Mga Batan-on Karon—Daling Mabiktima sa Satanismo?
“ANG pagsimba kang Satanas nahimong ordinaryo taliwala sa mga batan-on,” nagtaho ang Pinlandes nga mantalaan sa Pebrero 27, 1993. Sumala sa impormasyong nadawat sa kapolisan sa Tampere, Pinlandia, gidala sa mga kriminal nga nalangkit sa negosyo sa droga ang mga batan-on, ug ilabina ang mga batang babaye, sa satanikong pagsimba. Sa daghang kaso kini nga mga biktima ug bag-ong mga membro maoy mga bata gikan sa panuigong 10 ngadto sa 15 anyos. “Ang pagsimba kang Satanas nakakitag tabunok nga yuta taliwala sa mga tin-edyer karong adlawa,” mitaho ang mantalaan.
“Ang bag-ong uso sa pagsimba kang Satanas dili lamang usa ka uso (sa Pinlandia),” nagpasidaan ang mantalaan. “Pananglitan, ang magasing Star sa Johannesburg sa Habagatang Aprika sa dili pa dugay nagpasidaan nga ang pagsimba kang Satanas nangdani sa sapiang puti nga mga batan-on sa nasod.” Sa pagkatinuod, ang satanikong pagsimba maoy usa ka makahahadlok nga kahimtang alang sa mga ginikanan maingon usab sa kabataan sa daghang nasod.
Sa pagkamatuod, ang Satanismo malimbongong nagasaad nga daghan kag makuhang kaayohan nga diyutay lamang ang imong himoon. “Simbaha ang yawa; himoa ang daotan niyang mga buhat, ug ingong ganti, iyang ihatag kanimo ang imong gusto. Ug mao kanay hinungdan kon nganong madanihon kaayo sa ubang mga batan-on ang Satanismo,” nagbatbat ang magasing ’Teen.
“Nagtuo ako sa pagpahimulos sa bug-os sa imong kinabuhi,” miingon ang usa ka batan-on kinsa miangkon nga usa ka membro sa satanikong grupo. “Nakita ko ang duha ka puwersa sa kinaiyahan: ang maayo ug daotan. Ang tanang butang nga isulti sa mga tawo nga daotan mao ang mga butang nga makahatag kanimog kalipay. Ang sala motultol sa katagbawan sa emosyon, lawas ug hunahuna,” siya miingon.
Sa dihang ang usa ka sekreta sa Denver, Colorado, T.B.A., nga eksperto sa satanikong kulto, gipangutana kon nganong siya naghunahuna nga ang mga tin-edyer daw dali kaayong mabiktima sa Satanismo, siya mitubag: “Dili gayod ako makalimot sa giingon kanako sa usa ka tin-edyer nga Satanista. Siya miingon, ‘Unsa bay katarongan aron mabuhi? Mabuhi lamang kita alang niining adlawa ug atong buhaton ang buot nato. Walay kaugmaon.’”
Si Dr. Khalil Ahmad, direktor sa mga pag-alagad sa mga batan-on sa Nova Scotia Hospital sa Dartmouth, Canada, mipahayag sa iyang hunahuna labot sa pangdani sa Satanismo. “Ang mga tin-edyer nagapangitag kaukyab. Ang mga luyag-buot, nga sagad kulag-katakos, ang madani sa [satanismo]. Kini mopabati kanila nga daw sila adunay gahom.”
Gipadayag sa laing iladong awtoridad sa kapolisan labot sa Satanismo, nga usa ka sekreta sa San Francisco, ang problema: “Ang atong kalibotan maoy usa ka dapit nga walay-pagbati. Kita mas nabalaka sa atong kaugalingon kay sa usag usa. Kita nagkinabuhi sa mapintas, negatibong katilingban. Nakita sa mga batan-on kini ingong normal nga paagi sa pagkinabuhi ug busa nakabig sa Satanismo.”
Unsa ka grabe ang pagkalangkit sa mga batan-on karong adlawa sa Satanismo? “Gipamatay sa mga batan-on ang ilang kaugalingon ug ang ilang mga higala. Kita adunay problema,” nagpasidaan si Larry Jones, presidente sa Cult Crime Impact Network ug tenyente sa kuwerpo sa kapolisan sa Boise, Idaho, T.B.A. Usa pa ka polis, gikan sa estado sa Illinois, kinsa naniid ug maayo sa Satanismo diha sa iyang papel ingong magtatambag nga polis sa hayskul, miingon nga 90 porsiento sa mga batan-on nga nag-eksperimento sa pagsimba sa yawa nalangkit niini tungod kay kini ang uso, apan 10 porsiento “ang nabuyo pag-ayo sa Satanismo ug dugang ug dugang nalangkit.”
