Ang Puthawng Dalaga Gipatahom

Sinulat sa koresponsal sa Pagmata! sa Pransiya

SIYA tigulang na apan walay mga kunot. Siya maayong pagkagalam. Matag pito ka tuig siya patahomon. Ug karong bag-o siya gipadiyeta mao nga nabatabata siyag diyutay. Gikinahanglan gayod niya kana.

Sukad sa iyang pagkatawo sa 1889, ang Torreng Eiffel, nga mapanggaon nga nailhang Puthawng Dalaga, nakaagig daghang kaalaotan. Ang kongkretong mga salog gibubo nga nakapabug-at sa unang andana, ug ang maot nga mga tindahan ug mga puwesto gitukod diha sa lainlaing mga andana niini. Ang mga sagbayan misugod sa pagbawog tungod sa kabug-at. Kinahanglan usab nga tangtangon ang tubo sa gas nga misaka paingon sa mga restawran sa una ug sa ikaduhang andana. Wala na kana makakab-ot sa mga sukdanan sa pagkaluwas karong adlawa.

Sa sinugdanan sa mga tuig 1980, ang siyudad sa Paris mihatag sa pagtugot alang sa kinahanglanong trabaho sa pagremodel. Ang tumong mao nga ihatag balik ang kinabuhi ug dungog sa tigulang nang Puthawng Dalaga ug masayon ang pagdawat sa minilyong bisita nga moanha aron mosud-ong kaniya kada tuig.a Ang pagtangtang sa nagdependeng mga estruktura nakaabag sa iyang “pagkaniwang”—sa kapig usa ka libong tonelada. Bisan pa niana, ang pagremodel nagtugot nga madugang ang bag-ong mga tindahan, modernong lawak-komperensiya, usa ka musiyo sa video nga nagsubay sa iyang kasaysayan, usa ka opisina sa koreyo, ug mga restawran nga angayan sa dapit ug nagpakaon sa lainlaing klase sa mga suki.

Ang karaang hydraulic elebetor tali sa ikaduha ug ikatulong mga andana (nga nagadala sa mga turista gikan sa tungatunga sa torre hangtod sa ibabaw) gitangtang. Sa tugnaw kaayong panahon, kinahanglang ihunong niadto ang paggamit niana. Busa, ang mga turistang nanuaw sa Paris sa tingtugnaw kadaghanan nahiubos tungod kay dili na makaabot saylo sa ikaduhang andana. Karon, ang upat ka tuling dekoryenteng elebetor makabalikbalik ubos sa tanang klima. Kini nakapakunhod ug dako sa mga linya sa mga tawong nagpaabot nga moadto sa ibabaw.

Nagmahay ang pila ka tawo nga sa bag-ong pagremodel siya nawad-an sa iyang naglukot nga hagdan nga nagkonektar sa ikaduha ug ikatulong mga andana. Apan siya gihatagag bag-ong mga suga. Ang ginatos ka hanas pagkapahimutang nga mga replektor nagpausbaw sa nindot niyang gambalay ug nagatugot nga siya magpasundayag sa bug-os niyang katahom sa magabii.

Ang Puthawng Dalaga usa ka gatos ka tuig na karong tuiga. Bisan pag siya gilantugian pag-ayo sa iyang pagkatawo, walay mausa ang gustong siya mahanaw gikan sa kahanginan sa Paris. Siya mao gihapon ang bantog niyang simbolo sa tibuok kalibotan.

[Mga footnote]

[Mga Letrato sa panid 10, 11]

Mapahimuslan sa mga turista ang pag-aninaw sa Paris gikan sa Torreng Eiffel