Pagsulbad sa Suliran sa Kabus
ANG ubang relihiyosong mga lider maayo kaayong mopahayag bahin sa mga suliran karong adlawa nga sa ingon motuo ang mga tawo nga sila nasayod gayod kon unsaon sa pag-uswag sa mga butang. Apan, kon ang mga politiko ug mga ekonomista wala man gani makasulbad sa mga suliran, makasulbad ba ang relihiyosong mga lider pinaagi sa pagsuportar sa rebolusyonaryong mga elemento?
Depensahan sa mga lider sa iglesya ang ilang nasukong espiritu, apan dili ang tanan kombinsido sa ilang pagkasinsero. Si Edmund Burke misulat: “Sayop sa katibuk-an ang paghunahuna nga ang pinakareklamador mao ang labing mabalak-on sa kaayohan sa publiko.” Posible ba nga ang mga lider sa iglesya napalihok sa mga kabalaka gawas sa yanong kadasig alang sa hustisya?
Ang magasing Veja sa Brazil miingon: “Sa pagkatinuod, ang ginatinguha sa Iglesya mao ang gahom . . . Ang kamatuoran nga ang labing adunahan sa kalibotan anaa lamang sa Protestante, Buddhista, ug bisan ateyistikong mga nasod nakapugos sa Iglesya sa pagsulay sa pagbalik sa gahom diha sa mga kamot sa kabus sa Ikatulong Kalibotan.”
Bisan tugotan pa nga ang indibiduwal nga mga klero dili mangitag bisan unsang personal nga bentaha, ang kabus ba tinuod nga makapahimulos pinaagi sa pagsuportar sa kalihokan sa kagawasan nga nagadusog sosyal nga aktibismo? Mao ba kana ang paagi sa pagsulbad sa suliran sa kabus?
Ang Sumbanan nga Gihatag Alang sa Matuod nga mga Kristohanon
Unsang pananglitan ang gihatag ni Jesu-Kristo, ang usa nga obligado ang tanang mga Kristohanon sa pagsunod? Samtang dinhi pa sa yuta, siya wala moapil sa sosyal nga mga reporma, ni misimang siya gikan sa gisugo kaniya sa pagsulti sa uban bahin sa Gingharian sa Diyos. (Lucas 4:43; Juan 6:15) Bisan si Papa Paulo II, sa dihang naghisgot ug sosyal nga aktibismo, miingon: “Ang mga Ebanghelyo klarong nagpakita nga alang kang Jesus, ang bisan unsang butang nga makabag-o sa iyang misyon ingong Alagad ni Yahweh [Jehova] maoy usa ka pagsulay.”
Wala kini magkahulogan nga si Jesus wala makakita sa mga panginahanglan sa kabus. Siya nakakita. “Siya naluoy kanila,” nag-ingon ang Bibliya, “tungod kay sila gipanitan [o gihasi] ug nagkatibulaag sama sa mga karnero nga walay magbalantay.” (Mateo 9:36) Ug iyang gidapit kadtong nagasunod kaniya: “Umari kamo, kamong tanan nga nabudlayan ug nabug-atan, ug papahulayon ko kamo.”—Mateo 11:28.
Ang propesiya sa Bibliya nagbatbat sa pagmando sa Gingharian ni Kristo: “Kay siya magaluwas sa kabus nga nagapangayog tabang, sa sinakit usab ug kang bisan kinsa nga walay magtatabang. Siya maluoy sa timawa ug kabus, ug pagaluwason niya ang mga kalag sa kabus. Gikan sa pagdaogdaog ug sa kapintasan iyang lukaton ang ilang kalag, ug hamili ang ilang dugo sa iyang mga mata.”—Salmo 72:12-14.
Busa kadtong nagasundog kang Jesus kinahanglan dunay dakong kaluoy alang sa kabus ug kinahanglan maningkamot sa pagtabang kanila. Apan sa unsang paagi? Sanglit gidawat ni Jesus nga ang presenteng kalibotan ilalom man sa pagmando ni Satanas nga Yawa, siya wala mosulay sa pagrepormar niini. (Lucas 4:5-8; Juan 12:31; 14:30; 18:36) Apan iyang gitabangan ang kabus pinaagi sa pagtagana kanilag instruksiyon nga makatabang kanila sa pagsagubang sa mga suliran sa kinabuhi.
Gitudloan ni Jesus ang iyang mga disipulo nga magmakalakihon, busa nagasunod kaniya ug sa iyang Amahan. “Ang akong Amahan nagapadayon sa pagbuhat bisan pa hangtod karon, ug ako nagabuhat sa ingon man,” siya miingon. (Juan 5:17) Lain pa, ang mga sumusunod ni Kristo gisugo kon unsaon sa pag-atiman sa ilang kaugalingon ug sa ilang mga pamilya ug pinaagi sa pagkahimong maligdong, matinud-anon, ug makugihon. (Filipos 4:4-8; 1 Tesalonica 4:11, 12) Apan kini maoy sa pagpangandam lamang alang sa usa ka labi pang maayong butang: ang katumanan sa mga panalangin sa Gingharian sa Diyos.
Ang Gingharian sa Diyos Mao Lamang ang Sulbad
Sa pagkatinuod, gipasiugda ni Jesus ang Gingharian sa Diyos nga mao lamang ang realistikanhon ug malungtarong sulbad sa suliran sa kabus ug sa tanan. Unsay imong mga hunahuna bahin niini? Nganong ang mga tiglaban sa teolohiya sa kagawasan wala may gipamulong bahin sa Gingharian sa Diyos?