Sa usa ka peryodiko sa eskuylahan sa Brooklyn, New York, ang School News Nationwide, Enero-Pebrero-Marso 1994, sa lindog niini nga “Relihiyon,” may usa ka artikulo nga nag-ulohang “Kon Nganong ang Satanismo Nakadani sa mga Tin-edyer.” Kini mitaho: “Human nag-away ang duha ka bata diha sa kapeteriya sa hayskul, ang nakadaog milukso ug mihimog kalit katingad-ang saludo, usa ka nagkumo nga kamot nga nagsiwil ang iyang igtutudlo ug kumingking. Ang magtutudlo sa arte wala makasabot kon nganong daghan kaayong mga batan-on ang nagdibuhog mga hulagway sa mga lalaki nga samag-demonyo nga may mga ulo sa kanding. Ug ang mga libro bahin sa okulto nagakawala sa librarya sa eskuylahan.
“Ang kabataan, sa pagkatinuod, nakigduladula sa gahom, sa madyik, sa misteryo sa Satanismo. Alang sa kadaghanan, kadto makalingaw ug makapaukyab. Alang sa uban, kadto seryoso—seryoso gayod alang sa 17-anyos nga si Lloyd Gamble—nga nawad-an sa iyang kinabuhi diha sa satanikong halad.
“Sa pagkamatay ni Lloyd ug human nadakpan ang iyang 15-anyos nga igsoong lalaki tungod sa pagpatay, nasabtan sa mga edaran sa lungsod sa Monroe ang mga sinyas nga misteryoso kaayo sa miagi: ang sinyas sa kamot nga ‘timaan sa yawa,’ ang mga hulagway sa ulo sa kanding ug ang mga libro nga nagpakaon sa mga handurawan sa mga tin-edyer, ang mga rituwal ug mga lamat.”
Ang mga taho daw walay kataposan bahin sa pagpatay sa mga bata ug sa mga tin-edyer sa ilang mga ginikanan ug sa ubang mga membro sa ilang mga pamilya tungod sa pagsimba kang Satanas. Ang mga bata gipatay sa ubang mga bata tungod niining mga buhata. Sama sa satanikong mga hamtong, gitagodtagod ug gipatay sa mga bata ang mga mananap. Ang mga binuhi sa pamilya gihalad diha sa halaran sa satanikong mga rituwal. Walay igong luna dinhi aron hisgotan bisan gani ang tipik nga taho bahin sa pagpatay nga gihimo sa mga bata nga midawat sa relihiyon sa pagsimba sa Yawa.
Kini ba maoy mga pananglitan sa mga bata nga nag-eksperimento lamang sa Satanismo? Kadtong nalangkit pag-ayo sa pagsimba sa Yawa pipila ba lamang, diyutay kaayo? Dili, mao ang tubag niadtong nakaimbestigar niining mga nagasunod sa okulto. Si David Toma, kanhi sekreta batok sa bisyo nga nahimong tigpamaba sa pagdasig sa mga batan-on, miingon nga diha sa matag eskuylahan nga iyang gipakigpulongan, siya nagbangon ug samang pangutana, “Pila ba kaninyong mga batan-on nga adunay kaila ug may nadunggan nga nalangkit sa Satanikong mga buhat?” Iyang gibanabana nga “un-tersiya gayod sa mga estudyante ang miisa sa ilang mga kamot.”
Sumala kang Shane Westhoelter, presidente sa National Information Network, gikan 30 ngadto sa 40 porsiento sa mga estudyante sa hayskul ang nalangkit sa pipila ka matang sa okulto. Dugang pa, si Westhoelter miingon nga duolan sa 70 porsiento sa tanang krimen nga gihimo sa mga tin-edyer ubos sa panuigong 17 nahimo tungod sa pagkalangkit sa okulto.
[Blurb sa panid 5]
Ang pagsimba kang Satanas nakakitag tabunok nga yuta taliwala sa mga batan-on karong adlawa