Gikan sa Among mga Magbabasa
Buhata-sa-Imong-Kaugalingon Ang inyong artikulo (Nobyembre 8, 1989) makapaikag kaayo, apan nahibalo ba mo nga ang tawong nagkatkat sa sumpay nga hagdan naggamit niadto sa sayop nga paagi? Kini peligroso kaayo.
G. R. H., Britanya
Salamat sa pag-awhag sa among pagtagad niini. Ang sumpay nga mga hagdan kinahanglang magbaton sa bahin sa sumpay nga pagawas—dili pasulod, sumala sa dili-hustong gipakita sa among letrato.—ED.
Nagaaway nga mga Ginikanan Gibasa ko ang artikulong “Mga Batan-on Nangutana . . . Unsay Angay Kong Buhaton Kon Mag-away ang Akong mga Ginikanan?” (Disyembre 8, 1989) Bisan pag ako dili na kaayo batan-on, makahinumdom pa ako nga ang akong mga ginikanan sigeng away. Ang tibuok pamilya magubot kon ang mga ginikanan mag-away. Apan karon ako nakaamgo nga imong padak-on ang kagubot kon kon ikaw may dapigan sama sa akong gihimo. Salamat kaayo sa artikulo.
G. H., Netherlands
Satanismo Makapahayag lamang akog dakong pasalamat sa artikulo bahin sa Satanismo. (Oktubre 22, 1989) Ang akong inahan naghatag ug maayong dagway sa gawas, ug daghang tawo naghunahuna nga siya maayo. Bisan pa niana, siya nahiuban sa usa ka grupo sa katawhan nga nagpraktis sa demonismo. Gipaagom ako sa seksuwal nga pag-abusar ug pag-abusar sa droga. Tapos sa katuigan sa pag-antos, misulay pa ako sa paghikog. Sa bisan unsang paagi, wala gayod ako mokuyog niya sa satanasnong mga buhat, ug sa ulahi ako nahimong usa sa mga Saksi ni Jehova. Kadto usa ka dakong sagpa sa akong inahan kay nakaamgo siya nga walay labaw nga gahom kay kang Jehova nga Diyos.
A. M., Tinipong Bansa
Relihiyosong Kasaysayan Kay bag-o pang nakatapos sa kataposang artikulo diha sa seryeng “Umaabot sa Relihiyon Tungod sa Iyang Kagahapon” (Disyembre 22, 1989), kinahanglang mosulat ako sa pag-ingon nga dako kaayo ang akong pagpasalamat sa serye. Pagkadaghan ang akong nasayran bahin sa Buddhismo, Hinduismo, Confucianismo, ug sa ubang relihiyon! Ang kaugmaran sa Kakristiyanohan hangtod karong adlawa makaiikag ilabina. Dili lamang nga akong makita sa tin-aw ang gidak-on sa pagkalangkit sa Kakristiyanohan diha sa mga gubat ug pag-ulag dugo apan ako makaila nga mas tin-aw sa pribilehiyo sa pagkaplag sa matuod nga relihiyon.
G. V., Pederal Republika sa Alemanya
Ang kataposang artikulo sa inyong serye maoy usa sa labing maanindot nga mga artikulo nga akong nabasa diha sa Pagmata! sa halos 40 anyos nga ako nagbasa niini. Ang artikulo prangka sa pagsulti bahin sa ‘bakakon, malimbongon, maluibon, ug mangil-ad nga mga paagi nga naghimo sa bakak nga relihiyon nga ngil-ad sa panan-aw sa Diyos ug sa tawo.’
M. M., Espanya
Napulo ka Paagi sa Paghunong sa Pagtabako Ako nagtabako sulod sa 40 anyos ug nakasulay sa paghunong pinaagi sa acupuncture, hypnosis, ug mga pildora sa tanang matang, mao nga ang inyong atubang-panid nga letrato sa usa ka kalaberang nagsigarilyo nakatandog pag-ayo nako. (Hulyo 8, 1989) Sa tabang sa pag-ampo, ako mohunong gayod sa pagtabako.
B. H., Tinipong Bansa
Ako hapit nang 15 anyos. Ang akong magtutudlo nangayo namo sa paghunahunag pulo ka katarongan sa dili pagtabako ug pagpatunghag napulo ka ideya kon unsaon paghunong. Ang mga artikulo sa Pagmata! mapuslanon kaayo nako sa pagkaaging ako lamang ang nakakita sa mga tubag sa tanan nga pangutana. Gipahalipayan ako sa magtutudlo ug gihatagan akog maayong grado.
S. C., Pransiya