Ang kamatuoran mao, sila nawad-an ug pagtuo sa mga saad sa Bibliya bahin sa Gingharian sa Diyos. Apan, sa dihang gitudloan ni Jesus ang iyang mga tinun-an sa pag-ampo alang sa ‘gingharian sa Diyos nga moabot ug nga matuman ang iyang kabubut-on sa yuta maingon man sa langit,’ siya wala mohatag ug usa ka hinanduraw nga paglaom. Kanang maong pag-ampo tubagon. Ang Gingharian sa Diyos maoy usa ka tinuod nga kagamhanan. Ikaw makatino nga dili gayod limbongan ni Kristo ang iyang debotadong mga sumusunod pinaagi sa pagtudlo kanila sa pag-ampo sa butang nga dili gayod matuman.—Mateo 6:9, 10.
Si apostol Pedro gipaboran sa pagtan-aw daan nianang langitnong kagamhanan. Nahitabo kini sa dihang mipakita si Jesus atubangan ni Pedro ug sa duha pa ka apostoles diha sa usa ka hataas nga bukid. Busa, sa milabay ang daghang tuig si Pedro misulat: “Wala, kami wala magsubayg mga sugilanong bakak nga kami nakasinati kaninyo sa gahom ug sa presensiya sa atong Ginoong Jesu-Kristo, hinunoa kami mga saksi nga nakakita sa iyang pagkahalangdon.”—2 Pedro 1:16-18.
Diha sa panan-awon, si Pedro aktuwal nga nakakita kang Kristo nga nagmando niana nga Gingharian sa Diyos! “Busa,” si Pedro mipadayon, “among nabatonan ang matagnaong pulong [bahin sa Gingharian, sama sa mga propetang si Isaias ug Daniel] nga labi pa nga nahimatud-an.” (2 Pedro 1:19) Ang propetang Daniel, pananglit, mirekord ug usa ka panan-awon sa pagkaentrono ni Kristo ingong Hari sa dihang Siya “gihatagan ug kagahom ug kadungganan ug gingharian.” Si Daniel mipadayon sa pag-ingon: “Ang iyang pagmando maoy walay kataposang pagmando nga dili umalagi, ug ang iyang gingharian dili gayod malaglag.”—Daniel 7:13, 14.
Unsay giingon “sa matagnaong pulong” nga mahitabo sa presenteng mga kagamhanan sa mga tawo sa dihang ang Gingharian sa Diyos moabot sa pagtubag sa mga pag-ampo sa mga sumusunod ni Kristo? Pamatia ang dinasig nga panagna sa Daniel 2:44: “Ug sa mga adlaw niadtong mga haria [ang mga kagamhanan nga naglungtad karong adlawa] ang Diyos sa langit magatukod ug gingharian nga dili gayod malumpag [ang Gingharian nga maoy gitudlo ni Kristo sa iyang mga tinun-an nga maoy igaampo]. Ug ang gingharian dili mahibilin sa laing katawhan. Kini magadugmok ug magaut-ot niining tanang mga gingharian [presente tawhanong mga kagamhanan], ug kini molungtad sa walay kataposan.”
Sa pagkatinuod, kining Gingharian sa Diyos mao lamang ang bugtong paglaom sa katawhan sa pagsulbad sa suliran sa kabus! Ang kamatuoran mao, ang mga tawo walay-katakos sa tukmang pagmando sa iyang isigkatawo. Ang kasaysayan nagpakita nga ang “tawo nagamando sa tawo sa iyang kadaot,” bisan unsa pang matanga sa tawhanong kagamhanan ang gisulayan. Sumala sa gipadayag sa Pulong sa Diyos sa dugay nang panahon, kini sa yano dili iya sa tawo sa pagmando sa iyang kaugalingon nga bulag sa Diyos.—Ecclesiastes 8:9; Jeremias 10:23.
Sa laing bahin, ikaw makasalig nga ang dagayang mga panalangin nga gibatbat sa “matagnaong pulong” ni Isaias matuman, nga mao: “Sila magatukod ug mga balay ug magapuyo niini; ug sila magatanom ug mga kaparrasan ug magakaon sa ilang bunga. Sila dili magatukod ug lain ang magapuyo; sila dili magatanom ug lain ang magakaon. . . . Sila dili magabuhat nga walay kapuslanan, ni manganak sila alang sa kagul-anan; kay sila mao ang kaliwatan nga gipanalanginan ni Jehova, ug ang kaliwatan magauban kanila. Ug mahinabo nga sa dili pa sila mosangpit ako magatubag na; ug samtang sila magasulti pa, ako mamati kanila.”—Isaias 65:21-24.
Si Jehova nga Diyos dili mogamit ug bisan unsang tawhanong mga paningkamot o mga kalihokan, lakip sa teolohiya sa kagawasan, sa pagpatungha niini nga mga panalangin. Hinunoa, ang iyang langitnong gingharian maoy mopuli ug mopahiusa sa tanang masinundanong katawhan, nga mosangpot ug pagkamatarong ug kauswagan. Busa, ibutang sa hunahuna ang Gingharian sa Diyos. Unaha kini sa imong kinabuhi. Oo, “labing maayo ang pagdangop kang Jehova kay sa pagsalig diha sa tawo.”—Salmo 118:8; Mateo 6:33.
[Letrato sa panid 7]
Ang Gingharian sa Diyos maoy mosulbad sa mga suliran sa kabus