Gikan sa Among mga Magbabasa

Mga Batang Ahat Ako dunay anak nga babaye, nga karon anaa na sa iyang ikatulong ang-ang sa hayskol. Akong namatikdan sa mga tuig nga nanglabay nga ang iyang katakos sa pagbasa ug ang iyang katakos sa pagpamati kulang. Sa pagsulay sa pagdasig kaniya, nakasulti ako ug mga pulong nga tingali mapintas nga pamation sa iyang mga dalunggan. Apan, sa dihang nabasa nako ang inyong mga artikulo, napahinumdoman ako nga ang akong anak maoy usa usab ka batang ahat. (“Natawong Sayo, Natawong Gamay,” Pebrero 22, 1989) Ang inyong artikulo nakatabang nako sa pagkaamgong angay nakong tagdon ang iyang kahimtang dihang makiglabot niya.

A. I., Japan

Salamat kaayo ninyo sa inyong tandogonon ug timbang nga paagi. Ang inyong mga artikulo nakapatulo sa akong mga luha. Ilabinang giapresyar nako ang inyong pagdawat nga kining gagmayng mga tawo sa pagkamatuod dunay mga pagbati ug nga ang mahigugmaong pag-atiman sa inahan ug pamilya makaamot ug dako sa ilang kaayohan.

J. J., Tinipong Bansa

Mga Kabog Giapresyar nako ang inyong artikulo bahin sa mga kabog. (Enero 22, 1989) Akong gipalabay ang pagbasa niana tungod kay ang paghunahuna nila makapalimbawot na nako. Karon human nakabasa sa artikulo, ako nakaapresyar na kanila. Diha sa mga hulagway, daw sila malumo, inosenteng mga hayop. Nakita na nako nga kahimut-anan ang ilang gagmayng mga nawong. Ang kalalangan ni Jehova tinuod gayod nga matahom.

C. S., Tinipong Bansa

Nawala sa Kapig 20 Anyos Ang eksperyensiya ni Tiyo Jimmy nakadasig kaayo nako. (Disyembre 8, 1988) Ako dunay leukemia, apan nakalihok pa akog maayo. May mga panahong maguol ako ug moagi sa akong ‘kaluoy nako’ nga mga yugto. Apan, karon, makapalandong ako sa pagtuo ni Tiyo Jimmy nga nag-agak niya sa iyang malisod ug masulayong mga yugto. Dili gayod nako siya kalimtan.

J. B., Tinipong Bansa

Ang akong otso-anyos nga anak nga babaye natandog kaayo sa eksperyensiya ni Tiyo Jimmy nga tungod niana siya milingkod ug misulat kaniya. (Sa pagkatinuod, kon matuman pa ang iyang gusto, makasakay unta kami sa awto ug momaneho tabok sa Tinipong Bansa sa pagduaw niya.) Siya misulat niya: “Makadasig gayod ang pagbasa nga sa dihang nagapanlimbasog ang mga tawo sa pagpahunong nimo sa pag-alagad kang Jehova, ikaw nagpadayon gihapon. Ako otso anyos, ug ako nanghinaot nga ako makapabiling malig-on sama kanimo sa [Kristohanong pagtuo].”

J. R., Canada

Kamingaw Usa ka kauban nako sa tunghaan miingon: “Ang mga babaye sa akong klase kulag-pagbati, ug walay gustong makighigala nako.” Sa pagkasunod adlaw gidalhan nako siya sa artikulong “Unsaon Ko Paghanaw ang Akong Kamingaw?” sa Agosto 8, 1987, nga gula sa Pagmata! Wala gayod ako maglaom nga basahon kini niining babayehana. Apan sa pagkasunod adlaw iya akong gisultihan: “Gibasa nako kana sa pag-abot dayon nako sa balay. Duna pa bay lain niana?” Gihatagan nako siyag laing mga artikulo sa “Mga Batan-ong Nangutana . . .” nga akong gihunahunang makaikag niya. Sa milabay ang pila ka adlaw, siya malipayong miingon: “Nakakita na akog mga higala sama gayod nianang gihubit diha nianang magasina!” Ingong resulta, kami karon nagtuon na sa Bibliya.

M. S., Japan

Samag-Seksong Kaibog Ako 17 anyos nga dalaga, ug dugay nang panahong ginapangutana nako ang akong kaugalingon, ‘May deperensiya ba ako?’ Nahupayan kaayo ako dihang nabasa ang inyong artikulo sa “Mga Batan-on Nangutana . . .” niana mismong ulohana. (Abril 8, 1989) Kahupayan usab ang pagkasayod nga dunay uban nga nakaeksperyensiya sa samang pagbati nako, ug nga moabot ra ang adlaw nga kini mahanaw ra sa pagdagan sa panahon. Salamat kaayo kaninyo!

M. R., Tinipong Bansa