipikasyon sa usa ka Akita diha sa grupo nga hulagway. Ang komento sa magbabasa sa ubos dunay kalabotan sa imong ubang punto.—ED.

Ingong maayong palabay sa panahon, nagabansay akog mga pit bull, ug ako nahibalo gikan sa akong eksperyensiya sa daghang mga tuig nga dunay pila ka pit bull nga lisod atimanon, ug sa pila ka kaso sila “peligroso.” Apan dili kini ang pangunang kinaiya niining mga iroa—ang kinaiya sa iro “maumol” sa tag-iya. Uyon ako sa artikulo 100 porsiento. Apan, ang uban nga nakabasa niini miingon nga gipasiugda sa artikulo nga ang mga pit bull “kinaiyanhong pumapatay” ug “kriminal sukad pa sa pagkapanganak” nga walay eksipsiyon. Buot ko uban sa dakong pagtahod nga inyong ipatin-aw kining puntoha, sanglit daghan ang naghingapin bahin niining liwata human nakabasa sa artikulo.

D.Q.H., Costa Rica

Inyong gipresentar ang materyal sa usa ka paagi nga makatabang sa mga tawo sa pagsabot sa bili sa temperamento sa tanang mga iro, dugang pa sa dakong bahin nga gidula sa tag-iya niini. Ingong mga tag-iya sa irong pit bull, among nakita nga uban sa hustong pagbansay, ang pit bull mahimong usa sa labing hiligugmaong mga binuhi. Apan sa akong hunahuna walay bisan kinsa nga dunay irong binuhi ang makaingon, “Siya dili mamaak,” kay ang mga hayop maoy mga hayop. Dili nato matag-an ang ilang batasan.

C. S., Tinipong Bansa

Tungod sa daghang mga pasiugda sa mga basahon bahin sa mga pit bull, maayo tinuod nga makabasag timbang nga artikulo nga nagpakita nga ang dakong suliran maoy sa abusong mga tag-iya (ang uban sa aktuwal nagapakaon sa ilang mga iro ug pulbura ug/o mga kiniskis gikan sa asiro) ug walay pugong nga pagpaliwat, kay bisan hain niini mopahinabog kadili-timbang sa bisan unsang matang sa iro.

S. S., Tinipong Bansa

Paglayas

“Ang Paglayas Mao ba ang Sulbad?” (Marso 22, 1988) naghisgot bahin sa 14-anyos nga batang babaye nga mikagiw tungod kay wala siyay suod nga relasyon sa iyang mga ginikanan ug mibati nga siya dili makaarang sa pagpakigsulti kanila. Iyang gibati nga walay usa ang nakasabot kaniya. Ako 14 anyos, ug dili pa dugay nakaagi ako sa samang kasinatian kang Amy diha sa artikulo. Mikagiw ako ug miadto sa akong mga higala sa samang mga hinungdan. Ang kalainan lamang sa among mga sugilanon mao nga wala ako makigsekso o mangilabot sa mga droga. Sa gabii nga milayas ako, miabot ang akong mga ginikanan ug gikuha ako. Miadto kami sa mga ansiano sa kongregasyon ug nagsultihay. Maarang-arang na ang among relasyon karon, ug nahibalo ako karon nga anaa ang akong mga ginikanan alang kanako. Nahibalo ako nga sila makasabot sa bisan unsa nga akong isulti kanila. Kon nabasa pa lang unta nako kining artikuloha sa sayo pa, wala unta ako makalayas.

A. B., Tinipong Bansa