Gikan sa Among mga Magbabasa

Pagkabungol Nakabasa ako sa inyong artikulo mahitungod sa pagkabungol diha sa “Pagpaniid sa Kalibotan.” (Octobre 22, 1989) Matuod nga ang pagpatokar ug kusog makadaot sa igdulungog. Wala ako mamati sa dihang gisultihan ako sa mga tawo sa pagpahinay sa akong pagpatokar ug musika. Karon gibayran ko ang wala pagpamati. Ako 19 anyos ug nagakabungol nga masakit kaayo.

K. G., Tinipong Bansa

Astrolohiya Ang inyong artikulo bahin sa astrolohiya (Nobyembre 22, 1989) nag-ingon nga ang Sidlakan ug Kasadpang astrolohiya nagbahin sa zodiac ngadto sa 12 ka rehiyon ug nagngalan sa matag bulan gikan sa usa ka hayop. Dili kini husto. Ang Kasadpang astrolohiya naghatag ug usa ka ilhanan sa zodiac matag bulan. Apan sa Sidlakan, ang mga ilhanan aplikado sa tibuok tuig.

C. B., Pransiya

Tinuod nga usa ka siklo sa 12 ka hayop (matag hayop naghawas ug usa ka tuig) kasagarang gigamit sa mga Intsik sa pagpaila sa tuig nga natawhan sa tawo. Busa popular nga kustombre alang sa mga Intsik sa pagtawag sa iyang kaugalingon nga iya sa ‘tuig sa baka’ o bisan unsang simbolo nga gigamit sa tuig nga siya natawo. Apan, sumala sa gipahayag sa among artikulo, kining mao gihapong 12 ka hayop gigamit usab sa pagpaila sa astrolohikal mga mga siklo sa 12 ka oras, adlaw, ug bulan.​—ED.

Reaksiyon sa Magbabasa sa Gula sa “Satanismo” Sa Pebrero 22, 1990, nga gula, usa ka magbabasa nakapahayag ug kakurat sa hapin sa magasin bahin sa Satanismo. (Oktubre 22, 1989) Sa bata pa ako, nalangkit ang akong mga ginikanan sa Satanismo sa labing grabe ug labing mapintas nga mga bahin niini. Kana nga panumdoman nalubong na, pinugngan diha kanako hangtod karong tuiga, ug karon na lamang nako kini nasabtan. Kadtong magasina nakatabang gayod kanako. Ug giapresyar ko ang hapin. Ang Pagmata! nagapamata gayod sa mga tawo! Samtang nagtanyag sa magasin diha sa among buluhaton sa pagsangyaw, among nakita nga walay mibalibad niadtong gulaa. Mahimong makapahimutang pa kami ug gatosan pa!

L. H., Tinipong Bansa

Mapasalamaton kaayo ako sa impormasyon nga inyong gipatik bahin sa Satanismo. Nalangkit kaayo ako sa Satanismo sa bata pa ako. Ang kalisang nga akong giatubang dili-mahubit. Apan makahupay ang pagkasayod nga dili kinahanglang ilimod ko ang akong naagian ingong biktima sa rituwal nga pag-abuso ug nga dili na ako makabaton sa pag-uyon sa Diyos. Wala tagoa sa artikulo ang kamatuoran. Ang mga kabataan ginasakit, gilugos, ug gipamatay. Ang mga tawo kinahanglang masayod nga kini atua didto!

P. M., Tinipong Bansa

Pubertad Salamat sa inyong artikulo “Mga Batan-on Nangutana . . . Unsay Nagakahitabo sa Akong Lawas?” (Enero 22, 1990) Ang akong inahan namatay sa dos anyos pa ako, ug sa dihang misugod ako sa pagregla, wala akoy kasuginlan bahin niini. Maulawon kaayo ang akong amahan, ug mapahitas-on ra kaayo ako sa pagpaminaw sa akong magulang nga igsoong babaye. Gulang-gulang na ako karon, apan kulang gihapon ug kahibalo. Ang inyong artikulo nagpatin-aw kanako nga labi pang maayo kay sa kadaghanang mga libro. Salamat kaninyo sa pagsabot sa among kahimtang.

D., Tinipong Bansa

Ugangan-Umagad Sukad nga ang akong bana ug ako nagminyo kapin sa napulo na ka tuig sa miagi, kanunay kami nga mag-away sa akong ugangan. Sumala sa gitagna ni Jesus, ang mga suliran modaghan tapos sa akong pagpahinungod kang Jehova nga duolan na sa lima ka tuig kanhi. (Mateo 10:35) Sa miaging bulan, misamot ang among panag-away hangtod sa punto nga magkasakit ako usahay. Apan dili mahubit sa mga pulong ang akong apresasyon sa mga artikulo bahin sa mga ugangan-umagad. (Pebrero 22, 1990) Dako kaayong pagsabot ang gihatag bahin sa mga pagbati sa ugangang babaye ug sa mga kahadlok nga sa ingon nagsugod na ako karon sa pagsabot kon nganong ang mga butang nasulti ug nabuhat sa nangagi. Uban sa akong dakong paningkamot, tingali kami mahimo rang managhigala sa umaabot.

J. P., Tinipong Bansa