Gikan sa Among mga Magbabasa

Espesyal nga mga Panginahanglan Salamat sa artikulo bahin sa pagtabang niadtong may espesyal nga mga panginahanglan. (Agosto 22, 1989) Ako dunay grabeng sakit nga makapabakol nga nagaapektar sa akong kaunoran, mga lutahan, ug mga organo. Ingong resulta, ako may daghang operasyon ug kinahanglang mogamit sa wheelchairs, walkers, mga sungkod, ug braces nga lainlain ug matang. Kay 25 anyos pa lang, ako makabatog daghang komento, nga direkta ug dili-direkta, nga makapasilo. Bisan pag ang pila ka tawo yanong mausisaon, ang uban bastos ug dili-mahunahunaon. Ang maong artikulo nagatabang dili lamang sa mga baldado apan niadtong nabulahan usab sa maayong panglawas; sila makatuon nga mahimong mas masinabtanon.

D. H., Tinipong Bansa

Tabi Mga usa ka tuig nga miagi, ako nabiktima sa makadaot nga tabi. Ako nasilo ug nasakit sa sinugdan, apan nasubay sa akong amahan ug nako ang tabi ug napahunong kadto niadtong adlawa mismo. Ang artikulo (Hulyo 22, 1989) nakatabang nako sa paghikalimot niining mangil-ad nga bakak.

P. M., Tinipong Bansa

Ako 17 anyos, ug ang pila ka tawo nagtabi bahin kanako. Usa ka gabii akong nakita ang usa kanila, ug wala ako masayod kon unsay buhaton. Sa pagkauli nako, akong nakita ang artikulo bahin sa tabi. Nagpasalamat ako kang Jehova gikan sa kasingkasing sa pagtubag sa akong mga pag-ampo. Nakatuon ako kon unsaon sa pag-atubang sa maong mga tawo ug nakasabot nga dili angay nga isipon ko ang akong kaugalingon nga seryoso kaayo. Kon buot sabton, ako dili kaayo importante nga sila maghisgot kanako sa nahibilin kong kinabuhi, ug labi pang hinungdanon, ang akong tinuod nga mga higala ug si Jehova nasayod nga ang ilang ginasabwag dili tinuod. Salamat tungod sa pagkaamgo sa mga panginahanglan sa mga batan-on!

L. U., Brazil

Bionics sa Iho Gibasa kong maikagon ang artikulo mahitungod sa artipisyal nga panit sa iho. (“Pagpaniid sa Kalibotan,” Agosto 8, 1989) Ako nagtrabaho sa usa ka kompaniya nga nagtrabaho sa mao mismong proyekto sa daghang katuigan. Ang mga artikulo sa Pagmata! nga sama niini nga nagahisgot sa katingalahang mga desinyo sa kalalangan nga makaplagan sa kinaiyahan naghatag nakog daghang higayon sa pagpakigsulti sa uban mahitungod sa atong Maglalalang.

M. H., Tinipong Bansa

Pagpamalikas Karong bag-o ako misulat kaninyo sa usa ka sulat bahin sa suliran sa pagpamalikas sa mga batan-on. Sa dako kong katingala, karong adlawa lamang nadawat nako ang Agosto 22, 1989, nga isyu nga may artikulong “Unsay Daotan sa Pagpamalikas nga Panagsa?” Ako nasayod nga kining artikuloha giandam dugay na sa wala pa ako mosulat, ug makapadasig ug makapalig-on-sa-pagtuo ang pagkasinati sa personal nga ang akong pag-ampo alang sa tabang natubag pinaagi sa inyong mga basahon.

J. A., Tinipong Bansa

Luwas nga Pagkaon Ako nagaalagad nga nagapanawng ministro sa mga Saksi ni Jehova, nga inubanan sa akong asawa. Dili ko buot pabug-atan ang among mga tagbalay sa daghang lagda bahin sa pag-atiman sa pagkaon, mao nga kami naladlad sa mga suliran sa panghilis. Mahanduraw gayod ninyo unsa ka mapuslanon kaayo ang maong artikulo (Hunyo 22, 1989) alang kanamo! Buot gayod namong pasalamatan kamo tungod sa paghunahuna sa tanan nga maayo alang sa katawhan sa Diyos.

R. P., Venezuela

Baligya nga Kamatayon Ang tanang gisulat diha sa inyong artikulo (Hulyo 8, 1989) matulon-anon ug matuod. Ako nahibalo kay ako nagtabako sulod sa kapin sa pulo ka tuig. Ang resulta: kakapoy, pagsingot, ug daot nga buot kon ako walay tabako. Mihukom ako sa paghunong sa pagtabako, apan ang akong hukom milungtad lamag duha ka bulan. Pila ka panahon sa ulahi, misugod ako sa pagtuon uban sa mga Saksi ni Jehova ug nakatuon sa pagpadapat sa tambag sa Bibliya sa 2 Corinto 7:1, ug sa kataposan ako nakahunong. Sa duol na ako nagalaom nga mabawtismohan ingong usa ka Saksi.

A. P., Espanya